To a tamne (20.02.25)
Njeznaći su sydom ćelatow z hródźe w Arzbergu pokradnyli. Skućićeljo su so w nocy do zymskeho kwartěra skoćatow zadobyli, zdźěli policija w Lipsku. Cyłkowna hódnota ćelatow wučinja wjace hač 2 000 eurow.
Ryby su mudre. Tole zwěsćichu nětko wědomostnicy Max-Planckoweho instituta za biologiske zadźerženje w Konstanzu. Při slědźenju na kupje Korsika bě wědomostnikam napadnyło, zo jim wěste ryby při nurjenju sćěhowachu a picu spakosćichu, kotraž bě poprawom jako mytowanje za wuspěšne pospyty postajena. Zadźiwani zwěsćichu, zo přewodźachu ryby bjezwuwzaćnje ludźi, wot kotrychž su hižo raz chłóšćenki dóstali.
Měrowa iniciatiwa běše hósć BSW
Zastupjerjo serbskeje iniciatiwy za měr w Ukrainje su wolóženi, zo skónčnje wo tym jednaja, pokročowanju morjenja zadźěwać. Zdobom su w zwjazkowym sejmje wo iniciatiwje rěčeli.
Berlin/Budyšin (SN/mb). Zapósłanča Żaklin Nastić witaše njedawno zastupjerjow serbskeje iniciatiwy za měr w Ukrainje, Hajka Kozela a Cyrila Pjecha, samo kašubsce do rumnosće skupiny Zwjazka Sahry Wagenknecht – rozum a sprawnosć (BSW). Nastić, něhdyša krajna předsydka Lěwicy w Hamburgu, ma pólske, němske, kašubske a židowske korjenja. Wona dźěła za BSW mjez druhim w zakitowanskim wuběrku zwjazkoweho sejma.
Warnowanske stawki zahajili
Drježdźany (dpa/SN). Po njewuspěšnych tarifowych jednanjach za sobudźěłaćerjow zwjazka a komunow chcychu potrjecheni dźensa w Drježdźanach stawkować. Dźěłarnistwo verdi je k tomu namołwjało. Planowane bě, zo so mjez druhim sobudźěłaćerjo měšćanskeho zarjada, klinikuma města a dalšich posłužbow na stawkach wobdźěla. Dotal njejsu dźěłodawarjo hišće žadyn poskitk předpołožili. Přichodne dny stawkuja na mnohich dalšich městnosćach.
Ludźo starosća so bamža dla
Rom (dpa/SN). Po nowej diagnozy chorosće bamža Franziskusa, so dale a wjac ludźi wo njeho starosći. W běhu přepytowanjow zwěsćichu lěkarjo Gemelli chorownje w Romje, zo stej płuca zahorjenej. Chorosć je chětro kompleksna, w zdźělence dale rěka. Před chorownju dale a wjac zastupjerjow medijow na nowe powěsće ze stron lěkarjow čakaja. Tež wěriwi so tam zetkaja a so za wustrowjenje bamža modla. Po informacijach swojeho rěčnika, měješe bamž měrnu nóc.
Identifikacija drje dlěje traje
Dźěłaćerjo Carolinowy móst w Drježdźanach hižo dale ...
Hospodarstwu ideje AfD škodźa
Ličba dźěławych sylnje woteběra
Trump: Zelenskyj wójnu zawinował
Washington (dpa/SN). Prezident USA Donald Trump je po zetkanju swojeho wonkowneho ministra Marco Rubio ze zastupjerjemi Krjemla optimistiski. Wón je połny nadźije, zo dojednaja so přećiwnicy hižo bórze na měrowe zrěčenje nastupajo wójnu w Ukrainje. Rozmołwy z ruskimi zastupjerjemi běchu jara dobre, Trump zdźěli. „Ruska chce něšto činić“, wón doda. Zdobom wumjetuje Trump ukrainskemu prezidentej Wolodymyrej Zelenskemu winu na tym, zo je Ruska w februaru lěta 2022 Ukrainu nadpadnyła.
Zastupjerjo z USA a Ruskeje rozmołwjachu so wčera na zetkanju w saudi-arabskim Riadźe wo kóncu wójny w Ukrainje. Z Ukrainy a EU nichtó pódla njebě. Wobě stronje po zetkanju wonkowneju ministrow Marca Rubija a Sergeja Lawrowa dale zdźělištej, zo wosebite skupiny za měrowe jednanja wutworitej.
Mjeztym su so staty EU trajaceje wójny dla na nowe sankcije přećiwo Ruskeje dorozumili. Wone płaća wot přichodneje póndźele.
Kandidata njepostajili
W Choćebuzu podpěraja Zeleni Maju Wallstein (SPD)
Choćebuz (dpa/SN). Strona Zelenych w Braniborskej so při wólbach zwjazkoweho sejma přichodnu njedźelu prěni raz we wólbnym wokrjesu direktneje kandidatury wzdawa a wabi za kandidatku SPD Maju Wallstein. Přičina toho je, zo chce strona z tym demokratisku direktnu kandidatku podpěrać a jeje šansy na mandat powyšić, wuswětli braniborska šefina Zelenych Alexandra Pichl powěsćerni dpa. Wo tym rozsudźił je skónčnje Choćebuski wokrjesny zwjazk. Pichl ma postupowanje za zajimawe, předewšěm chce wona wědźeć, hač to funguje. Braniborscy Zeleni we wólbnym wokrjesu 64 (Choćebuz – Sprjewja-Nysa) tuž cyle wědomje njenastupja. Před štyrjomi lětami je Wallstein direktny mandat z 27,6 procentami prěnich hłosow před požadarjom AfD Danielom Münschke dobyła. Münschke je tehdy 25,7 procentow hłosow wolerjow dóstał. W pjeć krajach na wuchodźe Němskeje njejsu Zeleni w lěće 2021 ani jedyn direktny mandat docpěli.
Płun dosaha
To a tamne (19.02.25)
Swětoznata pomazanka je nětko bjez praweje ruki. Lětdźesatki dołho mjenowachu jeho medije „nana nutelle“, tola 14. februara wón w starobje 97 lět zemrě. Francesco Rivella bě nimo Michele Ferrero worjechowu-nugatowu pomazanku wuwił. Rivella bě zežiwidłowy chemikar. Słowo „nutella“ zestaja so z dweju słowčkow, jendźelskeho słowa „nut-“, štož rěka worjech, a „-ella“, štož je klasiska italska kóncowka.
Wótře telefonować móže fatalne sćěhi měć. Znajmjeńša je tole žona w ćahu do Rosenheima nazhoniła. Wona so při telefonaće wjeseleše, zo běše horda, zo je policiji wućeknyła. Ciwilny policist to słyšeše a zazwoni swojich kolegow. Kaž so wukopa, bě so wona wospjet agresiwnje zadźeržała, čehoždla ju hamtske sudnistwo w Mnichowje do psychiatrije přepokaza.
