Wokna a durje fuk
Budyšin. Zahrodowy domčk na Budyskej Daimlerowej bě minjene dny cil paduchow. Woni so tam namócnje zadobychu a wusadźichu wšitke drjewjane durje kaž tež tři woknowe křidła. Dalše wokna skućićeljo wobškodźichu. Wěcna škoda wučinja něhdźe 1 000 eurow, pokradnjene durje a wokna pak su něhdźe dwójce telko hódne.
Njebjelčicy. Wuradźowanje Njebjelčanskeje gmejnskeje rady dźensa w 19.30 hodź. přewjedźe so pod prawidłom 1G. Kaž gmejnske zarjadnistwo zdźěli, to woznamjenja, zo smědźa so jenož testowane wosoby na posedźenju wobdźělić. Wo testy na městnje chcedźa so prócować. Hosćo njech sej prošu přiwšěm testy abo testowe dokumenty (nic starše hač 24 hodźin) sobu přinjesu. Dale dyrbja škit za hubu a nós wužiwać a wotstawki dodźeržeć. Gmejnske zarjadnistwo tež informuje, zo seminar „Wjesna rada – šansa za naslědne wuwiće wsy?“ wutoru, 30. nowembra, w 19.30 hodź. w Njebjelčicach korony dla wupadnje.
Wobchody njedźelu zawrjene
Wojerecy. Aktualnje płaćiwych koronowych postajenjow dla město Wojerecy na to skedźbnja, zo 28. nowembra planowana nakupowanska njedźela w měsće njebudźe. Dokelž su adwentne wiki wotprajene, njeje tež wosebita přičina tajkeje nakupowanskeje njedźele data. To samsne płaći za 12. december, hdyž chcychu Teschenske wiki přewjesć.
Slepo (AK/SN). Přihoty na jubilej „750 lět Slepo“ klětu w lěću tež tamniša wjesna rada podpěruje, kaž wjesny předstejićer a gmejnski radźićel Wolfgang Goldstein podšmórnje. „Za wotpohlad, při tej składnosći 750 štomikow sadźić, chcemy so wuraznje sobu angažować a namołwjamy wšitkich wobydlerjow, so na tym wobdźělić.“ Tež nowe sadowcy na priwatnych zahrodach a dalšich priwatnych ležownosćach su jara witane. Po móžnosći, tak Wolfgang Goldstein praji, móhli sponsorojo sadźensku akciju podpěrać. To by jara witana pomoc była. „Dźakowano nawodnicy našeho hłowneho zarjada Marion Mudrineje je dźěło planowanskeje skupiny hižo derje postupowało.“ Tež na wjesnym wuwićowym koncepće pilnje dźěłaja. Po móžnosći 13. decembra chcedźa wobšěrny dokument hotowy měć. Potom móže jón wjesna rada zjawnosći prezentować. „Rjenje by było, jeli tón wulki zajim wobydlerjow zbudźi“, so wjesny předstejićer nadźija. Hač pak budu tón dźeń wjetše zjawne zarjadowanje přewjesć móc, je dwělomne.
Tak mjenowane Nižowjesnjanske spušćadło před Rakecami je tuchwilu znowa twarnišćo. Hakle w juliju 2017 běchu je po wjacore měsacy trajacym přetwarje dokónčili.
Rakecy (SN/MWj). Po zwjazkowej dróze B 96 z Budyskeho směra do Rakec jěducy widźiš na lěwym boku spušćadło, kotrež wodu Wojerowskeje Čornicy reguluje. Hižo před dobrymi štyrjomi lětami bě tam ćežka technika zasadźena. Tehdy su spušćadło tak přetwarili, zo móhli ryby a druhe wódne zwěrjata po skłoninje připrawu přeńć. Nětko tam znowa bagry a nakładne awta dźěłaja. Kaž krajny zarjad rěčnych zawěrow (LTV) informuje, chcedźa připrawu hač do kónca lěta optiměrować. Tak mjez druhim skłoninu za ryby podlěšeja a z basenkami wuhotuja.
Incidenca na wysokim niwowje
Budyšin. Z 95 korona-padami na tysac wobydlerjow je gmejna Ralbicy-Róžant w Budyskim wokrjesu z wotstawkom najbóle potrjechena. Incidenca po RKI tu je dźensa 1 027,5. Wčera informowachu wo 1 656 natyknjenjach z koronawirusom. W Zhorjelskim wokrjesu bě jich wčera 1 033. Tři smjertne z časa wot 8. do 17. nowembra statistiku wudospołnjeja. Incidenca po RKI je tam dźensa 735,6.
Wólby znowa přestorčene
Budyšin. Zwjazk serbskich wuměłcow (ZSW) je swoju hłownu a wólbnu zhromadźiznu dalši raz přestorčił. Aktualneho pandemiskeho połoženja dla njemóža 7. decembra w Budyskej Röhrscheidtowej bašće planowane zarjadowanje přewjesć. Nowy termin dotal hišće jasny njeje. ZSW dale zdźěli, zo je literaturu šěrjacy projekt „serbskiTV“ wotnětka tež na platformje Instagram přistupny.
Změnja prawidła mawty
Pančicy-Kukow. Wobchod klóštra Marijineje hwězdy w Pančicach-Kukowje budźe wšitke štyri adwentne soboty stajnje wot 10 do 16 hodź. wotewrjeny, tak zo móža so ludźo za tym abo tamnym darom pod hodownym štomom rozhladować. Zastup do wobchoda maja woni jenož po prawidle 2G.
Zarjadowanja wotprajene
Smochćicy. Aktualneho koronoweho połoženja dla je Smochčanske kubłanišćo swj. Bena rozsudźiło, najprjedy raz hač do kónca januara 2022 wšitke prezencne zarjadowanja wotprajić. Za přenocowanja słužbnych a nuznych priwatnych přičin dla kaž tež za zarjadowanja, kotrež dyrbja so wěstotnych přičin a pandemije dla přewjesć, wostanje kubłanišćo dale wotewrjene. Přistup rjaduja w tym padźe po prawidle 2G+. To rěka, zo maja šćěpjeni a wotchorjeni přidatnje aktualny negatiwny koronatest předpołožić, jeli chcedźa so wobdźělić.
Kupjel zawrjena
Wobšudnistwu zadźěwała
Budyšin. Kedźbliwa sobudźěłaćerka Budyskeje wokrjesneje lutowarnje je minjene dny staršeho muža před wulkej škodu wobchowała. Jej so spodźiwne zdaše, zo chcyše muž 20 000 eurow wotzběhnyć. Kaž so w rozmołwje wukopa, běchu jeho njeznaći zazwonili a wudawali, zo je jeho dźowka wobchadne njezbožo ze smjertnym woporom zawiniła. Zo njeby wona do jastwa trjebała, dyrbješe muž 40 000 eurow zapłaćić. Dokelž telko njeměješe, poskići wón połojcu sumy. Sobudźěłaćerka lutowarnje je prawje reagowała a hnydom policiju informowała. Za wobhladniwe zadźerženje so jej policija nětko z kwěćelom podźakowa.
Hač móža komuny do swojich předewzaćow inwestować, wotwisuje hłownje wot spěchowanskich srědkow. To wědźa tež w gmejnje Halštrowska Hola, kotraž je nětko towarstwu přistupiła.
Hory (AK/SN). Załoženju towarstwa Leaderowy region łužiska jězorina gmejna Halštrowska Hola přihłosuje a jemu tež přistupi. To je gmejnska rada na swojim wčerawšim posedźenju na Horach jednohłósnje wobzamknyła. Tak móže so gmejna Halštrowska Hola tež w dobje wot lěta 2023 do 2027 wo spěchowanske srědki prócować.
„Towarstwo załožić je formalna naležnosć. Dźěłowe zjednoćenstwo łužiska jězorina je so z naležnosću intensiwnje zaběrało“, rjekny wčera wjesnjanosta Dietmar Koark (CDU). „Z přistupom k towarstwu chcemy na přichodnu spěchowansku dobu přihotowani być. W minjenych lětach smy z Leaderoweho programa stajnje zaso pjenjezy dóstawali.“ Po słowach Dietmara Koarka ma gmejna tuchwilu někotre mjeńše próstwy wo spěchowanje zapodate. Při tym jedna so wo wjacore ławki a wotpadkowe sudobja, kotrež chcedźa na wšelakich městnach nastajić.
Worklecy (SN/MWj). Ćežka dróhotwarska technika bě tele dny mjez Worklecami a Kozarcami zasadźena. Z wulkimi nakładnymi awtami přiwjezechu tam horcy asfalt a rozdźělichu jón z wosebitej mašinu na přihotowanu podłohu. Dotal bě puć jeno ze šćerkom posypany, a tak so tam nastajnosći dźěry jewjachu. Nětko so tajke něšto z tołstej asfaltowej worštu hižo stać njemóže. Worklečanska gmejna inwestuje tule něšto wjace hač 20 000 eurow. „Dokelž wjace wudać njemóžemy, twarimy puć hač ke gmejnskej mjezy. Wottam měła so gmejna Chrósćicy angažować“, praji Worklečanski wjesnjanosta Franc Brusk (CDU).
Po jeho słowach ma puć rozdźělny wuznam a je tuž za rozdźělne skupiny wužiwarjow wažny. Najprjedy raz wjedźe po nim Krabatowy kolesowanski puć. Tón mjez Worklecami a Kozarcami takrjec do Worklečanskeje gmejny přeńdźe a ju po třoch kilometrach před Sernjanami zaso wopušći.