Wulki bě wačok prašenjow, kotryž běchu młodostni z Njebjelčic, Smječkec a Hór­kow­ sobotu, 8. hodownika, do Njebjelčanskeho młodźinskeho kluba sobu přinjesli. Tam witaše jich socialna dźěłaćerka Rěčneho centruma WITAJ na dźě­łarničku, kotraž wěnowaše so konkretnym temam a prašenjam kołowokoło organizacije młodźinskich klubow. Na wěcywustojne wašnje wotmołwješe přeprošena referent­ka Mandy Wiesner wot Sakskeje młodźiny Drježdźany na prašenja młodostnych a pokaza jim hromadźe ze socialnej dźěłaćerku (wu)puće a móžnosće pomocy a podpěry. Tak zhonichu wobdźělnicy, što woznamjenja zapisane towarstwo być a kotre nadawki a winowatosće su z tym zwjazane. Porno tomu běše za mjeńše cyłki zajimawe, kotre alternatiwne formy organizowanja maja. Nimo toho dowěchu so młodostni wo móžnosćach spěchowanja/financowanja projektow a wšelakich poskitkow podpěry.

Mjeztym hižo 11. raz wotmě Biskopičanska Syć za dźěći a młodost­­nych w druhej połojcy zašłeho lěta wot wo­krje­sa Budyšin, wokrjesneje lutowarnje a partnerstwa za demokratiju podpěrane wubědźowanje „Macht euren Projekten Beine!“. Jako běchu młodostni namoł­wjeni so z projek­tami požadać, kotrež přinošuja k jich demokrati­skemu kubłanju, je we wokrjesu hnydom jědnaće projektow „noze dóstało!“ Jury – wobste­jaca ze sydom mło­dostnych w starobje 16 do 23 lět, kotraž bu na dźěłarničce přihotowana – witaše wobdźělnikow z jich prezentacijemi w nowembru na žurlu Budyskeho krajnoradneho zarjada. Tam zdoby sej dźewjeć skupin wuprošenu podpěru. Mjez nimi běštej tež serbskej klubaj. Tak doby Smječkečanski młodźinski klub z projektom „Porjeńšimy naš klub!“ 1. městno a Radworski mło­dźin­ski klub z ideju „Kino w klubje“ 5. městno. Pisane a čiłe posedźenje jury a mytowanje je šuler­ska kapała z Goethoweho gymnazija Biskopicy wulkotnje wobrubiła. Marija Koklina

Foto: Tabeja Brumec
Prěnju njedźelu w zymskich prózdninach běchu we Worklecach njewšědne pisane figury widźeć. Na přikład čerćiki, piraća, liški, myški, princesny, palčiki a cowboyje. Wone a dalše nory zetkachu so w sportowej hali na póstnisku zabawu. Po tym zo su so wšitcy w kole wjerćo předstajili, dachu sej kofej, tykanc abo plincy zesłodźeć. Slědo­wachu ruki-cuki a druhe znate reje a spěwy kaž tež sportowe wubědźowanje we wšelakich starobnych skupinach. Za napřemoběh přez ławki łažo, skakajo a běhajo mytowachu dźěći na kóncu ze swěćatymi kiješkami a słódkosćemi. Tak knježeše wulke wje­se­lo. Dźakne helaw za wšu organizaciju pisaneho swje­dźenja Christinje Hozynej! Tabeja Brumec, 2. lětnik Worklečanskeje zakładneje šule

Foće: Jost SchmidtchenTež w Slepom je hižo dołho z tradiciju, zo swjeća dźěći pěstowarnje „Pfiffikus“ 25. januara ptači kwas, a to na žurli tamnišeho Serbskeho kulturneho centru­ma. Tam maja hosćo dosć městna a móža program tak derje sćěhować. Hižo něšto tydźenjow běchu so dźěći pěsto­war­nje z nałožkom zaběrali a wosebity dźeń přihotowali. Najprjedy wšak wone zhonichu, čehodla ptači kwas scyła swjećimy. W zymje tu přebywacym ptačkam mamy picu dawać, tak zo móhli zymny počas přežiwić. Wězo wobhladachu sej chowancy pěstowarnje tež in­scenaciju dźěćaceho ptačeho kwasa Budyskeho Serbskeho ludoweho ansambla we Wojerowskej Łužiskej hali. Slepjanska pěstowarnja ma z nowej nawodnicu Aline Wen­del, kotraž tam wot lońšeho nowembra skutkuje, anga­žowanu wosobinu. Za přihoty ptačokwasneho swje­dźenja pak měješe tójšto pomocnikow poboku. Wšako je dokoła­wokoło mnoho pilnych rukow trěbnych. Swój program z kubłarkami nazwu­čo­wali su dźěći hnydom na jewišću centruma. „Tak móžachu so hižo na to nawučić”, Aline Wendel rozprawja. Njewjesta bě lětsa Lysann a nawoženja Roman.