Spominanje a zdobom namołwa
Krótkopowěsće (09.08.21)
Incidenca trochu přiběrała
Budyšin/Zhorjelc. Přez kónc tydźenja zwěsća Roberta Kochowy institut w Budyskim wokrjesu snadnje přiběracu incidencu za minjene sydom dnjow, dźensa podawa tu hódnotu 4,7. Dohromady je wokrjes Budyšin dotal 944 zemrětych w zwisku z koronawirusom zličił. W Zhorjelskim wokrjesu je incidenca na 3,6 woteběrała. Tam su dotal 1 160 smjertnych padow registrowali.
Znowa kurs serbšćiny w Čěskej
Budislav. Dohromady 15 ludźi wobdźěla so wot wčerawšeho na lětnjej šuli serbšćiny w Budislavje pola Litomyšla. Po lońšej premjerje je to druhi raz, zo Praske Towarstwo přećelow Serbow nimale tydźeń trajacy serbskorěčny kurs přewjedźe. Mjez druhim přednošuje tam redaktorka SN dr. Cordula Ratajczakowa wo swojich sociolinguistiskich slědźenjach a čita z knihi „Nowa swoboda“.
Třo kandidaća wobkrućeni
Policija (06.08.21)
Na mosće mórałoj
Wuježk. Na awtodróze A 4 su policisća předwčerawšim popołdnju grafitijoweju mórakow z Hessenskeje při tak mjenowanym Wuježčanskim mosće pola Wósporka lepili. 30lětna žona a jeje 25lětny komplica běštaj něhdźe dwaj metraj wulkej wobrazaj zwěrjatow a wšelake pismiki na móst mórałoj. Zastojnicy sćazachu jimaj 21 tyzow barby.
Swěčki, swjedźeń a zela
Pančicy-Kukow (SN/MWj). Hnydom tři podawki dožiwja wopytowarjo za tydźeń w klóštrje Marijinej hwězdźe w Pančicach-Kukowje. 14. awgusta přeproša tam wot 19 hodź. na zahrodowu nóc pod hesłom „W swětle tysac swěčkow“. Ta bě poprawom 17. julija planowana. Špatneho wjedra dla pak dyrbjachu zarjadowanje tehdy krótkodobnje wotprajić.
Nazajtra, 15. awgusta, wotměje so lětuši klóšterski a swójbny swjedźeń Budyskeho wokrjesa. Tón zwjazaja z tradicionalnej zelowej njedźelu. Wot 11 hodź. móža so wopytowarjo po regionalnych a přirodowych wikach rozhladować. Na klóšterskim dworje chcedźa wikowarjo swoje twory poskićeć. Paleta saha wot rostlin za balkon a zahrodu přez korjeniny, mydła a kulinariske wosebitosće hač k drjewjanym rjemjeslniskim wudźěłkam. Dale předstaja so wšelake zwjazki a towarstwa wokrjesa a prezentuja swoje projekty. W 12 hodź. zahudźa Porchowscy muzikanća a wot 14 hodź. pokazaja pisany program za cyłu swójbu. Sobu skutkować budu mjez druhim Wudworski folklorny ansambl, akordeonowy orchester, klankodźiwadło a dudak Handrij Henčl.
Šuli dale digitalizuja
Wuběrk měšćanskeje rady nadawk za dodawanje a instalaciju přepodał
Kulow (AK/SN). Swoju zakładnu a wyšu šulu chce město Kulow digitalnje dale wuhotować. Wo tym informowaše twarski nawoda Stephen Rachel na zašłym posedźenju měšćanskeje rady. Po jeho słowach je so wuběrk za přepodaće nadawkow rozsudźił, zo ma Kamjeničanska kompjuterowa firma Megware digitalne šulske tafle dodawać a instalować. Nadawk ma wobjim něhdźe 36 000 eurow. Krabatowa zakładna šula dóstanje tři tafle, wyša šula „Korla Awgust Kocor“ dwě. „Na woběmaj kubłanišćomaj sej digitalne tafle hižo dlěje přeja. Nětko so tele přeće spjelni“, kaž nawoda twarskeho wotrjada měšćanskeho zarjadnistwa podšmórny.
Do Dubrjenskeho bahna
Michałki. Kulowska přirodoškitna skupina Nabu přeproša za zajutřišu njedźelu na prózdninske pućowanje po Dubrjenskim bahnje. Zajimcy zetkaja so w dźewjećich při hosćencu w Michałkach. Wobdźělenje płaći dwaj euraj za dorosćenych, dźěći smědźa darmotnje sobu hić.
Přewjedu hornčerske wiki
Hózk. Mjeztym hižo 18. raz wotměja so jutře a njedźelu w Hózku hornčerske wiki. 18 wobdźělnikow chce tam swoje twory poskićeć. Mjez nimi budu někotři, kiž su wot wšeho spočatka pódla, a dalši, kotřiž prěni raz přijědu. Wopytowarjow zastaruja z ćopłymi jědźemi kaž tež z čerstwym tykancom.
Za dźěłarničku so přizjewić
W měsće so sam posłužować
Štóž ma zahrodku, za toho je samozrozumliwe, zo tam tomaty, kórki, jahody zela a dalše płody žněje. W Budyšinje móžeš sej nětko to a tamne našćipać, tež hdyž sam žanu zahrodku nimaš.
Budyšin (SN/MWj). Lětsa kónc meje su sobudźěłaćerjo Budyskeje wobdźělenskeje a wobhospodarjenskeje towaršnosće (BBB) něhdźe 150 zelowych a zeleninowych rostlin ze Zhorjelskeho biozahrodnistwa do rostlinskich sudobjow a na hrjadki w sprjewinym měsće sadźeli. Nětko je poněčim čas, zo móža zajimcy žnjeć započeć. Pisany mangold na Hłownym torhošću su sej někotři hižo sobu wzali. Družiny tomatow a papriki pak móža hišće někotre hodźiny słónca znjesć, kaž w nowinskej zdźělence BBB rěka.
Před radnicu nadeńdźeš tohorunja wšelake zela a słódne čaje, mjez druhim syriski majoran, kopricu (Fenchel) z jeho čerwjenobrunym lisćom abo bazilik. W sudobjach na Bohatej hasy wuhladaš nimo pisanych kwětkow tež žerchej (Kresse).
Hač do oktobra ma nowy kružny wobchad na křižowanišću statneje ...
Krótkopowěsće (06.08.21)
Incidenca snadnje niša
Budyšin/Zhorjelc. Aktualnje je Zhorjelski wokrjes tři dalše natyknjenja z koronawirusom zwěsćił. RKI podawa tam incidencnu hódnotu 4,0. Za Budyski wokrjes registruja samsnu incidencu a tohorunja tři nowoinfekcije. Na wosebitej akciji wčera we Wojerowskim Łužiskim centeru je so 261 ludźi spontanje šćěpić dało. Dalšej tajkej akciji přewjedu 10. a 12. awgusta w Budyšinje a Wojerecach.
Kartki jeničce w předpředani
Nuknica. Towarstwo barakka z.t. wuhotuje po lońšim wupadźe lětsa znowa Nukstock-openair, po zwučenym wašnju posledni kónc tydźenja w awgusće. Tónraz pak njebudźe móžno sej zastupny lisćik při wječornej kasy kupić. Kartki hodźa so pod jeničce online w předpředani skazać.
35 próstwow zapodali
Policija (05.08.21)
Koleso pokradnyli
Wojerecy. Štóž swoje kolesa na awće transportuje, dyrbi derje kedźbować, zo su porjadnje přizamknjene. Hewak su wone lochki cil paducham. Tak su njeznaći předwčerawšim rano we Wojerecach koleso marki Giant pokradnyli. Wone steješe na dźeržaku za připowěšakowu kuplowanku. Hač bě koleso přizamknjene abo nic, z rozprawy policije njewuchadźa. Tež wo jeho hódnoće ničo znate njeje. Kriminalna słužba pad nětko přepytuje.
