Wiesbaden (dpa/SN). Podźěl wot chudoby wohroženych ludźi w Němskej je minjeny čas dale rozrostł. Tole zwěsća Zwjazkowy statistiski zarjad we Wiesbadenje. Něhdźe 13,3 miliony ludźi w Němskej mějachu naposledk dochody pod mjezu hrožaceje chudoby. To bě 16,1 procent wšeje ludnosće. Před lětom wučinješe tónle podźěl hišće 15,5 procentow.

Po definiciji Europskeje unije je wot chudoby wohroženy, kiž ma mjenje hač 60 procentow přerěznych dochodow ludnosće k dispoziciji. Lěta 2025 wučinješe tuta mjeza za samostejacych w Němskej 1 446 eurow měsačnje a za domjacnosće ze staršimaj a dwěmaj dźěsćomaj pod 14 lětami 3 036 eurow.

Wot chudoby chětro wohroženej stej dwě skupinje ludźi: 30,9 procentow samo­bydlacych a 28,7 procentow samokubłacych měješe dochody pod mjezu chudoby. Bjezdźěłni su ze 64,9 procentami najbóle wot chudoby wohroženi.

Rejza Šěnowa z Budyšina ma přispomnjenje k Předźenakej (30. 1.26).

Jara zajimawy přinošk Benedikta Cyža w pjatkownym Předźenaku wuwabi we mi při wšej chutnosći wobsaha tola po­směwk. Do teksta bě sej mały čerćik zaběžał. Rozeznawać měli ćišćernju (Druck-erei) a čisćernju (Reinigung)

Pawoł Krječmar cyle wěsće njeje žanu čisćernju, potajkim někajku rjedźernju přewzał, kotraž je so 8. oktobra 1945 w Rumburgu załožiła a tule po cyłym teksće šeri, ale tam bě so załožiła ćišćernja.

Zawěsće tež njewotměwachu so wólby delegatow na hłownu zhromadźiznu ŁSZNW 27. januara 1945, ale 1946.

Lipsk/Magdeburg/Erfurt (dpa/SN). Po warnowanskich stawkach je zjawny bliskowobchad w Sakskej, Durinskej a Saksko-Anhaltskej dźensa zaso zaběžał. Tak zdźělichu wobchadne zawody mjez druhim w Halle a Lipsku dźensa rano na swojich internetnych stronach, zo je warnowanski stawk skónčeny. Pola Drježdźanskich wobchadnych zawodow je informacija wo běžnym stawku z internetneje strony šmórnjena. Tramwajki a busy zaso normalnje jědu.

Druhe wobchadne zawody kaž w Magdeburgu, Kamjenicy abo Erfurće běchu hižo wčera připowědźili, zo su busy a nadróžne wot dźensnišeho ranja něhdźe 2.30 hodź. zaso po puću.

Dźěłarnistwo ver.di bě wčera w běhu tuchwilnych tarifowych jednanjow do cyłodnjowskeho warnowanskeho stawka namołwjała. Busy a tramwajki zwjetša wjace njejědźechu. Potrjechene běchu štyri wulke města w Sakskej, tři města a regiony w Saksko-Anhaltskej a jědnaće w Durinskej. Wosebje w powołanskim wobchadźe so tole sylnje wuskutkowaše.

Vogtlandske město wuhotuje 2027 znowa „Dźeń Saksow“

Plauen (dpa/SN). Město Plauen hotuje so z połnej paru na to, wuhotować jako hosćićel „Dźeń Saksow 2027“. Staflowy stab je wyši měšćanosta Stefan Zenner (CDU) wčera wot wyšeho měšćanosty Sebnitza Ronalda Kretschmera přewzał. Sebnitz bě loni 31. Dźeń Saksow wuhotowali. Najwjetši swjatk swobodneho stata zarjaduja wot lěta 2023 jenož hišće po dwěmaj lětomaj.

Vogtlandski Plauen pokazuje přede­wšěm na swoje nazhonjenja: Lěta 1997, runje před 30 lětami, běchu tam hižo raz z hosćićelom ludoweho a towarstwoweho swjedźenja. „Je to wulke a zdobom naročne wužadanje. Zdokonjamy pak to“, wyši měšćanosta Zenner rjekny.

Při wšěm planuja hižo nětko nowostku w Plauenje: Klětu wotměje so swjedźeń wot 18. do 20. junija. Tak njezarjaduja wulki wjeršk swobodneho stata wjace prěni kónc tydźenja w septembru, ale runočasnje z tradicionalnym Plauenskim swjedźenjom cankow.