150 přinoškow lětsa dóšło
Waršawa/Zielona Góra (SN). Wo požadane Němsko-Pólske žurnalistiske myto Tadeusza Masowieckeho prócuja so lětsa w medijach skutkowacy wobeju krajow z cyłkownje 150 přinoškami. 76 z nich je z Němskeje, 74 z Pólskeje.
Binarodna jury, kotrejž přisłuša za kategoriju telewiziju tež nawodnica Budyskeho studija MDR Bogna Korjeńkowa, rozsudźi wo mytach w pjeć kategorijach. Lawreatow mytuja we wobłuku Němsko-Pólskich medijowych dnjow 15. a 16. junija w Zielonej Górje.
Zapodate přinoški su tematisce šěroko zapołožene. Zastupjene su artikle a wusyłanja, kotrež so z ćežkimi zhromadnymi němsko-pólskimi stawiznami rozestajeja, runje tak sylnje kaž přinoški, kotrež so na aktualne połoženje wěstotnu, energijowu a klimowu politiku nastupajo w Europje poćahuja, běrow žurnalistiskeho myta wčera zdźěli.
Dóšli su 65 printowe přinoški, 17 rozhłosowe, 20 telewizijne, 27 přinoški w kategoriji „Nowe žurnalistiske formaty“ a 21 nastupajo „Lokalny žurnalizm w pomjeznym regionje“.
Loni bu 183 přinoškow zapodatych.
Domowina z nowymi wustawkami dozałožena
We Wojerowskim Towarstwowym domje zetkachu so 9. małeho róžka 1913 delegaća serbskich towarstwow k prěnjemu zarjadowanju štyri měsacy po załožowanju Domowiny 13. winowca 1912 we Wojerecach znowa k schwalenju nowych wustawkow třěšneho zwjazka. Na schadźowanju před 110 lětami bu narodna organizacija serbskeho ludu dozałožena.
Za předsydu Domowiny wuzwolichu znowa překupca a zapósłanca Sakskeho krajneho sejma Arnošta Barta z Brězynki a za městopředsydu wobkrućichu zastupnicy towarstwow Wochožanskeho fararja Bogumiła Šwjelu. Zapisowar bu wučer a dirigent Pančičanskeje Lipy Serbskeje Jurij Słodeńk a jeho naměstnik bu Wojerowski knihićišćer Awgust Lapštich a předsyda tamnišeho Serbskeho burskeho towarstwa. Funkciju pokładnika dowěrichu překupcej Janej Haješej z Wulkich Zdźar, předsydu tamnišeho serbskeho towarstwa.
Hdyž w heli žane dźěło wjace nimaja
„rozMYSLOwanje – beSINNung“: Načasne a bjezčasne w njeměrnym ...
Naročny, wot wirtuozow wuhotowany program z wjacorymi serbskimi prapremjerami
Komornokoncertny rjad na spočatku lěta 2023 běše znowa sylnje wuprudźacy event. Dwaceći programowych dypkow za njecyły dwuhodźinski koncert pod hesłom „rozMYSLOwanje - beSINNung“. Tak prezentowaše lětsa zaso koncertna pianistka, komponistka a improwizatorka Heidemarja Wiesnerec w rjedźe swojeho nowolětneho rjadu hudźbu serbskich komponistow – a to tež nowych opusow – pod wěstej tematiku w konteksće z dalšimi twórbami swětoweje hudźbneje literatury. A to na wysokim niwowje. Za prezentaciju na spočatku lěta 2023 běše sej iniciatorka z pianistom a improwizatorom prof. dr. Peterom Jarchowom, oboistku a hrajerku na jendźelskim rohu Christinu Bylow kaž tež z ukrainskim huslerjom a komponistom Markom Chaetom zaso kedźbyhódny interpretatoriski team zdobyła. Tak předstaji swój derje koncipowany program – dźakowano rjadej spěchowarjow, mjez nimi tež Załožba za serbski lud – wot 14. do 22. januara w Lipsku a Berlinje kaž tež w Choćebuzu, Budyšinje a Wojerecach.
Nowa kniha wo Tuchorju z wulkim wothłosom
Budyšin (CS/SN). Kniha „500 lět Tuchorski kěrchow“ měješe wčera we wosadnym domje ewangelskeje Pětroweje wosady w Budyšinje před wjace hač sto zajimcami swoju premjeru. Zarjadowanje měło zazběh k dalšim poskitkam być w zwisku z jubilejom kěrchowa, rjekny Christian Tiede, farar ewangelsko-lutherskeje wosady. W juniju přednošuje wuměłstwowy historikar Kai Wenzel wo Tuchorskej cyrkwi. Wón je sobuawtor knihi, chorosće dla njemóžeše so wčera wobdźělić. Po słowach fararja Tiedeho je Tuchorski kěrchow wosebita městnosć, kotraž měšćanske stawizny a wažne historiske podawki wotbłyšćuje. Runočasnje je to wuběrny blečk přirody. Tomu móžeše wyši měšćanosta Karsten Vogt (CDU) jenož přihłosować. To je městno, hdźež pokoj namakaš, z mnohimi architektoniskimi wosebitosćemi.
Žarujemy wo horliweho Serba
Čas žiwjenja bě Křesćan Baumgärtel ze serbskej kulturu a serbskim spěwom wusko zwjazany. Jeho powołanske stacije běchu mjez druhim w lětach 1973 do 1991 Serbski ludowy ansambl, hdźež wosebje jako solist skutkowaše, abo w lětach 1991 do 1995 Domowina z. t. Jako jeje kulturny referent spěchowaše z wulkim wosobinskim angažementom Zwjazk serbskich spěwarskich towarstwow abo dźěłaše sobu a staraše so wo wulkoprojekty kaž bě to 1. zlět serbskich chórow po přewróće (18. awgusta 1996 w Chrósćicach) abo Mjezynarodny folklorny festiwal.
Wot lěta 1996 do 1998 bě Křesćan Baumgärtel wotrjadnik za regionalne kulturne spěchowanje w Załožbje za serbski lud a w lětach 2003 do spočatka 2007 předsyda Załožboweje rady. Hłowne temy w tutej legislaturje běchu polěpšenje zhromadneho dźěła Ludoweho nakładnistwa Domowina z nowowutworjenym Rěčnym centrumom WITAJ na polu wučbnicow, pruwowanje fuzije Serbskeho ludoweho ansambla z Němsko-Serbskim ludowym dźiwadłom a wotwobaranje hrožaceho redukowanja spěchowanskeho podźěla Zwjazka.
Łužiske talenty hotuja so na krajne wubědźowanje
Budyšin (SN/bn). Dobyćerjo lětušeho 32. regionalneho wubědźowanja „Młodźina hudźi“ su we wobłuku „Koncertow w awli Friedricha Schilleroweho gymnazija Budyšin“ wuběr swojich wuznamjenjenych přinoškow zjawnje prezentowali. „Njeje dźensa dawno hižo samozrozumliwe, so ze sćerpnosću, z wutrajnosću a wulkej prócu wěstemu cilej wěnować. Budźeće naš wokrjes, naše město a našu hudźbnu šulu na krajnym wubědźowanju lětsa w měrcu w Šwikawje (Zwickau) dostojnje zastupować. Za to wam wšu chwalbu a dźak wučerjam a nic naposledk staršim“, podšmórny předsydka koncert wuhotowaceho spěchowanskeho towarstwa Wokrjesneje hudźbneje šule Budyšin Margitta Luttner minjeny pjatk w połnje wobsadźenej awli.
Tak mjenowanej, wčera zahajenej hłownej probje a slědowaca ...
Chmjelow w srjedźišću přehladki
Wustajeńca tróšku hinašeho razu prezentuje Serbski dom w Choćebuzu wot minjeneho štwórtka. Widźeć je pućowanska přehladka z titlom „Chmjelow něhdy & dźensa – Schmellwitz gestern & heute“. Ju je Wobydlerske towarstwo z.t. Chmjelow (Schmellwitz) loni zestajiło.
Měšćanski dźěl Chmjelow delnjołužiskeje metropole Choćebuza tworja přewšo wšelake sydlišćowe areale ze swójskimi stawiznami. Tak móže so stać, zo so wobydlerki a wobydlerjo „Swójskeje role“ abo „Ptačeho sydlišća“ jako Chmjelowčenjo nječuja.
Tuž skići pućowanska wustajeńca dohlad do aktualneje situacije kaž tež do historiskeho wuwića jednotliwych bydlenskich kónčin. Ekpozicija chce k tomu přinošować, zo so Chmjelowčanki a Chmjelowčenjo bóle ze swojim měšćanskim dźělom identifikuja. Runočasnje měli ludźo, kotřiž tam njebydla, zhonić, kotre specifiske stawizny so za kóždym z tych zasydlenjow na sewjeru Choćebuza chowaja. Stajnje na dwěmaj taflomaj je dohlad do aktualneho połoženja a do historiskeho wuwića podaty.
„Laboratorijej“ folklory a dirigowanja
Budyšin (SN/bn). Serbski ludowy ansambl pokročuje lětsa z loni zahajenej dźěłarničku „LAB 1“. Pod nawodom pólskeho etnologi, muzikologi, multiinstrumentalista a znawca serbskeje ludoweje hudźby Macieja Rychłeho běchu w aprylu 2022 dohromady dźewjeć wobdźělnikow w běhu třoch dnjow cyłkownje pjeć sadźbow na zakładźe „Kraloweho huslerskeho spěwnika“ improwizujo nazwučowali a we wobłuku koncerta w Budyskim Kamjentym domje předstajili. Mjenowana zběrka – drje najstarše pisomne žórło serbskeje tradicionalneje hudźby – ma tež lětsa jako wuchadźišćo nowych interpretacijow starodawnych melodijow słužić. SLA je w tym zwisku hižo wuběr zestajał, z kotrymž „móža so zajimcy na dźěłarničku přihotować“, kaž na internetnej stronje ansambla rěka. Tam nańdu potencielni wobdźělnicy tež přizjewjenski formular za „laboratorij serbskeje tradicionalneje hudźby“, kotryž wuhotuja pod nowym hesłom „LAB F“ wot 24. do 26. měrca, tónraz na žurli Delnjoserbskeje kulturneje akademije w Choćebuzu. Přizjewjenja su hač do kónca februara móžne, popłatk wučinja 180 eurow.
