Warnuja před lodom a sněhom

srjeda, 17. januara 2024 spisane wot:
Offenbach/Drježdźany (dpa/SN). Na zapadźe Němskeje je so dźens rano dešćować započało. Bjezposrědnje na to dóńdźe na dróhach na juhozapadźe Němskeje k prěnim wobchadnym njezbožam na zalodźenych dróhach. W běhu dopołdnja mějachu wulke problemy z hładkimi dróhami w Porynsko-Pfalcy, Hessenskej a Badensko-Württembergskej. Ludźo běchu namołwjeni, radšo doma wostać. Zalo­dźene dróhi wočakuja dźensa wječor tež w Sakskej. Z městnami padnje hač do 15 centimetrow sněha. Sylneho wětřika dla hroža wějeńcy. Zhromadnje z lodom móhł sněh jutře rano na dróhach k masiwnym problemam wjesć, wjedrarjo připowědźa. Temperatury wostanu pod nulu.

Zastrow z FDP wustupił

srjeda, 17. januara 2024 spisane wot:
Drježdźany (dpa/SN). Bywši wjelelětny předsyda sakskeje FDP Holger Zastrow je ze strony wustupił. Swój rozsud wopodstatni z tym, zo FDP wosebje na zwjaz­kowej runinje zajimy srjedźneho stawa hospodarstwa kaž rjemjeslnikow, hosćencarjow a spediterow hižo njezastupuje. Město toho su so Zelenym podali a zakładne hódnoty swobodnych demokratow přeradźili. Zastrow připowědźi załoženje „noweho projekta“ resp. „zhromadneho hibanja“ přichodny tydźeń, kaž z rozprawow wšelakich sakskich medijow wuchadźa. Zastrow je hišće čłon frakcije FDP w měšćanskej radźe Drježdźan a chce tam hač do lětušich komunalnych wólbow dale skutkować. Sakska FDP rěči wo dlěšim procesu „wotcuzbnjenja“ Zastrowa wot FDP.

Katar sćele lěki – Němska granaty

srjeda, 17. januara 2024 spisane wot:

Doha/Gaza/Berlin (dpa/SN). Po wot Katara posrědkowanym dojednanju mjez Israelom a islamistiskej Hamas maja israelscy zastajency w Gazaskim pasmje medikamenty dóstać. Nimo toho chcedźa dalše pomocne srědki za nuzu ­ćerpjacu ciwilnu ludnosć do Gazaskeho pasma dowjezć. Transport je hižo po ­puću do Egyptowskeje. Wottam dowjezu pomocne srědki z nakładnymi awtami do Gazaskeho pasma. Zastarać chcedźa wosebje chronisce chorych zastajencow. Hamas so boji, zo móhł Israel mjez pomocnymi srědkami sćelaki schować, kotrež přeradźa, hdźe Hamas zastajencow chowa. Lěki maja tři měsacy dosahać.

Zwjazkowe knježerstwo po informacijach medijow pruwuje, Israel z dodawanjom granatow za tanki w boju přećiwo Hamas podpěrować. Wobdźělene ministerstwa su so pječa zasadnje na to dojednali, wotpowědnu próstwu Israela spjelnić. Dokelž njemóže industrija wulce preciznu municiju spěšnje dosć naprodukować, chcedźa granaty najprjedy raz ze składow zwjazkoweje wobory brać.

Weimarske poměry?

srjeda, 17. januara 2024 spisane wot:
Nimale kóždy tydźeń so tuchwilu nowa strona na politiskim jewišću Němskeje jewi, pak jako plan pak hižo załožena: Ně­hdyša lěwicarka Sahra Wagenknecht ma nowu stronu za „rozum a sprawnosć“. Hans-Georg Maaßen, něhdyši prezident Zwjazkoweho zarjada za wustawoškit a hišće čłon CDU, chce ze zjednoćenstwa křesćanskich demokratow „unija hódnotow“ swójsku stronu sčinić. A nětk je wjelelětny předsyda sakskeje FDP w zwisku z wustupom ze swojeje dotalneje strony załoženje „zhromadneho hibanja“ připowědźił. Sym wćipny, hač bórze prominentny Serb zwěsći, zo bychmy tola swójsku serbsku stronu po přikładźe SSW trjebali ... Nichtó njemóže sej hišće stare zapadnoněmske poměry hač do 70ych lět jenož z CDU/CSU, SPD a FDP předstajić. Hroža nam „Weimarske poměry“? Ně, to je načasna demokratiska normalita w europskich krajach. A na kóncu dyrbi so kóždy wo wjetšinu prócować, potajkim z druhimi stronami rěčeć. Marcel Brauman

To a tamne (17.01.24)

srjeda, 17. januara 2024 spisane wot:
Měšeńca procha a muchow na alarmowej připrawje je w poruhrskim Ennepetalu zasadźenje wohnjoweje wobory zbudźiła. Awtomatiska wohnjoškitna připrawa w industrijnym muzeju bě wobornikow alarmowała. Jako wobornicy do muzeja přijědźechu, spěšnje zwěsćichu, zo so tam scyła njepali. „Kolegojo wuhladachu chětro zapróšeny alarmowak, kiž bě połny muchow“, wobornicy zdźěleja. „Na to drje je sensor reagował.“ Wobornicy namjetuja, w domje časćišo proch trěć.

Trump prěnje předwólby dobył

wutora, 16. januara 2024 spisane wot:

Des Moines/Washington (dpa/SN). Při prěnich předwólbach republikanow w zwisku z kandidaturu wo zastojnstwo prezidenta USA je Donald Trump wčera jasnje a překwapjace w Iowa dobył. Hižo 30 mjeńšinow po zahajenju wothłoso­wanja su wjacore sćelaki medijow USA Trumpa jako dobyćerja wozjewili. Wothłosowanje wotměwachu tam na mjeńšich zhromadźiznach strony. Guwerner Floridy Ron DeSantis docpě druhe městno a bywšu pósłanču Zjednoćenych narodow Nikki Haley wolachu wólbokmani na třeće městno.

Inwesticije w Ukrainje móžne

Davos (dpa/SN). Zwjazkowy hospodarski minister Robert Habeck (Zeleni) z toho wuchadźa, zo němske předewzaća w Ukrainje inwestuja. Najebać wójny skići zwjazkowe knježerstwo wotpowědne zawěsćenje za inwesticije, zdźěli wón dźensa na Swětowym hospodarskim forumje w šwicarskim Davosu. Tam chcyše so ­Habeck zhromadnje z ukrainskim prezidentom Wolodomyrom Zelenskyjom na jednym ze zarjadowanjow wobdźělić.

Dale a wjac eko-ratarjow

Höckemuprawa wzać?

wutora, 16. januara 2024 spisane wot:
Erfurt (SN). Hladajo na dale a sylnišu AfD diskutuje so wo zakazu strony a dalšich móžnosćach. Jedna z toho je próstwa, kotraž wopřija, zo njeměli za jednotliwcow zakładne prawa płaćić, dokelž přećiwo wustawje jednaja. Mjeztym bu na internetnej stronje Campact peticija přećiwo šefej frakcije AfD w durinskim krajnym sejmje Björna Höcku zahajena. Pod ­hesłom „Fašista zadźeržeć“ namołwja wosoba z mjenom Indra Gosh ludźi peticiju podpisało. Hižo wjace hač 953 000 podpěraćelow je tam hižo hač do dźensnišeho dopołdnja podpisali. W peticiji apeluje iniciatorka na zwjazkoweho kanclera Olafa Scholza (SPD) a šefow demokratiskich frakcijow SPD, Zelenych, FDP, CDU/CSU a Lěwicy kaž tež zwjazkowe knježerstwo wotpowědnu próstwu wo zakazu zakładnych prawow zwjaz­kowemu wustawowemu sudnistwu zapodać.

Kritika a chwalba

wutora, 16. januara 2024 spisane wot:
Drježdźany (dpa/SN). Planowany integraciski zakoń dósta wčera na słyšenju w socialnym wuběrku sakskeho krajneho sejma chwalbu a kritiku. Ze zakonjom chce koalicija CDU, Zelenych a SPD situaciju ­ćěkancow polěpšić. Prawiznik Ulrich Vosgerau (CDU), kiž bě so zdobom na dwělomnym zeńdźenju ze sobustawami AfD a prawicarskimi ekstremistami w Podstupimje wobdźělił, měnješe, zo měła Sakska wot Bayerskeje wotpisać. Čłon CDU Vosgerau bě přeprošenju AfD jako posudźowar na słyšenje přišoł. Sakski społnomócnjeny za wukrajnikow Geert Mackenroth ma naćisk zakonja za „wažny signal“.

Što pomha přećiwo AfD?

wutora, 16. januara 2024 spisane wot:

Politikarjo hladajo na wuspěch strony a bližace so wólby znjeměrnjeni

Berlin (dpa/SN). Hladajo na rozróst AfD a jeje splećenosć z radikalnymi aktiwistami pytaja tamne politiske strony starosćiwje za receptami přećiwo stronje na prawej kromje politiskeho spektruma w Němskej. Minjenu njedźelu je strona dalši wuspěch žnjała: W prěnim kole wólbow krajneho rady we wuchodnym durinskim wokrjesu Solawa-Orla je jeje kandidat jasnje dobył. W SPD so přiběrajcy hłosy jewja, kotrež sej wot zwjazkoweho kanclera Olafa Scholza (SPD) hinašu migracisku politiku a lěpšu komunikaciju žadaja, zo bychu so argumentam AfD lěpje wobarać móhli. Dale diskutuja tež móžny zakaz strony, kotraž je wočiwidnje z prawicarjemi splećena.

Senatorka zludana

wutora, 16. januara 2024 spisane wot:
Berlin (dpa/SN. Senatorka za nutřkowne naležnosće zwjazkoweje stolicy Berlina Iris Spranger (SPD) je hladajo na namócnosće při wopomnjeću Karla Liebknechta a Rosy Luxemburg předwčerawšim w Berlinje jara zludana. Někotři z demonstrantow su „cyle wědomje akceptowali, zo dyrbja ludźo z najćešimi zranjenjemi do chorownje“, rjekny senatorka wčera w Berlinskim domje zapósłancow. Po informacijach policije běchu so wjacori demonstranća „njewočakowano a njejapcy“ z drjewjanymi retlemi a železnymi žerdźemi do policistow dali. 21 zastojnikow so při tym zrani. Wideja w interneće, po kotrychž su policisća demonstrantow pječa jako prěni nadběhowali, su wopačne, senatorka rjekny. „Tole sej zakazuju. Tajke wuprajenja su prosće wopačne.“ Senatorka kritizowaše tež wuprajenja zapósłanca Lěwicy Ferata Koçaka. Wón bě na swojej internetnej stronje wo „brutalnej namocy policije“ a wo „zranjenych a krawjacych demonstrantach“ rozprawjał. „Maće jako zapósłanc tež zamołwitosć.“ Njedźelu běchu tysacy ludźi w Berlinje morjenje Liebknechta a Luxemburg před 105 lětami wopominali.

Serbska debata

nowostki LND