Naprašowanja za kalkulaciju
Kak maja so popłatki za rjedźenje wopłóčkow wotličić, to bě wčera hłowny dnjowy dypk zhromadźizny wopłóčkoweho zaměroweho zwjazka Při Klóšterskej wodźe w Porchowje.
Porchow (AK/SN). Zaměrowy zwjazk za wopłóčki Při Klóšterskej wodźe (AZV) da swoje wobličenje popłatkow wróćo sahajo wot lěta 2009 wot eksterneje firmy pruwować. Na to dojednachu so čłonojo zwjazkoweje zhromadźizny AZV w Porchowje. Přičina rozsuda běchu kritiske naprašowanja čłonow zhromadźizny kaž tež z wobydlerstwa. Zhromadnje z Budyskej poradźowanskej firmu KOGIS a z komunalnym zarjadnistwom jako prawniskim dohladom chcedźa problem rozrisać.
Jednaćel KOGIS Jens Sterzel rozłoži wčera wuslědki dodatnje wobličenych popłatkow za lěta 2009 do 2012 kaž tež kalkulaciju za lěta 2013 do 2015. „Pozadk je, wobličić jenake popłatki za zjawne wotstronjowanje wopłóčkow. Při tym płaćitej principaj solidarnosće a zarunanja kóštow“, wón podšmórny. Jeho facit: Wot lěta 2009 žadany zakładny popłatk wosom eurow na bydlensku jednotku a wot lěta 2013 płaćiwy mnóstwowy popłatk 3,90 eurow na kubikny meter wopłóčkow stej w porjadku.
Serbske wjesne mjena přelěpjene
Krótkopowěsće (01.12.15)
Protestuja w sakskej stolicy
Drježdźany. Sobudźěłaćerjo twarca chipow Globalfoundries chcedźa sobotu w Drježdźanach přećiwo planowanemu wottwarej dźěłowych městnow demonstrować, kaž industrijne dźěłarnistwo za hórnistwo, chemiju a energiju IG BCE zdźěli. Předewzaće bě spočatk oktobra připowědźiło, zo chcyło 800 z cyłkownje 3 700 městnow šmórnyć.
Mjenje bjezdźěłnych w EU
Luxemburg. Bjezdźěłnosć we 18 krajach europasma je so w oktobru na 10,7 procentow znižiła a je tak na najnišim stawje po januaru 2012. We wšěch 28 statach EU bě wona w oktobru z 9,3 procentami tak niska kaž wot septembra 2009 nic. Tole zdźěla statistiski zarjad Eurostat. Najmjenje bjezdźěłnych je w Němskej (4,5 proc.) a Čěskej (4,7), najwjace w Grjekskej (24,4) a Španiskej (21,6).
Wjace pjenjez ratarjam
Frankfurt n. M. Dźěłarnistwo ratarjow IG twar, ratarstwo a wobswět chcyło wyše mzdy za jedyn milion sobudźěłaćerjow němskeho ratarstwa přesadźić. W dźensa zahajenych jednanjach z dźěłodawarjemi žada sej dźěłarnistwo wo 5,9 procentow wyšu mzdu kaž tež lěpše strowotniske zastaranje a zawěsćenje rentow, kaž wone zdźěla.
Policija (01.12.15)
Budyšin. Póndźelu tydźenja njebě so 15lětna do swojeho bydlenskeho přebywanišća w Budyšinje wróćiła. Wot toho časa policija w blišej wokolinje za njej pytaše. Wčera je holcu strowu w jednym bydlenju w měsće našła.
Kamjenc. Byrnjež tež wčera wječor w Budyskim wokrjesu wětřikec hólcy zachadźeli, njejsu telko škody načinili kaž w nocy do toho. Tak je wichor mjez Haselbachtalom a Halštrowom na S 105 štom powalił. Mjez Němskimi Pazlicami a Smjerdźacej do směra na Pěskecy ležachu wulke hałzy na puću.
Dešćik ludźi njewottrašił
Dohodowne wiki na mnohich městnach z kulturnymi poskitkami
Njebjelčicy (HS/SN). Runja zašłym lětam mějachu čłonojo Njebjelčanskeho domizniskeho towarstwa tež lětsa režiju za adwentne wiki we wsy. Za přihoty dźakowachu so jim wjesnjenjo z bohatym wopytom. Tež njepřestajny dešć ludźi wčera njewottraša; sej na parkowanišćo na nawsy dóńć. Tam dožiwichu program pěstowarskich dźěći. Mjez připosłucharjemi bě tež někotryžkuli wopytowar z Kamjenca. Mali akterojo wšak čakachu hižo njesćerpnje na rumpodicha, kiž tež woprawdźe přijědźe. Jemu přeradźichu swoje přeća a dóstachu za to darik. Nimo horceho wina a praženych kołbaskow poskićachu w Njebjelčicach tež někotryžkuli samozhotowjeny hodowny darik.
Nětko zaso tydźensce do hospody
Krótkopowěsće (30.11.15)
Wo wliwje němčiny
Budyšin. Zběrnik „Wliwy němčiny na gramatiske struktury słowjanskich rěčow“ je wušoł. W nim jewja so přinoški 30 rěčespytnikow z Němskeje, Pólskeje, Čěskeje, Šwicarskeje a Słowjenskeje k tutej temje na konferency 2011 w Choćebuzu. Dr. Sonja Wölkowa a dr. Hauke Bartels staj knižku zestajałoj. Němčina je jedna z najwažnišich kontaktnych rěčow za słowjanske ludy.
Nowe pomjenowanje referata
Podstupim. W zwjazkowym ministerstwje za wědomosć, slědźenje a kulturu su mjeno referata 14 na „Naležnosće nabožinskich zhromadźenstwow, Serbow a delnjoněmčiny“ změnili. Wopřijeće Serbja so nětk oficialnje jewi, zdobom skedźbnja na tematisce wusko z delnjoserbšćinu zwisowace mjeńšinowe spěchowanje delnjoněmčiny, kaž ministerstwo zdźěla.
Kamjenski zwjazk počesćeny
Policija (30.11.15)
Ohorn. K hašenju su dźensa rano wobornikow na awtodróhu A 4 wołali. Tam bě so z dotal njeznateje přičiny konjacy transporter krótko před Ohornskej wotjězdku palić započał. Pólske awto z připowěšakom bě do směra na Zhorjelc po puću. Šoferej so poradźi, na prawym boku awtodróhu zastać a w poslednim wokomiku tež hišće konjacy připowěšak wotpowěsnyć. Přiwšěm dyrbješe bjezmócny přihladować, kak so jeho přezpólne jězdźidło dospołnje wupali. Wohnjowi wobornicy drje płomjenja zhašachu, awto pak wuchować njemóžachu. Na zbožo so ani šofer ani transportowany kóń zraniłoj njejstaj. Awtodróha do směra na Zhorjelc bě hodźinu zawrjena.
Boži narodk kaž dźěl cyrkwje
Eberhard Zobel před 30 lětami nowe drjewjane figury stworił
Smječkecy (AK/SN). Mjeztym zo w mnohich cyrkwjach Hornjeje Łužicy Bože narodki hakle patoržicu natwarjeja, je Smječkečanski hižo cyły adwent widźeć, nic direktnje w cyrkwi, ale w předrumnosći. „Chcych něšto stworić, štož wšitkich w adwenće zwjesela. Chcych pokazać, zo móžeš tež z jednorymi srědkami a z jednorymi formami tajki narodk zhotowić“, měni Eberhard Zobel z Kamjenca, wot lěta 1984 čłon předsydstwa Smječkečanskeje ewangelskeje wosady. Před 30 lětami je wón figury z chójnoweho a šmrěkoweho drjewa zhotowił.
Njemóža rozšěrjenju kormjernje zadźěwać
Radźićeljo chcedźa smjerd a wobchad redukować
Róžant (aha/SN). Ze saněrowanjom a powjetšenjom Ralbičanskeje kormjernje swini mějachu so čłonojo gmejnskeje rady Ralbicy-Róžant na swojim wčerawšim posedźenju znowa zaběrać. Hačrunjež běchu woni planowane předewzaće jednaćela kormjernje Hagena Roßmanna zas a zaso wotpokazowali, ma Budyski krajnoradny zarjad předwidźane twarske podłožki nanajpozdźišo klětu w januaru wupołožić.
Spočatk lěta 2014 bě nawodnistwo ratarskeho předewzaća próstwu k nastajenju wobtwarjenskeho plana zapodało. Gmejnska rada je loni w aprylu wo tym wuradźowała a předwidźane změny wotpokazała. Spočatk meje tohole lěta so radźićeljo z planowanymi podłožkami wospjet zaběrachu. Ratarske předewzaće chce na městnje třoch starych chlěwow tři nowe natwarić. Tamne štyri maja so modernizować a tak wuhotować, zo su imisiske předpisy dodźeržane. Dale natwarja juchowej jamje, dosahacej za mnóstwo juchi dźewjeć měsacow. Tuchwilu plahuja w Ralbicach 6 900 swini, po ponowjenju a powjetšenju ma kapacita na 11 400 skoćatow rozrosć.
