Kup nětko, płać pozdźišo
W interneće sej něšto kupić je mjeztym něšto cyle wšědne. Štož bě před 20 lětami hišće katalog z drastami abo tworami, je dźensa online-shop. Štož rěkaše tehdy hišće nakup na zličbowanku, mjenuje so dźensa na přikład „Kup nětko, płać pozdźišo“.
Karantena je za inficěrowanych dale trěbna
Po wšěm zdaću so dźeń a mjenje ludźi z koronawirusom inficěruje. A tola je tež w Budyskim wokrjesu natyknjenych a schorjenych. Milenka Rječcyna je so w krajnoradnym zarjedźe pola Sary Günther naprašowała.
Kelko testowych centrow w Budyskim wokrjesu tuchwilu mamy?
S. Günther: Na internetnej stronje https://www.landkreis-bautzen.de/corona-testcenter-21556.php su wšitke testowe centrumy zapisane. Zwjazana njeje z tym dospołnosć a tež nic aktualny staw.
W kotrej měrje je wobydlerjo wužiwaja?
S. Günther: Wot póndźele do pjatka su tam skutkowacy zašłe tydźenje wšědnje přerěznje 1 100 testow přewjedli, kónc tydźenja přerěznje 900.
Móžeće rjec, kelko wobydlerjow Budyskeho wokrjesa je přećiwo koronje šćěpjene?
S. Günther: Tele informacije nam njepředleža, wšako płaći stajnje městnosć šćěpjenja a nic te, hdźež čłowjek bydli.
Tež přećiwo koronje šćěpjeni ludźo na nju schorja. Hdźe ma to swoje zakłady?
Projekty inkluzije zapodać
Trěbny je mjezsobny respekt mjez ludźimi
Serbski prawiznik Hajko Kozel pomha ludźom pod hesłom „Pomoc k samopomocy“ we Łužicy kaž tež w Čěskej a Pólskej
Poradźowanje ludźi w socialnych prašenjach ma wobstajnje konjunkturu. Hajko Kozel mjeztym dlěje hač 25 lět na tymle polu čestnohamtsce skutkuje. Milenka Rječcyna je so ze serbskim prawiznikom, historikarjom a politikarjom rozmołwjała.
Kak sće přišoł na ideju ludźi w socialnych prašenjach poradźować?
H. Kozel: Rěčne hodźiny sym jako zapósłanc Sakskeho krajneho sejma wot wšeho spočatka swojeho skutkowanja poskićił, to rěka wot lěta 1999. Konkretnišo wusměrić so na socialne poradźowanje, tu ideju mějach w zwisku z tak mjenowanymi Hartz IV reformami. Sym swój čas iniciěrował w Budyskim wokrjesu politisku akciju „zběžk přećiwo socialnemu rubježnistwu“. Smy samo demonstraciju organizowali, na kotrejž je so na wšě tysac ludźi wobdźěliło. Powšitkowne kampanje wjesć bě a je wažne, zo by so w towaršnosći něšto změniło. Runje tak hódne pak je konkretnje pomhać. Hdyž wěš, wo čo so ludźo starosća, móžeš ćim jasnišo a wuspěšnišo politisce argumentować.
Nowu dźěłarnju hospica wopytali
Wosebity kwěćel
Chcedźa nowe bydlenja z hladanjom twarić
Budyšin (UM/SN). Při tak mjenowanym Green Parku na Budyskej Flincowej blisko Serbskeho gymnazija zahaja bórze wobšěrne twarske dźěła. Kaž Andreas Spitzke z Lipšćanskeje serwisoweje towaršnosće Amalie wobkrući, ma tam 60 bydlenjow z wobstajnym hladanjom a dnjowe hladanišćo nastać. W tymle měsacu chcedźa fasadu ponowić kaž tež tepjenje, přewětrjenje a sanitarne připrawy zatwarić započeć. „Zaměr je, zo wobydlerjo wot apryla 2023 zaćahnu“, praji Andreas Spitzke. Byrnjež připrawu na zakładźe wobstejacych twarjenjow natwarja, ma bydlenski kompleks kaž „nowy natwarjeny“ wupadać. Twar dodźerži předpisy za dom z mało energiju. „Za zemsku ćopłotu smy dohromady 3 000 metrow dźěrow do zemje točili. Na dwěmaj domomaj natwarimy solarnu připrawu, tak zo budźemy wot miliny a ćopłoty njewotwisni, Spitzke připowědźa.
Serwisowa towaršnosć Amalie wjedźe hižo wjacore domy z wobstajnym hladanjom wokoło Lipska, mjez druhim w Lipsku, Eilenburgu, Halle a Leuna. Nětko chcedźa so sylnišo na kónčiny zwonka wulkich městow koncentrować.
Sym šćěpjena
Z pomocy spokojenje začuwała
W kruhu swójby, susodow a wjele přećelow swjeći dźensa w Pančicach-Kukowje znata serbska zubna lěkarka Leńka Andersowa swoje 70. narodniny. W swojim powołanju je druhim runje tak pomhała, kaž činješe a čini to zwonka zubnolěkarskeje praksy.
Narodźiła je so jubilarka jako druhe wot šěsć dźěći Lebzec swójby w Koslowje. Šulski čas wjedźeše ju prěnje štyri lěta do Dobrošic, dalše štyri lěta do Róžanta. W Małym Wjelkowje wopyta Serbsku rozšěrjenu wyšu šulu. Na tónle čas dopomina so wosebje rady, na žiwjenje w internaće. Spočatnje chcyše Leńka ratarstwo studować. Wot toho pak jej jeje nan raznje wotradźowaše, wšako měješe sam hrózbne nazhonjenja z kolektiwizaciju w NDR. Tuž jej jeje wuj Jurij Kubica, tehdy zubny lěkar w Budyšinje, šćežku za zubnu medicinu runaše, za čož je jemu Pančičanka hišće dźensa dźakowna. Studowała je wona potom w Berlinje a Drježdźanach, hdźež je so rady na čiłym studentskim žiwjenju wobdźěliła.
