Policija (30.04.20)

štwórtk, 30. apryla 2020 spisane wot:

Na awtodróze prasnyło

Słona Boršć. Zranjeny šofer a dołhi rynk čakacych awtow bě wuslědk wobchadneho njezboža wčera wječor na awtodróze A 4 mjez Hornim Wujězdom a Słonej Boršću. Krótko po 20 hodź. zrazy Škoda z wulkej spěšnosću do transportera, kotrehož wodźer zhubi na to kontrolu nad wodźi­dłom. Wón zajědźe do lěweho wobhrodźenja a zwróći, na zbožo pak so njezrani. Wodźerja Škody dyrbjachu ­porno tomu do chorownje dowjezć. ­Awtodróha do směra na Zhorjelc bě hač do 22.30 hodź. zawrjena.

Podłu hatow so wuchodźować

štwórtk, 30. apryla 2020 spisane wot:
Za čas koronapandemije je dale a wjac ludźi w přirodźe po puću. Kedźbliwje so ­wuchodźujo móžeš sej tu abo tamnu zajimawostku wotkryć. Při wotpušćenych ­Minakałskich hatach na přikład, kaž wrobliki wulke rěčne kuliki (Flussregenpfeifer, na wobrazu) w błóće za cyrobu pytaja. Z wulkim zbožom wuhladaš tam samo šćejcy (kibuty) a lěsne wodoměrjaki (Waldwasserläufer). Foto: Andreas Baumgärtel

Z wěstotnym wotstawkom

štwórtk, 30. apryla 2020 spisane wot:

Njeswačanska gmejnska rada so na hinašim městnje schadźowała

Njeswačidło (JK/SN). Tučasne hygieniske postajenja a naprawy, swoju a strowotu druhich škitać, su Njeswačanscy gmejnscy radźićeljo na wutornym posedźenju w tamnišim domje wohnjoweje wobory kruće dodźerželi. Kaž wjesnjanosta Gerd Schuster (CDU) našemu wječornikej zdźěli, sedźachu radźićeljo w předpisanym wotstawku a mějachu škit za nós a hubu. Přiwšěm móžachu wo mnohich temach, kotrež stejachu na dnjowym porjedźe, porjadnje wuradźować.

Dojednać móžachu so na to, pokryw wšelakich gmejnskich dróhow ponowić a skrućić. Wosebje w Šešowje a Holešowje smědźa so wobydlerjo na lěpši a runiši powjerch dróhow wjeselić. W Holešowje před Pěčkec zahrodnistwom chce gmejna Njeswačidło betonowu jězdnju tak wukmanić, zo hodźi so lěpje wužiwać. Tež hdyž njehodźa so wšitke ko­munalne puće ponowić, su radźićeljo spokojom a móžachu nadawk přepodać w serbskich gmejnach derje znatej specialnej firmje Kutter z Plaue, kotraž dróhi w dobrej kwaliće zhotowja.

Z originelnym plakatom wuprajeja někotři Budyscy měšćanscy radźićeljo CDU zjawny dźak tym, kotřiž jako póstownicy, ­kubłarjo a přistajeni w medicinskim wobłuku w tuchwilnej krizy spušćomnje swoje dźěło wukonjeja. A kaž so to za sprjewine město słuša, so tež serbskorěčnje dźakuja. Foto: SN/Hanka Šěnec

Wužiwajće škit!

štwórtk, 30. apryla 2020 spisane wot:
Budyskej wokrjesnej hamtskej lěkarce dr. Janje Gärtner překročenje kompetencow wumjetować, dokelž je ludźi namołwjała sej hubu a nós škitać, mam za směšne. Pozadk namołwy dźě njeje ludźi dračować, ale za njej tči starosć wo strowotu wšitkich wobydlerjow wokrjesa. Byrnjež sam najwjetši fan tajkeho škitneho zakryća njebył, přiznawam, zo stej zažny rozsud za krute škitne naprawy kaž tež zažna namołwa lěkarki – wona bě hižo 3. apryla k tajkemu škitej namołwjała – sobu wuskutkowałoj, zo wokrjes Budyšin hladajo na ličby z koronu inficěrowanych relatiwnje derje steji. Hłowna powěsć jeje namołwy tež dźensa hišće płaći: Kóždy škit, tež hdyž najwyše naroki njespjelnja, je lěpši hač žadyn. Chcemy-li so bórze zaso „normalnje“ w swojim wobswěće pohibować, dyrbimy so dale po škitnych wukazach měć. Nadźijam so tuž, zo kompetency njepřekročam, hdyž namołwjam: wužiwajće dale škit za hubu a nós! Janek Wowčer

Prěni króć w swojich stawiznach njeje so Choćebuska zhromadźizna měšćanskich zapósłancow wčera wječor w měšćanskim domje schadźowała, ale postajenjow koronapandemije dla w měšćanskej hali. Ta bě za posedźenje ekstra spřihotowana. Na połdra­metrowski wěstotny wotstawk běchu dokładnje dźiwali. Škit za hubu a nós pak wšitcy njemějachu. Foto: Michael Helbig

Město změje „hoberski problem“

štwórtk, 30. apryla 2020 spisane wot:

Koronapandemije dla schadźowaše so Budyska měšćanska rada wčera w Melanchthonowym gymnaziju. Tamniša wjacezaměrowa rumnosć pak je so jako njekmana za tajke zarjadowanja wopokazała, předewšěm swojeje špatneje akustiki dla.

Budyšin (CS/SN). Pjenježne wuskutki koronakrizy na sprjewine město běchu jedna z hłownych temow na wčerawšim posedźenju Budyskeje měšćanskeje rady a wuwabichu wobšěrnu diskusiju. Financny měšćanosta dr. Robert Böhmer pokaza na přewšo chutne połoženje. Runočasnje pak wón rjekny, zo njemóže město problemy rozrisać, za kotrejž stej wokrjes a Swobodny stat Sakska zamołwitej. Hdyž dalše dawkowe dochody wotpadnu, změje město Budyšin „hoberski problem“. „Na kóždy pad płaći zasada, zo njemóžemy pjenjezy wudawać, kotrež tu njejsu“, Böhmer podšmórny.

Krótkopowěsće (30.04.20)

štwórtk, 30. apryla 2020 spisane wot:

Ličba natyknjenych přiběrała

Budyšin/Zhorjelc. W Budyskim wo­krjesu bě wčera 351 (+3) z koronawirusom inficěrowanych. Aktualnje je hišće 91 wosobow schorjenych, z kotrychž sydom w chorowni lěkuja. Z dalšimi pjećomi su so dotal 248 wustrowili. W Zhorjelskim wokrjesu bě wčera 258 (+2) natyknjenych. Tuchwilu je 85 wosobow schorjenych, mjez nimi dwě w chorowni. 153 ludźi je so wustrowiło.

Rozrost bjezdźěłnosće zwěsćili

Budyšin. We wuchodnej Sakskej je kónc apryla 18 593 bjezdźěłnych, 1 147 wjace hač w měrcu. Přirost wučinja 6,6 procentow. Kwota bjezdźěłnosće w druhim měsacu koronapandemije ma samsnu hódnotu, kaž Budyska wotnožka agentury za dźěło dźensa zdźěli. Konkretne přičiny wuwića njejsu mjenowane.

„Holaskec“ z Chrósćic dobyli

Budyšin. Serbski poskitk tydźenja w syći (SPTWS) su sej tónraz štyrjo Donatec bratřa z Chrósćic „Holaskec“ dobyli a smědźa so nad mytom sto eurow wjeselić. Z jednorymi srědkami poskićeja woni kreatiwne a lóštne wobrazowe hódančka w socialnej syći, kaž jury SPTWS dźensa na Youtube wozjewjenym wideju hódnoći.

Tigry wo klasu postupili

Hodźij (CK/SN). W Hodźijskim wjesnym dźělu Debiškow (Döbschke) chcedźa dodźeržane roły kanalizacije z nowymi wuměnić. To je gmejnska rada na swojim zašłym posedźenju z wjetšinu hłosow schwaliła. Projekt je zhromadna naprawa gmejny Hodźij z Budyskimi wokrjesnymi zawodami, kotrež su za ponowjenje wodowoda zamołwite. Twarske dźěła su hromadźe z wokrjesnymi zawodami wupisali, rozdawać pak móža je samostatnje. Dwanaće firmow bě so wo trěbne podłožki požadało, wosom z nich swój poskitk woteda. To je „porjadne wob­dźělenje“, měnješe nawoda techniskeho zarjada gmejny André Laue.

Kóšty za podźěl Hodźijskeje gmejny bě planowanski běrow na 172 000 eurow trochował. Ze 144 000 eurami bě Zhorjelska firma najlěpši poskitk wotedała, tak zo so radźićeljo tež za nju rozsudźichu. Gmejna so wo 50procentowske spěchowanje prócuje, spěchowanske přizwolenje za 103 000 eurow, w kotrychž su nimo twarskich tež planowanske wudawki zapřijate, pak hišće njepředleži. 50 000 eurow za wodowód je porno tomu naležnosć wokrjesnych zawodow.

Policija (29.04.20)

srjeda, 29. apryla 2020 spisane wot:

Spěšnosć měrili

Čorny Chołmc. Často zastojnicy wobchad kontrolowaceje słužby tele dny spěšnosć nadróžneho wobchada měrja. Předwčerawšim stejachu woni ze swojej techniku mjez druhim w Małym Wjelkowje, na statnej dróze S 94 při wotbóčce do Žuric, w Gersdorfje, Großharthauwje a Běłych Noslicach (Weißnaußlitz). Na Wjesnej w Čornym Chołmcu přepruwowachu w běhu jedneje hodźiny 27 šoferow. Štyrjo z nich jědźechu spěšnišo hač dowolene 50 kilometrow na hodźinu.

Serbska debata

nowostki LND