Policija (01.04.19)
Koleso sam přetwarił
Budyšin. Žane přetwarjene awto abo moped, ale technisce změnjene koleso sta so minjeny pjatk w Budyšinje z padom za policiju. Na Stieberowej kontrolowachu zastojnicy kolesowarja, kiž bě bjez swěcy po puću. Při kontroli zwěsćichu, zo bě koleso tak přetwarjene, zo móhło wone bjeze wšeho hač do 50 km/h spěšnje jěć. Mjez druhim je wobsedźer wjacore sylne akuwy do swojeho jězdźidła zatwarił a tohorunja elektriske kable sam składł. Z tymle kolesom njesmědźeše wobsedźer najprjedy raz dale jěć.
Na wopytowarjow čakaja nowosće
Pančicy-Kukow (SN/MWj). Hinak hač w mnohich druhich – w zežiwjenskim a zelowym centrumje klóštra Marijineje hwězdy w Pančicach-Kukowje hižo pilnje dźěłaja. W nadawku nošerja Křesćansko-socialneho kubłanskeho skutka so tam krajinotwarc Měrćin Kral a jeho sobudźěłaćerjo gratu přimaja. Dokelž dósta CSB wot krajneho zarjada za wobswět, ratarstwo a geologiju 12 000 eurow spěchowanja, twarja w klóšterskej zahrodźe nowu zelowu spiralu. „Dotalna bě dodźeržana, dokelž bu wot lěta 1993 za šulerske projekty wjele wužiwana“, rozłožuje sobudźěłaćer CSB Ronny Škoda.
Nowe wobličo dóstawa tuchwilu tohorunja murja, kotraž zahrodu wot klawsury dźěli. Za tamniše rostliny wona minjene lěta zdźěla prawe městno njebě, dokelž južne słónco přejara smaleše. Nětko nastanje na muri a před njej městnosć za tři temowe kompleksy. Kotre to budu Ronny Škoda přeradźić nochce. Temy pak hodźa so po wěstym času wuměnjeć, tak zo móhli wopytowarjo stajnje něšto noweho wuhladać.
Maks tola prawy Indian był
Za nowy serbski synchronizowany film čerwjeny přestrjenc wukładli
Chrósćicy (SN/MWj). Wuběr serbskich filmow je wot wčerawšeho wo zajimawostku bohatši. W Chróšćanskej „Jednoće“ su wjace hač 200 staršich, jich dźěći, zdźěla dźědojo a wowki kaž tež dalši wopytowarjo dožiwili premjeru synchronizowaneho filma „Syn Winnetouwa“. Za kooperacisku produkciju mjez Rěčnym centrumom WITAJ a Sakskim wukubłanskim a wupruwowanskim kanalom (SAEK) wukładźechu hosćom čerwjeny přestrjenc a su jim samo kaž w kinje popcorn poskićeli.
Nowačkojo z kantorom zwučowali
Krótkopowěsće (01.04.19)
Kolba so na wuměnk podał
Zły Komorow. Prokurist Łužiskeje a srjedźoněmskeje towaršnosće hórnistwoweho zarjadnistwa (LMBV), kotraž zamołwja tež saněrowanje we Łužicy, Manfred Kolba je so kónc měrca na wuměnk podał. Na jeho městnje skutkuje wot dźensnišeho Gerd Richter, kiž je sam mnohe lěta w brunicowych jamach dźěłał. Naposledk nawjedowaše pola LMBV wobłuk projektneho managementa wuchodneje Sakskeje.
Požadaja so wo titul UNESCO
Podstupim. Podstupim chce so wo titul „Filmowe město UNESCO“ požadać, kaž wyši měšćanosta Mike Schubert (SPD) připowědźi. Podstupim by tak prěnje „UNESCO-kreatiwne město filma“ było. Wšako ma na tym polu dobru infrastrukturu, kwalifikowany personal a wulki spektrum móžnosćow. Filmowe studijo w Babelsbergu wobsteji wot lěta 1912.
Łobjo połne mikroplasty
Za chódnik dźěle pódy předali
Wobšěrny dróhotwarski projekt w Jenkecach traje dwě lěće
Jenkecy (CS/SN). Na poćežowanja najwšelakorišeho razu dyrbja so wobydlerjo Jenkec (Jenkwitz) w přichodnymaj lětomaj nastajić. Hłowna dróha přez wjes budźe po dołhosći něhdźe 1 200 metrow wobšěrnje wutwarjena. Zo bychu dotal njerozrisane prašenja rozłožili, přewjedźechu zawčerawšim w Bošecach (Baschütz) wobydlersku zhromadźiznu, na kotruž je tójšto zajimcow přišło. Na prašenja wjesnjanow wotmołwichu wjesnjanosta Olaf Reichert, Jens Denk z Lětońskeje (Litten) twarskeje firmy SLB a René Dürlich z dróho- a hłubokotwarskeho wotrjada krajnoradneho zarjada.
Mjez druhim připosłucharjo zhonichu, zo njetraje dróhotwar kaž dotal planowane tři lěta, ale jenož dwě. Ze změnjenym rozdźělenjom twarskich wotrězkow móža cyłkowny čas přikrótšić. Tak chcedźa wot 15. apryla najprjedy wotrězkaj zapadnje a wuchodnje wjesneho srjedźišća twarić, dokelž stej wonej trochu njekomplikowanišej. Wjesne srjedźišćo ze swojimi křiwicami a wuskimi městnami, kotrež twarske dźěła poćežuja, budźe w lěće 2020 na rjedźe.
Policija (29.03.19)
Wopitaj randalěrowałoj
Budyšin. W předawanišću zakuskow na Budyskej Róžowej staj zawčerawšim mužej w starobje 27 lět hosći wobćežowałoj. Po tym zo přistajeni jeju namołwichu předawanišćo wopušćić, dóńdźe wonka k tomu, zo młodaj mužej tam stejace awta wobškodźištaj. Jako policija přijědźe, poča jedyn ze skućićelow do policajskeho awta kopać. Nimo toho wón zastojnikow biješe. To sej woni lubić njedachu a jeho sputachu. Pola muža naměrichu 3,14 promilow alkohola w kreji. Wón smědźeše so na policajskim rewěrje wuspać. Tamneho z 1,74 promilemi domoj pósłachu.
Livestream wo „hłownej“
Chrósćicy. 19. hłowna zhromadźizna Domowiny wotměje so jutře, 30. měrca, wot 9 hodź. w Chróšćanskej wjacezaměrowej hali „Jednota“. Na dnjowym porjedźe steja mjez druhim rozprawy wo dźěławosći w zašłymaj lětomaj a schwalenje předewzaćow za dobu hač do přichodneje „hłowneje“. Wot 9 hodź. móža zajimcy wuradźowanje tež přez livestream slědować, a to pod linkom https://www.youtube.com/user/DomowinaBudysin/live.
Porěčitej wo putnikowanju
Chrósćicy. Posledni wječor aktualneje kulturneje zymy w Chróšćanskej putniskej hospodźe wotměje so jutře, sobotu, w 19.45 hodź. Dwanaće lět je Monika Gerdesowa hižo po puću po Jakubowym puću. Startowała bě 2007 w Zhorjelcu a kóžde lěto w dowolu čwak dale nóžkuje, z wulkim cilom Santiago de Compostela před wočomaj. Loni bě wona zhromadnje ze swojej přećelku Beatu Gruß na wotrězku „Camino frances“ w Španiskej wot Pamplony hač do Leóna po puću. Zhromadnje rozprawjatej wonej wo wutrobnych zetkanjach z dalšimi putnikami ze wšeho swěta, wo kulturnych drohoćinkach po puću a wo smalacym słóncu na pustej wysočinje Meseta.
Wobrazy na hrodźe
Sakralna drohoćinka zachowana
W katolskich Serbach je wjele wjetšich a mjeńšich historiskich drohoćinkow, kotrež sej ludźo jara waža. Jedna tajka – wona zdaše so hižo zhubjena być – je nětko znowa w Ralbicach widźeć.
Ralbicy (aha/SN). Hdyž bu před 16 lětami njeposrědnje za wosadnej cyrkwju wot 1992 njewobydleny statok spotorhany, zhubi so z nim tež Grubertec-Narćikec kapałka. Wuběrny znajer stawiznow delanskeje wsy Pawoł Rota zhladowaše tehdy w Serbskich Nowinach na stawizny wokoło 1840 natwarjeneho statoka a jich wobsedźerjow. Kónc 19. lětstotka bě Šunowčan Michał Narćik dom a ležownosć w Ralbicach kupił. Wón měješe tam swoju šewcownju. Nimo toho wikowaše ze šijawami a kolesami, kotrež tež porjedźeše. Hač bě wón mnohim hišće znatu kapałku z postawomaj Wutroby Jězusoweje a Wutroby swjateje Marije zarjadował, bohužel znate njeje. 1942 je Narćik 77lětny zemrěł.
Wudowa zapisa lěto na to statok swojemu sotrowcej Janej Grubertej. W Katolskim Posole w meji 1956 jeničce čitamy, zo je nowy wobsedźer postawje wobnowić dał a zahrodu před kapałku rjenje wuhotował.
