Budyšin. Štóž njeje dotal hišće najnowšu inscenaciju Serbskeho dźěćaceho dźiwadła NSLDź „Mały Muk“ widźał, móže to jutře, srjedu, nachwatać. Młodźi dźiwadźelnicy pokazaja swoju hru w 10 hodź. w Budyskim Dźiwadle na hrodźe.

Wo geologiskich swědkach

Stróža. Geologiske wosebitosće w biosferowym rezerwaće Hornjołužiska hola a haty kaž tež w jeho nakromnych kónčinach steja w srjedźišću přednoška dr. Andreasa Gertha jutře w 19 hodź. w Stróžanskim Domje tysac hatow. Budyski geologa a awtor rozłoži wšelake geologiske procesy, kotrež běchu k dźensnišim powjerchowym formam regiona wjedli. Z najwšelakorišimi geologiskimi swědkami rozprawja referent wo mnohich dramatiskich wuwićach w běhu zemskich stawiznow we Łužicy. Zastup płaći dwaj euraj, potuńšeny jedyn.

Serbski muski chór Delany je minjenu njedźelu wuspěšnje w Čěskej koncertował. Pod nawodom Pawoła Šołty-Kulowskeho su delanscy mužojo na putniskim městnje w Jablonné v Podještědí, hdźež předewšěm swjatu Dźisławu česća, Božu mšu wobrubili. Nimo dźělow łaćonskeje misy delnjošleskeho komponista Maxa Filki zaklinčachu tež wjacore serbske kěrluše. Mjez druhim běštej to „Miłosćiwa, zhladuj na nas“ a „Swěru kralej přisahajmy“ w sadźbje za muski chór, kotrejž bě Jan Bulank stworił. Hakle třeći króć zjawnje zaklinča w tamnišej bazilice swj. Ławrjenca choral jednoho z najwuznamnišich francoskich komponistow Césara Francka „Panis angelicus“ (Chlěb Jandźelow) za muski chór a tenorowe solo, kotrež přewza předsyda cyłka Janek Wowčer. Přewod na pišćelach zaruči organist Njebjelčanskeje wosady a spěchowacy čłon muskeho chóra Delany Chrystof Mikławšk,­ kiž je na kralownje instrumentow za čas swjateho woprawjenja spontanje zahudźił. Tak słyšachu wěriwi – mjez nimi tež Serbja z Łužicy – někotre dalše serbske zynki, mjez druhim pěseń „Ja znaju kraj“.

Jawora (WB/SN). Jako jedna z poslednich je minjenu sobotu tež meja w Jaworje padnyła. Młode swójby běchu wšitko organizowali. Nimale cyła wjes, wot ćěšenka hač k 95lětnemu najstaršemu woby­dlerjej, so nawječor srjedź wsy zetka. W Jaworje bydli něhdźe 120 ludźi, z nich je 32 dźěći do 15 lět. Prjedy hač meja padny, zarejwa šěsć porow w starobje třoch do dźewjeć lět wokoło njeje a wjesnjenjo serbske pěsnje sobu spěwachu. Napjaty bě wokomik za dźěći, jako meja padny. Běh wo wjeršk doby Fabian Hejduška, kiž wuzwoli sej Elisu Belkotec za kralownu. Kóždy na jednym konju sedźo jěchaštaj wonaj hordźe po wsy. Po mejemjetanju móžachu dźěći na swojim wosebitym dnju na skakanskim hrodźe a trampolinje skakać. Zdobom dachu so šminkować. Při praženej kołbasce, napojach a dobrej naledźe so wječor spěšnje miny.

Wšo druhe hač zapróšena a starodawna prezentowaše so njedźelu serbska kultura na Wojerowskim staroměšćanskim swjedźenju. Hordźe předstajištej tam Ćišćanska rejwanska skupina a tamniše dźěćace towarstwo pisany program.

Wojerecy (SiR/SN). Najebać horce wjedro móžeše župan Wojerowskeje župy Marcel Brauman na serbski program lětu­šeho Wojerowskeho staroměšćanskeho swjedźenja wjace hač sto přihladowarjow witać. Jim wón rjekny, zo stej Domowina a Serbstwo najspušćomnišej garantaj w regionje za zdźerženje domizny. Dale župan rozłoži, zo spytaja z nowymi idejemi serbsku kulturu a rěč spěchować a do wšědneho dnja zapřijeć. Tak so iniciatorojo prócuja, w šulach rěč sylnišo spěchować, w susodnej Čěskej za wučerskim dorostom pytać, rěčnu šulu załožić kaž tež nowych kubłarjow a sobudźěłaćerjow za serbske pěstowarnje zdobyć. „Njetrjebamy so w přirunanju z druhimi serbskimi regionami schować, a to njezaleži jenož na našej rjanej Wojerowskej narodnej drasće, kotraž słuša k najrjeńšim“, Marcel Brauman podšmórny.