Měrowy apel
Rom (B/SN). Na mjezynarodnym modlerskim zetkanju nawodow nabožinow Sant’Egidio je 3 000 ludźi žadanje wo měr schwaliło. „Měr je swjaty, wójna njesmě so nihdy nanihdy swjata stać.“ Bamž wuzběhny, zo su wukřiki ludźi wuraz bolosće wójny a stracha před atomarnym zakročenjom. Wón njemóže kónc wójnow přikazać, ma pak swjate prawo sej měr žadać a so słyšeć.
Knježny zapřijeć
Köln/Kürten (B/SN). Rjadniske knježny měli do reformowych debatow zapřijate być. Benediktinka Emmanuela Kohlhaas měni: „Smy wobrotniwiše hač wulka cyrkej. W našim konkretnym zhromadnym žiwjenju storčimy zašo na bytostne temy.“ Jako přikład mjenuje wona wustupy z cyrkwje. W aktualnej debaće su knježny njeparujomne.
Swjaty Franciskus
Vatikan (B/SN) „Hdyž sym so za mjeno Franciskus rozsudźił, wědźach, zo poćahuju so na swjateho, kotryž je tak popularny“, zwěsći bamž Franciskus na zetkanju z přisłušnikami klóštrow franciskanow, kotřiž přihotuja 800. posmjertniny swj. Franciskusa w lěće 2026. Franciskus słuša k najznaćišim swjatym w katolskej cyrkwi.
Modlić so za Pelosi
Zrěčenju přihłosowali
Hannover (dpa/SN). Něhdźe měsac po wólbach krajneho sejma w Delnjej Sakskej podpisaja SPD a Zeleni dźensa w Hannoveru koaliciske zrěčenje přichodneho krajneho knježerstwa. Kónc tydźenja bě baza wobeju stronow wujednanemu koaliciskemu zrěčenju na wosebitymaj stronskimaj zjězdomaj přihłosowała. Jutře ma so Stephan Weil (SPD) w sejmje znowa jako ministerski prezident wobkrućić.
Płun w Němskej wudobywać
Schkeuditz (dpa/SN). Sakska CDU sadźa k zawěsćenju energijoweho zastaranja w Němskej na atomowe milinarnje a wudobywanje płuna w Němskej. Na krajnym stronskim zjězdźe w Schkeuditzu wobzamkny unija zawčerawšim namjet, w kotrymž dalše wobhospodarjenje atomowych milinarnjow podpěruje. Sakska CDU chce so za wudobywanje němskich składow płuna zasadźeć. „Jako brunicowy kraj wotpowědne ćeže lětdźesatki dołho znjesechmy, nětko tole płun nastupajo tež wot druhich zwjazkowych krajow wočakujemy“, sakski ministerski prezident Michael Kretschmer (CDU) wuzběhny. Dotalne wotpokazanje frackinga je jenož ideologiskeho razu.
Industrija wjace produkowała
Z napominanskej stražu su w Berlinje wčera na kolesowarku spominali, ...
Klimowa konferenca zahajena
Šarm el-Šejch (dpa/SN). W Egyptowskej su wčera swětowu klimowu konferencu COP27 zahajili. Hladajo na minjene a tuchwilne klimowe podawki w Pakistanje, Africe, dźělach Europy a w Americe dyrbjeli na nje reagować. „Njezmějemy žanych dobyćerjow“, wuzběhny egyptowski wonkowny minister Samih Šukri na zahajenju konferency wčera w Šarm el-Šejchu.
Zwjazkowa wonkowna ministerka Annalena Baerbock (Zeleni) podšmórny, zo je wažne sćoplenje zemje wobmjezować. „Čłowjestwo měri so na sćoplenje nad 2,5 stopjenjow, štož změje zahubne wuskutki na naše žiwjenje“, wona wuzběhny. Swět ma „wšitke trěbne instrumenty k dispoziciji, zo móhli sćoplenje na 1,5 stopjenjow wobmjezować“.
W Šarm el-Šejchu při Čerwjenym morju wuradźuja zastupjerjo nimale 200 statow dwaj tydźenjej wo tym, kak hodźał so bój přećiwo sćoplenju zemje zesylnić. Je wulki čas, kaž z wčera předstajeneje rozprawy Swětoweje wjedroweje organizacije (WMO) wuchadźa.
Hranica je překročena
Ličba dojězdźowarjow dźeń a wjetša
Podstupim (dpa/SN). W Braniborskej je wšědnje nimale 1,17 milionow dojězdźowarjow po puću. To wuchadźa z ličbow portala „Pendleratlas.de“, do kotrehož dodawaja mjez druhim daty Zwjazkoweho statistiskeho zarjada. Ličby dojězdźowarjow w zwjazkowym kraju su potajkim loni porno předchadźacemu lětu zaso chětro přiběrali. Najwjac dojězdźowarjow registrowachu statistikarjo w krajnej stolicy Podstupimje, do kotrejež wšědnje něhdźe 124 000 ludźi přichadźa.
Přiwšěm je tež wjele ludźi, kiž z Podstupima druhdźe na dźěło jězdźa. Tak maja mnozy wobydlerjo města swoje dźěłowe městno w Berlinje. Snadny podźěl jězdźi samo hač do Hamburga na dźěło.
Korona wosłabja
Freiburg (dpa/SN). Po słowach Freiburgskeho medicinarja Haja Grundmanna nima koronapandemija hižo telko mocy. „Njetrjebamy so nětko hižo tak na kedźbu brać kaž před 33 měsacami, jako mějachmy wirusowu infekciju, za kotruž njebě swětowe wobydlerstwo scyła imune“, wuswětli fachowc minjeny pjatk w dźeniku „Badische Zeitung“.
To a tamne (07.11.22)
W Japanskej bu policist dla delikta přećiwo druhemu zastojnikej zajaty. Kaž japanske medije dźensa wozjewichu, je wobchadny policist za čas słužby priwatne awto kolegi pokradnył a wikowarjej předał. Wěstotna kamera bě to připadnje natočiła, tak zo móžachu pad rozrisać.
Pjany muž je w sewjerohessenskim Eschwege starušku w jeje bydlenju chětro nastróžił. Tak njebě 34lětny na dompuću zawčerawšim rano swójski dom spóznał. Dokelž swój kluč njenamaka, rozbi wón škleńcu durjow bydlenja, hdźež 78lětna žona sama bydli. Tuta poćerpi šok a sej přiwšěm zwaži zadobywarja narěčeć, jako chcyše so pola njeje lehnyć. Muž ma nětko z chłostanskim jednanjom kaženja domjaceho měra dla ličić.
Scholz wopyta Chinu
Berlin (dpa/SN). Šef frakcije SPD w zwjazkowym sejmje Rolf Mützenich je dźensnišu jězbu zwjazkoweho kanclera Olafa Scholza (SPD) do Chiny zakitował. Minjene měsacy staj Scholz a chinski statny šef Xi Jinping wjacekróć přez widejo rěčałoj. Nětko pak bě direktna wuměna trěbna, předewšěm hladajo na rusku wójnu přećiwo Ukrainje.
Za sankcije so zasadźić
Berlin (dpa/SN). Generalny sekretar FDP Bijan Djir-Sarai je zwjazkowu wonkownu ministerku Annalenu Baerbock (Zeleni) namołwjał, so sylnišo za sankcije přećiwo Iranej zasadźeć. Za iransku rewoluciju je wažne, kak so wukraj zadźerži, rjekny Djir-Sarai dźensa w rańšim magacinje sćelaka ZDF. Trěbne su na wosoby so poćahowace sankcije přećiwo wjednistwu kraja. Wobydlerjo njeměli sankcije začuwać. Połoženje w Iranje je dźensa tema na zetkanju wonkownych ministrow G7 w Münsteru.
Žada sej wjace podpěry Zwjazka
