Myto do Slepoho
Drježdźany. Z temu „Gładźarnica Dźěćetko – Die Schleifer Tracht“ staj Elvira Rathner a Hartmut Hantšo ze Slepoho z 1 500 eurami dotěrowane třeće myto w Sakskim wubědźowanju za domizniske slědźenje dobyłoj. Myto su lětsa dwanaty raz spožčili. Dobyćer dósta 3 000 eurow, druhe městno 2 000 eurow. Hobbyjowym slědźerjam přepodadźa čestne wopisma a knižne dobropisy.
Nowe spěchowanske towarstwo
Smochćicy. Za Dom biskopa Bena załožichu přećeljo a spěchowarjo srjedu spěchowanske towarstwo, kotrež ma kubłanske dźěło zarjadnišća podpěrać. Za předsydu su bywšeho rektora dr. Petera-Paula Straubu wuzwolili, za městopředsydku dr. Susannu Hozynu. Widźa swój nadawk předewšěm w tym, być z posołom Domu biskopa Bena w towaršnosći a cyrkwi, kaž dr. Straube wuzběhny.
Do złoteje knihi so zapisał
Ćmowe kaž ebenowe drjewo abo tola radšo w měšeńcy z palizandrom? Z tajkimi nadrobnymi prašenjemi zaběraja so w Dźěwinskim (Groß Düben) ćěsliskim zawodźe Haralda Röscha. Drjewo- a třěchitwarske předewzaće ma nadawk, Šwjelowu bróžnju z Wochoz (Nochten) po pomnikoškitnych předpisach restawrować. Jako pospyt su sobudźěłaćerjo někotre deski rozdźělnje wobarbili. Tak móža sej na restawraciju specializowany planowar Dirk Böhme, farar Daniel Jordanov a čłonojo Wochožanskeho towarstwa Šwjelowa bróžnja lóšo předstajić, kak jednotliwe barby skutkuja.
Cyły rozměr škodow widźeć
Slepo (AK/SN). Cyłkownje 38 wjesnjanostow, měšćanostow, hamtskich direktorow, krajnych radow a dalšich komunalnych zastupnikow Łužiskeho kruha (Lausitzrunde) chce 14. nowembra před zwjazkowym sejmom a Zwjazkowej radu w Berlinje demonstrować. „Chcemy jasne znamjo sadźić za trěbnu strukturnu změnu“, podšmórny Slepjanski wjesnjanosta Reinhard Bork (CDU) na wutornym posedźenju tamnišeje gmejnskeje rady. „Za znajmjeńša 200 wobdźělnikow smy busy skazali.“
Budyšin. Dźěłarnička Serbskeho ewangelskeho towarstwa (SET) nastupajo kubłanje lektorow sobotu, 9. nowembra, na Budyskej Michałskej farje wupadnje. To zdźěli našej redakciji předsyda SET Mato Krygaŕ. Jako přičinu mjenuje wón snadne wobdźělenje. Zdobom skedźbnja na to, zo započnje so sobotne schadźowanje towarstwa hakle w 13 hodź. na Michałskej farje z dźěłarničku „Přichod serbskeho wosadneho žiwjenja“. Ze zhromadnym kofejom a mjezsobnej wuměnu popołdnjo něhdźe napoł štyrjoch zakónča.
Impresije z Južneje Afriki
Łaz. Na swětłowobrazowy přednošk přeproša spěchowanske towarstwo Zetkanišćo Dom Zejlerja a Smolerja we Łazu pjatk, 8. nowembra, do swojich rumnosćow. Łazowčan Wilfrid Sauer rozprawja wo swojich dožiwjenjach na pućowanju po juhu Afriki, mjez druhim w Namibiji a Botswanje. Započatk je we 18 hodź. Towarstwo prosy wo přinošk třoch eurow na wosobu za wudawki.
Přiběrajcy zaso jebarjo po puću
Hodźij. Policija warnuje znowa před jebarjemi, kotřiž spytaja z pomocu wnučkoweho trika staršim ludźom pjenjezy wulišćić. Wobydlerjo běchu jenož wčera sydom tajkich njeskutkow z cyłeho Budyskeho a Zhorjelskeho wokrjesa přizjewili, mjez druhim w Hodźiju, Połčnicy a Hórce pola Niskeje. Při tym paduši rozdźělnje postupuja. Pak so telefonisce pola staršich ludźi přizjewjeja a jako wnučki wudawaja abo jich direktnje na dróze narěča. Policija namołwja tuž k wjetšej kedźbnosći.
Worklecy (JK/SN). W rumnosćach nastawaceho šulskeho horta we Worklecach knježi čiłe žiwjenje. Kaž wjesnjanosta Franc Brusk (CDU) na wčerawšim posedźenju gmejnskeje rady zwurazni, běža wšitke dźěła po planje. Zo njebyštej so wutwar a wuhotowanje twara dlijiłoj, su wčera cyły rjad naslědnych dźěłow přepodali. Tak přewozmje zamkarske dźěła we wobjimje 18 300 eurow metalotwarska firma z Halštrowskeje Hole. Při přehladanju poskitkow so na gmejnje dźiwachu, zo njeběchu so nimale žane bliske a regionalne zawody na wupisanju wobdźělili, tež nic za dalše dźěła při wutwarje. Radźićeljo tukaja, zo maja tam dosć derje pjelnjene nadawkowe knihi a tuž žane swobodne kapacity. Tak bě to tež při rozdźělenju dalšich nadawkow. Kachlicarske dźěła přewozmje Kumwałdske předewzaće, po tym zo bě za 39 000 eurow najlěpši poskitk wšitkich pjeć wo nadawk prócowacych so firmow zapodało. Molerske dźěła za 38 800 eurow přepodachu radźićeljo po pruwowanju firmje z Hamora, wo kładźenje špundowanja w hódnoće 32 000 eurow postara so předewzaće ze Zhorjelca.
Dyrlich w Stróži čitał
Stróža. Ze swojeje knihi „Doma we wućekach“ je Benedikt Dyrlich wčera wječor w Domje tysac hatow w Stróži (Wartha) čitał. Zarjadowar bě přirodoškitna stacija wuchodneje Hornjeje Łužicy. Wo swojich wosobinskich nazhonjenjach w NDR kaž tež po přewróće je so spisowaćel, dramaturg, politikar a bywši šefredaktor Serbskich Nowin po čitanju hišće z nimale 20 zajimcami rozmołwjał.
Njedosahace zawěsćenje
Choćebuz. Zelena liga a Greenpeace kaž tež Klimowa alianca Němskeje krajnej knježerstwje Braniborskeje a Sakskeje doraznje namołwja, zo byštej financne zawěsćenje brunicowych naslědnych kóštow hnydom zaručiłoj. Wuchadźišćo su nowe wědomostne přepytowanja, po kotrychž njejstej tak mjenowanej profylaktiskej dojednani krajow z koncernom LEAG kmanej naslědne kóšty zawěsćić.
Hač namołwa pomha?
Njebjelčicy (SN/JaW). Kulturne towarstwo a gmejna Njebjelčicy kaž tež tamniša młodźina hotuja so na „dźeń rejwanskeje lipy“. Wo tym informuje Njebjelčanski gmejnski zarjad w nowinskej zdźělence. Wotměć chcedźa jón sobotu, 9. nowembra, w Njebjelčanskim gmejnskim centrumje.
Pozadk je, zo chcetej Njebjelčanski młodźinski klub a tamniše Domizniske a kulturne towarstwo runje tajku rejwansku lipu na swjedźenišću wsy sadźić, kaž w zdźělence rěka. „Tak chcemy na tradiciju wjesnych lipow jako zhromadne srjedźišćo gmejny nawjazać. Wosebitosć wšak je zhromadne hudźenje a rejwanje pod respektiwnje tež w štomje, štož zmóžnja wuměłske wodźenje hałzow kaž tež připrawjenje rejwanskich podestow wokoło njeje“, zdźěla sobudźěłaćerka gmejnskeho zarjada Constanze Róblec.