Seniorojo škotuja
Kozarcy. Přichodny škotowy turněr serbskich seniorow wotměje so jutře, 28. nowembra, w Kozarčanskim hosćencu „Při kupjeli“. Započatk budźe kaž stajnje w 14 hodź. Nowačkojo su wutrobnje witani. Posledni lětuši turněr přewjedu 12. decembra w Budyšinje.
Wotewru wustajeńcu
Budyšin. Spěchowanski kruh za serbsku ludowu kulturu přeprošuje wšitkich zajimcow na wotewrjenje wustajeńcy „Dwórnišćo pisanosće“ jutře, wutoru, w 17 hodź. do Budyskeho Serbskeho domu. Wustajeńca pokazuje wuslědki molerskeje dźěłarnički lětsa w Radworju.
Policija (27.11.23)
Diesel kradnyli
Jaseńca. We wulkim stilu kradnyli su njeznaći w nocy na sobotu w Jaseńcy. Z nakładneho awta a třoch bagrow wotklumpachu woni dohromady něhdźe 1 300 litrow diesela. Dale pokradnychu wšelki grat. Škoda wučinja 3 300 eurow.
Njewuwabja jeno zahoritosć
Rozdźělne měnjenja k wutwarej zwjazkoweje dróhi B 156
Zdźěr/Čelchow (UM/SN). „Wjesołe poselstwo“ mjenowaše Sakska krajna direkcija w meji 2023 wobzamknjenje planoweho zwěsćenja za wutwar zwjazkoweje dróhi B 156 wot Brězynki hač do Zdźěrje. Předewšěm dojězdźowarjo, ale tež pěškojo, kolesowarjo a ludźo z handicapom bychu wot dróhotwara profitowali, tehdy prezidentka Regine Kraushaar zdźěli.
Wšudźe pak so nad planowanym dróhotwarom njewjesela. Předewšěm ratarske zawody skorža, zo wjetše mnóstwo polow a łukow zhubja. Nimo Zdźěrjanskeje Holanskeje farmy su tež wjacore mjeńše zawody potrjechene. „Bjez priwatneho wobsydstwa so zaměry twarskeje naprawy docpěć njehodźa“, krajna direkcija k tomu zwěsća. Druhe warianty drje su pruwowali, wone pak wopokazachu so jako njekmane. Krajna direkcija přilubi, zo wšitke přijězdy na pola a łuki wobchowaja abo je po twarskich dźěłach zaso připrawja. Žadanju Zdźěrjanskeje Holanskeje farmy, přijězd k jeje kuchni a k składej běrnow za wšón čas twarskich dźěłow zaručić, wotpowěduje krajna direkcija z prowizoriskim přijězdom.
Lutk jako „klimowy lěpjer“
Čas žnjow postaja nazymu. W tymle počasu ludźo na kraju z radosću a dźakownosću žně swjeća. „Hłowne dźěła w ratarstwje su dokonjane a wuslědki su wunoški“, měni Dietmar Koark, wot spočatka lěta 1994 předsyda tradiciskeho towarstwa Halštrowski kraj. Na Horach su lětsa 41. běrnjacy bal swjećili.
Towarstwo je swjedźeń intensiwnje přihotowało. Zarjadowanje je jedyn z wjerškow w běhu lěta. Mnozy hosćo woblěkaja so k tomu serbsku narodnu drastu. Hižo 25 lět serbska dujerska kapała Horjany běrnjacy bal hudźbnje z wulkim wjeselom přewodźa.
Lětuša tema běrnjaceho bala bě přihot a přepodaće wěna (Aussteuer) młodemu njewjesćinskemu porej. Na wěnje dźěłachu swójby něhdy hižo lěta do kwasa. „Młode holcy dóstachu dźěle wěna k wšelakim składnosćam wot swojich staršich a přiwuznych, jako dar“, Dietmar Koark wuswětla. „Na druhim dnju kwasa so wěno na wulke žnjenske wozy kładźeše a do domu wožeše, w kotrymž mějachu młodźi bydlić.“ Wjesni wobydlerjo wobdźiwachu meble, křinje, kołwrót a předewšěm poslešća. Tež drohotne drasty k tomu słušachu.
W nuznym padźe dale zhromadnje
Běła Woda (AK/SN). Město Běła Woda a susodna gmejna Wuskidź (Weißkeißel) kaž tež Krušwica (Krauschwitz) maja dale zhromadnu wjesnu škričkowansku stražu za alarměrowanje w nuzowej situaciji abo při katastrofach. K tomu je so měšćanska rada na swojim zašłym posedźenju wuprajiła. Tuž su wotpowědne dorěčenje z Wuskidźu a Krušwicu jednohłósnje wobzamknyli.
Wjesna škričkowanska straža ma centralnu wuchowansku stražu we Wojerecach wolóžić. Nadawk tajkeje straže w Běłej Wodźe je, přirjadowane mocy, kotrež z nawodneje straže dochadźeja, koordinować a rozdźěleć. To potrjechi na přikład škody při sylnym dešću, při wysokej wodźe, wichoru, hdyž milina na wjetšim arealu wupadnje, wjetše wohenje w lěsu abo łukach kaž tež wulku ličba zranjenych po njezbožu w tamnišej kónčinje. Wjesna škričkowanska straža, tak rěka w podłožkach k wothłosowanju, wobsteji zhromadnje z woběmaj gmejnomaj hižo z lěta 2019.
Za natwar 640. Wjacławskich wikow w Budyšinje je drje hišće ...
Krótkopowěsće (27.11.23)
Projektaj wuznamjenjenej
Mittweida. We wobłuku Sakskeho statneho myta za twarjenje we wjesnych kónčinach bu předwčerawšim mjez druhim Hórčanski Smolic statok wuznamjenjeny. Młoda swójba je sej tam přikładnje konjenc na bydlenski dom wutwariła. Tež ponowjeny tykowany dom bjezposrědnje Njeswačanskeje cyrkwje je wuznamjenjenje dóstało.
Předstaja wuslědki ewaluacije
Budyšin. Wědomostnicy Serbskeho instituta su we wobłuku nowinarskeje konferency dźensa wo přednoškach na zajutřišim, srjedu, so wotměwacym Institutnym dnju informowali. Zarjadowanje budźe w Serbskim domje a změje jako jedne temowe ćežišćo „Wubrane wuslědki ewaluacije koncepta ,2plus‘ a wliw wobchadneje rěče na komunikatiwnu kompetencu šulerjow 9. lětnika“.
Bankowe konta wozjawnić
Na knižnu premjeru
Budyšin. Smolerjec kniharnja w Budyšinje přeprosy na knižnu premjeru. Štwórtk, 30. nowembra, w 19 hodź. prezentujetaj přełožowarka Dorotheja Šołćina kaž tež přełožowar a wudawaćel Benedikt Dyrlich knihu „Posledni sněh/Der letzte Schnee“. Awtor knihi, kotraž je w nakładnistwje Pop w Ludwigsburgu wušła, je nakładnik a basnik Traian Pop Traian.
Wustajeja rasowe nukle
Wulke Ždźary. Kaž kóžde lěto přewjedźe Wulkoždźarowske towarstwo plahowarjow rasowych nuklow w nazymje wustajeńcu najwšelakorišich družin rasowych nuklow. Zajimcy dožiwja ju jutře, sobotu, wot 9 do 17 hodź. a njedźelu wot 9 do 16 hodź. we Wulkoždźarowskim hosćencu „K winowej kići“. K tomu su sej tež plahowarjow z blišeje wokoliny přeprosyli, tak zo móža wopytowarjam šěroku paletu nuklacych družin prezentować. Zajimcy su wutrobnje witani.
Wopominaja wopory wójnow
Policija (24.11.23)
Strašnu ideju měł
Słona Boršć. Wodźer nakładneho awta je srjedu wječor na awtodróze A4 mjez Słonej Boršću a Hornim Wujězdom strašnu přestawku na nakromnym pasmje awtodróhi zapołožił. Wón bližeše so swojej předpisanej přestawce. Dokelž pak bě wotpočnišćo pola Słoneje Boršće z nakładnymi awtami přepjelnjene, měješe šofer žiwjenjastrašnu ideju, swoje jězdźidło bjez wobswětlenja na nakromnym pasmje parkować. Wobsadka policajskeho awta muža wubudźi a k parkowanišću zwonka awtodróhi přewodźa.
Symbole w prěnim sněze
Biskopicy. Prěni sněh su njeznaći w nocy na srjedu w Biskopicach znjewužiwali a na awće zakazane symbole do njeho mórali. Policija je wšitko zaso wotstroniła.
Čestnohamtskich sej wažić
Radźićeljo wo zarunanju dobrowólneje dźěławosće wuradźowali
Róžant (JK/SN). Čestnohamtsce skutkowacy maja w kóždej gmejnje wulki podźěl na derje fungowacych towaršnostnych poměrach kaž tež na čiłym zhromadnym kulturnym a sportowym žiwjenju. Zwjetša skutkuja woni za ćichim a bjez wulkich słowow, ale často tež bjez wulkeho zjawneho připóznaća a hódnoćenja. Zo by so jich dźěło na dobro wšitkich tež w gmejnje Ralbicy-Róžant bóle připóznało a hódnoćiło, gmejnscy radźićeljo na wčerawšim posedźenju jara dołho a intensiwnje wuradźowachu.
