„Hórnikowa“ njech wostanje
Po druhim posudku pomjenowanja dróhow je nětko wšo jasne
Chrósćicy (SN/mb). Pomjenowanje dróhow na serbske wašnje kaž „Chróšćanska“, „Hłowna“, „Hórnikowa“ abo „Wingerowa“, tak čitaš w třistronskej ekspertizy Serbskeho instituta z pjera dr. Anje Pohončoweje, „móhli w spisownej rěči akceptować“. Chróšćan wjesnjanosta Marko Kliman so wjeseli, zo je tež po doporučenju wědomosće móžno, dróhowe tafle „po ertnym wašnju“ popisać.
Nowa atrakcija w Choćebuzu
Dalekubłanje sekretarkow z LUCIJU
Krótkopowěsće (04.05.23)
Habeck přewozmje patronatstwo
Flensburg. Za koparske europske mišterstwo narodnych mjeńšin Europeadu 2024 w němsko-danskim pomjeznym kraju přewozmje němski wicekancler a zwjazkowy minister za hospodarstwo a škit klimy Robert Habeck patronatstwo. To je zarjadowaca organizacija FUEN wčera zdźěliła. Politikar Zelenych a rodźeny Lübeckčan bydli w Flensburgu, wón zastupuje tamniši wólbny wokrjes 1 tuchwilu w zwjazkowym sejmje.
Choćebuska šansoneta w Halle
Halle nad Solawu. Na 18. festiwalu Women in Jazz, kotryž bu wčera w Halle nad Solawu zahajeny, prezentuje so přichodnu wutoru mjez druhim delnjoserbska spěwarka Lena Hauptmann ze swojim duwom LeDazzo. Lena Neumann, z kotrejž Hauptmann zhromadnje w triju Die Lenas hudźi, ma lětsa šansu na wuznamjenjenje we wobłuku dorostoweho wubědźowanja „Next Generation“.
Planuja Rudne horiny škitać
35 metrow wysoko štomy wurězał
Dujerska hudźba na „žiwym městnje zetkawanja“
Mały Wjelkow (CS/SN). Lědma hdy je Małowjelkowska zahroda sotrownjow telko žiwjenja wuhladała, kaž štwórtk wječor zańdźeneho tydźenja! Z gmejny a wokoliny běše syła wopytowarjow přišła, zo by bórzomne wozrodźenje historiskeho twarskeho ansambla woswjećiła. Před 253 lětami běchu Ochranowscy bratřa zakładny kamjeń za prěni twar połožili, w kotrymž žony wosady – sotry – hromadźe bydlachu a dźěłachu. Hakle njedawno je europski pomnikoškitny zwjazk Europa Nostra ansambl sotrownjow do skupiny sydom najbóle wohroženych europskich twarskich pomnikow přiwzał. Z tym je wón wobstatk kolektiwneho pomjatka Europy. Spěchowanske towarstwo za Małowjelkowske sotrownje jara zwjesela, zo je financowanje za nuzne saněrowanje twarow zawěsćene: dohromady 445 000 eurow dóstanje wot Zwjazka kaž tež kraja Sakskeje.
Dwórnišćo z originelnej symbiozu
Běła Woda (AK/SN). Běłowodźanske dwórnišćo ma so stać z „kulturnym a wobydlerskim dwórnišćom“. Wone ma přichodnje měšćansku biblioteku, serwis železnicy, turistisku informaciju, bistro a kulturne rumy zjednoćić. „Zwisk dwórnišća a biblioteki je originelna symbioza a městnosć wobohaća“, podšmórny architektka Ina Greifenhagen ze społnomócnjeneho planowanskeho běrowa „Architekten Dresden“ zańdźenu srjedu na posedźenju měšćanskeje rady.
Projekt financuje Zwjazk a komuna. K 95 procentam wužiwa so spěchowanje ze zakonja za přewod změny strukturow. Pjeć procentow kóštow ma město Běła Woda přewzać. „Srědki zwjazka su přilubjene“, architektka rozłoži. W juliju chce město prěnje nadawki wupisać. W oktobrje ma so twar zahajić. Zaměr je, nowe dwórnišćo w aprylu 2025 wotewrěć.
Policija (03.05.23)
Parašutist znjezbožił
Wojerecy. K njewšědnemu zasadźenju wołachu policiju předwčerawšim připołdnju we Wojerecach. Tam bě na křižowanišću Stara Berlinska dróha/Einsteinowa parašutist znjezbožił. 54lětny sportowc bě z dotal njeznateje přičiny ze swojim parašutom najprjedy do štoma a na to na zemju padnył. Při tym so wón ćežko zrani, tak zo dyrbjachu jeho do chorownje dowjezć. Jeho wuhotowanje nětko na techniske njedostatki pruwuja.
Wobornicy so dźakuja
Róžant. Dobrowólne wohnjowe wobory zarjadniskeho zwjazka Při Klóšterskej wodźe a susodne wobory swjeća pjatk, 5. meje, dźaknu Božu mšu składnostnje swjedźenja swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wobornicy kaž tež hosćo su k tomu přeprošeni. Lětuši organizator Božeje mšě je Worklečanska gmejnska wohnjowa wobora.
Duwo zahudźi z hosćom
Smochćicy. Přichodne zarjadowanje w rjedźe Smochčanske jewišćo wotměje so sobotu, 6. meje, w 19.30 hodź. w Smochčanskim kubłanišću swjateho Bena. Tam zahraje jazzowy duwo Focus z Aninu Batz (spěw) a Janom Brězanom (gitara) kaž tež z hosćom Philippom Adamom (gitara). Młodźi wuměłcy prezentuja nimo jazza a popa tež soul, funk a blues. Koncert wotměje so w bróžni. Zastup je darmotny, organizatorojo proša wo dar za zarunanje wudawkow.
„Wandalizm Serbam napřećo“
Worklečanska šulska meja powalena a přidatnje hišće rozrězana
Worklecy (MG/SN). Zo so w Serbach hdys a hdys meje na wsach dočasnje podrězuja abo powaleja, drje nikomu nowum njeje, wšako słuša to tež někak k nałožkam kołowokoło meje k tomu. Wosebita šamałosć pak sta so nětko we Worklečanskej šuli. Tam běchu šulerjo 9. lětnikow minjeny pjatk pletwu a wěnc wili a na to meju swjatočnje stajili. W nocy na sobotu njeznaći meju powalichu. Po wšěm zdaću jim to hišće njedosahaše, přetož w nocy na 1. meju skućićeljo meju tež hišće srjedźa rozrězachu.
Šulerjo a wučerjo po wuprajenju šulskeje nawodnicy Diany Šołćineje „za to žane zrozumjenja nimaja a su šokowani“. Za njemało wučerjow powěsć wo rozrězanej meji swjatk prěnjeje meje porjadnje skazy, kaž wona dale praji. Tež wjesnjanosta Clemens Poldrack je zludany. Wón zdźěli: „Skutk raznje zasudźuju. To je wandalizm Serbam a wosebje šulerjam napřećo.“ Wjesnjanostu wosebje zrudźi, zo so nałožowana próca šulerjow na tak hanjace wašnje wonječesći.
