Hódnota 35 překročena
Budyšin. Z incidencu 45,0 po Roberta Kochowym instituće je Budyski wokrjes dźensa kritisku hódnotu 35 překročił. Wostanje-li to pjeć dnjow za sobu, nabudu dalše škitne naprawy płaćiwosće. Minjeny pjatk bě tu 25 nowych natyknjenjow z koronawirusom. W Zhorjelskim wokrjesu rozprawjachu wo šěsć infekcijach. Incidenca po RKI je tu dźensa 21,6.
Wuspěšna bilanca festiwala
Bart. 2. hornjołužiski komornohudźbny festiwal je so minjeny pjatk w Bartskej cyrkwi wuspěšnje zakónčił. Wot 10. do 17. septembra móžachu na dźewjeć zarjadowanjach dohromady wosom stow wopytowarjow witać. 45 wuměłcow ze 14 krajow hudźeše na sydom koncertnych městnach we wjesnych cyrkwjach a hrodach. Štyri wodźenja po tworni klawěrow C. Bechstein we Wodowych Hendrichecach a kulturnopolitiska podijowa diskusija su program skulojćili.
Móža sportowu halu wobnowić
Do wobchoda so zadobyli
Wojerecy. W nocy na srjedu su so njeznaći we Wojerecach do wobchoda na Budyskej aleji zadobyli. Z njeho spakosćichu woni najwšelakoriše nastroje w hódnoće wjac hač 600 eurow. Nimo toho su paduši wěcnu škodu 150 eurow načinili.
Rakecy (JK/SN). Po lěćnej přestawce witaše Rakečanski wjesnjanosta Swen Nowotny (CDU) swojich radźićelow zaso wróćo do wšědneho komunalneho dźěła a tak do poslednjeho lětušeho koła posedźenjow.
Hnydom na spočatku mějachu so radźićeljo gmejny z problemom wobydlerjow susodneje Stróže (Wartha) rozestajeć, hdźež mějachu njedawno přez cyły dźeń mazanu pitnu wodu. Wohnjowa wobora bě tankowe awto napjelniła, při čimž je so wulkeho ćišća we wodowodźe dla zerzawc pušćił a w někotrych domjacnosćach škody na płokawach a šatach zawinował. W přichodźe hižo k tajkim panam dóńc njesmě, a wohnjowa wobora budźe swoje tanki na přemysłownišću při Jitkowskim puću pjelnić.
Budyšin. Serbske šulske towarstwo z. t. přeproša seniorow na dnjowu wuprawu do Drježdźan. Srjedu, 29. septembra, pojědu zajimcy z busom do sakskeje stolicy. Wottam podadźa so z łódźu na Łobju podłu Sakskeho winoweho puća do Mišna, hdźež wopytaja po zhromadnym wobjedźe Albrechtowy hród. Wuprawa płaći na wosobu 55 eurow. Zajimcy njech přizjewja so hač do 20. septembra pod telefonowym čisłom 03591 /550 223 abo z mejlku na .
Koncert w Michałskej cyrkwi
Budyšin. Spěwytwórc Clemens Bittlinger a perkusionist David Kandert wuhotujetej jutře, sobotu, pod hesłom „Daj mi swojej křidle“ koncert w Budyskej Michałskej cyrkwi. Zarjadowanje započnje so w 19 hodź., zastup při wječornej kasy płaći dźesać eurow.
Lěto po wotkryću
Koslow. Z krótkej swjatočnosću dopominaja w Koslowje na lońše wotkryće pomnika „Nawrót do Koslowa“, jutře, sobotu we 18 hodź. Swjatočnosći přizamknje so zabawa z prezentaciju CDje „Hory módre, ja was znaju“ woblubowanych serbskich spěwow.
Wuběrk europeady wuradźował
Wojerecy. Wuběrk za přihoty koparskeje europeady je wčera we Wojerecach wuradźował. Po wozjewjenju jeje klětušeho termina na kongresu FUEN je planowanska doba zaso jasna. Tež nowy trenar balokoparjow z Delnjeje Łužicy Sven Ballack (SN informowachu) so wčera předstaji. Nimo planowanja treninga a zetkanjow hrajerjow serbskeho mustwa rozjimachu wužadanja wuskich hrajnych planow w braniborskich a sakskich ligach.
Incidency snadnje stupałoj
Budyšin. Snadnje zwyšenu incidencu 32,5 je Roberta Kochowy institut dźensa za Budyski wokrjes podał. Wčera informowachu tu wo 15 natyknjenjach z koronawirusom. Ze 171 schorjenych su štyri dale w chorowni. Wo 15 infekcijach rozprawja tež wokrjes Zhorjelc, hdźež po RKI incidenca 22,4 wučinja.
Hotuja so na 147. schadźowanku
Při wuparkowanju njekedźbowała
Budyšin. 44lětna wodźerka wosoboweho awta marki VW je wčera rano na Budyskej Hornčerskej znjezbožiła. Wona bě ze směra Drjewowe wiki přijěła. Dalša, 49lětna šoferka awta Volvo wujědźe z parkowanskeho městna, njewobkedźbowaše pak při tym přijěducy VW, a zrazy do njeho. VW zajědźe do sćěny, a jeho wodźerka so ćežko zrani.
Před sto lětami běchu we Wudworju na česć padłych wjesnjanow Prěnjeje swětoweje wójny pomnik stajili.
Wudwor (aha/SN). Nimale wšěch Wudworčanow, ale tež zapósłanca Sakskeho krajneho sejma Alojsa Mikławška (CDU), witaše minjenu njedźelu popołdnju Worklečanski wjesnjanosta Franc Brusk (CDU) na wobnowjeny areal wosrjedź wsy, hdźež bu před dokładnje sto lětami pomnik na česć padłych wjesnjanow Prěnjeje swětoweje wójny stajeny. Wuběrny znajer stawiznow swojeje wsy a wjesny chronikar Eckhard Kliemann zhladowaše ze zajimawym přednoškom na wony podawk.
Hłowny iniciator postajenja pomnika z Rochlitzskeho porfyra bě swój čas wobsedźer kobłarnje Alfons Porak. Jednory kamjeń ze serbskim a němskim napisom a kulu na wjeršku słuži jako symbol česćenja padłych Wudworčanow. Wosebitosć wopomnišća je, zo maš tam nimo toho rownišćo za třoch cuzych němskich padnjenych Druheje swětoweje wójny. Najmłódši z nich bě hakle 17 lět. Woni su w njepřewidnych poslednich bitwach w aprylu 1945 žiwjenje přisadźili.