Ratarjo demonstrowali

srjeda, 24. nowembera 2021 spisane wot:
Malchow/Wittstock (dpa/SN). Z napominanskej stražu su ratarjo z Mecklenburgsko-Předpomorskeje wčera wječor před jeničkim wulkoskładom wikowanskeho předewzaća Edeka na sewjerowuchodźe Němskeje protestowali. Po tym puću chcychu na to skedźbnić, zo za swoje wudźěłki, kaž mloko, přemało pjenjez dóstawaja. Edeka zastaruje ze swojeho składa w Malchowje 200 kupnicow.

To a tamne (24.11.21)

srjeda, 24. nowembera 2021 spisane wot:

Ekstremnaj krosnowarjej staj wčera po fa­sadźe wysokodomu w Frankfurće nad Mohanom horje lězłoj. Jako „spiderman“ znaty Alain Robert a Leo Urban, wobaj Francozaj, staj tam hač na třěchu 153metrowskeho „skypera“ w dwórnišćowej štwórći krosnowałoj. Njewuži­wa­štaj žane pomocne srědki. Na třěše pak čakaše policija a jeju nachwilnje zaja.

Wopačny „pater Don Romano“ dyrbi 30 měsacow do jastwa. To je sudnistwo w južnofrancoskim Saint-Raphaëlu wukazało. Pozdatny duchowny bě dobroćiwemu wěriwemu 2 500 eurow wulišćił, kotrež běchu pječa za dźěćacy dom w Afri­ce postajene. Na mnicha předrasćeny wobšudnik je mjeztym dlěje hač dwaceći lět „aktiwny“ a sedźeše wospjet w ja­stwje. Najebać to je wěriwych a cyłe wosady jako pozdatny dušepastyr zas a zaso za nós wodźił.

Powěsć z Brjesta

wutora, 23. nowembera 2021 spisane wot:

Po prezidentskich wólbach w Běłoruskej a raznych demonstracijach přećiwo Aleksanderej Lukašenkej je nimale lěto zašło. Kraj pak wostawa we wizěru zjawnych medijow, a to hłownje w Němskej, Pólskej, Litawskej, hač do najwyšich gremijow w Brüsselu, OSZE a hač do hłowneho sydła UNO w New Yorku. Nětko knježi nowa rozhorjenosć nawala ćěkancow na běłorusko-pólsku hranicu dla, kotřiž spytaja so přez nju na teritorij ­Europskeje unije předrěć. Za tym tči běłoruski „mócnar“ Lukašenko. Spochi so wospjetowaše, zo wjedźe Lukašenko hybridnu wójnu přećiwo EU a zo ma Němska wšitke srědki přećiwo tomu zasadźeć. Lukašenko da tysacy ćěkancow ­nastupić, zo by sej z tutej žiwej masu wunuzował legitimaciju jako prezident a tak připóznaće Europskeje unije za prawosć poslednich prezidentskich wólbow w Běłoruskej. Žada sej, zo ma EU sankcije přećiwo Běłoruskej cofnyć.

Merz: Wulka podpěra na bazy

wutora, 23. nowembera 2021 spisane wot:

Berlin (dpa/SN). Bywši předsyda frakcije CDU/CSU w zwjazkowym sejmje Friedrich Merz wopodstatnja swoju třeću kandidaturu za předsydu CDU w běhu třoch lět z wulkej podpěru na bazy strony. „Haj, to ma něšto iracionalne na sebi“, rjekny wón wčera wječor na prěnim kole předstajenja požadarjow za předsydstwo strony. Jutře chce so Norbert Röttgen čłonam CDU předstajić, štwórtk jako posledni Helge Braun.

USA warnuja před Němskej

Washington (dpa/SN). Wonkowne ministerstwo USA warnuje razneho rozpřestrěća koronawirusa dla před jězbami do Němskeje. To je konsekwenca po nowym posudku strowotniskeho zarjada nastupajo połoženje w kraju. Zarjad namołwja wšitkich wobydlerjow USA, so jězbow do Němskeje wzdać. Podobne warnowanje płaći za dalše wot pandemije po­trjechene kraje, kaž Belgisku, Chorwatsku, Madźarsku, Awstrisku a Nižozemsku.

W Israelu nětko dźěći šćěpja

Sakska planuje nowe naprawy

wutora, 23. nowembera 2021 spisane wot:

Drježdźany (dpa/SN). Sakska ministerka za strowotnistwo Petra Köpping (SPD) a nutřkowny minister Roland Wöller (CDU) chcyštaj dźensa popołdnju wo dalšich naprawach hladajo na tuchwilnu ­koronapandemiju w swobodnym staće informować. Wöller chcyše wosebje kontrole we wobłuku wot wčera płaćiweho nuzoweho wukaza wuhódnoćić. Minis­terski prezident Michael Kretschmer (CDU) bě minjeny pjatk při předstajenju wukaza tež konsekwentne kontrole připowědźił. Pandemija sej to prosće žada.

Sakska je dale z wotstawkom wot pandemije najbóle potrjecheny zwjazkowy kraj. Tydźenska incidenca bliži so mjeztym hódnoće 1 000. Dźensa ležeše wona po informacijach Roberta Kochoweho instituta pola 969,9. Po cyłej Němskej wučinješe incidenca dźensa rano 399,8, po wčerawšim nowym rekordźe 386,5.

W běhu dnja chcychu we wjacorych zwjazkowych krajach wo dalšich naprawach přećiwo koronawirusej wuradźować, mjez druhim wo winowatostnym šćěpjenju.

To a tamne (23.11.21)

wutora, 23. nowembera 2021 spisane wot:

Priwatne awto z taksijom zaměnił je wopity muž w Bielefeldźe. To jemu samo puki wunjese, dokelž mějachu jeho za paducha. 22lětny bě so do awta sydnył, kotrež z běžatym motorom při dróze steješe. Wóz běchu wjacori mužojo wotstajili, zo bychu towarša domoj dowjezli. Jako woni cuzeho w awće wuhladachu, dachu so do njeho, dokelž sej myslachu, zo chce awto pokradnyć. Hakle policija zamó ­njedorozumjenje wujasnić.

Ze swojoraznej narěču je britiski premierminister Boris Johnson zaso raz zadźiwanje zbudźił. W narěči hospodarskim fachowcam přirunowaše so wón z Mójzesom, citowaše Lenina a napo­dobnješe zwuki awta. Nimo toho dyr­bješe mjeńšiny dołho w swojich podłožkach listować, dokelž bě „nitku zhubił“. Připosłucharjo rěčachu wo „katastrofalnej“ a „bicarnej“ narěči.

Bjez změnow cyrkej zwrěšći

póndźela, 22. nowembera 2021 spisane wot:

Köln (B/SN). Předsyda Němskeje biskopskeje konferency, Limburgski biskop Georg Bätzing, zastupuje jasne cyrkwino-politiske měnjenje nastupajo rólu žónskich w cyrkwi, celibat a wujasnjenje seksualneho znjewužiwanja. „Hdyž my ničo njezměnimy, potom nas změnja. Hižo lětdźesatki dalewuwiće tradicijow stagněruje, dźeń a wjac křesćanow cyrkej wopušća a měšniski dorost dale a bóle pobrachuje. Trjebamy radikalnu změnu perspektiwy“, rjekny biskop Bätzing katolskej powěsćerni kna.

Za wjetšu transparencu

Seminar budźe, diskusija nic

póndźela, 22. nowembera 2021 spisane wot:

Budyšin (SN). Jutře wječor w Němsko-Serbskim ludowym dźiwadle planowana diskusija „Serbske samopostajowanje w Sakskej – kontrowersy a perspektiwy za přichod“ z dr. Měrćinom Krawcom, Dawidom Statnikom, prof. dr. Stefanom Oeterom a Lutzom Hillmannom so pandemijoweho połoženja dla njewotměje. Sakska krajna centrala za politiske ku­błanje ma tematiku za tak wažnu, zo nochce ju jenož digitalnje wobjednać. ­Zarjadowanje budźe tuž přichodnje nachwatane.

Hižo jutře w 14.30 hodź. planowany seminar z ekspertu za zjawne a prawo ludow prof. dr. Stefanom Oeterom pak so digitalnje wotměje. Zajimcy su přeprošeni so za widejowu konferencu pod hesłom „Cyrkwinsko-statne zrěčenja jako přikład za serbske samopostajowanje a samorjadowanje?“ přizjewić, a to pod adresu . Tam je tež móžno sej do toho diskusijowu papjeru wo statnym zrěčenju wobstarać. Nimo prašenja, kajke ma tajke zrěčenje wupadać, chcedźa na seminarje tež wo tym rěčeć, kajki móhł politiski puć zwoprawdźenja być.

Kandidaća so předstaja

póndźela, 22. nowembera 2021 spisane wot:

Berlin (dpa/SN). Dwaj měsacaj po ćežkej poražce při wólbach zwjazkoweho sejma pyta CDU wot dźensnišeho za nowym předsydu. Jako prěni chcyše so wječor Friedrich Merz čłonam strony internetnje prezentować. A woni maja tež składnosć so jeho prašeć. Dopołdnja běchu so wodźace gremije strony zetkali. Nimo bywšeho šefa frakcije CDU/CSU w zwjazkowym sejmje Merza prócujetaj so amtěrowacy šef kanclerskeho zarjada Helge Braun a wonkowny politikar Norbert Röttgen wo zastojnstwo.

Prezident wólby dobył

Sofija (dpa/SN). Bołharski statny šef Rumen Radew je rozsudne koło prezidentskich wólbow po najnowšich wěšćenjach jasnje dobył. Wón móže so něhdźe 65 procentow hłosow nadźijeć. Toho wužadar Anastas Gerdźikow njezměje drje wjace hač 33 procentow hłosow a je swoju wólbnu poražku mjeztym přiznał. Wólbne wobdźělenje bě z mjenje hač 40 procentami hišće snadniše hač w prěnim kole tydźenja.

Wjace pokiwow na namóc

Tež w Čěskej republice płaća wot dźensnišeho nowe naprawy přećiwo koronawirusej. Tak dyrbja so nješćěpjeni w zawodach ­tydźensce testować dać. Wšelake firmy, kaž awtotwarc Hyundai w morawskich Nošovicach (hlej foto) tajke testy dobrowólnje poskićeja. Do hosćencow smědźa wotnětka jenož hišće šćěpjeni a wustrowjeni. Foto: pa/ČTK/Jaroslav Ožana

nawěšk