Krućiši škit ptačkow a wudźenje hodźitej so zjednoćić
Krajna direkcija Sakskeje je w minjenych lětach wuwiće turistiskeje infrastruktury we Łužiskej jězorinje wobšěrnje spěchowała. To je jeje prezidentka Regina Kraushaar předwčerawšim w Budyšinje potwjerdźiła.
Budyšin (AK/SN). Za projekty w jězorinje steješe dotal dohromady 24 milionow eurow k dispoziciji. Konkretnje při Bjerwałdskim jězoru je krajna direkcija za twar informaciskeho centruma za turistow na Hamorskim přibrjoze jedyn milion eurow, za parkowanišćo za wopytowarjow w Delnim Wujězdźe 80 000 eurow a za naprawu zastarowanja z pitnej wodu a wopłóčki w Klětnom-Jazowje (Klitten-Jasua) za turistiske wuwiće 1,9 milionow eurow přewostajiła.
Krótkopowěsće (27.04.23)
„Bagatelizowana namóc“
Budyšin. Po mjeztym „wosmym zapalerskim nadpadźe“ na twarnišća předewzaća Hentschke Bau kritizuje firma, zo so „pady njekonsekwentnje přepytuja“. Nimo toho hrozytej „tež jednostronskeho a bagatelizowaceho rozprawnistwa w medijach dla nadal permanentna namóc a teror pře twarnišća, mašiny a wosoby“.
Pomałšo po Ochranowje
Lipsk. Po Wojerecach je Ochranow jako druhe łužiske město iniciatiwje „Žiwjenjahódne města a gmejny“ přistupiło. W njej angažuje so aktualnje wjace hač 660 němskich teritorialnych korporacijow (Gebietskörperschaften), reprezentowacych něhdźe 28 milionow wobydlerjow, za „samopostajenje wobmjezowanjow spěšnosće“. Dołhodobny zaměr je „přezcyłne zawjedźenje tempo-30-conow po komunalnym posudźowanju w městach a wsach“.
Hrjebjenjowy puć wotewrěli
Policija (26.04.23)
Jězdźidło z ćěkancami zadźerželi
Zhorjelc. Transporter z něhdźe 29 ćěkancami je sakska policija po přesćěhanju pola Zhorjelca zadźeržała. Zastojnicy chcychu jězdźidło wčera wječor kontrolować, tola 50lětny šofer ćekny, dźensa rěčnik zwjazkoweje policije zdźěli. Po něšto kilometrach zrazy transporter w Markersdorfje do awta policije. Po prěnich dopóznaćach so nichtó njezrani. Po informacijach zwjazkoweje policije jedna so pola ćěkancow wo muži, žony a dźěći ze Syriskeje. Zarjady jich nětko registruja. Jelizo woni wo škit w Němskej proša, dowjezu ćěkancow do wotpowědnych přebywanišćow. 50lětny wodźer transportera pak ma nětko z chłostanskim jednanjom ličić.
Z nałožkom so bliže zaběrać
Wojerecy. Kóždolětnje wotměwaja wobydlerjo wječor do 1. meje w Hornjej Łužicy chodojtypalenje. W Delnjej Łužicy so porno tomu hižo ćichu sobotu po chowanju słónca k tradicionalnemu jutrownemu wohenjej hromadźa. Nałožki z wohenjom předewšěm w kónčinach na wsach pěstuja. Tak skića ludźom často prěnju składnosć, po dołhej zymje so zaso jónu pod hołym njebjom zetkać a zhromadnosć pěstować. Přiwšěm pak su regionalnych rozdźělow na přikład hladajo na ceremoniju, spěwy, hrónčka atd. Wo wotběhach – a nic naposledk tež we wułožowanjach, přednošuje dr. Susanne Hozyna z Budyskeho Serbskeho instituta. W přednošku, kotryž budźe jutře, 27. apryla, we Wojerowskim hrodźe, wěnuje so wona třom rituelnym elementam nałožka. Zastup płaći pjeć eurow.
Maja nowy běrow
„Nětko swjatočniše dyžli prjedy“
Krok po kroku so serbskim senioram Katolskeje tachantskeje wosady w Budyšinje radźi, po přestawce pandemije dla swoje měsačne zetkanja stajnje třeću wutoru měsaca wožiwić. Tak běchu hišće zbywacy starši, ale zdobom bohudźak tež trochu młódši zajimcy njedawno po rańšich kemšach do domu Carity přeprošeni. Tam poskićichu po zwučenym wašnju přednošk. Běše dźě so na zběranju nowych idejow Jurij Žur z Hrubjelčic spontanje zwólniwy wuprajił, jako na nazhonjenja bohaty křižer rozprawjeć. To wobkrući so nětko w jutrownym času jako dosć zajimawa tema.
Drama ze smjertnym wusudom
Kamjenej. Hižo 17. měrca je prěni baćon do Kamjeneje pola Radworja dolećał. Dwaj dnjej pozdźišo přidruži so druhi, tak zo bě porik kompletny. Wjesnjenjo běchu zbožowni, wšak pokaza přichad baćonow na to, zo so nalěćo bliži. Tola hižo pjeć dnjow pozdźišo dóńdźe k sylnym rozestajenjam. Lońši mužik bě přepozdźe do Kamjeneje dolećał, a žonka hižo wobsadźena. Wo swoju poziciju tuž mócnje wojowaše, ale w boju ze swojim kontrahentom so třećina pyska wotłama. Skónčnje je bój samo dobył. Přěhračka pak su ludźo hišće raz we Łomsku wuhladali.
Za zranjeneho ptaka w Kamjenej pak bě wotłamany pysk jeho smjertny wusud. Wobydlerjo wobkedźbowachu baćona, kak za cyrobu pyta. Wón je drje insekty a wački wuhladał, ale njemóžeše je popadnyć. Cyłkownje 17 dnjow swěrnje we wsy přebywaše. Někotre dny pozdźišo, 17. apryla, jeho wobydler w Minakale nańdźe a popadny. Samsny dźeń baćon zahiny. Mjeztym ptaka fachowcy Zhorjelskeho Senckenbergskeho instituta přepytuja.
Wobšudnicy dale a lestniši
Wobydlerskaj policistaj daštaj pokiwy, kak so před wobšudnistwom škitaš
Wojerecy (SR/SN). „Strategije wobšudnikow su dźeń a lestniše. Skućićeljo mištersce na emocionalnej runinje operuja – strowu strózbu mysl ludźi takle wobeńdu a jich njesmilnje zjebaja“, praji policajski hłowny mišter André Kober na zarjadowanju za seniorow zańdźeny tydźeń we Wojerowskim swójbnym centrumje VDK. Ze swojim kolegu Robinom Liesku informowaše wón wopytowarjow wobšěrnje wo metodach zjebanja: Wo šokowym telefonaće, wnučkowym triku, wikowanjom „při durjach“ abo zełharnych zdźělenkach wo dobyću. „Ličba wobšudnistwow w interneće kaž tež druhich deliktow dale stupa. Cilowa skupina je hustohdy starša generacija“, informowaštaj policistaj. Rozłožowaštaj pak tež móžnosće, kak so před wobšudnistwom škitaš.
Nowu kolesowarsku šćežku zarjaduja tuchwilu na nutřkoměšćanskim ...
Boja so nacijow
Choćebuz (SN/mb). Wučerjo šule we wokrjesu Sprjewja-Nysa su so na braniborske medije z informacijemi wo prawicarskoekstremistiskich zjawach na swojim kubłanišću wobroćili. Dźe wo črjódku šulerjow, kotřiž wšědny dźeń dominuja, podpěrani wot wjele „sobuběharjow“. Jim rasistiske skřiwdźenje šulerjow z migraciskim pozadkom, pokazanje hitleroweho postrowa a zatrašenje ludźi z fyziskej a psychiskej namocu wumjetuja. List je drje anonymny, RBB a policija pak šulu znajetej. Kolegij wučerjow je pačeny, mainstream šulerjow prawicarski – při „wólbach młodźiny“ do wólbow zwjazkoweho sejma 2019 stej AfD a NPD wjetšinu docpěła.
Wotum za nowy projekt klinikuma
Z wulkej wjetšinu hłosowaše Wojerowska měšćanska rada na swojim wutornišim posedźenju za nowy, do přichoda sahacy projekt změny strukturow w regionje.
Wojerecy (AK/SN). „Natwar strowotniskeho regiona Łužica – digitalizowana medicinska powołanska fachowa šula“ rěka nowy projekt, kotryž je Klinikum Łužiska jězorina tzwr wuwił a w Sakskej agenturje za strukturne wuwiće zapodał. Za to přewza komuna sydom procentow trěbnych swójskich srědkow. W dwójnym etaće lětow 2023/2024 je to konkretnje 215 000 eurow. Cyłkowne kóšty projekta su nimale 3,2 milionow eurow. Wot tuteje sumy přewza Klinikum Łužiska jězorina tzwr dźesać procentow, to rěka 319 000 eurow. Tež Swobodny stat Sakska a Zwjazk so z 72 000 eurami respektiwnje 2,6 milionami eurami po Zakonju za sylnjenje strukturow na financowanju wobdźělitej.
