Turistiske ideje z dźěłarnički skonkretizowali
Wulka Dubrawa (SN/MiP). Gmejnski zwjazk Radwor-Wulka Dubrawa-Malešecy a „FUTOUR tzwr“ stej wčera wječor druhi raz na wosebite wobydlerske zarjadowanje přeprosyłoj. Něhdźe 40 zajimcow běše do Wulkodubrawskeje Swobodneje wyšeje šule přichwatało, zo by so wo namjeće kónčneho koncepta za zhromadne turistiske wuwiće w gmejnach informowało. Tež wšitcy třo wjesnjanosća běchu přitomni: Madeleine Rynčowa z Radworja, Hardy Glausch z Wulkeje Dubrawy a Matthias Seidel z Malešec.
Krótkopowěsće (10.05.23)
Na festiwalu spěwała
Halle. Delnjoserbska spěwarka Lena Hauptmannojc je wčera wječor na 18. festiwalu Woman in Jazz w Halle nad Solawu wustupiła a tež wjacore delnjoserbske spěwy zanjesła. Studowana jazz- a pop-spěwarka je loni na samsnym festiwalu loni dobyła 2. myto publikuma mjez 22 wobdźělnikami z cyłeje Europy a z tym składnosć tam lětsa koncertować.
Seminar MENS klětu we Łužicy
Budyšin. Serbske młodźinske towarstwo Pawk wuhotuje klětuši jutrowny seminar MENS, Młodźiny europskich narodnych skupin. To su sobustawske organizacije na swojej wurjadnej hłownej zhromadźiznje kónc tydźenja jednohłósnje wobzamknyli. Tak witaja młodźi Serbja na 60 młodostnych z cyłeje Europy do sprjewineho města. Nimo dźěłarničkow k mjeńšinowym temam je tež mały wulět po Łužicy předwidźany.
Kniha pohonja kreatiwni być
Přednošuje wo jubilejnej wsy
Lejno. W lěće 1423, potajkim před 600 lětami, bu wjes Lejno prěni raz pisomnje naspomnjena. Tutomu jubilejej wěnuje Benedikt Cyž swój přednošk, kotryž změje wón srjedu, 10. meje, w 19 hodź. w Lejnjanskim hosćencu „K lipje“. Na njón su wšitcy wobydlerjo cyle wutrobnje přeprošeni.
Darmotnje do stolicy
Budyšin. Wot 1. do 2. junija wobsteji móžnosć z busom wot Budyšina do Berlina jěć. Wobdźělnicy wopytaja mjez druhim Němski zwjazkowy sejm, zwjazkowe ministerstwo za dźěło a socialne kaž tež Humboldtowy forum. Nimo toho je planowana kołojězba po měsće. Na jězbu přeprošuje zapósłanča zwjazkoweho sejma Kathrin Michel (SPD), kotraž so z wobdźělnikami jězby k rozmołwje zetka. Wudawki za jězbu, přenocowanje, snědań a dwójce za wobjed kaž tež wšitke zastupy žane njenastanu. Přizjewjenja přijimuja hač do 11. meje pod telefonowym čisłom 03591 2744690.
Dźěći a młodostni rejwali
Bydlenja saněruja po naprašowanju zajimcow
Wobsedźerka wobstatka něhdyšeje Rakečanskeje bydlenjotwarskeje towaršnosće móžeše loni nahladnu ličbu bydlenjow znowa přenajeć. Při tym je jej wosebite wuwiće pomhało.
Rakecy (UM/SN). Firmowe stawizny Rakečanskeje bydlenjotwarskeje towaršnosć su skónčene. Rakečanska gmejnska rada je hižo kónc 2022 likwidaciju komunalneho předewzaća wobzamknyła. „To bě formalny akt, wšako smy 2020 cyłkowny wobstatk bydlenjow předali“, rozłoži wjesnjanosta Swen Nowotny (CDU). Po tym njeje hižo žane zamóženje wobstało, towaršnosć bě jenož hišće wonkowny konstrukt. Wěrićeljo mějachu składnosć swoje žadanja přizjewić, wjesnjanosta předchadźacy proces wuswětla.
Policija (09.05.23)
Podhladnych za hranicu lepili
Krušwica. Do metal předźěłaceje firmy chcychu so njeznaći předwčerawšim w Krušwicy zadobyć. Při tym jich sobudźěłaćer myleše a policiju zazwoni. Podhladni z awtom do Pólskeje ćěkachu. Na tamnym boku hranicy so němskim zastojnikam poradźi, skućićelow dosahnyć. Jednaše so wo muži w starobje 26 a 47 lět kaž tež wo 36lětnu žonu. Wšitcy třo běchu pólscy staćenjo. Kaž pólscy policisća při dalšim přepytowanju zwěsćichu, předležeše přećiwo 26lětnemu skućićelej přikaz zajeća. Jeho dowjezechu do jastwa. W Němskej změja so lepjeni pospytneho zadobywanja dla zamołwić.
Gmejna zmylki nětko koriguje
Fasadu turistiskeje informacije při Bjerwałdskim jězoru ponowja
Hamor (AK/SN). Hamorska gmejna da fasadu turistiskeho informaciskeho centruma při Bjerwałdskim jězoru dospołnje ponowić. Tole je gmejnska rada wčera jednohłósnje wobzamknyła. Radźićeljo přepodachu nadawk we wobjimje 186 000 eurow Grodkowskej twarskej firmje. We wobłuku wupisanja nadawka je wona najpřijomnišu płaćiznu poskićiła.
„Při twarje turistiskeje informacije su so na fasadźe zmylki stali“, rozłoži twarska nawodnica gmejny Cortina Kokles pozadk. „W sudniskim jednanju smy docpěli, zo móžemy fasadu dospołnje ponowić. Trěbne pjenjezy za to smy nětko dóstali. Gmejnska radźićelka Swantje Schneider-Trunsch (Hamorske wolerske zjednoćenstwo) chcyše wědźeć, hač pjenjezy tež woprawdźe dosahaja. Tole móžeše twarska nawodnica wobkrućić. Pjenjezy dosahaja za planowanje kaž tež za poprawne twarske dźěła. Srědki su za ponowjenje fasady turistiskeje informacije wjazane.
Za blidom sedźeli a dźělili
Wojerecy (SN/MiR). Čłonka serbskeje přirady města Wojerec Gabriela Linakowa ma zetkanje za wulkim blidom minjenu njedźelu popołdnju na tamnišim Łužiskim naměsće za přewšo poradźene. Nimo mnohich zastupjerjow w měsće a wokolnych wsach zaměstnjenych zarjadnišćow a towarstwow je so tež wona za nadměru wulku taflu sydnyła. „Nochcych tam jeničce w swojej funkciji jako čłonka přirady pódla być“, wona rjekny, „wjele bóle dźěše mi wo to, wabić za našu Ćišćansku rejwansku skupinu. Rady chcemy dale a bóle z młodymi ludźimi dźěłać. Dokelž tych dosć nimamy, běše nam tafla dobra składnosć zajim zbudźić a zwiski wutworić.“ Zo by za blidom dobra nalada knježiła, su so nimo njeje dalši čłonojo a čłonki mjenowaneje rejwanskeje skupiny wobdźělili. W swojej pyšnej Wojerowskej drasće woni napadnychu a na te wašnje z mnohimi zajimcami wužichu móžnosć so rozmołwjeć. „Nam bě wažne pokazać, zo su Serbja wažny a žiwy dźěl města a jemu přisłušacych wsow“, Gabriela Linakowa wuzběhny. Wulkotna nalada knježeše, jako woni „Hanumarju“ zarejwachu.
Po tym zo su w Chróšćanskej cyrkwi prěnje dźěła zakónčene, ...
„Šoterowe zahrodki“ Budyšinej dwělomnu česć wunjesli
Budyšin je najbóle zazyglowane město Sakskeje. To je aktualna studija w nadawku Cyłkowneho zwjazka Němskeho zawěsćenskeho hospodarstwa (GDV) zwěsćiła. W měšćanskim zarjadnistwje wobkedźbuja, zo wosebje w priwatnym wobłuku mějićeljo swoje płoniny tak njewuhotuja, zo móže woda zasakować.
Budyšin (SN/at). 52,91 procentow sydlenskeje kónčiny města Budyšina je wobtwarjenych, betonowanych abo asfaltowanych. To wuchadźa z datow zazyglowanja, kotrež je satelit Corpernicus z přezcyłnej dokładnosću dźesać króć dźesać metrow z wysokim rozpušćenjom dobył. Mjez dźesać najwjetšimi městami Sakskeje steji sprjewine město na čole, slěduja Lipsk z 51,14 a Drježdźany z 50,67 procentami. Wuslědki studije su minjenu srjedu wozjewili.
Jako bazu wuhódnoćenja satelitowych wobrazow su fachowcy towaršnosće VdS Schadensverhütung GmbH swobodnje přistupne geodaty komunow kaž tež sydlišćowe hranicy Zwjazkoweho zarjada za geodeziju a kartografiju wužiwali.
