Koncept přichoda wohnjoweje wobory šefa statneje kenclije přeswědčił

Chrósćicy (JK/SN). W gratowni Chróšćanskeje wohnjoweje wobory hašenskej jězdźidle tak wusko stejitej, zo so lědma łopješko mjez njej hodźi. Mała pódlanska rumnosć, w kotrejž móhli so kameradojo snano raz po zasadźenju abo zwučowanju posydnyć, skići jeno dźesaćom z nich městno za sedźenje. Wo sanitarnych připrawach so ani rěčeć njehodźi. Toho­dla je nuznje trjeba twarić nowu gratownju ze wšěm, štož načasnej woborje wotpowěduje. Kak sej kameradojo přichod swojeje wohnjoweje wobory předstaja, zestajichu woni do koncepta přichoda. Najwažniši dypk w nim je nowa gratownja. Zo bychu jeje trěbnosć a nuznosć wobkrućili, přeprosychu sej minjeny pjatk šefa sakskeje statneje kenclije Olivera­ Schenka. Jeho přewodźeše za­pósłanc krajneho sejma Alojs Mikławšk.

Najebać spadowacu ličbu wobydlerjow bě sej loni w Kamjenskej měšćanskej Lessingowej bibliotece wjace ludźi medije wupožčiło. Cyłkownje bě jich ně­hdźe 40 000 wopytowarjow.

Kamjenc (SN/mwe). Marion Kutter, wjednica Kamjenskeje knihownje zdźěli, zo bě so loni 552 nowych zajimcow přizjewiło, telko kaž po lěće 2011 hišće ženje. Mjez 124 143 wupožčenkami je 95 eksemplarow z domu. Tuž wučinja podźěl elektroniskich medijow jenož pjeć procentow. Hač běchu to čitanja, seminary, papjerowe dźiwadło kaž tež akcije k sobučinjenju: 2 216 dźěći, šulerjow a dorosćenych tež ze serbskich gmejnow bě so loni na programowych poskitkach biblioteki wobdźěliło. Sobudźěłaćerjo běchu 100 zarjadowanjow k spěchowanju čitanja, kubłanja a wuwiću literatury přewjedli. Lětnje přewostaja město Kamjenc knihowni něhdźe 30 000 eurow za nakup nowych medijow. Mjez nimi pak njejsu žane serbske.

Pančicy-Kukow (SN/mwe). Přitomnaj běštaj na posedźenju gmejnskeje rady Pančicy-Kukow minjeny štwórtk wječor nawoda wjesneje wohnjoweje wobory Daniel Rychtar a jeho naměstnik Kay Hoge. Jeju su gmejnscy radźićeljo po wólbach wohnjoweje wobory w zastojnstwje wobkrućili. Dźakował je so wjesnjanosta Markus Kreuz (CDU) na zeńdźenju darićelam, kotřiž běchu Pančičanskej Šuli­ Ćišinskeho­ nimo hrajkow z ruku zhotowjene hodowne pyramidy, bijadłowy set a młodźinskej wohnjowej woborje hodowničku sponserowali.

Nimo přihłosowanja próstwje wo stejišću k natwarej wlečaweje třěchi za podstajenje ratarskich wěcow na ležownosći w Kanecach běchu radźićeljo wustawki k dowolnosći a popłatkam za plakatowanje w zjawnym rumje wobzamknyli.

Rozmołwne koło w Budyskej cyrkwi něhdźe 900 ludźi sćěhowało

Budyšin (CS/SN). Wobydlerski forum w Budyšinje drje njeměješe wot časa přewróta hižo telko zajima. Tež zajim medijow na zarjadowanju „Dyrbimy rěčeć“ minjeny pjatk w Marje-Marćinej cyrkwi bě wulki. Kak budźe sprjewine město, kotrež nadregionalnje často „brune hnězdo“ mjenuja, z přećiwkami wobchadźeć, wo kotrychž měšćanska towaršnosć hižo wjacore měsacy diskutuje? Hladajo na bilancu je Budyske měšćanske zarjadnistwo zwěsćiło, zo bě cyrkej z něhdźe 900 wopytowarjemi hač na poslednje městno wobsadźena, a přiwšěm dyrbjachu organizatorojo mnohich ludźi preč pósłać. Kaž Budyski wyši měšćanosta Alexander Ahrens (SPD) wjacore razy wuzběhny, chcedźa dalše rozmołwne koła tajkeho formata přewjesć. Wón pak tež zwurazni: „Mamy hišće zwučować.“ W někotrych wokomikach zarjadowanja drje emocije přewažowachu, ale cyłkownje bě wječor měrny, a to cyle wěsće tež dźakowano prezency policije.