Při jězoru prasnyło
Brězowka. Štyrjo zranjeni a tójšto wěcneje škody su wuslědk wobchadneho njezboža sobotu popołdnju při Brězowskim jězoru w Dźěwinskej gmejnje. 79lětny wodźer Audija chcyše z parkowanišća při jězoru na statnu dróu S 126 wujěć, njewobkedźbowaše pak předjězbu 51lětneho šofera Mitsubishija. Při zražce so wobaj mužej snadnje zraništaj, runje tak kaž 66lětna sobujěduca w Audiju a 21lětny sobujěducy Mitsubishija. Na woběmaj jězdźidłomaj nasta dohromady něhdźe 20 000 eurow škody.
Do busa zrazył
Rakecy. Po wšěm zdaću njekedźbliwosć bě wina na wobchadnym njezbožu minjeny pjatk wječor w Rakecach. 42lětny wodźer busa chcyše tam ze swojim jězdźidłom typa Iveco z Hłowneje dróhi nalěwo na firmowy teren jězdźidłoweho předewzaća wotbočić. Při tym dóńdźe k zražce z wosobowym awtom typa Ford. Jeho 35lětny wodźer chcyše runje w tym wokomiku bus přesćahnyć. Wodźer Forda so při zražce snadnje zrani. Po informacijach policije nasta dohromady něhdźe 15 000 eurow wěcneje škody.
Krěpjecy (SN/MWj). Hižo wot decembra zašłeho lěta dóstawaja wobydlerjo w Krěpjecach, wjesnym dźělu města Halštrowa, pitnu wodu z noweje syće. Tu je Kamjenski zaměrowy zwjazk za pitnu wodu kłasć dał. Z wobydlerskim zarjadowanjom minjeny štwórtk su swoju nowu wodowu syć oficialnje woswjećili.
Město Halštrow hižo wot lěta 1991 zaměrowemu zwjazkej za pitnu wodu přisłuša. Krěpjecy pak zjawnej syći dotal přizamknjene njeběchu, dokelž wudźeržowachu swójske zastaranje z dweju studnjow. W lěće 2019 je Krěpječanske wodowe towarstwo wobzamknyło, zo měli wjes k zjawnej syći za pitnu wodu přizamknyć. Runočasnje so na to dojednachu, swoje towarstwo rozpušćić, ručež budu k zjawnej syći přizamknjeni.
Pančicy-Kukow. Po dołhim dlijenju twarskich dźěłow móže so gmejnska rada Pančicy-Kukow jutře w 19 hodź. k swojemu posedźenju prěni raz zaso w awli Šule Ćišinskeho zetkać. Mjez druhim zaběraja so radźićeljo z hospodarskim planom 2022. Dale steji na dnjowym porjedźe planowanske zrěčenje za wutwar kružneho wobchada w Zejicach. Wšitcy wobydlerjo su wutrobnje přeprošeni.
Biblioteka přećehnje
Kamjenc. Wot dźensnišeho je Kamjenska měšćanska biblioteka přećaha dla zawrjena. W přichodnych pjeć tydźenjach dyrbja něhdźe 33 000 knihow a dalšich medijow na techniku RFID přestajić. Na to dowjezu wšón wobstatk do nowych rumnosćow biblioteki na Wuchodnej čo. 16. Hač do njedźele Kamjenskeje Boršće (21. awgusta), hdyž twarski kompleks Lessingoweho gymnazija přepodadźa, ma wšitko na městnje być. Dwutydźenskeje testoweje fazy dla pak wotewru biblioteku hakle wot 2. do 4. septembra ze swjedźenskim kóncom tydźenja.
Tangenta połojčnje zawrjena
Rakecy (JK/SN). Towarstwa hraja w zjawnym žiwjenju gmejnow wažnu rólu a su spušćomni partnerojo při rjadowanju a wotběhu čiłeho gmejnskeho žiwjenja. Tomu je tež w Rakecach tak. Tohodla je gmejnje podpěra towarstwow wažna naležnosć. W časach wobmjezowanych srědkow pak žada sej to mudre postupowanje a sprawne rjadowanje. W Rakecach je to gmejnska rada na swojim minjenym posedźenju derje rozrisała.
Hač do lěta 2021 běchu podpěru za towarstwa financowali z pawšale Swobodneho stata Sakskeje za strukturne skrućenje wjesneho ruma we wobjimje 70 000 eurow. Wot lětsa wšak tule pawšalu wjace njepłaća. W Rakecach pak su za podpěru towarstwow w hospodarskim planje dosć wulku sumu zaplanowali. Wjesnjanosta Swen Nowotny (CDU) tuž dwě móžnosći podpěry namjetowaše, wo kotrymajž so konstruktiwna diskusija wuwi.
Radwor (SN/BŠe). Po něhdźe 30 lětach ma Radworska wohnjowa wobora nětko zaso młodźinski wotrjad. Minjeny kónc tydźenja su to wulce w tamnišej gratowni woswjećili. Mjeztym zo so pjatk w mjeńšim kruhu zeńdźechu, sćěhowaše sobotu oficialny akt, na kotrymž su mali wohnjowi wobornicy wjele gratulacijow přijěli. Nawoda wohnjoweje wobory gmejny Rüdiger Schmidt dźakowaše so Maximilianej Richterej za iniciatiwu, wšako bě wón załoženje młodźinskeho wotrjada namjetował. Mjeztym su jemu dalši třo podpěrarjo po boku. Dale skedźbni Schmidt na to, zo su za wuhotowanje kaž drasty atd. pjenjezy zběrali, wšako nima gmejna wotpowědny budget. „Młodźinski wotrjad je dobra móžnosć wo dorost wabić“, wón wuzběhny. Mjeztym je hižo jedyn sobustaw noweho wotrjada aktiwny čłon Radworskeje wohnjoweje wobory.
Zły Komorow (SN/JaW). Cyłkownje šěsć kandidatow a kandidatkow nastupi k wólbam měšćanosty abo měšćanostki w Złym Komorowje. Wšitkich je wólbny wuběrk města minjeny tydźeń wobkrućił, informuje město w nowinskej zdźělence.
Tak maja wobydlerjo łužiskeho města, kotrež přisłuša serbskemu sydlenskemu rumej, 18. septembra rozsudźić, štó přewozmje zastojnstwo wot tuchwilneho měšćanosty Andreasa Fredricha (SPD). Fredrich bě hižo připowědźił, zo wjac njekandiduje. Rozsudźić maja so wolerki a wolerjo nětko mjez Nadine Hönicke (SPD), Roxanu Trasper (Swobodni wolerjo – Zhromadnje za Zły Komorow), Andreasom Pfeifferom (CDU), Matthiasom Steinom (Hłós swobodnych wobydlerjow), Johannesom Svenom Hänigom jako kandidat-jednotliwc a Heikom Lückmannom (Iniciatiwa wobydlerjam bliski Zły Komorow). Wólbny wuběrk njeje žane požadanje wotpokazać dyrbjał.
Njedócpěje-li žadyn z kandidatow wjace hač połojcu płaćiwych hłosow, budźe rozsudne wólbne koło 9. oktobra. Nowy měšćanosta abo nowa měšćanostka ma zastojnstwo klětu 1. februara nastupić.
SLA z nowym dirigentom
Budyšin. Georgios Balatsinos nastupi ze zazběhom hrajneje doby 2022/2023 zastojnstwo šefdirigenta orchestra Serbskeho ludoweho ansambla. Wulce wuznamjenjeny Grjek, dotal skutkowacy mjez druhim za Berlinskich sinfonikarjow a Athensku narodnu operu, bu wot wjednistwa kaž tež hudźbnikow SLA nimale jednohłósnje wuzwoleny. Powabiło bě so dohromady 40 kandidatow.
Twarske dźěła zahajili
Niska. Twarskich naprawow dla wot dźensnišeho ćahi mjez Zhorjelcom a Niskej njejězdźa. Narunanski jězbny plan je přihotowany a je na internetnej stronje železniskeho předewzaća Odeg wozjewjeny kaž tež w busach a ćahach wupołoženy, wottam rěka. Twarske naprawy su hač do 23. septembra planowane.
Česćuja załožerja genetiki