Slepjanske towarstwo Kólesko je dwurěčnu knihu „Kak Slěpjańska cerkwja swój torm krydła“ wudało. Zběrka w němčinje a slepjanšćinje wopřijima dohromady 152 powěsćow.

Slepo (AK/SN). Z wobšěrnej zběrku chce towarstwo Kólesko powěsće ze Slepjanskeje kónčiny a Mužakowskeje hole wobchować. Tole wuzběhny předsyda Hartmut Hančo zawčerawšim na knižnej premje­rje w ateljeju wuměłca Thomasa Schwarza w Slepom. Folklorna skupina towarstwa je zarjadowanje wobrubiła.

Kniha „Kak Slěpjanska cerkwja swój torm krydła“ wuńdźe w nakładźe 800 eksem­plarow a wopřijima 152 powěsćow w slepjanšćinje a němčinje. Wona „je zdobom dalši přinošk za zachowanje naše­je narěče“, Hančo rjekny. Wudaće spěchowała bě załožba Doma w Slepom, Rownom a Mułkecach, ilustracije su wot Rownjanskeho molerja, restawratora a stukatera Jörga Tauscha.

Mina Witkojc na słuchoknize

srjeda, 09. meje 2018 spisane wot:
Budyšin (SN). W Ludowym nakładni­stwje Domowina wuńdźe tele dny nowa słuchokniha. Wosebitosć CDje „Gaž wětšyk dujo – Mina Witkojc powěda“ je, zo móže recipient wuznamnej delnjoserbskej lyrikarce, nowinarce, přełožowarce twórbow Handrija Zejlerja a Jakuba Barta-Ćišinskeho kaž tež organiza­torce „Serbskich wječorow“ samej připosłuchać, kak swójsku baseń přednjese a wšelake stawiznički powěda. LND wuda słuchoknihu składnostnje lětušich 125. narodnin Miny Witkojc. Teksty kaž tež hudźbu něhdźe hodźinu trajaceho zynkonošaka bě Jutta Kaiserowa wubrała.

Folklorna lawina

póndźela, 07. meje 2018 spisane wot:

Baršć (SN/bn). Mjeztym hižo 10. raz wuhotuje wokrjes Sprjewja-Nysa posledni kónc tydźenja junija Folklornu lawinu. Na třoch hrajnišćach w Lubnjowje, Bórkowach a Starej Darbni předstaji so wjace hač 300 akterow w dohromady štyrnaće wuměłskich cyłkach z jědnaće krajow. Najdlěši puć drje změja skupiny Kirakira Hikaru Arts z Japanskeje, Yong Ning Jin Tang z Chiny – tutej krajej so zdobom prěni raz na festiwalu wobdźělitej – a Les Folles Lambettes z Kanady. Nimo toho prezentuja so ansamble z Baskiskeje, Belgiskeje, Běłoruskeje, Českeje, Georgiskeje, Ruskeje, Šotiskeje a Turkowskeje. Bikulturnu a dwurěčnu Łužucu zastupować chcedźa Němsko-Serbski ansambl Choćebuz, dźěćacy a młodźinski ansambl Pfiffikus, tohorunja z delnjołužiskeje stolicy, kaž tež Serbski ludowy ansambl. Spěwarki a spěwarjo z Budyšina chcedźa zhromadnje z orchestrom a baletom we wobłuku zahajenja swjedźenja krótki folklorny program kołowokoło delnjoserbskeho nałožka łapanja kokota prezentować.

Budyšin (SN/bn). Najznaćiše powědančko Marje Kubašec „Row w serbskej holi“ je njedawno znowa w Ludowym nakładnistwje Domowina wušło. Kniha wopřijima originalny tekst kaž tež přełožkaj do němčiny a pólšćiny Lory Kowarjoweje resp. Aleksandera Widery. Nimo toho wobsahuje esej Trudle Malinkoweje, kotryž stawizniske pozadki jednanja wobswětluje. Wčera je něhdźe 30 zajimcow premjeru wudaća w Budyskej Smolerjec kniharni dožiwiło.

Anett Šołćic witaše přitomnych a pokaza jim dotalne edicije powědančka. Po tym­ přečita lektor noweho trojorěčneho wudaća Michał Nuk tekst Marje Kuba­šec, w kotrymž awtorka stawiznu pólskeho nućeneho dźěłaćerja za čas Druheje swětoweje wójny wopisuje.

Jutře před 200 lětami, 5. meje 1818, narodźi­ so w Trieru Karl Marx, politiski žurnalist, duchowny inspirator a njesprócniwy organizator dźěłaćerskeho hi­ba­nja, kotrež so pozdźišo z jeho mjenom wo­znamjeni. Po Marxowej woli to njebě. Wozjewi dźě sam: „Wěm jeničce tole, zo žadyn Marxist njejsym.“

Po woli staršeju a přiwuznistwa so njemě­ješe, wuzwoliwši sej powołanje. Nic jurist, ale filozof być, za to so na swoje žiwjenje rozsudźi. Filozof pak noweho typa, kaž tole w znatej 11. tezy wo Feuerbachu postulowaše: „Filozofojo su swět jeno wšelako interpretowali, dźe pak wo to, jón změnić.“

Jeho prěnje wusahowace dźěło je hro­ma­dźe z přećelom na čas žiwjenja Friedrichom Engelsom 1847/1848 napisał. Wony „Manifest Komunistiskeje strony“ mějachu Serbja w lěće 1956 tež w swojej maćeršćinje w ruce. 1969 wuńdźe třeće, wot Pawoła Nowotneho do serbšćiny přełožene wudaće. Druhe bytostne dźěło Karla Marxa, zakónčeny prěni dźěl „Kapitala“, do wšěch spisownych rěčow přenjesene, serbsce njepředleži. Štó by sej zwěrił, tutu wobšěrnu knihu zeserbšćić?

Jurja Wingerapočesćili

štwórtk, 03. meje 2018 spisane wot:

Chrósćicy (CRM/SN). „Serbja su bohaći na wuznamnych wosobinach“, wobkrući farar Měrćin Deleńk wutoru wječor. Składnostnje stotych posmjertnin duchowneho, spisowaćela a redaktora Katolskeho Posoła Jurja Wingera bu jeho wobnowjeny narowny pomnik z rownišćom znowa poswjećeny.

Narodźiwši so 1872 do swójby žiw­nosćerja, maturowaše wón po wopyće šule w domjacych Chrósćicach a preparandy w Budyšinje jako chowanc Serbskeho seminara w Praze na Małostronskim němskim gymnaziju. Potom studowaše teologiju. Jako młody duchowny wróći so do Serbow a běše sydom lět kapłan w Radworju. Na to skutkowaše dale w Lubiju. Jako dobry znajer pól­šćiny a čěšćiny staraše so tam tohorunja wo wukrajnych dźěłaćerjow. Hakle 45lětny zemrě 27. februara 1918 we Łusku pola Lubija. Na swójske přeće bu w Chrósćicach pódla swojeju staršeju pochowany.

Hornja Łužica do dweju wokrjesow dźělena

póndźela, 30. apryla 2018 spisane wot:

Lětstotki přisłušeše Hornja Łužica čěskemu kralestwu, něhdźe sto lět pak tež braniborskemu markhrabinstwu. Lěta 1231 wuda so sotra Beatrix čěskeho krala Otokářa II. na markhrabju Otta III., kiž zhromadnje z bratrom Johannom I. z rodu Askaněrow nad Braniborskej knježeše. Dokelž njemóžeše čěski kral swojej sotře wěno wupłaćíć, přirjadowa so hač do lěta 1253 Hornja Łužica ­ Braniborskej. W kraju knježeše tehdy pokoj, hospodarstwo bujnje rozrostowaše a města so wobo­haćachu. Otto III. a Johann I. wobzamknyštaj, zo ma so po jeju smjerći Hornja Łužica mjez jeju synami rozdźělić.

W dnja 1. meje 1268 w Plauenje wustajenym wopismje so dźělenje do wo­krjesow Budyšin (Budissin) a Zhorjelc postaji. Hranica mjez wokrjesomaj bě rěka Lubata wot jeje žórła hač tam, hdźež so wona do Sprjewje wuliwa. Wottam wjedźeše hranica runu smuhu, trochu zapadnje nětčišeje dalnodróhi 156, dale hač do Mužakowa nad Nysu. Před Mužakowom bě cyrkwinska wjes Jabłońc jako hranica naspomnjena. Kaž Wojerecy a Njeswačidło bu Jabłońc w dźělenskim wopismje prěni króć naspomnjeny.

Prapremjera na hudźbnym lěću

póndźela, 30. apryla 2018 spisane wot:

Budyšin (SN/bn). We wobłuku lětušeho „Łužiskeho hudźbneho lěća“ poskića město Budyšin jako wuhotowar wot 20. ju­lija do 5. awgusta 15 zarjado­wanjow na dźewjeć hraj­nišćach regiona. Předpředań zastupnych lisćikow započnje so jutře. Zajimcy dó­stanu tikety mjez druhim w kulturnym běrowje, zetkanišću Sakskich Nowin a w ekumeniskej tachantskej knihowni w Budyšinje, w turistiskej a měšćanskej informaciji w Zhorjelcu kaž tež direktnje we wobdźělacych so etablissementach. Runja mnohim tudyšim zarjadowanjam wotměje so 2018 tež hudźbne lěćo pod hesłom „1 000 lět Budyski měr“.

Wopomjatny kamjeń pola Łomska wotkryli

póndźela, 30. apryla 2018 spisane wot:

Łomsk (SN/JaW). Wot soboty dopomina w lěsu pola Łomska wopomnjenski kamjeń na njeskutk, kotryž bě so runje tam před 76 lětami stał. Na iniciatiwu Njeswačanskeho Towarstwa přećelow kultury a do­mizny, Njeswačanskeje ewangelskeje wosady a gmejny su dali kamjeń za pólskeho dźěłaćerja Stanisława Błażejczuka zhotowić, kotryž tam z trojorěčnej nutrnosću wotkrychu. „Wosebity nastork,­ kamjeń postajić, je dała Trudla Malinkowa, kotraž je so ze stawiznu nadrobnje rozestajała a wo tym tež trojorěčnu knihu wudała“, rjekny jedyn z iniciatorow Handrij Wirth našemu wječornikej. Pomnik spěchowała je tohorunja Załožba za serbski lud.

Čitajće w nowym rozhledźe (27.04.18)

pjatk, 27. apryla 2018 spisane wot:

Zašły měsac wopisowaše Lubina Malinkowa wuznam Ochranowskeje bratrowskeje wosady za Serbow. W mejskim Rozhledźe zhoniće wjace wo konkretnych wuskutkach jeje skutkowanja za Serbow. Někotre wažne hesła, kotrež Malinkowa ze zajimawymi přikładami podkładuje, rady hi­žo­ přeradźu: moralizacija, mobilizacija, lite­ralizacija a pluralizacija.

Pod hesłom „Čim wjace, ćim lěpje“ drje wobkowachu w srjedźowěku cyrkwine durje ze železnymi ornamentami. Kotru funkciju mějachu a hač su dokřesćan­skeho pochada, na to da so zdźěla jenož tukać. Alfred Roggan wopisuje wjacore cyrkwine durje z kowanymi elementami wokoło Choćebuza.

Serbska debata

nowostki LND