Židowskeho Budyšana wopominali
Budyšin (CS/SN/MiR). W Budyskim klóšterku klarisow zetka so wčera nawječor něhdźe dwaceći ludźi k 32. nutrnosći, wěnowanej wopomnjeću pogromoweje nocy. 9. nowembra 1938 běchu nacionalsocialisća započeli židowske žiwjenje w Němskim reichu wutupjeć, štož su hač do kónca Druheje swětoweje wójny dale wjedli. Zapołožene do modlitwow a spěwow su wopytowarjo nyšpora na dóńt 1927 rodźeneho Budyšana Isidora Nussenbauma spominali. Zhromadnje ze swojim bratrom ćerpješe wón w koncentraciskim lěhwje Stutthof. Siegfried je přez cyły čas swojeho mjeńšeho bratra Isidora škitał, torturu zajeća pak njeje přežiwił. W swojich dopomnjenkach piše Isidor Nussenbaum, zo měješe stajnje jandźela pěstona poboku. Mjez druhim škitachu jeho w kaceće sobujeći a samo młody čłon SS, kotřiž su jemu přežiwjenje zmóžnili. Tak su jeho z jědźu zastarali. Po wuswobodźenju přez sowjetske wójsko dyrbješe Nussenbaum dožiwić, kak su ruscy wojacy žonu wumocowali, pola kotrejež wón po wuswobodźenju bydleše a kotraž so wo njeho staraše. Po wójnje so na něšto měsacow do ródneho Budyšina nawróći.
Krótkopowěsće (10.11.20)
Wirus dale zachadźa
Budyšin. Z 48 nowymi padami je ličba z koronawirusom natyknjenych w Budyskim wokrjesu wčera na 3 046 rozrostła. Třo dalši pacienća su zemrěli (40). Z aktualnje 1 751 (-40) schorjenych 51 (-7) stacionarnje lěkuja. Wčera bě 3 720 ludźi w karantenje. Krajny rada Michael Harig (CDU) je so profylaktisce do karanteny podał, dokelž měješe kontakt z pozdźišo pozitiwnje testowanej wosobu.
Za schadźowanku so přizjewić
Budyšin. Zajimcy, kotřiž chcedźa na lětušej schadźowance pódla być, móža so online za zarjadowanje přizjewić. Městna na wirtuelnej žurli su wobmjezowane. Dalše informacije a link za přizjewjenje namakaja zajimcy pod www.schadźowanka.de. Hač budźe livestream po dotal zwučenym wašnju na Youtube widźeć, dotal jasne njeje.
Politikarjo CDU w karantenje
Policija (09.11.20)
Trik bjezmała fungował
Běła Woda. Wjacore razy su njeznaći minjene dny spytali, z koronowej wariantu tak mjenowaneho wnučkoweho trika ludźom pjenjezy wulišćić. W jednym padźe by to nimale fungowało. Tak je w Běłej Wodźe cuzy muž staršu žonu zazwonił a so jako jeje syn wudawał. Pječa bě so wón z koronu natyknył a rjekny jej, zo leži ćežko chory w chorowni. Za pozdatny medikament trjebaše wón wjetšu sumu pjenjez, kotruž chcyše žona na bance wotzběhnyć. Hakle sobudźěłaćerka pjenježneho instituta tomu zadźěwa a žonu před wjetšej škodu zachowa. Policija před tajkim trikom wuraznje warnuje.
Radźićeljo so schadźuja
Łaz. K swojemu přichodnemu wuradźowanju zetkaja so Łazowscy gmejnscy radźićeljo jutře, wutoru, we 18 hodź. na Łazowskim gmejnskim zarjedźe. Mjez druhim chcedźa so tam z koncepcionelnym zdźěłanjom analyzy za inwesticije w jednotliwych pěstowarnjach gmejny rozestajeć. Dale póńdźe wo wopłóčkowy koncept za kónčinu wokoło Hórnikečanskeho jězora.
Předawaja zwonka domu
Čorny Chołmc. Koronoweje pandemije dla wostanje Čornochołmčanski Krabatowy młyn hač do kónca nowembra zawrjeny. Zdobom pak na to skedźbnjeja, zo wot wutory hač do njedźele stajnje wot 11 do 16 hodź. najwšelakoriše jědźe a předewšěm swoje słódne plincy zwonka domu předawaja. Nadrobnišo wobhonić móža so zajimcy internetnje pod www.krabat-muehle.de.
Dwoje wrota za dožiwjensku šćežku
Čorny Chołmc (SiR/SN). Hnydom cyłu skupinu dobrowólnych pomocnikow witachu minjene dny w Čornochołmčanskim Krabatowym młynje. Tam pobychu wobdźělnicy wotewrjeneje młodźinskeje dźěłarnje Domu Bethesda, kotryž je w nošerstwje Diakonije swj. Měrćina. Hižo w lěću běchu woni při dožiwjenskej šćežce za Krabatowym młynom drjewjany nastroj nastajili, kiž kaž ksylofon funguje. Njedawno pak dyrbjachu zwěsćić, zo běchu tam wandalojo zachadźeli a wšelake dźěle prosće zwutorhali. Tuž su so młodźi ludźo w starobje 15 do 25 lět do dźěła dali a instrument sporjedźeli.
Poslednje dny pěstowarnje
Chróšćanska gmejna da něhdyše kubłanišćo spotorhać
Chrósćicy (JK/SN). Wulke myto we wobłuku sakskeho wubědźowanja Simul+, kotrež je gmejna Chrósćicy dobyła, so dale spomóžnje na jeje komunalne projekty wuskutkuje. Na te wašnje je mjenujcy móžno, wšelake wudawki zwonka hospodarskeho plana zwoprawdźić. Na zašłym posedźenju mějachu čłonojo tamnišeje gmejnskeje rady wobzamknyć wudawki za swójski podźěl 22 000 eurow nastupajo spotorhanje něhdyšeje pěstowarnje.
Wot partnerow awto přewzali
Partnerstwa mjez městami a gmejnami maja často ideelny charakter. Na přikładźe Njebjelčic a Barlebena w Saksko-Anhaltskej so nětko pokazuje, kotry praktiski wuskutk móže partnerstwo měć.
Njebjelčicy (SN/MWj). Něhdźe 300 kilometrow dołhi puć z Hornjeje Łužicy do saksko-anhaltskeho Barlebena su Njebjelčanski wjesnjanosta Tomaš Čornak (CDU) a dalši zastupjerjo gmejny njedawno rady na so wzali. Barlebenski wjesnjanosta Frank Nase (CDU) přepoda jim kluč za wohnjowoborne hašenske jězdźidło.
TLF/25 z lěta 1989 Barlebenska wohnjowa wobora hižo njetrjeba, dokelž ma wot lěća nowe jězdźidło. Za 20 000 eurow přewostaji awto Njebjelčanskej gmejnje. „Barleben nam tak wulku słužbu wopokaza, přetož jako mała komuna njebychmy nowe wohnjowoborne awto zapłaćić móhli“, praji Tomaš Čornak. Tež na posedźenju minjeny tydźeń wón hišće raz wuzběhny, kak spomóžnje so partnerstwo mjez komunomaj wuskutkuje.
Hač do kónca lěta ma nowy móst nad Młynskej hrjebju na ...
Serbske komuny jara potrjechene
Budyšin (SN/at). Mjez dźesać procentualnje na wobydlerstwje najbóle wot koronainfekcijow potrjechenymi komunami w Budyskim wokrjesu je šěsć serbskich: Ralbicy-Róžant, Njebjelčicy, Pančicy-Kukow, Chrósćicy, Worklecy, Radwor a město Kulow. To wuchadźa z informacije, kotruž je krajnoradny zarjad wjesnjanostam, měšćanostam a wokrjesnym radźićelam připósłał. Na to so zepěrajo namołwja wokrjesny radźićel CDU a předsyda Domowiny Dawid Statnik: „Smy hordźi, zo je zhromadnosć generacijow pola nas intaktniša hač druhdźe. Tohodla njesmě nam wšojedne być, hdyž njewobhladniwe wobchadźenje z pandemiju dźeń a wjace našich swójbnych, přećelow a znatych wohroža.“
Wot minjeneho pjatka hač do wčerawšeho zwěsćichu w Budyskim wokrjesu 453 nowych natyknjenjow, ličba zemrětych je wo dalši pad na 37 přiběrała, kaž krajnoradny zarjad zdźěli. Schorjenych je 1 791 wosobow, 58 (+14) z nich stacionarnje lěkuja. W Zhorjelskim wokrjesu registrowachu w samsnym času 344 nowoinfekcijow, cyłkownje 1 624. Ličba stacionarnych pacientow je na 126 rozrostła.
Krótkopowěsće (09.11.20)
Nowostce LND tež jako e-book
Budyšin. Lětsa w Ludowym nakładnistwje Domowina wušłej wěcna kniha Cordule Ratajczakoweje „Nowa swoboda?“ a powědančko Angele Stachoweje „Slědne dny strowja“ w delnjoserbskim přełožku předležitej nětko tež jako e-bookaj. Elektroniskej wudaći hodźitej so w shopje LND pod www.domowina-verlag.de skazać.
Nowe hudźbne widejo
Budyšin. Najnowši widejowy klip „Krabat“ serbskich hiphoperow z mjenami Lil Handrij, FloJ & SMAN je po swojej wčerawšej premjerje na Youtubekanalu „Serbska hduźba“ dotal něhdźe 1 100 přihladowarjow přiwabił. Produkciju běštej Załožba za serbski lud a kampanja „So geht sächsisch“ spěchowałoj.
Partitura Mětška wozjewjena
Berlin. Hudźbne nakładnistwo Edition Roy, specializowane na publikowanje referencnych zynkonošakow a notow přewažnje noweje hudźby, je partituru serbskeho komponista Jura Mětška wudało. Kruch „Quatuor noir“ je twórba za braču, cello a kontrabasaj, kotruž bě Mětšk w nadawku Budyskeho kulturneho zarjada spisał. Muzikalije su mjez druhim w Smolerjec kniharni na předań.
