Prašenja, dwěle a wuhlady
Napjata a zajimawa diskusija mjez wobydlerjemi a wědomostnikami
Konjecy (JK/SN). Delany móhli so w přichodnych lětach stać ze srjedźišćom slědźenja na polu astrofyziki. Wo šansach, ale tež wo wobmyslenjach wobydlerjow k planowanemu astrofyziskej slědźenskej připrawje z tak mjenowanym Einsteinowym teleskopom diskutowachu wčera na dworje towarstwoweho domu „Delany“ w Konjecach wědomostnicy, fachowcy z hospodarstwa a zarjadnistwa, komunalni politikarjo a wobydlerjo. Přeprosyli běchu k tomu wědomostnicy němskeho centruma za astrofyziku (DZA), kotřiž hižo wot měrca probowe točenja za planowany projekt njedaloko Konjec přewjednja.
Wuprajenja su njeakceptabelne
Berlin (dpa/SN). Nowy němski wulkopósłanc w Israelu Steffen Seibert je přirunanje holocausta palestinskeho prezidenta Mahmuda Abbasa jako „wopačne a njeakceptabelne“ kritizował. Abbas bě do toho na swojim wopyće w Berlinje Israelej „holocaust“ nad mnohimi Palestinjanam wumjetował a z tym rozhorjenosć zbudźił. Rěčnik zwjazkoweho kanclera Olafa Scholza (SPD) Steffen Hebestreit bě nowinarsku konferencu po wuprajenju Abbasa zakónčił, kancler so na městnje njewupraji, ale hakle po tym słowa Abbasa kritizowaše.
Němska ma sposrědkować
Drježdźany (dpa/SN). Sakski ministerski prezident Michael Kretschmer (CDU) je so znowa za to wuprajił, zo měła Němska mjez Ruskej a Ukrainu sposrědkować. „Wójna dyrbi so po móžnosći spěšnje zakónčić“, wón wčera na zjawnej diskusiji ze swojim naměstnikom a sakskim hospodarskim ministrom Martinom Duligom (SPD) w Drježdźanach wuzběhny. To njerěka, zo měła Ukraina teritorij wotedać. Chaos po cyłym swěće měli zadźeržeć.
Sakska na prěnim městnje
Industrija starosća so mało wody dla
Berlin (dpa/SN). Němska industrija starosća so niskich pegelow na němskich wodowych dróhach dla. „Je prašenje časa, doniž připrawy w chemiskej abo woclowej industriji njewotpinu, mineralne wolije a twaršćizny swój cil njedocpěja abo so wulke transporty hižo wjace přewjesć njehodźa“, zdźěli wčera zastupowacy hłowny jednaćel Zwjazka Němskeje industrije Holger Lösch.
Trajaca perioda suchoty a niska woda wohrožujetej zastaransku wěstotu industrije. „Předewzaća nastajeja so na najhórše. Tak a tak hižo napjate hospodarske połoženje so dale a bóle přiwótřa“, Lösch rozkładźe. Łódźe jězdźa, jeli scyła, tuchwilu z minimalnym wućeženjom. Niska woda móhła nimo toho nuzowy staw zastaranja z energiju dale přiwótřić. „Politiske plany, hladajo na płunowu krizu nachwilnje sylnišo na wuhlo sadźeć, njejsu masiwnych transportnych ćežow dla zwoprawdźomne.“ Łódźe njemóža dosć surowiznow po wodowych dróhach transportować. Tež wulki dźěl ćěriwow po rěkach dowožuja.
Dawk njehodźi so šmórnyć
Berlin (dpa/SN). Za přetrjebarjow w Němskej njeje wuwzaće nastupajo wuswobodźenje nadhódnotoweho dawka na płunowy wotedawk móžno. Komisija EU wčera w Brüsselu potwjerdźi, zo njemóže zwjazkowe knježerstwo kaž předwidźane dawk šmórnyć. Komisija chce zhromadnje z knježerstwom w Berlinje za rozrisanjom pytać.
Zwjazkowe knježerstwo chce po informacijach kanclera Olafa Scholza (SPD) nětko spěšnje wo alternatiwach wuradźować. W amplowej koaliciji SPD, Zelenych a FDP rozmysluja wo zniženju nadhódnotoweje sadźby. „Minimalnu měru pjeć procentow měli wužiwać“, rjekny hospodarski politikar Zelenych Dieter Janecek nowinje Handelsblatt. Podobne měnjenja su tež politikarjo SPD zwuraznili.
Dosć wujasnjene njebě
To a tamne (17.08.22)
W stolicy Nepala Kathmandu tuchwilu žane wotpadki njewotwozyja, dokelž při wulkej deponiji bydlacy protestuja. Wobydlerjo wokoło Banchare Danda deponije hižo někotre tydźenje nakładne awta zadźerža, kotrež chcedźa tam wotpadki dowjezć, kaž lokalne medije rozprawjeja. Wobydlerjo strukturnje słabeje kónčiny wokoło smjećoweje deponije su chudźi a ćerpja pod smjerdom kaž tež zanjerodźenjom wulkeho mnóstwa wotpadkow dla, kotrež tam jenož deponuja a njerecycluja. Z protestom žadaja sej lěpše žiwjenske wuměnjenja.
Zwěrjeću překwapjenku mějachu minjeny kónc tydźenja wobydlerjo Berlinskeho bydlenja. Tam je jich liška wopytała. Ludźo su zwěrjo sobotu rano na balkonje našli, policija zdźěli. Potom pak je liška na třěchu domu ćeknyła. Policisća zamóžachu ju pak zaso na balkon wabić. Přez bydlenje a po schodach je zwěrjo potom zaso won na dróhu běžało. Liška bě spłóšiwa a njeje nikoho nadpadnyła, w zdźělence dale rěka.
Warnuje před katastrofu
Kijew (dpa/SN). Ukrainski prezident Wolodymyr Zelenskyj je Rusku znowa doraznje namołwjał, wojakow z atomoweje milinarnje Saporiššja cofnyć. Prezident warnowaše předewšěm hladajo na sćěhi móžneje nuklearneje katastrofy, kotraž potom wšitke kraje masiwnje poćežuje. Wot Ruskeje wobsadźenu najwjetšu jadrowu milinarnju Europy hižo dny dołho nadběhuja.
Scholz w Skandinawiskej
Oslo (dpa/SN). Na druhim dnju jězby po Skandinawiskej zetka so zwjazkowy kancler Olaf Scholz (SPD) dźensa wšwedskej stolicy Stockholmje z ministerskej prezidentku Magdalenu Andersson. W rozmołwje wobjednawatej mjez druhim planowany přistup k NATO. Němska je hižo přihłosowała, zo smětej Šwedska a tež Finska k NATO přistupić. Scholz je so wčera w Norwegskej hižo z tamnišim ministerskim prezidentom Jonasom Gahrom Støreom na wuše zhromadne dźěło nastupajo energijowy sektor dojednał.
Škitne naprawy podlěšili
Žane žiwe slěbro w rybach našli
Podstupim (dpa/SN). Přepytowanja wody Wódry na jědojte substancy hišće wotzamknjene njejsu. „To móže hišće wjacore dny trać, doniž njejsmy wšitke maćizny, kotrež móhli tajku situaciju zawinować, dokładnje přepytowali“, rjekny braniborski wobswětowy minister Axel Vogel (Zeleni) wčera w informaciskim radiju RBB. „Krajny labor pak zaměrnje na tym dźěła.“ Pokiwy z Pólskeje, zo je so wysoko jědojta maćizna Mesitylen do Wódry dóstała, njejsu so z Braniborskeje strony sem wobkrućili, Vogel wuswětli. Mjeztym su wobšěrne přepytowanja wody zahajili. „A štož ryby nastupa, to dźe w prěnim rjedźe wo to wuslědźić, hač su labory w nich ćežkometale namakali“, wobswětowy minister rozłoži. „Z pólskeje strony su signale, zo njejsu ćežkometale a wosebje tež žane žiwe slěbro w rybach našli, štož wšak tež změruje.“
Kritika přećiwo Woelkijej přiběra
Köln (dpa/SN). Wjace hač 60 fararjow, wosadnych referentkow a dalšich sobudźěłaćerjow Kölnskeho arcybiskopstwa je so zjawnje wot kardinala Rainera Marije Woelkija wotwobroćiło a wozjewjenje podpisało. „To je njesměrnje dynamiske wuwiće, mnozy chcedźa podpisać“, wuswětli farar Dirk Peters wčera w Kölnje powěsćerni dpa. We wozjewjenju mjez druhim rěka: „Žadamy sej woprawdźity nowozapočatk. K tomu słušeja tež personalne změny a změny systema.“
Kritika přećiwo Woelkijej w najwjetšim katolskim biskopstwje Němskeje hižo dołho přiběra. Zo pak so nětko tež telko sobudźěłaćerjow arcybiskopstwa přećiwo swojemu najwyšemu šefej stajeja, je překwapjace. „Nowe informacije hladajo na komunikacisku strategiju kardinala a jeho sobudźěłaćerjow wjednistwa nas rozhorjeja“, we wčera wozjewjenej zdźělence dale rěka. Woelki je prawdźepodobnje w lěće 2020 komunikacisku agenturu angažował, kotraž bě plany za jeho „přežiwjenje“ w zastojnstwje naćisnyła.
Přetrjebarjow podpěrać
Zwjazkowe knježerstwo chce hladajo na płunowy wotedawk reagować
Berlin (dpa/SN). Zwjazk bydlenskich a imobilijowych předewzaćow (GdW) je sej wotedawka płuna dla podpěru financielnje sylnje poćeženych bydlenskich předewzaćow žadał. „Płunoweho wotedawka dla přiwótřa so financielne poćeženje socialnje orientowanych bydlenskich předewzaćow kaž tež domjacnosćow podružnikow“, rozłoži prezident zwjazka GdW Axel Gedaschko wčera w Berlinje.
