Drježdźany (dpa/SN). Sakski nutřkowny minister Armin Schuster (CDU) sej wot zarjadow přeje, zo bychu eficientnišo a spěšnišo dźěłali. Při reformje zarjadow chce tež sobudźěłaćerjam składnosć dać so wuprajić: „Njeńdźe wo to druhich dać rozsudźić, ale sam namjety činić a něšto změnić, prjedy hač dyrbimy na šěrokim polu lutować.“ Schuster při tym wuzběhuje, zo měli wšě struktury do prašenja stajić. Strach wo swoje dźěłowe městno pak při tym nichtó měć njetrjeba, wšako móža pomjeńšenje personala w sakskich zarjadach přez to realizować, zo poda so wulka ličba přistajenych bórze na wuměnk. Tute městna potom hižo wjace znowa njewobsadźa. W dźěłowej skupinje wšelkich ministerstwow, kotraž bě so w běhu tydźenja w Smochćicach zešła, su tež wo tutym problemje rěčeli. Naprawy, kotrež su tam zhromadnje nadźěłali, chcedźa bórze tež z partnerami, kiž njejsu dźěl statneho knježerstwa, wobrěčeć. Wažne budu při tym wosebje komuny, wšako chce Schuster tež na tutu runinu zamołwitosće wotedać.

Nihdźe po cyłym swěće telko swjatych pochowanych njeje kaž w Assisiju w Italskej. Dohromady je jich pjeć: Franc z Assisija, Hańža, Klara, Rufinus a Carlo Acutis. Nětko chcedźa powostanki swjateho Franca w bazilice San Francesco wustajeć, a to po 800 lětach w rowje. Jenož něšto stow metrow dale česća w putniskej cyrkwi Santa Maria Maggiore swjateho Carla Acutisa, kotrehož bě bamž Leo XIV. loni swjateho prajił.

Slědźerjo carabidologije, potajkim nałožowaneho slědźenja wo běhacych brukach, so kónc tydźenja w Drježdźanach zetkaja. Towaršnosć slědźerjow chce při tym skutkownje na to pokazać, kajke wosebite, mnohostronske a ekologisce wažne bruki su. Na zeńdźenju w sakskej stolicy chcedźa zakładne slědźerske prašenja rozjimać. Za to planuja přednoški a prezentacije před fachowym publikumom.

Turistiski zwjazk Łužiska jězorina chce sezonu, kotraž je dotal wot apryla do oktobra trała, wot lětušeho podlěšić. Za to je nowe turistiske poskitki na temu „Bajki, powěsće a stawiznički“ wuwił.

Zły Komorow (AK/SN). W lěće 2012 za­łoženy turistiski zwjazk, kotryž skutkuje w kónčinach Braniborskeje kaž tež Sakskeje, zahaji swoju sezonu lětsa hižo w februarje. Tole podšmórny nawoda wotrjada za marketing Marcus Heberle na lětnym nowinarskim terminje.

„Po puću z rybarjom (bjez jeho žony)“ rěka nowy turistiski poskitk, kiž wopřija kołojězbu na Złokomorowskim jězorje a wopyt hatarskeho zawoda swójby Eulo w Baršću (Forst/Lausitz). W Hórnike­čanskej Energijowej fabrice móža turisća lětsa pod hesłom „Na slědach plona“ za pokładom pytać. Na Horach chce zwjazk z wuměłskej rjemjeslnicu Birgit Pato­kowej w tamnišim kładźitym domje zhromadne zarjadowanja wo temje ­„Lutki – přećelne palčiki Łužicy“ wuho­tować.

Seoul (dpa/SN). Dokelž je tehdyši južnokorejski prezident Yoon Suk Yeol w decembrje 2024 wojerske prawo wuwołał, su jeho dźensa k jastwu na čas žiwjenja zasudźili. Sudnistwo města Seoul jemu wumjetuje, zo je zběžk nawjedował a wustawu kraja podrywał. Statne rěčnistwo bě sej žadało, jeho k smjerći zasudźić. Prezident móže sej nětko hišće rewiziju wusuda žadać. Proces je prěni tajkeho rozměra w Južnej Koreji a je precedenca za dalše tajke jednanja.

Rada so prěni raz schadźuje

Washington (dpa/SN). Kontrowersnje diskutowana měrowa rada US-prezidenta Donalda Trumpa so dźensa prěni raz schadźuje. Jedna z hłownych temow prěnje­ho posedźenja budźe prawdźe­podobnje dalše wuwiće w Gazaskim pasmje. Trump bě do zeńdźenja připowědźił, zo chce paket wjacorych miliardow dolarow za humanitarnu pomoc schwalić. Měrowa rada ma nimo toho wojersku skupinu za rjadowanje měra w pasmje wutworić.

Eks-princa Andrewa zajeli