Mjeno Jiří Vosecký najskerje w Serbach znate njeje. To je škoda, dokelž je 75lětny muž Połserb – syn Serbowki, kiž bě po wójnje do Čěskeje přišła. Tajkich dźěći je wjele a bohužel nimale žane z nich njeserbuje. Sym husćišo słyšał, zo su so wosebje maćerje jako emigrantki wo to prócowali, dźěła dla spěšnje čěsce nawuknyć. Tohodla je ­so serbšćina w Čěskosłowakskej zhubiła. Dźensa mi tute dźěći powědaja, zo je jim to žel, ale jako dźěći njejsu wo tym přemy­slowali. To je zaso dopokaz, kak je so nastajenje narodnostnych mjeńšinow w Europje změniło. Dźensa je to hódnota, ale w času mojeju wowkow tomu tak njebě. Je to kaž ze skutkowanjom čłowjeka w přirodźe – hakle, hdyž něšto nimale zhubimy, sej to wažimy. Senator Jiří Vosecký je aspirant za interview. Na jeho přihot so wje­selu, dokelž tón muž je zwuraznił sadu, ­kotraž mi njeda spać: „Wšo dobre, štož je w Čěskej wokoło Serbow nastało, sym ja organizował.“ Wo tym chcu wjace zhonić. Lukáš Novosad

Zasadźenje helikoptera bě wčera, póndźelu, na Choćebuskim hłownym dwórnišću ­jara wunošne: Na wšěch 25 nowych milinowych sćežorow su podłu železniskeje čary nastajili, kotraž wjedźe do noweje porjedźernje. Helikopter z nazhonitym mustwom trjebaše za to runje dwě hodźinje. Runje tak profesionalnje dźěłachu monterojo, kotřiž sćežory na přihotowane fundamenty stajichu a w běhu někotrych mjeńšin přišrubowachu. Z akciju njejsu zamołwići jenož tójšto časa zalutowali. Twarskich naprawow dla bychu wulki dźěl dwórnišća dlěši čas zawrěć dyrbjeli. Tole nětko scyła trjeba njebě. W lěću chcedźa nowu halu a z njej tež kolije poswjećić. Foto: Michael Helbig

Zapřijeće „Wurjadne zamóženje“ je njesłowo lěta 2025. Tole je jury dźensa w srjedźno-hessenskim Marburgu zdźěliła. Z hospodarskeho a juristiskeho wobłuka pochadźacy wuraz dźensa wužiwaja, zo bychu z nim zatajili, zo jedna so wo nowe zadołženje, jury pisa. „Wurjadne zamóženje“ bě loni w diskusiji wo nowe kredity sta miliardow eurow zwjazkoweho knježerstwa zjawnu debatu dominowało.

Škleńcu kołbasy a hewak ničo je paduch pokradnył, kiž je so kónc minjeneho tydźenja do bydlenja 29lětneho muža w durinskim Sömmerda zadobył. Muž bě durje přełamał a škleńcu kołbasy za tři eura spakosćił. Hač bě skućićel hłódny, pjany abo hač njeje prosće ničo druheho na­makał, njeje znate. Škoda při durjach ­bydlenja, kotruž je paduch zawostajił, hódnotu rubizny „w dalokej měrje“ pře­sahuje, policija zdźěla.

Freiburg (B/SN). Na wurjadnu hłownu zhromadźiznu 7. a 8. januara je bamž Leo XIV. wšěch 245 kardinalow do Roma přeprosył. Teologa Andreas Batlogg měni: „Zo chce nas bamž informować a z nami wuradźować, je postup porno zašłosći.“ Kaž medije rozprawjeja, dźěše tam wo synodalnosć a předkoncilarnu Božu mšu. Bamž pyta kompromis mjez „tradiciju a dalewuwićom.“

Symbol Swjateje swójby

Vatikan (B/SN). Bamž Leo XIV. je na swjedźenju Swjateje swójby přirunował: „Tak kaž je Józef z Mariju a Jězusdźěćatkom před kralom Herodesom ćěkał, přesćěhani křesćenjo dźensa před jednotliwymi despotami a krejlačnymi tyranami ćěkaja. „Sprawna swójbna přichilnosć, wotewrjeny dialog, swěra a dobre skutki móža nadźiju do swěta njesć a so ze šulu lubosće stać.“

Cyrkwje derje wopytane

Hannover (B/SN). W Němskej je loni patoržicu pjeć milionow ludźi jedne z 33 000 ewangelskich kemšow wopytało. To je trochu wjace hač lěto do toho. To je signal, zo je hodowne poselstwo ludźi docpěło. Wěra kemšerjow pak njewobmjezuje so jenož na patoržicu“, wujasni předsydka rady Ewangelskeje cyrkwje w Němskej Kirsten Fehrs.