To a tamne (17.02.26)
Blisko Lipska su paduši wjacore dźesatki kilogramow pyšneho kobołka pokradnyli. Kónc tydźenja je policija štyrjoch podhladnych w sewjeru a juhu města lepiła. Jónu běchu woni 40 kilogramow, druhi raz 44 kilogramow dulow wuryli. Pokradnjene rostliny je policija namakała. 24- do 42lětnym nětko přemysłowe padustwo a přeńdźenje přećiwo zwjazkowemu zakonjej wo škiće přirody wumjetuja.
Po tym zo bě mjedwjedźica hajnika w Słowakskej zraniła, jeho syn zwěrjo zatřěli. Po podawku su tři młodźata mjedwjedźicy našli, tuž so zjawnosć kraja wo jich přichod starosćeše. Statny sekretar za škit wobswěta Filip Kuffa na facebooku wo njezbožu blisko wsy Hrboltova rozprawješe. Mjedwjedźatka su mjeztym do zwěrjenca města Bojnice dowjezli, dokelž same w dźiwiznje přežiwić njemóža.
Šěsć medaljow kónc tydźenja – wšitke w skeletonje
Zymske olympiske hry w Italskej běchu kónc tydźenja połne wjerškow a emocionalnych rozsudow. Němski team wubědźi sej tójšto medaljow. Wosebje w skeletonje postarachu so němscy atleća wo wjele drohometala.
Najwjetši wuspěch poradźi so němskim mužam pjatk w skeletonje, hdźež doby Axel Jungk slěbornu medalju za olympiskim dobyćerjom Mattom Westonom z Wulkobritaniskeje. Dalši Němc, Christopher Grotheer, je sej bronzowu medalju zawěsćił a postara so wo přidatne wyskanje.
Sobota wobradźi nam dalši historiski wuslědk w alpinskim sněhakowarskim sporće. Lucas Pinheiro Braathen z Brazilskeje doby sensacionelnje złoto we wulkim slalomje muži. Z tym zawěsći swojemu krajej prěnju olympisku medalju na zymskich hrach scyła. Braathenowe dobyće drje je jedyn z najwjetšich wokomikow tutych Zymskich olympiskich hrow, wšako wuzběhuje přiběracu mjezynarodnosć olympiskeho zymskeho sporta.
Historiske wudobyće
New Delhi (B/SN). Kardinal Anthony Poola bu za prěnjeho předsydu Indiskeje biskopskeje konferency z něhdyšeje „njedótkliweje“ woršty dalitow wuzwoleny. Indiska katolska unija wuzběhnje wólby jako „historiski akt z wulkej symboliskej hódnotu“. To je sylne znamjo za to, zo namaka dotal socialnje diskriminowana kasta dalitow swoje prawniske městno w hierarchiji katolskeje cyrkwje.“
Rekordna suma pjenjez
New York (B/SN). Rysowanku molerja Michelangela Buonarrotija (1475–1564) za Sixtinsku kapału we Vatikanje su njedawno namakali a w New Yorku za rekordnu sumu 27,5 milionow US-dolarow (něhdźe 23 milionow eurow) přesadźili. Přesadźowanski dom Christie’s bě hódnotu objekta spočatnje na dwaj milionaj dolarow trochował. Rysowanka je 13,5 króć 11,5 centimetrow wulka. Kupc chce anonymny wostać.
Katedrala, dom abo bazilika?
Srjedźny staw lěpje zapřijeć
Wo dočasnym zawrjenju brunicoweje jamy Wjelcej-juh a atraktiwnišim přichodźe Łužicy su zašły pjatk we wosebitym wuběrku Braniborskeho krajneho sejma diskutowali, kiž so z wuwićom strukturow regiona zaběra.
Podstupim (SN/jp). Frakcija AfD w Braniborskim krajnym sejmje je srjedź januara próstwu wo rozprawu wo tym zapodała, kotre sćěhi dočasne zawrjenje brunicoweje jamy Wjelcej-juh w lěće 2030 za region změje. Tohodla je so wuběrk parlamenta w Podstupimje pjatk zetkał, zo by so w zwisku z tutej temu z přichodom Łužicy zaběrał. Prěni dypk dnjoweho porjada běše aktualne stejišćo k procesej strukturneje změny. Kathrin Schneider, ministerka a šefina statneje kenclije, rozjima aktualny budget za projekty w tutym zwisku. Hač do kónca lońšeho lěta chcyše kraj za to 197 milionow wudać, na kóncu bě jich samo wo 8 milionow eurow wjac. Ćim wažniše po jeje měnjenju je, zo so wšě planowane projekty skónčnje zahaja. Jenož tak móža spěchowanske pjenjezy spomóžnje zasadźić.
Wopominaja Nawalneho
Moskwa (dpa/SN). Dwě lěće po smjerći kritikarja Krjemla Alexeja Nawalnyja ludźo w Ruskej a druhich krajach dźensa na njeho spominaja. Jeho team zdźěli, zo we wjace hač 20 městach zarjadowanja planuja. W Moskwje smědźa ludźo kwětki na jeho rowje wotpołožić, wjetše zarjadowanja pak dowolene njejsu. Wudowa Julia Nawalnaja prezidentej Wladimirej Putinej nadal mordarstwo wumjetuje. Krjeml dale wo přirodnej smjerći rěči.
De-facto-aneksija bliska
Jerusalem (dpa/SN). Knježerstwo Israela je po rozprawach wšelkich medijow namjetej přihłosowało, kiž ma sydlerjam nakup kraja w Zapadnojordanskim kraju wolóžić. Zwjazkowe knježerstwo wobhladuje tole jako přeńdźenje přećiwo mjezynarodnemu prawu a mjenuje to dalši krok w směrje na de-facto-aneksiju kónčiny. Tež organizacije Peace Now rozsud raznje kritizuje. Israelske wonkowne ministerstwo wumjetowanja dementuje.
Třo sněhakowarjo zemrěli
Znaty twarc karnewalowych wozow w Düsseldorfje Jacques Tilly je do ...
Prezidentej rjap skrućili
Nowy rekord přeńdźenjow
Přewažnje měrliwje wopominali
Drježdźany (dpa/SN). Wjacore tysac ludźi su w sakskej stolicy přećiwo pochodej prawicarskich ekstremistow składnostnje wopominanja zničenja města w Druhej swětowej wójnje protestowali. Na wjacorych městnach běchu sej prawicarjo a přećiwni demonstranća tak bliscy, zo so widźachu a słyšachu. K direktnej konfrontaciji pak njeje dóšło. Na přećiwnu demonstraciju bě něhdźe 3 000 demonstrantow přichwatało, prawicarjow naličichu něhdźe 2 000. Policija žane oficialne ličby njewozjewi.
Najebać mjeńše rozkory z policiju bě napřećiwny protest přewažnje měrliwy, rjekny rěčnik policije Thomas Geithner. Wosebje na spočatku demonstracije běchu přećiwni demonstranća spytali, čaru prawicarskeho „pochoda wopomnjeća“ ze sydanskimi blokadami přetorhnyć. Při tym běchu demonstranća tež policiju nadběhowali. Zastojnicy dyrbjachu tuž popjerjowy spray wužiwać. Dohromady 2 200 policistow bě sobotu w Drježdźanach zasadźenych, mjez nimi běchu tež zastojnicy na konjach.
Rubio: USA su dźěćo Europy
Je so na konferency w Mnichowje woprawdźe přećelski zwuk přesadźił?
Mnichow. W Bayerskej wotmě so kónc tydźenja zaso wěstotna konferenca. Wot lěta 1963 schadźuje so tam lětnje mjezynarodna diplomatiska, politiska, intelektualna a žurnalistiska elita, zo by wo přichodźe swěta rěčała.
Loni je wotewrjenska narěč ameriskeho wiceprezidenta J. D. Vanca europskich partnerow zadźiwała a zamjerzała. W njej běše Vance Europje wotsalenje wot idealow swobody a wohrožowanje demokratije wumjetował. Jako přikład mjenowaše wot europskeho sudnistwa w lěće 2024 jako njepłaćiwe deklarowane prezidentske wólby w Rumunskej. Hladajo na tutu narěč běše atmosfera do spočatka lětušeje konferency napjata. Wobdźělnicy běchu wćipni, što wonkowny minister USA Marco Rubio w swojej narěči tematizuje.
