ANO sylna dobyćerka, tamne strony w změnjenym rjedźe mjenje bóle słabe

Praha (ČŽ/K/SN). Wólby sejma su Čěskej republice něšto podobne kaž politiske zemjerženje wobradźili. Parlamentna krajina ma wot najnowšeho napohlad areala z jednej horu a wosom wjetšimi abo mjeńšimi kopcam. Hač na přemóžace dobyće strony ANO so žane druhe wěšćenja z woprašowanjow njejsu spjelnili, za to dochadźeše k dospołnje njewočakowanym wuslědkam. Tak je dotal w pincy drěmaca ODS na 2. městno „skočiła“, lěta njepřitomni Piraća su třeći a cyle młoda SPD štwórta. Donětka knježaca ČSSD „zleća“ na 6. městno, hišće za KSČM. Lěwica­ nachadźa so nadobo zhromadnje na historiskej nižinje. A tež něhdy wliwna TOP 09 móžeše so runje hišće do sejma sunyć.

Moskwa (ČŽ/K/SN). Překwapjaca powěsć z ruskeje stolicy: Popularna telewizijna moderatorka Ksenija Sobčakowa wozjewi, zo budźe za opoziciju w měrcu 2018 na prezidentstwo kandidować. 35lětna dźowka zemrěteho Pětrohródskeho měšćanosty Anatolija Sobčaka přizjewi swój wotpohlad w lisće žurnalej Wjedomosti. Ksenija Sobčakowa, tež ruska Paris Hilton mjenowana, je do rjada skandalow zaplećena. Mjeno zdoby sej jako moderatorka talkshowow. Je tež filmowała, modowe přehladki přewjedła a žurnalistisce za opozicionelne medije dźěłała. Jako hwězda Moskowskich salonow je po cyłej Ruskej znata. Hižo lěta angažuje so w protestnym hibanju přećiwo krjemlowskemu knjejstwu. Ruscy analytikarjo maja za to, zo móhła Sobčakowa być přihódna alternatiwa ke charismatiskemu Aleksejej Nawalnemu. Jemu wšak so po sćelaku Echo Moskwy njelubi, zo Sobčakowa do boja wo zastojnstwo hłowy stata zasahnje. Nawalny ma to za zesłabjenje opozicije a jeje rozdrjebjenje. Prezident Wladimir Putin zreagowa na powěsće ze słowami: „Rusku móhła tež žona wjesć. W Ruskej je wšitko móžno.“

Brüssel (ČŽ/K/SN). Po cyłej Europskej uniji zasłužeja žony na hodźinu mjenje hač mužojo. Přerěznje wučinja tónle rozdźěl 16,3 procenty. Najhórje wjedźe so Čechowkam a Estowkam, kiž maja 22,5 procentow na hodźinu mjenje hač jich muscy kolegojo. Najmjeńši je rozdźěl w Italskej, hdźež dóstanje žona jeno 5,5 procentow mjenje hač muž. Tole wuchadźa ze studije europskeho statitiskeho zarjada Eurostat, z kotrejež publikowachu čěske medije nadrobnosće.

Rozdźěle dadźa so zdźěla z „indiwidualnych charakteristikow“ wotwodźować, ke kotrymž słušeja nazhonitosć, niwow­ zdźěłanosće kaž tež fakt, zo sej mužojo často lěpje płaćene městna a profesije wuzwoleja. Rozdźěle zwisuja tuž z kulturnymi, prawniskimi, socialnymi a ekonomiskimi faktorami.

W managemenće wučinja rozdźěl w mzdźě 28 procentow. Manager zasłuža 31,96 eurow na hodźinu, managerka jenož 22,87 eurow. Najmjeńši je rozdźěl w špatnišo płaćenych sektorach, kaž na př. w zarjadnistwje, posłužbach abo we wikowanju. W nich zasłužeja žony jenož wosom procentow mjenje hač mužojo.

Čěski prezident Miloš Zeman so wo połkupje Krim wuprajił

Praha (ČŽ/K/SN). Čěski prezident Miloš Zeman je tydźenja něšto wótře wuprajił, štož někotři druzy jeho razu snano skradźu mysla, z erta pak božedla njepušća. Na zeńdźenju parlamentariskeje zhromadźizny Rady Europy měješe wón za přitomnych – a wězo nic jenož za nich – namjet, pod naležnosć połkupy Krim sćahnyć kónčnu smuhu, dokelž je to fait accompli, potajkim hotowy fakt. Za narunanje Krimy móhła Ruska Ukrainje pjenjezy płaćić abo někajki druhi teritorij wotstupić. Njesłyšany nahlad Zemana bu wšo druhe hač witany. Kijewska Ukraina so přisamom rozhori a surowje so do Zemana da. Medije kidachu na njeho hnój a błóto, titulujo jeho notoriskeho pička a błudneho slěpca. Ministerski prezident Wolodymyr Hrojsman atestowaše hłowje Čěskeje psychisku chorosć, a prezident Petro Porošenko wustaješe na samsnym městnje kaž Zeman Krim jako wobstatk Ukrainy. USA a Němska wobkrućichu – k změrowanju Ukrainy – zo je Ruska Krim anektowała.