Serbskej domaj přirunowała
Budyšin (CRM/SN). W rjedźe Budyskeje akademije je wčera wječor wjelelětna wědomostna sobudźěłaćerka Serbskeho instituta dr. Marija Měrćinowa nastaće prěnjeho Serbskeho domu na Lawskich hrjebjach w dobje do Prěnjeje swětoweje wójny z natwarom druheho Serbskeho domu po Druhej swětowej wójnje na Póstowym naměsće přirunowała.
Domowina čaka na namjety
Budyšin (SN). Lětsa maja so zaso zasłužbne wosoby z Mytom Domowiny, z Mytom Domowiny za dorost a z Čestnym znamješkom Domowiny wuznamjenić.
Myto Domowiny spožči třěšny zwjazk wosobam, kotrež so zaměrnje a wuspěšnje za zachowanje a wozrodźenje serbskeje kultury, wosebje pak serbskeje rěče zasadźeja, kaž starši, kubłarki a wučerjo, wjelelětni předsydźa Domowinskich skupin a dalšich towarstwow.
Z Mytom Domowiny za dorost počesća młodostnu resp. młodostneho abo skupinu, kiž so na wusahowace wašnje za serbsku rěč a kulturu angažuje.
Z Čestnym znamješkom Domowiny připóznawa narodna organizacija zasłužby w towarstwowym dźěle, zwoprawdźacym program a směrnicy Domowiny.
Zwjazkowe předsydstwo Domowiny prosy čłonow župow, towarstwow a jednotliwcow, zo bychu namjety za wuznamjenjenje hač do kónca junija zapodali. Za to měli na internetnej stronje třěšneho zwjazka přistupny formular wužiwać. Wobkrućenje namjeta dyrbi w serbšćinje spisane być.
Krabatowy swjedźeń na Hrodźe
Budyšin (SN). Na 17. Krabatowy swjedźeń na Budyskim hrodźe přeprošeja njedźelu, 15. apryla, w času wot 10 do 18 hodź. Krabatowe towarstwo a Budyski turistiski zwjazk hromadźe ze Serbskim muzejom, Němsko-Serbskim ludowym dźiwadłom a wyšim zarjadniskim sudnistwom. Pod hesłom „Krabat w Budyšinje“ dožiwi historiska městnosć na Hrodźe němsko-serbski jewišćowy program, wosebite wodźenja po Serbskim muzeju a po zarjadniskim sudnistwje kaž tež dźiwadło, kreatiwne poskitki, skót k přimnjenju a kulinariske wosebitosće z Krabatoweho regiona. Wjeršk budźe zakónčenje wustajeńcy „Krabat – Muž – Mytos – Marka“. Na tym wobdźěla so Wolfgang Kraus jako Krabat a Dieter Klimek jako Čorny młynk. Tón dźeń budźe zastup do Serbskeho muzeja darmotny, tež stukowa žurla sudnistwa budźe zajimcam přistupna.
Wulkotna zhromadnosć
Róžeńčanski kružk pisacych zhladuje lětsa na 55. róčnicu załoženja. Alfons Wićaz je so z dwěmaj čłonkomaj rozmołwjał, kak stej ke kružkej přišłoj a što sej za jeho přichod přejetej.
Monika Kochowa z Pančic-Kukowa: Započach so za kružk zajimować, jako korigowach doma maćeri teksty basnjow. W Pančicach sym tajki kružk ze šulerjemi załožiła a jón 16 lět nawjedowała. Sym něhdźe 40 lět z čłonku Róžeńčanskeho kružka. Mjeztym napisach něhdźe 100 basnjow a hišće tójšto dalšich składnostnych za kwasy a druhe swjedźenje. To sym wšědne žiwjenje, počasy, hodowny čas a basnje z nutřkownymi začućemi tworiła. Za přichod kružka bych sej přała, zo přidruža so jemu zaso młódši ludźo. Nadźijam so, zo so snadź tež wnučki našich čłonow, hdyž su tróšku starše, do kružka zarjaduja.
Wuměna myslow wažna
Róžeńčanski kružk pisacych hišće dźensa aktiwnje dźěła
K 40. róčnicy załoženja Róžeńčanskeho kružka pisacych w lěće 2003 je w tehdy wušłej zběrce basnjow a powědkow ludowych basnikow dr. Irena Šěrakowa pisała, zo běchu w Serbach hižo do toho wjacore tajke kružki załožili, Róžeńčanski pak wosta jako jenički aktiwny. Lětsa w februaru zhladowaše tón na 55. róčnicu załoženja. A kružk přeco hišće pilnje dźěła a ze swojimi kulturnymi programami z basnjemi a spěwami ludźi zwjesela, kaž na přikład w starownjach abo k swojemu jubilejnemu swjedźenjej hromadźe z Domowinskej skupinu Pančicy-Kukow a w Chróšćanskej putniskej hospodźe.
Statnik: Smy krótko před cilom
Wojerecy (SN/JaW). Prezidij Zwjazkoweho předsydstwa Domowina je so wčera nadrobnje z aktualnym stawom wobydlerskeje iniciatiwy Federalistiske unije europskich narodnych mjeńšin (FUEN) Minority SafePack zaběrał. „Wjeselimy so, zo je iniciatiwa mjeztym jedne žadanje spjelniła a w sydom krajach trěbnu ličbu podpismow docpěła. Přiwšěm pobrachuje hišće něšto wjac hač 60 000 signumow, zo bychmy trěbny milion docpěli. Smy potajkim krótko před cilom“, rozłoži předsyda Domowiny Dawid Statnik. Zdobom wón hišće raz wšitkich naležnje namołwja akciju podpěrać a skedźbnja zdobom na to, wšitke dotal zezběrane podpisma w přichodnych dnjach Domowinskemu zarjadej w Budyšinje přepodać. Domowina je wot lěta 1990 z čłonom FUEN a sylnje za wobydlersku iniciatiwu wabi.
Myto Hórnika gymnaziastej
Budyšin (SN/bn). Předsyda Maćicy Serbskeje Jurij Łušćanski, jeje městopředsydka dr. Anja Pohončowa a čłonka předsydstwa dr. Ines Kellerowa spožčichu wčera spěchowanske Myto Michała Hórnika Fabianej Neterej. Šulerja Serbskeho gymnazija Budyšin wuznamjenichu za jeho fachowe dźěło „Přesćěhanje Židow w času nacionalsocializma we Łužicy wot 1933 do 1945 na přikładźe swójby Nussenbaum z Budyšina“. Awtor bě za to fachowu literaturu intensiwnje a dokładnje wuhódnoćił, nimo toho wustupuja časowi swědcy. Byrnjež nastawk wšitkim kriterjiam, kotrež Maćica předpisuje, njewotpowědował – wupisanje žada sej mjez druhim tematisce serbski wobsah, kotryž pak lawreat bjezposrědnje wobkedźbował njebě –, je so hódnoćacy wuběrk towarstwa wědomostneje akuratesy a rěčneje kwality dla na kompromis dojednał. Fabianej Neterej přizwoli tuž připóznawanske Myto Michała Hórnika we formje wopisma, je pak dotěrowanu sumu społojčił.
Do dźěła zdar!
Pěstuja dobru zhromadnosć
Wo pomniku Andrickeho naležnje rěčeli
Ralbicy (SN/MkWj). Pomnik za zbóžnoprajeneho kapłana Alojsa Andrickeho je Towarstwu Cyrila a Metoda dale wažne předewzaće a wostanje – kaž so wčera wječor na hłownej zhromadźiznje TCM w Ralbicach zaso pokaza – přiwšěm dosć emocionalna naležnosć.
Hižo na lońšej „hłownej“ towarstwa w Kulowje bě pomnik debatu zbudźił. Dr. Pětr Brězan ze Sulšec a jeho bratr dr. Jan Brězan z Drježdźan běštaj projekt předstajiłoj. Jeju předstawy: Pomnik Alojsa, wulki kaž čłowjek, steji měšnisku sutanu woblečeny před Róžeńčanskej swjatnicu a strowi přichadźacych putnikow. Bratraj běštaj model sobu přinjesłoj, organizatoriske prašenja w dalokej měrje hižo zrjadowałoj a samo pólskeho rězbarja za nadawk zdobyłoj. Dokelž pak je to mnohim prosće přespěšnje šło, loni w Kulowje rozsudźichu wutworić dźěłowu skupinu, kotraž ma so předewšěm z formu pomnika zaběrać a wjacore wuměłske namjety pruwować.
