Křesćanstwo zaso wožiwjene
Bonn (B/SN). Před 80 lětami je samoknježićel Enver Hoxha (1946–1985) prěni ateistiski stat Albansku załožił. Wón je kraj do wulkeje chudoby a izolacije wjedł. Tež narodne wozrodźenje pod nawodnistwom awtoritarneho krala Ahmeta Zoguwa (1928–1939) njebě Albanskej swobodu přinjesło. Hakle po lěće 1990 so nabožne žiwjenje z přewažnje muslimami a jenož 15 procentami křesćanow zaso wožiwi. Dźensa česća tam swjatoprajenu mać Terezu, kotraž bě albanskeho pochada.
Fresko Jězusa namakali
İznik (B/SN). W zapadnoturkowskim měsće İznik namakachu archeologojo w podzemskej narownej komorce, pochadźacej z 3. lětstotka, derje zdźeržane fresko Jězusa. Wone pokazuje syna Božeho jako dobreho pastyrja. Tehdy buchu křesćenjo w romskim mócnarstwje přesćěhani.
Smjertny rub přistupny
Turin (B/SN). Wšitcy móža sej nětko Turinski smjertny rub Jězusa ze smartfonom, tabletom abo kompjuterom dokładnje wobhladać. Slědy wobliča, ćernjoweje króny, šwikanja a křižowanja hodźa so tak powjetšić. Wužiwar dóstawa wujasnjenja na zakładźe ewangelijow w italšćinje, jendźelšćinje, francošćinje a španišćinje.
Miliony ludźi bjez miliny byli
Washington (dpa/SN). Sćěhi hoberskeho zymskeho njewjedra w USA su dale a wótriše. Wjace hač milion domjacnosćow dyrbješe nachwilnje bjez miliny wutrać. Wosebje potrjecheni běchu ludźo w južnych zwjazkowych krajach Tennesee, Texas a Louisiana. Tola tež wuchod bě potrjecheny. Najwjetši problem je mokry ćežki sněh na milinowodach, kotrež leža na drjewjanych sćežorach. Wosebje wohroženi su bjezdomni, kiž su pod hołym njebjom abo w stanach bjez tepjenja žiwi.
Tójšto mortwych w stadionje
Salamanca (dpa/SN). Na koparskim hrajnišću w Mexiku je při wobrónjenym nadpadźe znajmjeńša jědnaće ludźi wo žiwjenje přišło. Dwanaće wopytowarjow bu zranjenych. Pozadki njeskutka w zwjazkowym staće Guanajuato hišće njeznaja. W času koparskeje hry běchu skućićeljo z awtami přijěli a do přihladowarjow třěleli. W kónčinje wojujetej kriminelnej cwólbje z brutalnymi srědkami wo kontrolu na wikach z drogami a wolijom.
CDU: Žane prawo na lifestyle
Pistorius wočakuje zamołwjenje
Berlin (dpa/SN). Zakitowanski minister Boris Pistorius wočakuje po přisłodźenjach ze stron prezidenta USA Donalda Trumpa w zwisku ze zasadźenjom zwjazkoweje wobory w Afghanistanje zamołwjenje. Na prašenje, hač měł Trump přiwuznych padnjenych němskich wojakow wo wodaće prosyć, rjekny politikar SPD: „To by znamjo přistojnosće a respekta było.“ Pistorius pak z tym njeliči: „Wšitcy wěmy, kak ameriski prezident funguje.“
Trump bě sćelakej Fox News rjekł, zo njejsu USA nihdy NATO trjebali. Druhe kraje su po 11. septembru 2001 tež wojakow do Afghanistana pósłali, „su pak zboka fronty wostali“, Trump rjekny. Němska je mjez 2001 a 2021 w Afghanistanje cyłkownje 59 wojakow zhubiła.
Zelensky: Zrěčenje hotowe
Vilnius (dpa/SN). Dokument wo wěstotnych garantijach USA na dobro Ukrainy je po informacijach ukrainskeho prezidenta Wolodymyra Zelenskeho podpisanja kmany. Tole rjekny Zelenskyj na nowinarskej konferency w Litawskej, na kotrejž wobdźělištaj so tež litawska prezidentka Gitanas Nauseda a pólski prezident Karol Nawrocki. Nětko dyrbja jenož hišće čas a městnosć podpisanja postajić, tak Zelenskyj. Wón žada sej w tym zwisku tež wěstotne garantije ze stron europskich partnerow. Jedna tajka garantija by čłonstwo Ukrainy w EU było.
Problem wostanu dale žadanja Ruskeje za teritorijemi Ukrainy. Ukraina so wosebje spjećuje, Ruskej kónčiny přewostajić, kotrež Kijew hišće sam kontroluje.
Clinton namołwja ludźi so pozběhnyć
Minneapolis (dpa/SN). Bywši prezident USA Bill Clinton je po smjertnych wutřělach na muža w Minneapolisu ludźi namołwjał, swój hłós přećiwo praksy wotsunjenja prezidenta Donalda Trumpa pozběhnyć. „Jeli swoju swobodu po 250 lětach spušćimy, ju snano nihdy wróćo njezdobudźemy“, Clinton piše. Wšitcy, kotřiž do ameriskeje demokratije wěrja, měli so nětko pozběhnyć.
Demokrat Clinton, kotryž bě mjez 1993 a 2001 prezident USA, zdobom potwjerdźi, zo njeby nihdy za móžne měł, zo so podawki kaž minjeny tydźeń w Minneapolisu a druhich městach hdy w zjednoćenych statach wothrawaja.
Sobotu rano běchu zastojnicy zarjada za imigraciju ICE w Minneapolisu muža zatřělili. Spočatk januara běchu zastojnicy ICE w samsnym měsće 37lětnu mać třoch dźěći na samsne wašnje morili. Knježerstwo twjerdźi, zo dyrbjachu so policisća zakitować. Guwerner Tim Walz je Trumpa mjeztym naležnje napominał, „tute 3 000 njewukubłanych mocow wróćo zwołać, prjedy hač dalšich ludźi morja“.
Sněh a lód ludźi wužadałoj
Zymske poměry ze zdźěla ekstremnymi wuskutkami w Němskej
Offenbach (dpa/SN). Hač do 25 centimetrow sněha a zalodźene dróhi: We wjacorych dźělach Němskeje su so ludźo dźensa rano ze strašnymi zymskimi poměrami bědźili. Wina je poměrnje mała, ale jara skutkowna nižina, kotraž je so wčera wječor z juha do směra na sewjer rozpřestrěła. W tym zwisku so mócnje sněhuje, na wuchodźe nastanje strašny lód.
Dźensa rano běchu wosebje w Mecklenburgsko-Předpomorskej, Braniborskej a Berlinje dróhi zasněžene a zdźěla z lodom pokryte. W Badensko-Württembergskej a Bayerskej bě sněh hižo wčera wječor wulke ćeže na dróhach zawinował. Nadróžna słužba měješe ruce połne dźěła. Tójšto awtow dyrbjachu z přěrowow wućahnyć. Awtodróha A8 bě blokowana, po tym zo běchu wjacore awta do so zrazyli. Při tym nasta zwjetša jenož wěcna škoda. Šoferam nakładnych awtow radźeše policija dočakać, doniž njejsu najhórše wuskutki wjedra přewinjene. W Frankskej, na sewjeru Bayerskeje, dźensa žana šulska wučba njeje.
Nichtó njeje njelegalny
Muzeje maja dale ćeže
Drježdźany (dpa/SN). Statne wuměłske zběrki w Drježdźanach bědźa so po cyberowym nadpadźe přeco hišće z techniskimi problemami. „Njemóžemy ničo noweho rjec, situacija je njezměnjena“, zdźěli rěčnica muzeja nowinarjam. Muzeje su přiwšěm wotewrjene. Bjezposrědnje po nadpadźe bě krajny kriminalny zarjad přepytowanja zahajił.
Hosći z chlěbom a selu witali
Rekordna ličba wopytowarjow
Kamjenica (dpa/SN). Najwjetši archeologiski muzej Sakskeje w Kamjenicy wjeseli so nad nowym rekordom wopytowarjow. W lěće 2025, jako bě město europska kulturna stolica, zličichu tam nimale 105 000 wopytowarjow, to je 45 procentow wjace hač lěto do toho a telko kaž hišće ženje po wotewrjenju, muzej zdźěla. 2024 běchu 72 000 wopytowarjow ličili. Dotalny rekord 85 000 hosći je z lěta 2023. Najwjetši zajim je přehladka wo stawiznach hórnistwa z 45 000 zajimcami zbudźiła. Muzej běchu 2014 w historiskim twarjenju něhdyšeje kupnicy Schocken wotewrěli, kotraž bu 1930 wotewrjena. Pod pomnikoškitom stejacy dom běchu po planach architekta Ericha Mendelsohna natwarili.
Direktorka muzeja Sabine Wolfram hódnoći lěto kulturneje stolicy jako „wulki dar“ za Kamjenicu a za muzej. „Mam jenož pozitiwne nazhonjenja. Tójšto ludźi je naš muzej wopytało. Zdobom smy dźakowano lětušemu schadźowanju Zwjazka muzejow Němskeje fachowcow na bohatu kulturnu scenu Kamjenicy skedźbnili.“ W Sakskej wěnuja so lětsa z rjadom wosebitych zarjadowanjow židowskej kulturje Němskeje.
