Budyšin (CS/SN). Wosebitu płoninu za překasancy, předewšěm za dźiwje pčołki maja nětko na Budyskim Hrodźišku. Na wuchodnym róžku wotpołožichu hromadu mortweho drjewa a připrawichu tak mjenowany sandarium, pěskojte městno, hdźež móža insekty w zemi hnězdźić. Zo bychu wone tež dosć picy namakali, su tež štomy, kerki a kwětki nasadźene.

Hižo w septembru běchu so měšćanscy wozelenjerjo z čłonami pčołarskeho towarstwa Delni sprjewiny doł Budyšin zetkali a teren přihotowali. Minjenu ­sobotu wobstarachu poslednje dźěła a w přitomnosći sponsorow płoninu swojemu zaměrej přepodachu. Tež nowy twarski měšćanosta Budyšina Heiko Nowak bě přišoł a so wobdźělnikam za jich angažement dźakował.

Drježdźany (SN). Sakske statne ministerstwo za regionalne wuwiće a towarstwo Sakski krajny kuratorij Wjesny rrum stej dobyćerjow wubědźowanja „simul+ Kreativ“ wozjewiłoj. Z cyłkownje 558 zapodatych namjetow bu 198 projektowych idejow wuzwolenych, kotrež spěchuja so po štyrjoch modulach z dohromady tři milionami eurami. Mjez druhim přewostaja we wobłuku segmenta „Kreatiwnje žiwi być a dźěłać“ projektej města Kulow, Genealogiskeho centruma Schröter a Serbskeho instituta „Bachtać ze Schadowitzom“ 80 000 eurow. Pjenjezy maja so za přetwar Kulowskeho torhošća na „městnosć wotkrywanja a wuchadźišćo Krabatoweje dožiwjenskeje tury“ nałožować. Spěchowanskemu towarstwu Serbskeho muzeja přiznachu w kategoriji „Žiwa dwurěčnosć“ 5 000 eurow za zwoprawdźenje „mobilneho poskitka ‚Muzej olé! Geschichte und Kultur erfahren‘ za zeznawanje, nałožowanje a dožiwjenje rěče, stawiznow a kultury Serbow“. W samsnym segmenće spěchuja z 10 000 eurami prezentaciju towarstwa Kólesko „Gładźarnica“ wo Slepjanskej drasće.

Na swojim wčerawšim posedźenju su so měšćanscy radźićeljo mjez druhim z horco diskutowanym projektom natwara noweho Sprjewineho mosta zaběrali.

Budyšin (SN). Po emocionalnej, při­wšěm pak wěcownej diskusiji je so Budyska měšćanska rada z wjetšinu hłosow wčera za projekt Sprjewineho mosta wuprajiła a wotpowědny financny plan schwaliła. Wona wobzamkny, zo dohromady 1,35 milionow eurow swójskeho podźěla do etata města za lěto 2024 zaplanuje. Wot přitomnych 29 měšćanskich radźićelow hłosowaše 16 za móst, wosom přećiwo jemu. Pjeć radźićelow běše so hłosa wzdało.

Město Budyšin chce kalkulowane kóšty we wysokosći 13,5 milionow eurow za Sprjewiny móst z 90 procentami ze spěchowanskimi srědkami za změnu strukturow financować. Wčerawšeho pozitiwneho rozsuda dla, móže měšćanske zarjadnistwo wotpowědnu projektnu próstwu Sakskej agenturje za strukturne wuwiće (SAS) lětsa hač do 17. nowembra zapodać.

Wotběhi a procesy zeznali

Budyšin. Zastupjerjo Załožby za serbski lud, Serbskeho muzeja a Serbskeho instituta su so wčera z architektami dobyćerskeho běrowa wupisanja architekturneho wubědźowanja za „Serbski forum wědy“ na dźěłarničku zešli. W zetkanju w Röhrscheidtowej bašće chcychu architekća wosebje dźěłowe wotběhi a procesy a z tym zwisowace naroki wšitkich w twarje zaměstnjenych institucijow zeznać.

Firmownikow počesćili

Budyšin. Łužiske předewzaćelske myto 2023 su třom firmownikam z Budyskeho a Zhorjelskeho wokrjesa wčera w Budyskim Dźiwadle na hrodźe spožčili. Jury měješe z 29 zapodatych nominowanjow rozsudźić. Lawreaća su Robert Gey z firmy Charlotte Meentzgen Kräutervital Kosmetik GmbH w Radebergu, Susanne Mütze z Blidarnje Mütze tzwr w Kamjencu a Achim Kittner z Hatarstwa Hóznica.

Medalja Rakečance