Wobnowja lětsa wokna cyrkwje
Bartska cyrkej je minjene lěta tajke a hinaše twarske dźěła dožiwiła. Lětsa chcedźa Boži dom dale saněrować. Spěchowanske towarstwo nadźija so znowa skutkowneje pomocy.
Bart (UM/SN). Při saněrowanju Bartskeje cyrkwje zahaja nětko takrjec nowe koło, kaž Friedrich Hesse ze spěchowanskeho towarstwa za Bartsku cyrkej informuje. Po tym zo běchu tam minjene lěta zwony a wěžu ponowili, ma nětko cyrkej sama na rjedźe być. Předewšěm měri so spěchowanske towarstwo na wokna. Zhromadnje z planowanskim běrowom přihotuja tuchwilu próstwy wo spěchowanske srědki, Friedrich Hesse pisa. Runočasnje nadźijeja so mnohich darićelow a sponsorow. Mjez druhim planuja, zo móža zajimcy kmótřistwo za jednotliwe wokno přewzać. Kaž trochuja, płaći saněrowanje jednoho wokna 2 000 do 3 000 eurow.
Za ponowjenje třěchi a fasady chce towarstwo próstwu wo spěchowanje přez Leaderowy region Hornjołužiska hola a haty zapodać. Firma Creaton je mjeztym hižo připrajiła, zo třěšne cyhele přewostaji.
Swjedźeń žiwjenskeje radosće
Ćisk (AK/SN). Lětuši, mjeztym 14. serbski ewangelski domizniski dźeń Wojerowskeho regiona wotměje so 10. julija w Ćisku. Wo tym informuje farar Wojerowskeje Janskeje wosady Heinrich Koch. Wón přisłuša 15 ludźi wopřijacemu dźěłowemu kruhej, kotryž domizniski dźeń přihotuje.
Podawk započnje so w 10 hodź. z němsko-serbskej Božej słužbu w Janskej cyrkwi. Swjećić budźe ju serbski superintendent na wuměnku Jan Malink. Wo hudźbne wobrubjenje postara so Židźinski chór pod nawodom Kerstin Lieder a kantora Johannesa Leue. Za najmłódšich wobdźělnikow planuja dźěćacu bohosłužbu. Konjace zapřahi jednotliwych wsow Wojerowskeje Janskeje wosady podadźa so po kemšach zhromadnje do Ćiska. Připrajiła je hižo Rakečanska dujerska kapała, kotraž domizniski dźeń ze swojimi zynkami wobrubi.
Nižina „Ylenia“ njeje drje w Hornjej Łužicy tak zlě ...
Krótkopowěsće (17.02.22)
Widejo bórze přistupne
Budyšin. Serbska popowa opera „Carpe noctem – Njeskónčna nóc“ předleži jako widejo. Kaž skupina Trio a kumple informuje, stej zwukowa a widejowa produkcija zakónčenej. Njedźelu wot 20 hodź. skupina widejo kaž tež jednotliwe hudźbne wideja na swojim YouTube-kanalu wozjewi. Planowane je pěsnje wot nalěća tež na dalšich portalach poskićić.
Incidenca zaso stupa
Budyšin/Zhorjelc. Roberta Kochowy institut je za Budyski a Zhorjelski wokrjes dźensa zaso stupace incidencne hódnoty zwěsćił. Za Budyski wučinja incidenca 1 238,2, za Zhorjelski 1 062,8. Dohromady 1 351 nowoinfekcijow z koronawirusom zličichu wčera w Budyskim wokrjesu, Zhorjelc podawa za wčera 914 natyknjenjow, wosom z nich z omikronwariantu.
K wikam z nowej knihu
Prěni baćon do wokrjesa přilećał
Symjo měnjeć lětsa na hinaše wašnje móžno
Stróža (SN/MWj). Hišće hač do 20. februara móža zajimcy na dwěmaj městnomaj w biosferowym rezerwaće Hornjołužiska hola a haty symjo měnjeć a runočasnje k mnohotnosći rostlin w zahrodkach regiona přinošować. Štóž tele dny Dom tysac hatow w Stróži pola Hućiny abo Ladušec ratarski statok w Chrjebi-Nowej Wsy wopyta, wuhlada tam oranžobarbny kašćik. Tón je z najwšelakorišim symjenjom napjelnjeny. „Našeje w biosferowym rezerwaće wotměwaceje so měnjenskeje bursy za symjo nochcychmy so lětsa hišće raz wzdać. Tohodla smy hromadźe z Towarstwom za zachowanje mnohotnosće wužitnych rostlin (VEN) symjenjowe kašćiki nastajili. Tak móža ludźo swoje symjo měnjeć a přiwšěm předpisany wotstawk dodźeržeć“, rozprawja Susanne Bärisch ze zarjadnistwa biosferoweho rezerwata w Stróži. Něhdy bě z wašnjom, zo ludźo sami ze swójskim symjenjom rostliny plahowachu. Tak wuwiwachu družiny, kotrež běchu regionej přiměrjene. Dźensa sej wjetšina symjo kupi. Bohužel je so tak wjele dobrych družin rostlin zhubiło.
Dwě móžnosći wotwažowali
Worklečanskej šuli saněrować budźe gmejnje wulke wužadanje
Worklecy (JK/SN). Zakładnu kaž tež wyšu šulu we Worklecach dyrbja wobšěrnje saněrować. Čas je w nimaj swoje slědy zawostajił. Tež hdyž wjesnjanosta Franc Brusk (CDU) na njedawnym posedźenju gmejnskeje rady rjekny, zo je gmejna kubłanišći zas a zaso porjedźała a wobnowjała, je nětko načasu wěnować so wobšěrnemu saněrowanju, energetiskemu kaž tež wohnjoškitnemu. K woběmaj naprawomaj su so ze zastupjerjemi zjawnych zarjadow hižo časćišo po šulskim twarjenju rozhladowali a trěbnosć zwěsćili. Za wobě naprawje je gmejna tež zapodała wotpowědnej próstwje wo spěchowanje. W zwisku z digitalnym wuhotowanjom šulow su drje hižo tójšto dalšich naprawow (elektriska instalacija, nuzniki) zwoprawdźili, ale to njeje cyłkowny staw šulow bytostnje na dobro změniło. Je načasu jednać a mjenowanej kubłanišći jako wonkowne znamjo gmejny na přikładnej wukmanić.
Policija (16.02.22)
Paducha znowa lepili
Běła Woda. Znowa je policija předwčerawšim w Běłej Wodźe paducha katalyzatora lepiła. Při kontroli Fiata njewuhladachu woni jenož po wšěm zdaću pokradnjene koleso, ale tež katalyzator wosoboweho awta typa Volvo. Pola šofera jednaše so wo 32lětneho Ukrainjana, kotrehož běchu zastojnicy hižo minjeny kónc tydźenja z tajkim awtowym dźělom lepili. Sobujěducy bě 25lětny pólski staćan, za kotrymž policija hižo pytaše. Wobeju zastojnicy nachwilnje zajachu. Sudnik chcyše wčera wo dalšich chłostanskoprawniskich konsekwencach rozsudźić.
Kamelije zaso přeprošeja
Tež po dwěmaj lětomaj přestawki su kamelije w Kinsporku runje tak atraktiwne kaž do koronapandemije. Nětko móža sej je zajimcy zaso wobhladać. Něštožkuli pak je hinaše hač do toho.
Kinspork (UM/SN). Na tónle wokomik su Peter Sonntag a jeho sobuwojowarjo z Kinsporskeho domizniskeho towarstwa dwě lěće čakać dyrbjeli. Po začuwanej bjezkónčnej přestawce korony dla móžachu tele dny zaso kamelijowy dom na terenje hrodu wopytowarjam wočinić. „Prěni dźeń po tak dołhim času bě połny wuspěch“, předsyda towarstwa zjima. „Něhdźe 300 ludźi chcyše naše kamelije widźeć.“ A nic jenož to. Strategija domizniskeho towarstwa, wopytowarjow z přemyslenym systemom informaciskich taflow a pokazowakow po cyłym nutřkownym měsće wodźić, je so jako dobra wopokazała. „Wšudźe běchu ludźo po puću, tež w cyrkwi, na kotruž smy sobu skedźbnjeli.“
Krótkopowěsće (16.02.22)
Ralf Bursy njeboh
Berlin. W starobje 66 lět je póndźelu hudźbnik a producent Ralf „Bummi“ Bursy po ćežkej chorosći zemrěł. Berlinjan bě w 1980tych lětach z hitami kaž „Feuer im Eis“ wuspěšny. Wuměłc bě Serbam jara přichileny a je njeličomne pěsnje za Serbski rozhłós produkował a spěwał. Z Měrćinom Weclichom je wón wusko hromadźe dźěłał. Hudźił je „Bummi“ Bursy tež na wjesnym swjedźenju w Sernjanach a Brětni.
Wuwiće rozdźělne
Budyšin/Zhorjelc. Incidencna hódnota koronawirusa so po Roberta Kochowym instituće we wokrjesomaj Budyšin a Zhorjelc rozdźělnje wuwiwa. Mjeztym zo je w Budyskim na 1 039,6 spadnyła, je wona w Zhorjelskim na 983,8 lochce postupiła. Budyski wokrjes wozjewi wčera 657 nowych infekcijow a dwaj smjertnej padaj, Zhorjelski 585 natyknjenjow, pjeć z nich z omikronwariantu.
Z wobrazom počesća Sokołow
