Sadu „Woramy a wusywamy symjo na pódu, róst a kćěw pak maja njebjesa w rukomaj.“ je farar dr. Stefan Reichelt nazymu we wosadnym lisće pisał, dźakujo so Bohu za bohate žně. Blunjanski chronist a zdobom čłon wosadneje rady Jörg Redlich w lisće rozprawja, zo su fararja Reichelta 18. awgusta zapokazali: „Po třoch lětach wakancy je Blunjanski farski dom zaso wobydleny.“ Dr. Stefan Reichelt je zamołwity za něhdźe 2 000 křesćanow ewangelskeje wosady Bluń, kotrejž přisłušeja tež Bjezdowy (Klein Partwitz), Zabrod (Sabrodt), a Janska wosada Wojerowskeho stareho města.
„Wosebje wsy w Halštrowskej Holi charakterizuje serbskosć. Chcu sobu pomhać, tele korjenje zaso wožiwić“, wopisuje dr. Reichelt wiziju swojeho wosadneho dźěła. Jako farar widźi so wón sam předewšěm jako wozjewjer słowa Božeho, jako dušepastyr a koordinator. Zdobom wuwučuje konfirmandow. Intensiwnje chce z wosadnej radu w Halštrowskej Holi a we Wojerowskim starym měsće hromadźe dźěłać.
Krótko do hód zastupich prěni króć do wobchoda za toboły na Jerjowej 21 w Budyšinje. We woknje běch so mjenje a bóle připadnje tobołki z wobrazom serbskeho kwasa dohladała. A to mje zajimowaše. Serbski katolski kwasny por z małej skupinu přiwuznych, wšitcy w serbskej narodnej drasće, hladaše z woknom na staroměšćanski puć.
„Chcu něšto trajne tworić, ničo, štož je po jednej sezonje zabyte. Dźěłam tuž z přirodnymi materialijemi a kóžda toboła abo toša, kotruž poskiću, je unikat“, mějićelka wobchoda za kreatiwnu modu „Marlen“ Hella Schwager powěda. „Kóžda toboła něšto wo čłowjeku wupraji, kiž ju nosy. Móžeš sej po zaběrje z tematiku samo swět stawiznow, technikow šića a materiala wotkryć.“
Zetkanje z Hellu Schwager we wobchodźe nad schodami, kotrež wjedu k Michałskej cyrkwi, chowa w sebi pućowanje po nazhonjenjach a dožiwjenjach designerki za wudźěłki z kože. Swoju dźěłarnju-manufakturu ma wona w bliskich Błohašecach. Na kulojtych narodninach před lětami bě ju dźowka Marlen z wobchodom w Budyšinje překwapiła a jej tak přeće młodych lět zwoprawdźiła.
Što zwjazuje nabožnu Chróšćansku cyrkwinsku band ze skerje swětnymi serbskimi kapałami kaž SerBeat, Praskot abo Holaski? Sprěnja wězo, zo hudźa a spěwaja tam zhromadnje młode serbske talenty. To wosebite pak je, zo nadeńdźeš w kóždej z mjenowanych skupin znajmjeńša jednoho hudźbnika ze swójbnym mjenom Donat. Dokładnišo, su to Józef, Michał, Bosćan a Tadej, synojo znateho pišćelerja a kantora Symana Donata z Chrósćic. Mjeztym su wšak Donatec hólcy po Serbach jako wosebje wobdarjeni hudźbnicy znaći.
Talent jim do kolebki połoženy
A znowa je tak daloko! Kaž kóžde lěto su tež w Čěskej zaso w mnohich městach adwentne wiki přewjedli, hdźež po tradicionalnje wupyšenym naměsće wšelakore pječene a warjene chłóšćenki wonjeja.
Wšudźe wabja kołbaski na grilach, pražene mandle a horce wino. Kajka to zawjedliwa wóń a kajke to spytowanje! W čěskej stolicy Praze je spytowanje wo wjele wjetše, dokelž skići złote město nad Wołtawu samo wjacore adwentne wiki.
Srjedźišćo dohodowneje romantiki a předwjesela su wězo wiki na Staroměšćanskim naměsće. Praženjo pak maja je skerje za mjerwjenišćo wukrajnych turistow. Tam předawaja najwšelakoriši ćikot za zdźěla woprawdźe přehnatu płaćiznu. Njech je, kaž chce. Staroměšćanski paradiz adwenta dźě hosći ze swojej wulkotnej atmosferu před jónkrótnej historiskej kulisu wobkuzłuje.
Klětu nalěto změja w Pančicach-Kukowje dalšu wjesnu parlu, nowu klóštersku kofejownju swj. Michała. Hižo nětko su zamołwići w klóštrje Marijinej hwězdźe połni nadźije, zo domoródni a pućowacy z cyłeje Němskeje a z wukraja tónle blečk w starych wjelbach a tołstych klóšterskich murjach blisko klóšterskeje zahrody přiwozmu. Městna budźe tam za 35 ludźi a poskićeć chcedźa nimo najlěpšeho kofeja čerstwe a słódne pječwo z hakle njedawno znowawotewrjeneje, ponowjeneje a derje wuhotowaneje klóšterskeje pjekarnje. A při tym wjerći so wšo wokoło klóštra a jeho dźěłarnje swj. Michała za zbrašenych. Wšědnje wšak tuchwilu 128 žonow a muži z handicapom z horjanskich a delanskich wsow kaž tež z Kamjenca a wokoliny do Pančic-Kukowa na dźěło jězdźi.
Skupina Silbermond, hižo wjele lět po cyłej Němskej kaž tež wokolnym wukraju wuspěšna, z Budyšina pochadźaca band, je nowu tačel wudała. We wobłuku wobšěrneje turneje ju tuchwilu předstaja. Bosćan Nawka je so z bubnarjom cyłka Andreasom Nowakom rozmołwjał.
Knježe Nowako, kajki maće zaćišć po zazběhu turneje?
A. Nowak: Wothłós na prěnje koncerty je jara dobry, ludźo su nas wutrobnje witali. Tež rezonanca na našu nowu tačel „Schritte“ je nadměru pozitiwna. Wosobinsce směm rjec, zo sym wjesoły, kak derje dotal běži. Wšako do toho ženje njewěš, kak publikum reaguje, hdyž jim nowostku prěni raz předstajiš. Napjatosć a nerwoznosć do wustupow wězo tež po wjelelětnym jewišćowym nazhonjenju njezhubiš. Ćim rjeńšo, hdyž so nam šlachći wopytowarjow zapřijeć a zahorić.
Sće aktualnu tačel po starym wašnju live nahrawali. Čehodla sće so za to rozsudźili, a wuskutkuje so to na waše wustupy?
Minjene lěta je na kromje Radworskich Młynskich chěžow něšto nastało, štož w tej formje swojeho runjeća pyta – lěsny park, přirodne wočerstwjenišćo a zdobom kubłanišćo.
Lěsny areal we wobsydstwje Sachsec swójby běchu po lěće 1945 we wobłuku rólneje reformy zestatnili a statnemu lěsnistwu přirjadowali. Wotpowědnje zanjechany je lěs tež wupadał, wě so Ludwig Sachsa dopominać. Spočatk 70tych lět kładźechu nowy milinowód z Hamorskeje milinarnje. Dokelž njesmědźeše pod milinowodom tak derje kaž ničo rosć, su w tym zwisku něhdźe pjećinu wšeho lěsa zničili. Statne lěsnistwo je dźěl štomow prosće podrězać dało a bjez přemyslenja tež drohotne štomy wotstronić dało. Wuslědk bě chaotiski napohlad.
Połoženje so hakle změni, jako su 1992 prodrustwo w dotalnej reformje rozpušćili. Zamołwići so pola Sachsec swójby naprašowachu, hač nochcyli lěs „wróćo wzać“. Po dlěšim wahanju so wona do dźěła da. „Pjeć lět njejsmy ničo druhe činili, hač njerjad w lěsu rumowali“, so Ludwig Sachsa hišće dźensa hněwa.
Pohladnicy powědaja wo dawnych časach, swědča wo podawkach a ludźoch. Alfons Handrik wotkrywa nam swět, na kotryž smy w minjenych lětach nimale pozabyli.
Přirunuješ-li statok na pohladnicy z tym, kajkiž dźensa na samsnym městnje we Łazku wuhladaš, drje su hnydom časowe změny widźomne, a to nic jenož wonkownje. Tež nutřka je so twar na dobro tam bydlacych změnił. Jedne pak bu zachowane a zawěsće njebudźe změnjene: Na starym tykowanym domskim bě hižo znazdala na swislach mjez hornimaj woknomaj 1,60 metrow wulki swjaty křiž widźeć. Křiž drje njeje hižo w samsnej wulkosći a na samsnym městnje wostał, přiwšěm wón tež po nowotwarje mnohim, tež cuzym a njewěriwym, kotřiž so rady do Łazkowskeho niwoweho lěsa podawaja, pokazuje, zo tu wěriwi Serbja bydla.
Hižo cyłe lěto so Janoš na hody wjeseleše, nic darow a tež nic dobreje husaceje pječenje dla, ale dokelž bě jemu nan slubił, zo k hodam domoj přińdźe. Tón běše wojak we wukraju. Kóždy dźeń hladaše Janoš z woknom won na pólny pućik, hač tam nan njepřińdźe.
Dźeń do patoržicy steješe mać w kuchni a kutleše husycu. Wowka sedźeše při kachlach a plećeše nohajcy. „Hdy no by nam Jězusdźěćatko skónčnje nana domoj přiwjedło“, wona zdychny.
Patoržicu rano steješe Janoš w spanskim wobleku při woknje, ale nana na pućiku njewuhlada. ,Što jenož, hdyž so wón po tak dołhim času wjace domoj njenamaka?, Janoš při sebi mysleše, a strach jeho zaja. „Póńdu jeho pytać! Njemóže tola być, zo dypkownje k hodam doma njeje. Je mi to slubił.“
Spěšnje chwataše hólc do wochěže, zjědźe do škórničkow, wobleče so zymski kabat, staji sej čapku a hižo steješe na dworje. Hišće raz so wobhladny, hač tež mać a wowka jeho njelepitej.