Poswjeća nowe třělnišćo
Po dwěmaj lětomaj přestawki změja noweho třělcowskeho krala
Kulow (SiR/SN). Wulki wokomik budźe jutře, sobotu, popołdnju za Kulowske třělcowske towarstwo swjateho Bosćana. Jeho čłonojo smědźa so nad nowym třělnišćom za powětrowki wjeselić. Město bě towarstwu staru a njewužiwanu trafochěžku přewostajiło. Wjace hač 350 hodźin su čłonojo towarstwa dźěłali a ju na třělnišćo přetwarili. Financowali su projekt z darami a ze swójskimi srědkami.
Hižo srjedź meje je fachowc wšitke trěbne wěstotne předpisy přepruwował a žane njedostatki njezwěsćił. Tuž móža jutře w 14 hodź. nowe třělnišćo poswjećić, z čimž lětuši třělcowski swjedźeń oficialnje zahaja. Hodźinu pozdźišo započnje so tak mjenowane kralowske třělenje na swjedźenišću. Runočasnje chcedźa Rolanda Brücknera jako třělcowskeho krala lěta 2019 rozžohnować. Dwójce wšak dyrbješe Kulowski třělcowski swjedźeń wupadnyć.
Ma hišće tójšto planow
Z gmejnu Ralbicy-Róžant je mjeztym 25 lět zwjazane mjeno Hubertusa Ryćerja. Tak dołho skutkuje 62lětny mjeztym hižo jako wjesnjanosta. Do toho bě tule funkciju w tehdy samostatnej Róžeńčanskej gmejnje wukonjał. K wólbam wjesnjanosty 12. junija wón nětko znowa kandiduje.
Najwjetši dźěl družin wišnjow dyrbi hišće chwilu zrawić, ...
Krótkopowěsće (03.06.22)
Drohoćinku „wróćo zdobyli“
Budyšin. Dźakowano spěchowanju Swobodneho stata Sakskeje a Kulturneje załožby Sakskeje kaž tež darom priwatnikow zamó Muzej Budyšin awkciju dobyć a wuznamny kapsny časnik „Tourbillon čo. 41 000“ kupić. Drohoćinka, zhotowjena w zawodźe Lange & Söhne, bě něhdy we wobsydstwje Otta Weiganga a je so po Druhej swětowej wójnje zhubiła. Přichodnje hodźi so „mišterska twórba“ w trajnej wustajeńcy muzeja wobdźiwać.
50 projektow wuzwolenych
Drježdźany. Sakske statne ministerstwo za kulturu a turizm je cyłkownje 50 namjetam wubědźowanja „Sachsen geht weiter“ spěchowanje po 5 000 eurach přizwoliło. Hač do oktobra maja zapodawacy, mjez druhim Wojerowska Kulturna fabrika a łužiski festiwal „Přińć a woteńć“, chwile, swoje projekty dale wuwiwać.
„Čorna scena“ so schadźuje
Policija (02.06.22)
Njezbožo wosy dla
Łuty. Wosy w swojim awće dla so 54lětny wodźer Opela předwčerawšim we Łutach prawje na wobchad koncentrować njemóžeše. Insekt bě so na mjezwočo muža sydnyło. Jako chcyše wón jeho wućěrić, zajědźe přez wobchadnu kupu. Na wobchadnym znamjenju a awće nasta dohromady 16 000 eurow škody.
W šuli swjeća
Pančicy-Kukow. Na šulski swjedźeń Serbskeje zakładneje „Šule Ćišinskeho“ su wšitcy zajimcy jutře, pjatk, najwutrobnišo do Pančic-Kukowa přeprošeni. W 15 hodź. započnje so pisany program na dworje kubłanišća. Přizamknje so zabawa za dźěći. Wo ćělne derjeměće je postarane. Nimo toho wobsteji móžnosć sej ponowjene rumnosće šule wobhladać. Šulske wjednistwo nadźija so prawje bohateho wopyta.
Narodninarjej Sławu zaspěwali
Chrósćicy. Škotowarka a 24 škotowarjow je so předwčerawšim na turněrje serbskich seniorow w Chróšćanskim Krawčikec hosćencu wobdźěliło. Spočatnje su škotowarjej, sobuzałožerjej a wjelelětnemu nawodźe turněra Janej Macce k jeho narodninam trójnu „Sławu“ zaspěwali. Z 3 046 dypkami wopokaza so Wolfgang Kühn jako najlěpši škotowar dnja před Křesćanom Weclichom (2 589) a Herbertom Krečmarjom (2 134). Cyłkownje nawjeduje dale Herbert Krečmar před Wolfgangom Kühnom a Siegfriedom Rawu. Přichodny turněr wotměje so 28. junija w Nowosličanskim kulturnym domje.
Styroporowe jeja njejsu na předań
Šprjejcy (JoS/SN). Jutry drje su dawno nimo, ale tež krótko do swjatkow hišće ludźo wo wrota Rainera Grosy w Šprjejcach kłapaja a chcedźa wědźeć, hač móža jedne z rjanych styroporowych jejow kupić, kotrež běchu jutry na zahrodźe wuměłca widźeć. Nětko Rainer Grosa zdźěli, zo tele eksemplary zasadnje na předań njejsu.
„Zo jutrowne jejka škrabam, mjeztym mnozy wědźa. Ideju ze styroporowymi jejami pak sym swojej ródnej wsy wěnował a tu tež wostanu“, Rainer Grosa podšmórnje. Jeho ležownosć ze zahrodu leži direktnje při wokrjesnej dróze, kotraž Braniborsku ze Sakskej zwjazuje. Tohodla přichadźeja zajimcy z regiona wot Budyšina hač do Lubnjowa. „Za tajke styroporowe jejo je wjele wjace dźěła trěbne hač za kokošace. Njemóžeš je w twaršćiznowym wikowanišću kupić. Ja sej wotpowědne štyriróžki pola producenta wobstaram a je potom z motorskej piłu wobdźěłam, doniž maja formu jeja. Štóž je hižo raz styropor z motorskej piłu rězał, wě, kak piła po tym wupada.
Krabata a serbšćinu zapřijeć
Nastorki wobydlerjow za Kulowski gmejnski wuwićowy koncept
Kulow (AK/SN). Město Kulow měło so sylnišo łužiskej jězorinje a jeje turizmej přizamknyć a trjeba sylniši zwisk ke Krabatej a wjace serbskeje rěče w pěstowarni, šuli a w měšćanskim wobrazu. Tole bě njedawno facit wobydlerskeje zhromadźizny ke gmejnskemu wuwićowemu konceptej. Martin Neumann z měšćanskeje wuwićoweje towaršnosće (STEG) jón wobydlerjam předstaji. Hesło koncepta rěka „Kulow w změnje – tradicionalny, žiwy a naslědny za přichod“.
„Mamy w měsće ze Šadowicom a z powěsću wo Krabaće wulki pokład. Tón měli sylnišo wuzběhnyć“, wobydler Joachim Popella nastorči. „W mojim dźěćatstwje rěčeše w měsće hišće něhdźe 60 do 70 procentow swójbow doma serbsce. Ludowe swjedźenje, gmejnske swjedźenje a regionalne swjedźenje wotměwachu so w Kulowje serbsce. Kulow móhł na kóždy pad aktiwniši być.“ Joachim Popella nastorči nimo toho pěstowarski park za młode maćerje. Wone móhli so po swjatoku tam zetkać a wuměnjeć mjeztym zo sej dźěći hrajkaja.
„Trjebamy sylnišu zwjazanosć“
Frank Knobloch je muž jasnych słowow. Wot 2014 je wón wjesny předstejićer za Tranje, Manjow, Rudej a Delni Wujězd. Nětko kandiduje wón k wólbam wjesnjanosty Hamorskeje gmejny.
„Zhromadnosć 18 wjesnych dźělow dyrbi so skrućić“, měni 55lětny. „Přeju sej, zo so nam na gmejnskej runinje poradźi, stronske a frakciske mjezy přesahujo we hłowach a wutrobach hromadu zrosć, bjeztoho zo dyrbi něchtó swójsku identitu spušćić. Štož je so nam wokoło Delnjeho Wujězda poradźiło, chcu na gmejnsku runinu přenjesć.“ Podpěrać chce Frank Knobloch domjacych rjemjeslnikow a přemysłownikow. Wutworić ma so stajne blido předewzaćelow. Projekt lěkarskeho domu chce dale zwoprawdźić. „Wažne mi w tutym zwisku je, zo jednotliwe wulke wsy kaž Klětno, Rychwałd a Delni Wujězd do medicinskeje struktury zawjazamy“, wón měni.
