Lětsa dobry staw financow
Ralbicy (JK/SN). Gmejna Ralbicy-Róžant ma lětsa dobry staw financow a zaměr, měć kónc lěta wurunany budget, na kóždy pad docpěje. To wobkrući komunje komornica Franciska Čapikowa na minjenej gmejnskej radźe w Ralbicach. Dobry pjenježny staw budźe tež trěbny, hdyž čaka na gmejnu wot klětušeho wulki nadawk: konkretny přihot nowotwara Ralbičanskeje pěstowarnje.
Po připrajenju spěchowanja a wěsteje twarskeje sumy 7,1 miliona eurow dźe nětko wo nadrobne prašenja, kaž to wjesnjanosta Hubertus Ryćer (CDU) radźićelam zdźěli. Hižo 6. oktobra sedźa zastupjerjo komuny pola Sakskeje natwarneje banki (SAB), hdźež zhonja, w kotrym wobjimje SAB nowotwar spěchuje, kak wulki budźe podźěl gmejny a kak konkretnje z časowym planom wupada. Dwaj dnjej pozdźišo, 8. oktobra, pojědu zhromadnje ze zamołwitymi Budyskeho krajnoradneho zarjada k Sakskej strukturnej agenturje (SAS), a tam póńdźe tohorunja wo nadrobnosće k nowotwarej pěstowarnje. Tak slěduja nětko po připrajenju twarskeje sumy trěbne zarjadniske, ale přiwšěm wažne kroki.
Nowe čorne złoto nětko wotkryte
Po tradiciji a přiwšěm z nowinkami swjećachu sobotu a njedźelu wjacore sta wopytowarjow pod korona-wuměnjenjemi lětušu domchowanku w Čornochołmčanskim Krabatowym młynje.
Načasny a powabny poskitk
Regionalne produkty sej w Budyskim „Zelenym pysku“ wotewzać
Budyšin (SN/MiR). Z načasnym poskitkom chcedźa w Budyšinje přichodnje wabić, zo ludźo dale a wjac regionalnych wudźěłkow kupuja. Iniciatiwa Marktschwärmer, za kotrejž stejitej w sprjewinym měsće wotnětka Stefanie Schwerk a Olivia Jakschik, chce 12. oktobra w hosćencu „Zeleny pysk“ wotewrjenje wudawanišća zežiwidłow woswječić. Ideja, kotraž běše před chwilu hižo jónu w Budyšinje zadomjena, mjeztym pak so trochu z wědomja pozhubiła, ma so nětko znowa etablěrować. „W lěću smój zhromadnje ze Stefanie Schwerk přewzałoj hosćićelstwo za ideju, kotruž smy w sprjewinym měsće nětko wožiwili“, rozjasnja Olivia Jakschik. „Namołwjamy k tomu, zo so ludźo registruja a potom zežiwidła kupuja“, dźensa jako wučerka skutkowaca angažowana Budyšanka wuswětla. Twory z pola abo zahrody, z produkowanišća zežiwidłow, z pjekarnje abo kuchnje, z hródźe, kurjenca abo pastwy přińdu direktnje do předawanišća na Budyskej Kurta Pchalekowej.
Wulku ličbu štomikow sadźeli
Budyski měšćanski lěs je wotnětka wo tójšto młodych štomikow bohatši. Postarało je so wo to 30 aktiwistow Budyskeho Leo-kluba. Woni běchu sej předewzali, skórnikow (Borkenkäfer) dla wotemrěte štomy narunać.
Krótkopowěsće (04.10.21)
Incidenca zaso nad 100
Budyšin. Natyknjenja z koronawirusom w Budyskim wokrjesu sylnje přiběraja. To so w dźensa wot RKI podatej incidency 103,7 zwuraznja. Minjeny pjatk je Budyski krajnoradny zarjad wo 56 infekcijach a dalšim smjertnym padźe rozprawjał. Wokrjes Zhorjelc informowaše pjatk wo 49 natyknjenjach, dwě wosobje stej w zwisku z koronu zemrěłoj. Incidenca po RKI je tam dźensa 77,0.
Žadanje Sintow a Romow
Heidelberg. Centralna rada němskich Sintow a Romow žada sej, do koaliciskeho zrěčenja za nowe zwjazkowe knježerstwo zapisać „wuměnjenja, z kotrymiž so runoprawne wobdźělenje Sintow a Romow w Němskej a Europje spěchuje a so přećiwo anticiganizmej we wšěch wobłukach towaršnosće wojuje“. To rjekny předsyda centralneje rady Romani Rose po wólbach zwjazkoweho sejma.
Politiske miljeje AfD zepěraja
Policija (01.10.21)
Přikładni šoferojo w Budyšinje
Budyšin/Zdźěr. Policija njeje we wobłuku hodźinskeje kontrole předwčerawšim na Drježdźanskej w Budyšinje ani jeničke překročenje dowoleneje spěšnosće 50 km/h zwěsćiła. Hinak bě to w Zdźěri, hdźež samsny dźeń pjeć hodźinow dołho spěšnosć na Mužakowskej přepruwowachu. 86 jězdźidłow njedodźeržachu dowolene tempo, „rekord“ 91 km/h docpě VW z Budyskim Kfz-znamješkom.
Tomaš Žur koncertuje
Budyšin. Na dnju němskeje jednoty, potajkim zajutřišim, 3. oktobra, wuhotujetaj wuznamny organist Tomaš Žur a saksofonist Gerold Gnausch, pochadźacaj z Baćonja resp. Lubija a skutkowacaj tuchwilu předewšěm w Berlinje, zhromadny koncert w Budyskej tachantskej cyrkwi. Zarjadowanje pod hesłom „Duchowna hudźba w měsacu róžowca“ započnje so we 18 hodź., zastup je darmotny. Při zachodźe pak wjeseli so zarjadowaca katolska wosada swj. Pětra nad šćedriwymi pjenježnymi darami.
Na prózdninske dźěło
Chrósćicy. Serbske šulske towarstwo poskići młodostnym wot 15 lět, kotřiž maja zajim na dźěle jako kubłarka/kubłar, prózdninske dźěło w swojich kubłanišćach w Hornjej a Delnjej Łužicy. Zajimcy njech so z krótkim požadanjom pod přizjewja.
Kubłanske dny za młodźinu
Worklecy. Wot 15. do 17. oktobra přewjedźe dekanatne dušepastyrstwo zhromadne kubłanske dny serbskich młodostnych we Winfriedowym domje w Schmiedebergu. Přizjewić móža so zajimcy hišće hač do wutory, 5. oktobra, ale jeničce online. Wotpowědny link podawaja pod .
Domchowanka při młynje
Akcija přećiwo brojenju zežiwidłow zahajena
Na Wojerowskej dźěćacej a młodźinskej farmje su zahajili wosebitu akciju, w kotrejž zaběraja so wuknjacy z wašnjom wobchada ze zežiwidłami. Akcija traje hač do 6 oktobra.
Wojerecy (KD/SN). „Kóždy wobydler Němskeje mjeta na lěto 75 kilogramow žiwidłow do wotpadkow, byrnjež hodźeli so tute hišće za zežiwjenje wužiwać“, rjekny minjenu wutoru Sebastian Klotsche na Wojerowskej dźěćacej a młodźinskej farmje, kotraž je w nošerstwje Křesćansko-socialneho skutka Sakska (CSB). Jako zastupjer sakskeje iniciatiwy CSB „Zežiwidła maja wulku hódnotu“ je Klotsche z tuteje přičiny z mnohimi partnerami zahajenje cyłoněmskeje akcije „Němska zachowa zežiwidła“ w Sakskej wuhotował.
Nowe bydlenja a tři studnje
Kamjenc (BG/SN). Hłownej ćežišći posedźenja Kamjenskeje měšćanskeje rady běštej předwčerawšim twarski plan za Jěžow a wotpohladane dalše spřistupnjenje wužiwanja tamnišeho lětanišća. W Jěžowje ma přichodnje 26 nowych bydlenjow nastać, při lětanišću chcedźa komunalne areale za přemysła poznamjenić a za předań spřihotować. Radźićeljo nadźijeja so, tak dalšemu wuwiću města polěkować a tuž woběmaj namjetomaj přihłosowachu.
Dalši dnjowy dypk bě podlěšenje najenskeho zrěčenja ze sportowym towarstwom Natwar Němske Pazlicy. Rada wotpowědowaše žadanju wjacorych pjenjezydawarjow kraja a Zwjazka, kotrež financuja tuchwilne wobnowjenje wulkoswětłoweje připrawy sportoweho centruma towarstwa, a rozšěri dojednanje na 15 lět. Nimorjadnje přilubichu dźěćacemu dnjowemu přebywanišću „Dołha haska“ pjenjezy za wotstronjenje njedostatkow na polu wohnjoškita.
