Berlin (dpa/SN). We wjacorych městach wuchodneje Němskeje su dźensa na šulach warnowanske stawki přewjedli. Tole je rěčnik dźěłarnistwa za kubłanje GEW zdźělił. Rozměr akcijow njebě dopołdnja hišće znaty. Runočasnje su po wšej Němskej přistajeni kubłanskeho systema na dróhu šli. Wjetše zarjadowanja wotměchu so w Berlinje, Hamburgu, Kölnje, Lipsku a Mannheimje. W Berlinje chcychu so tež přistajeni z Braniborskeje a Mecklenburgsko-Předpomorskeje wobdźělić.

Dźěłarnistwo sej žada, tarifowe dojednanja powšitkownje we wšitkich zwjazkowych krajach nałožować. Runočasnje dźěłodawarjam wumjetuja, zo njejsu dotal žadyn poskitk předpołožili. Dalše warnowanske stawki do hłowneho wuradźowanja 11. februara su tuž móžne.

Erfurt/Kamjenica (dpa/SN). Techniska uniwersita w Kamjenicy je rozsudźiła, zo njesmě durinski ministerski prezident Mario Voigt (CDU) hižo dlěje doktorski titul wužiwać. Voigt je mjeztym připowědźił, zo chce na zarjadniskim sudnistwje přećiwo rozsudej filozofiskeje fakulty skoržić. Wot fakulty kritizowane městna jeho doktorskeho dźěła wučinjeja runje 2,58 procentow cyłeho dokumenta, Voigt rjekny. „Wědomostne žro mojeho dźěła njeje wot wumjetowanjow potrjechene.“

TU w Kamjenicy njeje so dotal k tomu wuprajiła. Voigt bě tam lěta 2008 pro­mowował. Swoje dźěło „Ameriski prezidentski wólbny bój. George W. Bush přećiwo John F. Kerryjej“ bě wón zwjetša w USA napisał. Wumjetowanja, zo njeje Voigt w swojim doktorskim dźěle swědomiće dosć dźěłał, běchu so hižo we wólbnym boju do wólbow krajneho sejma 2024 jewili.

Voigt je sej wěsty, zo su wumjetowanja njewoprawnjene. Wot uniwersity zasadźena komisija je pječa wobkrućiła, zo je doktorske dźěło w porjadku. Rozsud uniwersity Voigt tuž njerozumi.

Kancler knježerstwowu deklaraciju w zwjazkowym sejmje předstajił

Berlin (dpa/SN). Zwjazkowe knježerstwo CDU/CSU a SPD chce kritisku infrastrukturu w Němskej w přichodźe lěpje škitać. Tole je zwjazkowy kancler Friedrich Merz (CDU) dźensa w swojej knježerstwowej deklaraciji w zwjazkowym sejmje připowědźił. Nadpad na milinowu syć w Berlinje spočatk lěta je pokazał, kak łoskoćiwa tuta naležnosć je, Merz rjekny. Wčera bě koaliciski wuběrk wo tym wuradźował a to samsne zwěsćił. Merz w tym zwisku rjekny, zo njesměli informacije wo kritiskej infrastrukturje hižo tak lochce zjawnje přistupne być. „Dźe wo geologiske daty a dalše, za wěstotu wažne informacije. Dyrbimy transparencu w tutej naležnosći wotstronić a reziliencu natwarić.“ Zwjazk a zwjazkowe kraje měli pruwować, kotre informacije wo wažnych objektach zjawnje spřistupnja a kotre nic. Nimo toho měli škody spěšnišo porjedźeć. Zwjazkowe knježerstwo je mjeztym naćisk zakonja „Kritis“ předpołožiło, kotryž ma zwjazkowy sejm nětko wobzamknyć.

Najebać to, zo je w Sakskej dobrych 100 000 wobydlerjow mjenje hač před 16 lětami, financuje swobodny stat dźensa po planje wjac dźěłowych městnow hač tehdy. Tehdomniši ministerski prezident Stanisław Tilich (CDU) bě drje na spočatku koalicije CDU/FDP wottwar statneho personalneho aparata namjetował, ale tomu je hač do dźensnišeho dosć mocow w politice a towaršnosći zadźěwało. Nichtó nima ničo přećiwo tomu, zo je wjac wučerjow a dosć policistow. Ale w Sakskej kaž w Serbach mamy samsny spodźiwny fenomen: Je drje dźeń a wjac ludźi, kotřiž zarjaduja a poradźuja, ale dźeń a mjenje, kotřiž substancu – w Sakskej hospodarsku, w Serbach rěčnu – wšědnje produkuja. Wšako zarjadniski a produktiwny wobłuk mjez sobu wo dale a mjenje dźěławych konkurujetej. To podrywa zaměr rozmacha regionalneho hospodarstwa runje tak kaž wiziju 100 000 serbowacych. Starosć na přikład wo serbski dorost serbskich rjemjeslnikow je wažniša hač kóžda dźěłarnička. Marcel Brauman