Wožiwjenje wuwostało

Budyšin. W oktobrje bě we wuchodnej Sakskej 19 452 bjezdźěłnych, 111 mjenje hač w septembrje. Kaž Budyska wotnožka Zwjazkoweje agentury za dźěło dźensa informuje, je lětsa we winowcu typiske nazymske wožiwjenje na tudyšich dźěłowych wikach wuwostało. Firmy su mjenje swobodnych dźěłowych městnow přizjewili. Zdobom móhło mjenje bjezdźěłnych nowe dźěło nastupić.

Ze serbskimaj kěrlušomaj

Drježdźany/Budyšin. Ewangelska cyrkej w Němskej přihotuje nowe spěwarske. Za sakski regionalny dźěl planuja tuchwilu jedyn abo dwaj serbskej kěrlušej, kaž Markus Leidenberger, krajny cyrkwinski hudźbny direktor Ewangelsko-lutherskeje krajneje cyrkwje Sakskeje, na naprašowanje zdźěli. To ma tež za cyłu Saksku wěsty wuznam, rjekny Jan Malink, serbski superintendent na wuměnku. Namjety zapodać je hišće móžne.

Z nowym předsydu

Wjesna rada kritizuje njedokładnu informaciju wo přetwarje gratownje

Šćeńca (AK/SN). W lěće 1926 natwarjena hadźicowa wěža wohnjoweje wobory w Šćeńcy je poslednja historiska zajimawostka we wsy. W zwisku z přetwarom gratownje pak ma so wěža spotorhać. Přećiwo tomu so wobydlerjo spjećuja. 75 ludźi je lisćinu hižo podpisało. „Njemóžemy sćěhować, što so tule stawa. 7. awgusta je wjesna rada wo doskónčnym spotorhanju wěže zhoniła“, rjekny wjesny radźićel Maik Wieder minjeny tydźeń na posedźenju gmejnskeje rady. „Hižo w lěće 2016, na swjedźenju 90 lět wohnjoweje wobory, bu přetwar gratownje nastorčeny“, rjekny wjesnjanosta Thomas Leberecht (CDU). „Hadźicowa wěža hižo žanu funkciju njeměješe. Z toho časa su so planowarjo, wohnjowa wobora a zarjadnistwo wjackróć zetkali. Wot lěta 2019 njebě wěža ­hižo do planowanja zapřijata.“

Namakana bomba w Šunowje je tež susodne Konjecy potrjechiła

Konjecy/Šunow (SN/MiR). Hižo dočasa, prjedy hač bě oficialna informacija dóšła, wědźachu Šunowčenjo a Konječenjo, zo bu na Kurjatec ležownosći w Šunowje bomba namakana. Wšako maja wobydlerjo wobeju wsow zhromadnu whatsapp-skupinu. A po njej je mějićel ležownosće w směrje do Tradowa informaciju šěrił, zo bu při twarskich dźěłach rozbuchadło namakane. Tež Martina Čornakowa, kotraž w Konječanskim młynje bydli, bě po tutym puću wo bombje zhoniła. „Smy z toho wuchadźeli, zo njejsmy z připowědźeneje ewakuacije potrjecheni. Na kóncu pak dyrbjachmy přiwšěm swoje domske wopušćić.“ Wona dojědźe sej z mandźelskim a synom do Tradowa přiwuznym. „Smy dyrbjeli zastojnikam rjec, dokal so podamy.“ Ći, kotřiž njeběchu priwatny schow nadešli, zaměstnichu so w Ralbičanskej sportowni. Předewzaćel Štefan Čornak bě po puću z wulěta domoj. „Jako sym wo ewakuěrowanju słyšał, sym třom swójbam ze Šunowa azyl poskićił. Jedna swójba ze štyrjomi dźěćimi je poskitk přiwzała, druzy njeběchu doma“, tak wón powěda.

Budyšan Alexander Herrmann nawjeduje a diriguje wotnětka orchester ­„Łužiska brunica z.t.“. Minjenu sobotu je wón z debitowym koncertom we Wojerowskej Łužiskej hali přeswědčił.

Wojerecy (JoS/SN). 48lětny powołanski hudźbnik nawjeduje tež dale młodźinski dujerski orchester Budyšin a skutkuje na polu hudźbneje pedagogiki. Kontakt k Wojerowskemu ćělesu nasta, jako je Herrmann na klarineće a saksofonje hudźo wupomhał.