Periodu podlěšić
Berlin (dpa/SN). Prezidentka zwjazkoweho sejma Bärbel Bas (SPD) je so za to wuprajiła, wólbnu periodu zwjazkoweho sejma wot štyri na pjeć lět podlěšić. „Pjećlětna legislaturna perioda by zwjazkowemu sejmej tyła“, zwurazni wona tele dny w Berlinje. „Snano móhli so tež te abo tamne wólby na samsnym terminje přewjesć.“ Za wšitke krajne sejmy nimo Bremena wólbna perioda pjeć lět traje.
Zdobom wupraji so prezidentka parlamenta za to, starobu wólbokmanych wot 18 na 16 lět znižić. Tak je to hižo při mnohich komunalnych a krajnych wólbach kaž tež přichodnje při europskich wólbach. „Ja wosobinsce sym za to, starobu 16 lět po cyłym Zwjazku zawjesć“, wona wuzběhny.
Nowelu zakonja wobzamknyli
Drježdźany (dpa/SN). Sakski kabinet je naćisk za nowy zakoń wo wysokich šulach wobzamknył. Nowela bě jedne z centralnych ćežišćow koaliciskeho zrěčenja, kotrež nětko zwoprawdźeja. Minister za wědomosć Sebastian Gemkow (CDU) je wčera detaile předstajił. Po jeho słowach je zakoń zakład, zo móže so Sakska na wědomostne stejnišćo dale wuwić. Zdobom polěpši so wubědźowanjakmanosć mjez wysokimi šulemi we wobłukomaj slědźenje a wučba.
Nadźija na lěpši přichod w EU
Měšćanosća Bosniskeje a Hercegowiny list pisali
Sarajewo (juny). W zhromadnym lisće prezidentce Europskeje komisije Ursuli von der Leyen su so měšćanostka a měšćanostaj třoch najwjetšich městow Bosniskeje a Hercegowiny – Sarajewa, Banje Luki a Mostara – minjeny tydźeń za to podźakowali , zo je EU jich krajej status kandidata EU spožčiła. Kaž Benjamina Karić, Draško Stanivuković a Mario Kordić wuzběhuja, je móžny přistup balkanskeho kraja „swójbje EU“ městam „pohon a pozbudźenje“ kaž tež jich „chutny zajim“.
To a tamne (22.12.22)
Etat Sakskeje: Serbska rada z jednaćelnju
Rada za serbske naležnosće w Sakskej změje bórze prěni raz swójsku jednaćelnju. To je wulki wuspěch wojowanja radźićelow, kotřiž móža přichodnje serbske zajimy efektiwnišo zastupować.
Drježdźany (dpa/SN/mb). Sakska chce w přichodnymaj lětomaj telko pjenjez wudać kaž nihdy do toho. Wčera wječor je Sakski krajny sejm dwójny etat za lěće 2023 a 2024 we wobjimje 49,34 miliardow eurow wobzamknył. Wšitke namjety za změny w etaće opoziciskeju stronow AfD a Lěwicy su CDU, Zeleni a SPD wotpokazali.
„Na zakładźe aktualnje wysokich dawkowych dochodow a w zašłosći wutworjenych rezerwow móžachmy etat takle zestajić“, rozłoži sakski financny minister Hartmut Vorjohann (CDU). Přiwšěm ma wón wobmyslenja. „Wot zasady sem měrja so wudawki po dochodach. Tule pak zdźěla trochu wotchilamy.“
Apel strowotniskej ministerce
Drježdźany (dpa/SN). Dokelž medikamenty pobrachuja, su sakscy prezidenća lěkarskeje komory, zubnolěkarskeje komory kaž tež komory apotekarjow saksku strowotnisku ministerku Petra Köpping (SPD) k spěšnemu jednanju namołwjeli. Tuchwilu hrozy wulki strach, zo njemóže strowotniski wobłuk zastaranje ludźi garantować, prezidenća komorow wčera w zhromadnym wozjewjenju zdźělichu. Postajenja strowotniskeje politiki njehodźa so w realiće zwoprawdźić.
Zelenyskyj we Washingtonje
Washington (dpa/SN). Ukrainski prezident Wolodymyr Zelenskyj je so na krótki wopyt do USA podał. To je jeho prěnja jězba do wukraja wot spočatka ruskeje wójny před nimale dźesać měsacami. Hłowna tema su dalše dodawanja brónjow. Zaměr je skrućenje stability a woborokmanosće swojeho kraja, pisaše wón dźensa rano na Twitteru. Wječor zetka so wón z prezidentom USA Joewom Bidenom.
Plahuja dale a mjenje swini
Praskotakow so wzdać
Osnabrück (dpa/SN). Prezident Zwjazkoweje lěkarskeje komory je so za trajny zakaz praskotakow wuprajił. „Njerjadowane praskotanje je hubjene za wobswět a klimu a wjedźe přeco zaso k ćežkim zranjenjam“, Klaus Reinhardt tele dny wuzběhny. Předewšěm dźěći, młodostni a młodźi dorosćeni pod 25 lětami so zranja. „To woznamjenja sylne přidatne poćežowanje za sobudźěłaćerki a sobudźěłaćerjow w chorownjach, kotřiž tak a tak hižo na hranicy swojich mocow dźěłaja“, Reinhardt rozłoži. Minjenej lěće bě zakazane w Němskej praskotaki předawać. A tež priwatne wohnjostroje běchu jenož we wěstych kónčinach dowolene. Pozadk toho běchu wućežene chorownje za čas koronapandemije. Lětsa tajkich wobmjezowanjow njeje.
Reinhardt přeješe sej tež hladajo na połoženje na swěće, so praskotakow wzdać. Tak njeměli z raketami nowe lěto witać, hdyž je w samsnym času wójna w Europje. „Pola mnohich ćěkancow z wójnskich kónčin silwesterske praskotanje hubjene začuća wuwabja. Město toho zo ludźo pjenjezy za praskotaki wudawaja, měli je radšo za něšto zmysłapołne wužiwać a je darić.“
Dźěło přetorhnyli
Zaso ruske jednotki w Běłoruskej
Kijew (dpa/SN). Po informacijach ukrainskich medijow je Ruska znowa jednotki wójska na hranicu mjez Běłoruskej a Ukrainu přepołožiła. Tak su nimo pancerow a transporterow tež najwšelakoriše wojerske nastroje blisko hranicy dowjezli, rozprawještej wčera nowina „Ukrajinska prawda“ a agentura Unian powołujo so na běłoruski kolektiw hackerow „Hajun Project“. Wosebita skupina kompjuterowych fachowcow sćěhuje wšitke akcije tam zaměstnjenych ruskich jednotkow.
Wobkedźbowarjo wuchadźeja z toho, zo jedna so pak wo přeměstnjenje ruskich jednotkow ze sewjerneje a srjedźneje Běłoruskeje abo wo krótkodobne přepołoženje k zhromadnym manewram z běłoruskim wójskom na ukrainskej mjezy. Za dalše nadpady pak njejsu na hranicu přepołožene zwjazki tuchwilu sylne dosć, fachowcy měnja.
