Mannheim (dpa/SN). Policisća su po smjertnej jězbje z dwěmaj mortwymaj w Mannheimje hač do pózdnjeho wječora bydlenje zajateho šofera w Ludwigshafenje w Porynsko-Pfalcy přepytowali. Po informacijach medijow su zastojnicy wšelake wěcy sobu wzali, kotrež chcedźa nětko wuhódnoćić. Tež a awće namakana cedlka policistow zaběra. Na njej su wołojnikowe skicy widźeć. 40lětneho muža chcychu dźensa přesłyšować. Muž bě wčerawšu róžowu póndźelu ze swojim awtom do ludźi zrazył. Při tym zemrěštaj 83 lětna žona a 54lětny muž.

Berlin (dpa/SN). Zwada mjez USA a Ukrainu­ wuskutkuje so tež na rozmołwy mjez CDU/CSU a SPD k móžnemu wu­tworjenju noweho zwjazkoweho knježerstwa. Za dalšu pomoc na dobro EU wažne financne prašenja chcedźa tak spěšnje kaž móžno rozrisać – po móžnosći hišće do wjerška EU zajutřišim, štwórtk. Po prěnich sonděrowanjach minjeny pjatk su zastupnicy stron wčera wječor dale jednali. Tež dźensa běchu wuradźowanja předwidźane. „Nuznosć je z mojeho wida jara wulka“, rjekny předsyda CDU Friedrich Merz. Najebać časowy ćišć je tež předsyda SPD Lars Klingbeil zwólniwy, so hižo tutón tydźeń z CDU dojednać. Jutře móhli sej nawodźa stron ze zwjazkowym kanclerom Olafom Scholzom (SPD) dorěčeć, što štwórtk w Brüsselu předpołoža.

Na wjeršku EU chcedźa na zwadu mjez prezidentom USA Donaldom Trumpom a ukrainskim prezidentom Wolodymyrom Zelenskym reagować. Při tym póńdźe wo dalšu financnu a wojersku pomoc na dobro Ukrainy a wo zesylnjenje europskeho zakitowanja.

Prezident Donald Trump nuzuje Kijew k měrowym jednanjam

Washington (dpa/SN). Knježerstwo prezidenta Donalda Trumpa wojersku podpěru USA na dobro wot Ruskeje nadpadnjeneje Ukrainy nachwilnje přetorhnje. Wukaz prezidenta je hnydom płaćiwy. Trump z tym potwjerdźi, zo je jemu měr najwažniši, rěka z Běłeho domu. Pomoc tuž skónča, zo móhli wšitke dotalne naprawy pruwować a pohódnoćić. Něšto dnjow po eklaće při wopyće ukrainskeho prezidenta Wolodymyra Zelenskeho wukazana kročel USA změje bjezdwěla dramatiske sćěhi za Ukrainu.

Nowina New York Times rozprawja po informacijach zastojnikow knježerstwa, zo chcedźa z pomocu hakle potom pokročować, hdyž je so Ukraina k měrowym jednanjam z Ruskej zawjazała. To potrjechi brónje a municiju w hódnoće jedneje miliardy eurow, kotrež su hižo po puću do Ukrainy abo kiž su skazane. Trump bě so do swojeho wukaza z wonkownym ministrom Marcom Rubiom, wiceprezidentom D. J. Vancom a zakitowanskim ministrom Pete Hegsethom dorozumił.

Serbski institut (SI) z lěto a wjac wědomostnikami naše žiwjenje přewodźuje a analyzuje – na próstwy wo wjac praktiskeho wužitka su ludźo pokiw na wědomostnu swobodu dóstawali. Zwonka Serbow móžeš kóždy dźeń wo wědomostnikach čitać, kotřiž so na zakładźe swojich wuslědkow swobodneho slědźenja towaršnostnje angažuja, wšako je jich dźěło w našim kraju přewažnje z dawkow rjemjeslnikow a druhich ludźi financowane, kotřiž pjenježny fundament zjawnych institucijow tworja. So wě, zo je tež w SI tajkich přikładow, z forumom wo serbskim žiwjenju w dobje digitalizacije, kotryž zwučeny institutny dźeń naruna, so hišće bóle jako Serbam wužitna institucija profiluje. A to dwójce: Sprěnja přinošuje ke kooperaciji mjez angažowanymi praktikarjemi. A zdruha je nam při pytanju za praktiskimi rozrisanjemi poboku. Tón raz so wo digitalizaciji bjez livestreama diskutuje, wšako je direktny kontakt mjez ludźimi njeparujomny. Marcel Brauman