W Běłej Wodźe swjeći dźensa Marja Henčlowa 90. narodniny. Rodźena w Trjebinje je wona tam do šule chodźiła a pozdźišo w ratarstwje dźěłała. Swojej ródnej wsy a Slepjanskej wosadźe je cyłe swoje žiwjenje swěrna wostała.

Dlěje hač 70 lět je Marja Henčlowa Trjebinskej Domowinskej skupinje a tamnišemu serbskemu žiwjenju swěrna, dźensa je najstarša čłonka wjesneje Domowinskeje skupiny. Zachować serbsku rěč, nałožki a kulturu běchu jej najwaž­niši wobsah žiwjenja. Wot wšeho spočatka přisłušeše tež Slepjanskim kantorkam. Z nimi je spěwne herbstwo Slepjanskeho regiona daloko za łužiskej mjezu šěriła. We wsy sej jubilarku wulce česća. W kóždejžkuli rozmołwje z njej sy jeje žiwjensku energiju začuwał, kotruž je stajnje tež na wustupach kantorkow wuprudźała.

Mjeztym sej staroba a strowotny staw Marje Henčloweje swój tribut žadatej, tak zo je wona do bydlenja z wobstajnym hladanjom w Běłej Wodźe přećahnyła. Tam so jeje dźěći wo nju staraja a z njej dźensniše 90. narodniny w małym swójbnym kruhu swjeća. Tež někotryžkuli Trjebinjan na nju dźensa spomina. Jost Schmidtchen

W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy w małej seriji. Naš ­awtor je bywši wjelelětny předsyda ­zarjadniskeho zwjazka Při Klóšterskej wodźe Alfons Ryćer. (6)

Wólbna perioda gmejnskich radow traje w Sakskej pjeć lět. Wólby wotměwaja so stajnje mjez 1. aprylom a 30. junijom. Wone maja so najpozdźišo 90 dnjow do wólbneho dnja zjawnje wupisać. Kandidować smě kóždy, kiž je znajmjeńša 18 lět stary a w gmejnje bydli. Ze zapósłancom njesmědźa być wjesnjanosta a při­stajeni gmejny abo zarjadniskeho zwjazka, kotremuž gmejna přisłuša. Štóž za čas wólbneje periody swoje hłowne by­dlenje w gmejnje wotzjewi, zhubi runočasnje tež mandat w gmejnskim parlamenće. W praksy so tajke něšto tež časćišo stawa.

Serbski domizniski dźeń 2021 we Wojerecach a na Horach wotměli

Wojerecy/Hory (AK/SN). Serbski ewangelski domizniski dźeń Wojerowskeho regiona zesylnja zhromadnosć, dopomina na historiske korjenje, sensibilizuje za identitu a skruća wěru. Tole podšmórny superintendent na wuměnku Jan Malink wčera we Wojerowskej Janskej cyrkwi. Swjedźensku Božu słužbu je Židźinski chór ze serbskimi kěrlušemi wobrubił. Domizniski dźeń so wot lěta 2007 wotměwa, loni pak dyrbješe korony dla wupadnyć.

Po kemšach jědźechu wobdźělnicy wčera z konjacymi zapřahami na Hory. Po puću pozastachu při lipje w Židźinom. Wo hudźbny přewod starachu so Rakečanscy dujerscy hercy. Na Horjanskej ­nawsy dožiwichu wobdźělnicy wjele zabawy a zhromadnosće. Jich zawjeselichu dźěći pěstowarnje „Lutki“ z pěsnjemi, basnjemi a rejemi. Wone wustupichu ­jako lutki kaž tež w narodnej drasće Wojerowskeho regiona. Wotewrjenej běštej tohorunja Patokec kładźita bróžnja a burski muzej.

Radwor. Přichodne zjawne posedźenje Radworskeje gmejnskeje rady wotměje so srjedu, 14. julija, we 18.30 hodź. w jědźerni Radworskeje šule. Mjez druhim porěča tam wo kóštach wobhospodarjenja pěstowarnjow a wo nakupje jězdźidła za komunalny twarski zawod. Zajimcy su wutrobnje witani.

Prěnje stajne blido

Budyšin. Po wjacorych měsacach přestawki přewjedźe Budyski měšćanski zwjazk CDU srjedu, 14. julija, wot 19 hodź. prěnje stajne blido CDU w tymle lěće. Zarjadowanje wotměje so w hosćencu Sprjewina pensija na Rybarskej hasy 6. Tam chcedźa sej mysle wuměnjeć wo najwšelakorišich temach, kotrež su ludźi w minjenym času zaběrali. Přizjewjenje njeje trěbne.