Iniciatorojo Łužiskeho monitora spřistupnjeja Serbowkam a Serbam katalog prašenjow, zo bychu jako mjeńšina wobydlerstwa swój wid na aktualne łužiske wobstejnosće zapodali a naprašnik wupjelnili. Sćěhowacy link płaći jenož wobmjezowanje hač do njedźele, 20. februara:
Lipsk/Budyšin (SN/at). We wobłuku naprašowanja za Łužiski monitor 2022 je prěni raz móžno, wuprajenja z perspektiwy Serbow wosebje wuhódnoćić. To je zwoprawdźene přilubjenje sobuiniciatora projekta dr. Jörga Heidiga w interviewje z našim wječornikom loni w meji.
Serbja a jim přichileni docpěja naprašowanje pod linkom . Za wotmołwy njech sej něhdźe 20 mjeńšin chwile bjeru. Woknješko w browseru njeměło so za čas wobdźěłanja kataloga prašenjow začinić, hewak su wšitke dotalne zapodaća zhubjene. Link je hač do 20. februara přistupny.
We Łužiskim monitorje 2021 bě mjez tysac naprašowanymi wosobami jeno 34, kotřiž buchu skupinje Serbow přirjadowane. Trěbne by pak znajmjeńša 50 było, zo smědźa tele měnjenja hódnoćić.
Tohodla staj so iniciatoraj dr. Jörg Heidig z Kwětanečanskeje towaršnosće Prozesspsychologen a Steffen Bischoff z Lipšćanskeho MAS Partners rozsudźiłoj, nimo předwidźanych tysac interviewow po statistiskim kluču paralelnje direktne naprašowanje Serbow zmóžnić, zo byštaj jich wid na Łužicu zwěsćiłoj.
Wojerecy/Budyšin (SN/MiR). We Wojerowskim klinikumje Łužiska jězorina dotal nješćěpjenym sobudźěłaćerjam dale njesprócniwje móžnosć poskićeja so šćěpić dać. Aktualnje maja w klinikach předewzaća Sana tzwr kampanju, z kotrejž namołwjeja ludźom, kotřiž su hižo dwójce šćěpjeni, so třeći raz šćěpić dać. Chcedźa wosebje nješćěpjenym přistajenym šćěpjenje intensiwnje dale rozjasnić a tak mnohe koleginy a kolegow docpěć. „Ručež budźe tak mjenowane mortwe šćěpiwo Novavax na wikach, chcemy tež te poskićić“, zdźěli rěčnik Wojerowskeho klinikuma Gernot Schweitzer, „a ličimy z tym – hromadźe z mjenowanymi aktiwitami – zo změjemy hač do 15. měrca dobru kwotu šćěpjenja. Přiwšěm we Wojerowskim klinikumje nješćěpjenych njewumjezuja. Wo swoje dźěłowe městno so nichtó starosćić njetrjeba. Nawodnistwo kliniki je zašły tydźeń zwurazniło, zo nikoho njepušća, dokelž šćěpjeny njeje. Něhdźe 80 procentow sobudźěłaćerjow kliniki je mjeztym šćěpjenych.
Budyšin (SN/MiR). Budyska dźěłowa agentura nastaja so na sylniše naprašowanje sobudźěłaćerjow w powołanjach medicinskeho a hladanskeho wobłuka. Přiwšěm njemóža dotal na aktualne statistiske ličby zhladować, korjenjace na njedawny wukaz Zwjazka wo šćěpjenju přistajenych w chorownjach, hladarnjach a podobnych zarjadnišćach. Přičina, zo agentura ličby hišće nima, je doba mjez wozjewjenjom postajenja wo dopokazu imunity na zarjadnišća poćahowana a na dźeń ličenja po statistice za aktualne daty z dźěłowych wikow. 10. decembra 2021 bě Zwjazk postajenje wozjewił, daty z dźěłowych wikow su 13. decembra zběrali. Mjeztym běše jenički dźěłowy dźeń. „Tuž je hišće přezahe pohódnoćić wuskutki wjetšeje ličby dźěłopytacych we wobłuku strowotniskich a hladanskich powołanjow“, rozłožuje rěčnica dźěłoweje agentury Corina Franke.
Šćěpjenje přećiwo koronawirusej steji dale w diskusiji. Milenka Rječcyna je so z Kulowskej fachowej lěkarku za nutřkownu medicinu dr. Sabinu Müller rozmołwjała.
Štó přińdźe k Wam, zo by so šćěpić dał?
S. Müller: W mojej praksy za nutřkownu a powšitkownu a medicinu šćěpimy zajimcow wšěch starobnych skupin wot 14 lět. Młódšim zajimcam poručamy šćěpjenje pola dźěćaceho lěkarja. Wšako jich tam specifisce poradźuja.
Tuchwilu přińdu mnozy hižo po třeće boosterowe šćěpjenje přećiwo koronje. Je tomu tež we Wašej praksy tak?
S. Müller: Haj, tež tu tuchwilu přewažnje zajimcow třeći króć šćěpimy. Wjetšina z nich su ludźo, kotřiž tež hewak jako naši pacienća sem přichadźeja. Hłownje je to starša generacija. Powšitkownje pak wobkedźbuju dale wulki zjaw, zo mnozy šćěpjenje přećiwo koronje dale wotpokazuja.
Hdźe widźiće za to přičiny?
Zwjazk kasowych lěkarjow w Sakskej (KV) je kónc minjeneho lěta wospjet na to pokazał, zo šćěpjenske srědki za Saksku njedosahaja. Předewšěm domjacy lěkarjo mějachu ćeže, zwólniwym šćěpjenje zaručić. Dyrbjachu swojich pacientow, kotrychž běchu na šćěpjenje skazali, časćišo zaso domoj pósłać a termin přesunyć.
Na Wojerowskim staroměšćanskim torhošću ma relief města nastać, po kotrymž móžeš z rukomaj tasać. Iniciator je Lionsowy klub, a tón nětko za swój projekt pjenjezy zběra.
Wojerecy (SiR/SN). Štož druhe města maja, dyrbjało so tola tež we Wojerecach zwoprawdźić hodźeć. Měnjeny je model města nad Čornym Halštrowom, kotryž ma předewšěm slepym a špatnje widźacym zaćišć wo měsće dać. Štóž je tajki model hižo raz widźał abo tasał, wě, zo je tajka atrakcija tež za ludźi bjez handikapa jara zajimawa a přiwabliwa.
Wot lěta 2019 so Wojerowski Lionsowy klub z mysličku tajkeho projekta nosy. Mjeztym je to jedne z najwjetšich předewzaćow kluba w jeho 25lětnych stawiznach, praji předsyda Steffen Markgraf. Tak dyrbjachu najprjedy raz wuměłca namakać, kiž tajki relief zhotowi. Z Egbertom Broerkenom ze sewjerorynsko-westfalskeho města Welver drje su jednoho namakali. Wón pak trjeba cyłe lěto za to, štož je za tajki projekt cyle normalne. Nimo toho w jeho firmje runje generacisku změnu k juniorskemu šefej Felixej Broerkenej organizuja.
Domjace lěkarki a lěkarjo dale pře koronu šćěpja, předewšěm ludźi staršeje generacije.
Budyšin/Njeswačidło/Mały Wjelkow (SN/MiR). Kónc zašłeho lěta bě so na domjacych lěkarjow wulka ličba pacientow z próstwu wo šćěpjenje wobroćiła. Wšako knježeše po cyłej Němskej deltawarianta korony. Nimo toho skedźbnješe Roberta Kochowy institut dźeń a bóle na přiwalacu so žołmu natyknjenja z wariantu omikron. „Njemějachmy pak stajnje šćěpiwa dosć, tež hdyž běchu nam to přilubili“, wuswětla Budyska lěkarka za powšitkownu medicinu Sabina Miklec, „tak dyrbjachmy pacientam terminy wotprajić a je přestorčić.“ Runje tak bě to w praksomaj dr. Jany Markoweje w Njeswačidle a dr. Anny Reiche w Małym Wjelkowje.
Dr. Jana Markowa zwěsća, zo „jenož jednotliwcy přichadźeja, zo bychu so prěni króć šćěpić dali, dalši wospjet přińdu, wosebje wulka pak je ličba tych, kotřiž móžnosć boosterowanja wužiwaja.“ Dźěći pod dwanaće lětami wona nješćěpi. „To měli dźěćacy lěkarjo činić. Dźěći a młodostnych nad dwanaće lětami mamy tu jenož w małej ličbje, zo bychu so před koronu škitać dali.“