Na italskej kupje Ischia pokročuja zarjady po zahubnym njewjedrje ze ...
Prawicarjo w Lipsku protestowali
Lipsk (dpa/SN). Pod hesłom „Ami go home“ („Amijo, dźi domoj“) su zawčerawšim w Lipsku wjacore sta ludźi před zwjazkowym zarjadniskim sudnistwom protestowali. Mjez rěčnikami demonstracije bě tež wudawaćel „Compact-magacina“, Jürgen Elsässer. Zwjazkowy zarjad za wustawoškit magacin jako „wopokazane prawicarskoekstremistiske prócowanje“ zastopnjuje. Mjez demonstrantami běchu předewšěm prawicarjo. Tež bywši politikar AfD André Poggenburg bě pódla. Rěčnicy kritizowachu postupowanje zwjazkoweho knježerstwa, mjez druhim hladajo na wójnu w Ukrainje.
Po demonstraciji wobdźělnicy po měsće ćehnjechu. Napřećiwni demonstranća su protestowacych ze sedźenskimi blokadami zadźerželi. Na kromje demonstracije dóńdźe přeco zaso k wukročenjam, policija zdźěli.
„Němska derje přihotowana“
Na krajnym zjězdźe SPD w Choćebuzu k zmužitosći namołwjeli
Choćebuz (dpa/SN). Braniborska SPD wobydlerjam kraja do zymy w zwisku z energijowej krizu zmužitosć přirěčuje. Zwjazkowy kancler Olaf Scholz a ministerski prezident Dietmar Woidke (wobaj SPD) běštaj zawčerawšim nadźijepołnaj, zo hodźi so kriza z alternatiwnymi energijowymi srědkami a financnymi pomocami Zwjazka a kraja zmištrować. „Z rozsudami, kotrež smy tworili, móžemy nětko rjec, zo budźemy drje krizu zhromadnje přetrać“, wuzběhny Scholz na krajnym stronskim zjězdźe SPD Braniborskeje w Choćebuzu.
Wjace hač 20 wuhlowych milinarnjow mjeztym zaso dźěła, tři eksistowace atomowe milinarnje hišće přez zymu dale milinu dodawaja. Płunowe składy su mjeztym derje pjelnjene. Na sewjeroněmskich pobrjohach su nowe stejnišća za běžity płun nastali, kotrež so zhromadnje z importami z Norwegskeje a Nižozemskeje wo to postaraja, zo je Němska derje na zymu přihotowana.
To a tamne (28.11.22)
W Japanskej je policija kocora na wobchadneho policista pomjenowała. Z małym kolesowym nahłownikom na hłowje wustupi dźesaćlětny Pitaro w YouTube-wideju policajskeho zarjada prefektury Shimane, zo by wobydlerjow pohonjował, jemu runja činić a nahłownik nosyć. Ze swojim něžnym napohladom sposrědkuje Pitaro mužam a žonam kóždeje staroby wulki wuznam wobchadneje wěstoty, rozłoži rěčnik tamnišeho policajskeho zarjada.
Jědnaće lět stary kusk kwasneje torty princa Williama a princesny Kate bu nětko za 390 puntow (dobrych 450 eurow) přesadźeny. To bě mjenje hač trochowana hódnota 400 do 600 puntow. Dalši kusk kwasneje torty Williamoweho nana krala Charlesa III. a jeho mandźelskeje Camille z lěta 2005 njeje sej nichtó kupił. Jasnje wjace pjenjez wunjese porno tomu foto Queen Elizabeth II. a jeje mandźelskeho princa Philipa. Za portret z podpismomaj mjeztym zemrěteho kralowskeho pora je kupc 980 puntow zapłaćił.
Wosebje małe dźěći potrjechene
Berlin (dpa/SN). Infekcije z tak mjenowanym RSV-wirusom wjedu po informacijach Roberta Kochoweho instituta (RKI) wosebje pola małych dźěći přiběrajcy ke chorosćam a zapokazanjam do chorownje. Přichodne tydźenje dyrbimy dale ze stupacymi ličbami ličić, rěka w tydźenskej rozprawje RKI. We wjacorych zwjazkowych krajach, mjez druhim w Bayerskej, Sewjerorynsko-Westfalskej a Delnjej Sakskej, maja hižo nětko lědma swobodne dźěćace łoža w chorownjach.
Hospodarski wukon přiběrał
Wiesbaden (dpa/SN). Němske hospodarstwo je najebać krizy w lěću swoje wukony powyšiło. Nutřkokrajny bruttoprodukt přiběraše w třećim kwartalu porno předchadnemu kwartalej wo 0,4 procenty a z tym sylnišo hač wočakowane, zdźěli dźensa Zwjazkowy statistiski zarjad. Z tym rozrosće najwjetše ludowe hospodarstwo Europy najebać koronapandemiju, stupace płaćizny a wójnu w Ukrainje kaž hižo w prěnimaj kwartalomaj lěta.
Přećiwo Amazonej protestowałoj
Aktiwisća protestneho hibanja „Poslednja generacija“ su so wčera ...
W Gubinje so dalše předewzaće zaměstni
Gubin (dpa/SN). Gubin w Delnjej Łužicy je hladajo na prócowanje wo zasydlenje firmow zaso wulku kročel dale. Po kanadiskim předewzaću Rock Tech a Jack Link z USA planuje z firmu Botree Cycling třeći wulki inwestor so w měsće nad Nysu zasydlić. To by po informacijach chinskeho předewzaća, kotrež baterije recycluje, prěnje stejnišćo w Europje było. Zamołwići města a inwestor su srjedź nowembra deklaraciju wotpohlada za nakup ležownosće podpisali, zdźěli wčera tamniši měšćanosta Fred Mahro (CDU).
Baterijowa recyclingowa připrawa předewzaća Botree Cycling móhła wot lěta 2025 na łužiskim industrijnišću dźěłać započeć. Předań 3,2 hektaraj wulkeje přestrjenje za prěnje połlěto 2023 přihotuja, Mahro wuswětli. Do toho běštej „Lausitzer Rundschau“ a sćelak RBB wo tym rozprawjałoj.
Blokuja blokady
Wobzamknu klětuši etat
Knježerstwo a opozicija minjene dny w parlamenće horco diskutowałoj
Berlin (dpa/SN). Knježerstwo a opozicija stej mócnje wo prawym krizowym kursu za Němsku hladajo na wójnu w Ukrainje, njedostatk energije a inflaciju diskutowałoj. W generalnej debaće wo politice zwjazkoweho knježerstwa zawčerawšim wumjetowaše nawoda opozicije Friedrich Merz (CDU) amplowej koaliciji w zwjazkowym sejmje grawoćiwe jednanje. Kancler Olaf Scholz (SPD) porno tomu rozłoži, zo so stat wo miliony wobydlerkow stara, kotrež móža tak krizu přewinyć.
Přičina generalneje debaty bě tradicionalnje etat kanclerskeho zarjada, kotryž bu zawčerawšim předstajeny. Klětuši etat Zwjazka předwidźi wudawki we wobjimje něhdźe 476 miliardow eurow a dalše zadołženje wo 45,6 miliardow eurow. Dźensa připołdnju chcychu zapósłancy klětuši etat wobzamknyć.
To a tamne (25.11.22)
Wěstotny personal na lětanišću w New Yorku je w kófrje pasažěra žiwu kóčku namakał. We skeneru za wačoki su zwěrjo spóznali a je wuswobodźili. Kóčka bě w dobrym strowotniskim stawje a je so zaso domoj nawróćiła. Pasažěr pak poda, zo słuša kóčka někomu druhemu z jeho domjacnosće. Přiwšěm dyrbi wón nětko z chłostanskim jednanjom ličić.
Wudra z mjenom Taiyo je dobyće Japanskeje přećiwo štyrikróćnemu swětowemu mištrej Němskej na zahajenskej hrě swětowych mišterstwow zawčerawšim wěšćił. Zahorjeni japanscy fanojo kopańcy w syći maja Taiyoa tohodla za jara kompetentneho. Tuž směmy wćipni na jeho dalše prognozy być.
