Minimusical šulerjam předstajili
Šulerjo Serbskeje wyšeje šule Budyšin su swój minimusical, kotryž předstajichu loni we wobłuku Mjezynarodneho folklorneho festiwala „Łužica“ w Chrósćicach, nětko hišće raz na jewišćo přinjesli, a to před swójskim publikumom w awli Budyskeho Serbskeho šulskeho a zetkawanskeho centruma. Nětko pak je sceny wo nałožkach w běhu lěta tehdyša narunanska wobsadka pokazała, kotruž bychu w Chrósćicach zasadźili, by-li něchtó z hłownych hrajerjow wupadnył. tekst a foće: Jan Hrjehor
Ally Pally w młodźinskim klubje
P o tym zo bě přichodny swětowy mišter w darće jasny, staji so prašenje, štó je najlěpši Serb, kiž zamóže z kłokami najlěpje na korkowu tačel mjetać. 19. januara wotmě so zaso „darts masters“ we Wotrowskim młodźinskim klubje. Mjeztym štwórty raz přeprosy tamniša młodźina znowa 32 hrajerjow, kotřiž wojowachu hač do nocy wo 88 centimetrow wysoki pućowanski pokal. Hrali su w modusu wosom skupin, kóždy přećiwo kóždemu z „best of 3 legs 501 double out“. Stajnje prěnjej stafle kwalifikowaštaj so za wosmifinale. W prěnim napjatym połfinalu měješe Pětr Wobst hoberski nadawk před sobu, dokelž hraješe přećiwo faworitej Oliverej Schmidtej, kiž bě sej hižo dwójce pokal kaž tež loni druhe městno wubědźił. Wobst njeměješe žane zbožo, a tak skónči so hra jasnje 3:0 za Schmidta. W druhim napjatym połfinalu steještaj sej Jakub Wjacławk a Tomaš Wićaz napřećo, a te doby lokalny matador Wjacławk 3:0. Finale wobsteješe z „first to 5 legs 501 double out“, to rěka, zo dyrbi dobyćer 5 legow za sebje rozsudźić. Dypkownje wo połnocy bě finalny duel nimo, a dobyćer rěkaše Jakub Wjacławk, kiž přewiny Schmidta po napjatej hrě z 5:3. Hru wo 3.
Motorske wiki wabili
Wot 17. do 19. januara wotměchu so w Drježdźanach wiki, hdźež njepředstajichu jenož motorske, ale tež z milinu ćěrjene kolesa. Tak prezentowachu tam najnowše modele, wot Hondy přez Harley a Yamaha k dalšim. Tež tak mjenowane nowe modele kwadow běchu pódla. Něhdyši jězdźer motocrossa MC Jawory Daniel Kral je tam zajimcow poradźował. Mjez tysacami wopytowarjow bě wšitke tři dny tež tójšto Serbow. tekst a foto: Michał Law
Po Jizerskich horinach sněhakowali
Mjeztym 17. raz běchu šulerki a šulerjo SWŠ Ralbicy zhromadnje ze sportowym wučerjom Pětrom Bejmakom a dalšimi dorosćenymi w sněhakowarskim lěhwje w Bedřichovje. Woni wukmanichu so na běžkach kaž tež w alpinskim sněhakowanju a dožiwichu tam rjany tydźeń z pućowanjemi po zasněženym lěsu, bowling- wječorom a wočerstwjenjom w Liberecskim Babylonje.
Tule měnjenja třoch wobdźělnikow.
Linda Isegrajec: Mi je so sněhakowarske lěhwo jara lubiło. Bě drje napinace, ale bě rjenje něšto zhromadneho dožiwić. Cyły dźeń sněh widźeć bě hižo wosebitosć. Wšako doma podarmo na njón čakamy.
Leticija Frenclec: Wjedro běše wulkotne a sněh dosahaše za běžki a sněhakowanje. W lěhwje sym skónčnje nawuknyła so wěsće na běžkach pohibować. W sněhakowanju mějach hižo nazhonjenja, ale móžach swoje kmanosće w Bedřichovje přiwšěm hišće skrućić.
Mějachmy wjele wjesela zhromadnje jako rjadownja – rady so na to dopominam.
Snehakowarske lehwo w Kyrkonošach
^
Kóžde lěto jědźe sportowy wučer
Jan Hrjehor ze swojimi šulerjemi do sněhakowarskeho lěhwa w Janskich
Láznjach. Tónkróć přebywaše tam ze šuler-
kami a šulerjemi Serbskeju wyšeju šulow
Budyšin a Worklecy. Kak rjenje tam bě, wučitaće ze sćěhowacych měnjenjow.
Dźiwadłowu hru předstajili
Slepo
Foto: Jost SchmidtchenŽurla Slepjanskeho Serbskeho kulturneho centruma bě na programje ptačeho kwasa hač na poslednje městno wobsadźena. Lětsa běchu hortowe dźěći dnjoweho přebywanišća „Pfiffikus“ na rjedźe a pokazachu publikumej dźiwadłowu hru „Zbožowny mały ptačk“, při čimž so dźěći wo to postarachu, zo maja ptački stajnje dosć picy. 1. lětnik pak předstaji serbski nałožk. Cyłkownje 54 dźěći je na dwěmaj předstajenjomaj zabawneho ptačokwasneho programa sobu skutkowało. Nawodnica kubłanišća Aline Wendel dźakowaše so staršim kaž tež kubłarkam za podpěru. Jost Schmidtchen
Wobrazy samo w jendźelskej nowinje wozjewili
Worklecy
Foto: Tomaš ŠołtaWe Worklecach je braška Milan w mjenje njewjesty Heleny a nawoženje Emila staršich, dźědow a wowki na ptačokwasnu hosćinu do sportownje přeprosył, a wjac hač 160 ludźi je přeprošenje sćěhowało. Předšulske dźěći pokazachu hłowny program, při čimž jich tamni chowancy kubłanišća pilnje podpěrachu. Jedna z maćerjow, knjeni Bětnarjowa, bě z dźěćimi samo rejku nazwučowała. Štyri kubłarki su so lětsa prěni raz katolsku swjedźensku drastu woblekli a tak kwasny wobraz wobohaćili. Cyłkownje trójce dźěći swój program pokazachu. Po tym zo zawjeselichu dopołdnja pjerachow w žłobiku, podachu so do Smječkečanskeho Domu swj. Jana. Popołdnju mějachu swój wulki wustup w sportowej hali. Překwapjeni wšitcy běchu, jako wuhladachu wobrazy Worklečanskeho ptačeho kwasa w jendźelskej nowinje Guardian, kotraž je wo serbskim nałožku rozprawjała. Bianka Šeferowa
Pančicy
Kwasny ćah po wsy
Malešecy
Foto: Jurij Helgest„W jesele dźensa“ spěwajo ćehnjechu dźěći Malešanskeje pěstowarnje „K wódnemu mužej“ njedźelu po ptačim kwasu najprjedy po wsy. Cyle hordźe běchu wone na ewangelsku drastu Budyskeho kraja, někotre holčki pak běchu tež katolsku drastu zhotowane. Na kopatej połnej žurli hosćenca „Wódny muž“ poskićichu mali kwasarjo spodobny, wot nawodnicy Borbory Kraloweje a jeje teama z wulkej prócu nastudowany serbsko-němski program. Braška Arne, njewjesta Mia a nawoženja Florian kaž tež dalši kwasarjo ze staršich skupin pěstowarnje, kotraž je w nošerstwje Serbskeho šulskeho towarstwa, mějachu tu swoje róle. Woni je wjesele a zmužiće, druhdy tež trochu strachoćiwje předstajichu. Spěwčk „Pip, pip, pip přez woknješko ...“ běše nimo „Lipoweho rocka“ jich najlubši hit. Po tym měješe kwasna hosćina ekstra fotowy termin. Najzajimawše a zdobom jónkrótne drje su wobrazy z najmjeńšimi holčkami, kak wone w swojich šikwanych běłych cankatych hawbičkach kedźbliwje na spěwy, dialogi a piskanje wjetšich dźěći słuchaja. Chrysta Meškankowa
Tež serbske štučki spěwali
Ćisk
Foto: Johann TescheW Ćišćanskej pěstowarni „Lutki“ tohorunja nałožk ptačeho kwasa haja. Nawoženja Moritz a njewjesta Zoey su staršich, dźěći, wowki a wjesnych radźićelow zaso na swjedźeń přeprosyłoj. Kubłarka Anne Brosig bě z dźěćimi spěw „Dźens hawron chce so woženić“ w serbskej a němskej rěči nazwučowała. Wjesny radźićel Jens Zahrodnik dźakowaše so brašce Janošej a jeho kwasnej hosćinje za rjany program ze słódnym pječwom. Johann Tesche
