160 ludźi na wěži cyrkwje
Wjele zajimcow na Njeswačanskim swjedźenju a rjemjeslniskich wikach
Njeswačidło (ML/SN). 16. dźeń Njeswačanskeho muzeja a rjemjeslniskich wikow je minjenu njedźelu popołdnju 1 500 wopytowarjow přiwabił. Mjez nimi bě zapósłanc Sakskeho krajneho sejma Marko Šiman (CDU). Na jewišću na nawsy postara so Budyski młodźinski dujerski orchester wo dobru naladu. Małe rejwarki GTA-skupiny Njeswačanskeje zakładneje šule kaž tež młodźinske rejwarki Modern Dance módro-běło Njeswačidło dóstachu wjele přikleska za swoje poskićenja.
Meja najprjedy padnyć nochcyła
Worklecy (jb/SN). Po dwulětnej přestawce je minjeny pjatk Worklečanska wyša šula zhromadnje ze zakładnej šulu zaso dworowy swjedźeń z mejemjetanjom přewjedła. Najprjedy rejwaše 15 porow 4. lětnika a na to 17 porow 9. lětnika wokoło meje. Po dostojnych rejach wobeju lětnikow slědowaše wjeršk: Štó drje budźe mejski kral? Prjedy pak hač móžachu so hólcy wubědźować, dyrbješe najprjedy mejski štom padnyć. Tón pak wosta na poł puća w pjeršći tčacy a nochcyše prosće padnyć. Ze zhromadnymi mocami někotři nanojo, šulerjo a wučerjo meju skónčnje powalichu.
Najspěšniši hólc ze štwórteho lětnika bě na to Nico Budar, kiž wuzwoli sej Monu Lukašec za swoju kralownu. Runje tak napjaty kaž pola šulerjow zakładneje šule běše běh pola dźewjatkow. Tam hrabny sej Ludwig Bjeńš jako prěni hałuzu a wupyta sej Hanu Hančikec za swoju kralownu. Dołhi ćah šulerkow a šulerjow – mejskej porikaj na konjomaj – ćehnješe po tym po Worklecach. Krystof Mikławšk ze Serbskich Pazlic jich při tym z akordeonom přewodźeše.
Na dworje Serbskeho gymnazija w Budyšinje su dźensa šulerki a ...
Krótkopowěsće (25.05.22)
Přijimaja projekty za „Simul+“
Drježdźany. Sakski statny minister za regionalne wuwiće Thomas Schmidt (CDU) je druhe koło wubědźowanja we wobłuku fondsa „Simul+ Čiń sobu!“ zahajił. Hač do 15. julija móža zajimcy wotnětka projekty zapodać. 500 najlěpšich namjetow budźe wuzwolene a z dohromady 7,6 milionami eurami spěchowane. Wubědźowanje ma „kreatiwiće a inowaciji w Sakskej polěkować a žiwjenjahódnosć regionow stopnjować“.
Pjenjezy za slědźenje
Drježdźany. Sakske ministerstwo za kultus podpěruje natwar „Konrad Zuse School“ za kumštnu inteligencu. Wo natwar třoch tajkich šulow běchu so po cyłej Němskej wjacore konsorcije požadali. Sakski namjet je pod nawodom Drježdźanskeje techniskeje a Lipšćanskeje uniwersity přeswědčił. Zwjazkowe ministerstwo za kubłanje přewostaji za tónle wotmysł spočatnje 24 milionow eurow.
Škitne naprawy podlěšeli
Wjacore cile za muži
Radwor. Na swjedźenju Božeho spěća zajutřišim, 26. meje, přeprošuja na wjacorych městnach muži, kotřiž su z kolesom abo pěši po puću na přestawku. Tak móža woni mjez druhim wot 10 do 17 hodź. na Radworskej kupje pozastać. Wot 11 hodź. zaklinči tam live-hudźba Olivera Stavenowa. Nimo toho změja kaž kóžde lěto słódnu hrochowu poliwku, dźěćacu zabawu a samopječeny tykanc přihotowane. Zjednoćenstwo kupoweho hata so prawje wjele wopytowarjow nadźija.
Konjecy. Móžna stacija za wulět muži budźe Konječanska burska stwa. Tam so wot 11 hodź. wo ćělne derjeměće lačnych wopytowarjow staraja. Nimo toho přewjedu wjacore žortne wubědźowanja kaž flunkyball, bierpong a flip the cup. Konječanski młodźinski klub wšitkich zajimcow wutrobnje přeprošuje.
Nowoslicy. Dinarjecy w Nowoslicach budu tohorunja na přichad wjesołych muži přihotowani. Tam poskićuja k wobjedu šašlik, pražene kołbaski, rězk z fritkami, čerstwje pječene honačiki a wězo chłódne piwo. Hudźbne wobrubjenje budźe runje tak zaručene.
Zwučuja zhromadnje
Studenća zhromadnje pućowali
Drježdźany. Tež lětsa přeprosy studentski zwjazk „Bjarnat Krawc“ znowa na nalětnje pućowanje, kotrež předwčerawšim, njedźelu, přewjedźechu. Pućowanje běchu studenća 2019 po pjeć lětach přestawki wozrodźili. Před lětomaj dyrbjachu je pandemije dla do nazymy přesunyć. Tónraz wobdźěli so dohromady 16 zajimcow. Tež skupina studowacych Lipšćanskeje Sorabije bě sej do Drježdźan dojěła.
Čara je kóžde lěto hinaša. Lětsa startowachmy připołdnju wot Alaunparka w Nowym měsće do njedalokeje Drježdźanskeje hole. Po šěsć kilometrach, někak na połojcy čary, kiwaše studentam a studentkam přestawka. Při krasnym ćopłym słónčnym wjedrje nóžkowachu wobdźělnicy dale přez lěs a podłu rěčki. Druha etapa wjedźeše pućowacych z hole k lěsnemu hrodźikej a wottam podłu Łobja k róžowej zahrodźe, hdźež sej lód popřachu. Naposledk podachu so po cyłkownje dwanaće kilometrach na łuki při Łobju, hdźež so dalši Drježdźanscy studenća přidružichu. Tam dachu zhromadne popołdnjo a wječor při bjesadźe a kartyplacanju wuklinčeć.
Policija (24.05.22)
Pokradnjene koło w interneće
Wojerecy. Ze swojej kedźbnosću staj mandźelskaj we Wojerecach přinošowałoj, paducha kolesa dosahnyć. Pola eBay pytaštaj wonaj za nowym kolesom. Jako běštaj kmane žonjace marki Giant namakałoj, daštaj ramikowe čisło najprjedy wot policije přepruwować. Kaž so wukopa, bu poskićene koleso minjeny tydźeń we Wojerecach pokradnjene. Policija za nim hižo pytaše. Město mandźelskeju jědźechu nětko policisća k wučinjenemu přepodaću. Tam zetkachu 30lětneho znateho – a pytane koleso. W bydlenju a pincy podhladneho namakachu dalše wěcy, kotrež běchu po wšěm zdaću pokradnjene, mjez druhim wšelki grat.
52 km/h přewjele
Ottendorf-Okrilla. 172 km/h bě rekord při kontroli spěšnosće w nocy na póndźelu na awtodróze A 4 pola Ottendorfje-Okrilli. Dowolenych je tam 120 km/h. Wodźer pólskeho Citroëna ma nětko 320 eurow pokuty płaćić a njesmě jedyn měsac žane awto wodźić. Při kontroli bě dohromady 85 wodźerjow přespěšnych.
Šulsku infrastrukturu skrućić
Zakładna šula jedne z ćežišćow komunalneho dźěła Rakečanskeje gmejny
Rakecy (JK/SN). Rakečanska zakładna šula „Bjarnat Krawc“ je jedyn z klučowych produktow Rakečanskeje gmejny. To je njedawno tamniša gmejnska rada wobzamknyła. Z tymle narokom ma so šula jako infrastrukturnje wažny wobstatk gmejny dale skrućić a wutwarić. To wuzběhny wjesnjanosta Swen Nowotny (CDU) na njedawnym posedźenju gmejnskeje rady, jako poda rozprawu k minjenym a přichodnym inwesticijam gmejny nastupajo zakładnu šulu.
