Němska koparska wubranka hižo zaso doma

srjeda, 30. junija 2021 spisane wot:

London (kh/SN). Němska koparska wubranka muži je we wosmifinalu europ­skich mišterstwow (EM) zwrěšćiła. Chowancy zwjazkoweho trenarja Joachima Löwa podležachu před 41 973 přihladowarjemi w Londonskim Wembleyjowym stadionje Jendźelskej z 0:2. Tale hra běše zdobom tež poslednja Löwa. Za njeho skónči so tak po nimale 15 lětach a 198 hrach čas pola Němskeho koparskeho zwjazka. Po EM přewozmje Hansi Flick narodne mustwo.

Raheem Sterling w 75. min. a Harry Kane w 86. min. staj za Jendźelsku wrota třěliłoj – a to přećiwo chětro dušnemu němskemu cyłkej. Thomasej Müllerej njeporadźi so w 81. min. najwjetša šansa wurunać, po tym zo bě nimale sam na přećiwniske wrota běžał. Powšitkownje běše němski škit jara solidny, ale nadběh přenjeskutkowny. Solidny wustup pak je na kóncu jenož dobry, hdyž tež raz sam nawjeduješ.

Po dołhej přestawce suwerenje dobyli

srjeda, 30. junija 2021 spisane wot:

SJ Chrósćicy – ST Porchow 7:0 (2:0)

Za domjacych zasadźeni: Hejduška – Králíček, Zynda, Runt, Mark, Matješk, Wornar, Handrik, Zahrodnik, Bogusz, J. Donat, B. Donat, Paška, Krawc

Při wulkotnym wjedrje witachu ko­parjo Chróšćanskeje Sportoweje jednotki mustwo z bliskeho Porchowa na prěni test po dołhej přestawce na hrajnišćo pod Šibjeńcu.

Hrajne klasy postajene

srjeda, 30. junija 2021 spisane wot:

Prezidij Sewjerowuchodneho kopar­skeho zwjazka NOFV je na posedźenju 25. junija za hrajnu dobu 2021/2022 sćěhowacym mustwam dowolnosć za wob­dźělenje we wyšej lize-juh dał:

Wyša liga – stafla juh

Biskopičanske KT (zestupnik z regionalneje ligi Sewjerowuchod)

VfL 96 Halle

FC Čerwjeno-běli Erfurt

VfB 1921 Kśišow

FC Hornja Łužica Neugersdorf

FC Grimma

SG Union Sandersdorf

VFC Plauen

FC Einheit Rudolstadt

FC An der Fahner Höhe

1. FC Merseburg

FC International Lipsk

ST Módro-běli Zorbau

FSV Martinroda

FC Carl Zeiss Jena II

FSV Wacker 90 Nordhausen

(postupnik Sakska)

SV 09 Arnstadt (postupnik Durinska)

FC Einheit Wernigerode (postupnik Saksko-Anhaltska) Jurij Bjeńš

Njezbožowne samowrota

wutora, 29. junija 2021 spisane wot:

Dalša překwapjenka we wosmifinalu, swětowy mišter z turněra zlećał

Kopenhagen (kh/SN). Tež třeći dźeń wosmifinalnych hrow na europskich mišterstwach (EM) kopańcy podlěši so spektakularna serija samowrotow. Wčera běše Španičan Pedri njezbožowny winik­. Najebać to so jeho wubranka po podlěšenju z 5:3 přesadźi.

Z lětadłom poda so loni 20. měrca olympiski woheń za tehdy planowanu olym­piadu wot 24. julija do 9. awgusta 2020 do japanskeje stolicy Tokija. Lětadło při­zemi w prowincy Miyagi, hdźež čakachu přeprošeni hosćo na woheń. Korona­pandemije dla pak njeje Mjezynarodny olympiski komitej (IOC) wulki swjedźeń dale přihotował. Wšitke nadźije w tej naležnosći, zo by so snadź tola poradźiło olympiadu w poprawnym lěće 2020 přewjesć, dyrbjachu pohrjebać.

Prezident IOC Thomas Bach pak běše hišće jara opti­mistiski, zo to wěsće hišće budźe, jako­ mjez druhim rjekny: „... smy hišće štyri a poł měsaca wot hrow zda­leni.“ Tak poda so loni 26. měrca smól­nica – olympiski woheń – na swój prěni puć do pre­fektury Fukushima, w kotrejž bě w měrcu 2011 tsunami zachadźał a ato­mowu katastrofu zawinił, štož je sej wjace hač 18 000 smjertnych woporow žadało. Dopominanje na tele njezbožo steješe w srjedźišću!

We wobłuku wčerawšeho wusyłanja młodźinskeje žołmy Radijo Satkula su w Hórkach přećelski koparski duel mjez mustwomaj „Satkula Allstars“ a „ATS Łužica“ přewjedli. Po 1:1 w regularnym hrajnym času, kotryž traješe dwójce 35 mjeńšin, přesadźi so młodźinska redakcija w třělenju jědnatkow ze 4:3. Foto: Darius Budar

Delanscy hrajerjo Sokoła Ralbicy/Hórki trenuja hižo wot 28. meje, zo bychu so myški a paski po sydom měsacow trajacej přestawce zaso na kopańcu nawučili. Spočatnje přewjedźechu pjatkowny trening z ćežišćom, telko kaž móžno hrać. Nětko tež zaso wutoru po zwučenym wašnju zwučuja.

Prěni hrajny dźeń we wokrjesnej wyšej lize budźe 14./15. awgusta. To rěka, zo so chowancy trenarja Chrystofa Gloxyna wot 2. julija intensiwnje na nowu sezonu hotuja, zo změja spočatk sezony 2021/2022 dosć kondicije. Nimo toho planuja wšelake přećelske hry. K tomu su hłownje mustwa z blišeje wokoliny narěčeli.

Planowane testowe hry prěnjeho mustwa Sokoła Ralbicy/Hórki:

09.07. Módro-běli Kulow II –

 Sokoł Ralbicy/Hórki

11.07. Sokoł Ralbicy/Hórki – ST Ćisk

17.07. Sokoł Ralbicy/Hórki –

 Zeleno-běli Bukecy

25.07. Serbski supercup w Njebjelčicach

31.07. SJ Chrósćicy –

 Sokoł Ralbicy/Hórki

08.08. SJ Njebjelčicy –

 Sokoł Ralbicy/Hórki

Koparjo Sokoła nadźijeja so přihoto­wanskeje fazy­ bjez zranjenjow a dobreho starta do no­weje sezony, kotruž móža potom nadźijomnje hač do kónca wužiwać. Maik Brězan

To so dźěćace woči błyšćachu

wutora, 29. junija 2021 spisane wot:
Štyri wot dźesać sportowych wačokow dóstachu Oskar Stallasch z BC Otten­dorfa-Okrille, Mira Jäckel z Mjetarskeho sportoweho towarstwa 1923, Finja Richter z Rejowanskeho sportoweho towarstwa Zemicy a Maximilian Ehnert z PSC Budyšina, a to w ramiku wulosowanja Wokrjesneho sportoweho zwjazka Budyšin z.t. Pozadk wulosowanja bě dźěćaca brošurka „Sportej zdar“ třěšneho sportoweho zwjazka wokrjesa Budyšin. Brošurku su přichodnym wuknjacym zakładnych šulow w zwisku z přepytowanjom Budyskeho strowotniskeho zarjada před zachodom do šule wudźělili. Něhdźe 3 000 dźěći wokrjesa kotrež póńdu spočatk septembra do šule, je nětko wo sportowych poskitkach wokrjesa informowane. Přichodne wudaće z kwisom wuńdźe we wo­błuku přichodneho přepytowanja šulskich nowačkow lěta 2022. SN

Čěska wubranka sensaciju docpěła

póndźela, 28. junija 2021 spisane wot:

Prěnje štyri cyłki hižo w štwórćfinalu, dźensa sćěhujetej dalšej – Němska hraje jutře w Londonje

Budapest/Sevilla (kh/SN). Čěska narodna wu­bran­ka steji po triumfje 2:0 pře­ćiwo Nižozemskej prěni raz po lěće­ 2012 zaso raz w štwórćfinalu europskich koparskich mišterstwow (EM). Za team Oranje pak su EM zakónčene.

Underdog z Čěskeje je faworizowane hollandske mustwo w Budapesće we wos­mifinalu přewinył. Za chowancow trenarja Jaroslava Šilhavý docpěštaj wrota­ Tomáš Holeš wot Slavije Prahi a Patrik Schick wot Bayera Leverkusen. Za hrajerja zwjazkoweje koparskeje ligi Schicka běchu to štwórte wrota w štwórtej hrě. Čěska nastupi tuž přichodnu sobo­tu w azerbaj­dźanskim Bakuwje přećiwo Danskej wo zaćah do połfinala.

Awtorka dźensa Tereza Wićazowa

Štwórtk, 1. julija, pře­wozmje bywši sławny wrotar-kopar Oliver Kahn nawod předsydstwa FC Bayerna Mnichow. Hač do kónca junija nawjeduje je hišće Karl-Heinz Rummenigge. Staju tuž woprawnjene prašenje: Móže něhdyši profijowy wrotar poziciju managera přewzać? Poprawom je zwisk cyle jasny, dokelž wobsteji wulka podobnosć mjez kmanosćemi, kotrež tež w sportowym wjednistwje trjebaš.

Njedawno čitach zajimawy interview z Renéjom Adlerom, w kotrymž rysuje wón paralele mjez wrotarjom a nawodu sportoweho towarstwa. W słowje „manager“ tči hižo jedyn z wjacorych nadawkow wrotarja: Jako wrotar managuješ resp. orga­nizuješ před sobu mustwo – a to po móžnosći z jasnej, druhdy raznej komu­nikaciju. Tež w sportowym předewzaću je to tak: Tam maš sej prašenje stajić: Kak nastaju mustwo, hdyž konkurent nad­běhuje? Abo runje nawopak? Komu dam zamołwitosć, hdyž mam sam dosć wokoło wuši? W natwarje hry maš bul w ruce. Zawjedźeš hru kaž w sportowym přede­wzaću na přikład nowe projekty.

nawěšk