Tři kralowny

pjatk, 14. junija 2019 spisane wot:

Fota: Alfons Handrik

Před 24 lětami za­ło­žichu w Miłoćicach towarstwo, ko­trež mjenuje so Miło­čanska žaba. Towarstwo ma 66 čłonow, a jeje před­syda je Marko Kowar. Wjele lět njejsu w Miłoćicach meju stajeli a mjetali. Towarstwo je so wo to postarało, zo po zało­ženju na­łožk zaso pěstuja.

Srjedu do Božeho spěća zetka­chu so Miłočenjo k mejemje­tanju. Čłonka předsydstwa Hanka Šwejdźina bě z dźěćimi a mło­dostnymi wjele znatych serbskich rejkow nazwučowała, kotrež je 14 porow předstajiło. Lětsa běchu wšitke holcy w serb­skej narodnej drasće. Mjez młodostnymi bě Ławrjenc Bobka mejski kral a Xenija Špitankec kralowna. Najspěšnišej hólcaj běštaj Lukas Žur a Noah Šuster. Wonaj wuzwolištaj sej Maju Lochec a Lenu Metzgerec za kralownje. Wonej kaž tež lońša mejska kralowna Jolanta Klugec sedźachu na kóncu na Bobkec konju. Kralowski por z rjadu młodostnych konja wjedźeše a za nim podachu so wšitke dalše pory, kotrychž Daniel Cyž na akordeonje pře­wodźeše, na rjany swjedźeń do domu Křesćansko-socialneho kubłanskeho skutka.

Alfons Handrik

Tež ći mali sobu rejwali

pjatk, 14. junija 2019 spisane wot:
Njedawno su w Pěskecach meju mjetali. Na to so tam wšitcy wjeselachu. Kóždy wšak bě wćipny a chcyše widźeć, kak su so dźěći na to přihotowali. Wone běchu z Patrikom Šołtu a Křesćanom Bejmakom pilnje zwučowali. Zo su wjele nawuknyli, pokaza dźewjeć porow. Lóštnje a eksaktnje rejwachu Katyržinku, Hory módre, Šewca a samo modernu rejku. Škoda zo njebě jich wjac hólcow, tak by hišće wjac porow było. Wšitke holcy běchu katolsku narodnu drastu zhotowane. Najmłódšej běštaj šěsćlětnaj Lukas Smoła a Sofija Šwejdźic. Jenož wo lěto starša bě Livien Heblakec. Wjele přikleska dóstachu mali rejwarjo za swój rjany program. Michał Šefer bě najspěšniši a docpě jako prěni wjeršk meje, po tym zo bě padnyła. Za kralownu wuzwoli sej wón Emiliju, kotraž ze swójbnym mjenom připadnje tež Kralec rěka. Kralowski por na čole tamnych porow spěwajo po wsy ćehnješe. Na akordeonje hrajo přewodźeštaj rjany ćah Beno Buk a Michał Šołta. Za rjany mejski swjedźeń dźakuja so wšitcy młodźinskemu klubej, kotryž nawjeduje hižo nimale tři lěta Aleksander Wałda. Alfons Handrik

Studuje hudźbu w USA

pjatk, 07. junija 2019 spisane wot:

Part Three: Serbin a Texas

fota:

syman ­hejduška

Chata prěnich

sydlerjow z jeničkej małej stwičku

Nutřkowna architektura cyrkwički swj. Pawo­ła w Serbinje je našim cyrkwjam jara podobna.

Něhdyše domske

Jana Kiliana, kotrež wužiwachu spočatnje tež jako kapałku

Sandra a Raymond ­Matthijetzec

z Winchestera


Hi and welcome! How are you, lubi čitacy? To je Syman Hejduška z Hórkow. Syman studuje načasnu hudźbu w USA, dokładnišo w Nashvillu w staće Tennessee. Wo swojim přeby­tku w Americe a wo dalšich dožiwjenjach chce nam tu rozprawjeć a wšitkim, kotřiž njejsu hišće w USA byli, spytać žiwjenje kraja rysować, wo kotrymž rěka, zo móžeš sej tam nimale kóždy són spjelnić.

Młodźina „so gratu přima!“

pjatk, 07. junija 2019 spisane wot:

 SERBSKE NOWINY – KÓNCTYDŹENSKA PŘIŁOHA
Pjatk, 7. junija 2019

Njeje za­­wěr­no lochko sudnik abo sudnica być. Štóž z was kopańcu hraje, wě wo tym zawěsće spěw spěwać. Podobne nazho­njenje mějachu minjenu sobotu Katja (Serbscy skawća „Alojs Andricki“), Feliks (mło­dźinski klub Wotrow), Marie-Luise (młodźinski klub Njebjelčicy) a Stanij (Serbski folklorny ansambl Wudwor). Woni two­rjachu jako čłonojo młodźinskeje přirady (su to zastupjerjo młodźinskich klubow a cyłkow) mału, ale přeswědčiwu jury za wubědźo­wanje „Přimaj so gratu!“. Cyłkownje štyri młodźinske skupiny běchu namołwu sćěhowali a požadachu so ze swojimi zajimawymi projektami wo přiražku z hornca partner­stwa za demokratiju, kotryž wobsahowaše tež lětsa zaso tysac eurow za serbski sydlenski rum.

Wjace hač40 porowna mejemjetanju

pjatk, 07. junija 2019 spisane wot:

We Wotrowje bě lětuše mejemjetanje wo­se­bity wjeršk. Z najwjac porami we Łu­žicy, do­hromady 43, rejowachu młodost­ni, šulerjo, ale tež ­pěstowarske dźěći wokoło meje. Najspěšniši mło­dostny Nico Schuster wuzwoli sej Saruh Paškec za mej­sku kralownu. Po ćahu po wsy pře­wjedźechu tradicionalnu koparsku hru Horni Židow přećiwo Del­njemu ­Židowej. Kaž hižo w minjenych lětach je ju Delni Ži­dow do­był, a to z 5:2.

Wo hudźbu na rejach postarachu so po tym Melodia-diskoteka, DJjowa dwójka SimplexX a DJ Daen.

Wotrowske meje­mjetanje bě znowa wulkotna wěc.

Jakub Langa fota: marcel

rjeda

W Lipsku nałožk hajili

pjatk, 07. junija 2019 spisane wot:

Kaž nimale wšudźe

su tež studenća

Sorabije Lipsk

we wulkim měsće

meju mjetali. Hišće wjetši wjeršk pak je tam

mejestajenje z chodojty­pa­-lenjom, hdźež chodojtu zasudźa. Wobdźělena bě zaso kopica studentow, wosebje pře­ćelki a přećeljo dalšich student­skich towarstwow.

Hač do nocy su So­ra-

bičenjo a hosćo zhro­mad­nje swje­ćili.

Clemens Šmit

Moto-tydźeń přewjedli

pjatk, 07. junija 2019 spisane wot:

Dźesatkarjo Serbskeje wyšeje šule „Michał ­Hórnik“ Worklecy dyr­bjachu sej spočatk meje tón abo tamny křiwy napo­hlad sobušu­lerjow lubić dać. Wšako njejsu w normalnej drasće do šule přišli, ale mějachu tak mjenowany moto-­tydźeń. To rěka, zo so kóždy dźeń po wěstej temje zdrasćichu. Zo bě to wulke wjeselo za serb­skich młodostnych, ­wi­dźiće na wobrazomaj.

tekst a fota: Nadine Knopec

Lětsa dojědźechmy sej my šulerjo Serbskeje wyšeje šule „Michał Hórnik“ Worklecy a Serbskeho gymnazija Budyšin zaso do Bretonskeje. W Kemperu nas hosćićeljo hižo wočakowachu. Wulězewši z busa dósta kóždy swojeho bretoniskeho partnera a wjeselachmy so na zhromadny přichodny tydźeń. We wjetšej rumnosći witachu nas Kemperscy šulerjo z bretonskej hymnu a z němsko-francoskim spěwom. Tež my za­njesechmy jim němsku a serbsku pěseń.

Sobotu a njedźelu přebywachmy w hóstnych swójbach. Někotři wobhladachu sej wokolinu abo zetkachu so z druhimi šulerjemi.

Za póndźelne dopołdnjo bě 9. lětnik stacije za nas spřihotował. Tak smy hry hrali, rejowali a samo crepesy pjekli. Wobjed w šulskej jědźerni je wšitkim zesłodźał. ­Po­połdnju pućowachmy po měsće, hdźež fotografowachmy zajimawostki.

Dartowy turněr

pjatk, 07. junija 2019 spisane wot:

W Kašecach wotmě so

13. jutrownika štwórty raz tak mjenowany „steel darts masters“. Dohromady 20 hrajerjow so na nim wobdźěli a wojowaše wo 80 centimetrow wysoki pućowanski pokal. W třoch skupinach nastupi kóždy přećiwo kóžde­mu z „best of 3 legs 501 double out“. Prěnje třo kwalifikowachu so za štwórćfinale.

W prěnim napjatym połfinalu měješe Fabian Langer hoberski nadawk, dokelž wubědźowaše so z faworitom Falkom Peschmannom. A tak skónči so hra 3:0 za Peschmanna.

W druhim połfinalu přesadźi so Jakub Wjacławk přećiwo Thomasej Lehmannej z 3:1. Finale wobsteji z „best of 7 legs 501 double out“, to rěka, dobyćer dyrbi štyri „legs“ za sebje rozsudźić. Rano w jednej bě dobyćer wěsty. Jakub Wjacławk bě Peschmanna ze 4:2 přewinył. Wjeselo Jakuba běše jara wulke, wšako bě sej po wulkej prócy swój prěni pokal wudobył.

Třeće městno zawěsći sej Tomaš Wićaz. Mytowanje za najwyši check-out ze 112 dypkami dósta ­Oliver Schmidt. tekst a foto: Matthias Wróbl

Rjenje zhromadnje swjećili

pjatk, 07. junija 2019 spisane wot:
Foće: Borbora ŠeferowaW delnich Sulšecach ­­witachu dźěći pěsto­warnje staršich, wowki, dźědow a wjele dalšich hosći na njedawne mejemjetanje. Nawodnica Brigita Wjeńcyna jich powita. Prjedy hač meja padny, zawjeselichu dźěći mjeńšeje skupiny přitomnych ze spěwčkami a rejkami. Wone běchu wotpowědnje spěwčkam w kostimach, kaž wowcki, šěry wóslik z dołhimaj wušomaj, zaječk a mjetelčka. Za program wulkeje skupiny běchu holcy katolsku narodnu drastu zhotowane. Na to witaštaj Franciska Mjetašec ze Sulšec a Filip Korch z Koćiny z basnju na rjany nalětni swjedźeń. Rejujo po hudźbje holcy a hólcy pisane banty wokoło meje wijachu. Mócny aplaws pokaza, zo je so rejka dosć derje poradźiła. Po tym zo bě meja padnyła, běžachu hólcy z wulkeje skupiny napřemo wo wjeršk. Koćinjan Tino Korch bě najspěšniši a je sej Sulšečanku Pawlinu Ditrichec za kralownu wuzwolił. Po tym su wšitke dźěći, starši, wowki a dźědojo a dalši hosćo na zahrodźe rjenje zhromadnje swjećili. Wutrobny dźak wšitkim kubłarjam a pomocnikam za rjany swjedźeń. Borbora Šeferowa

LND onlineshop 2026

Nowe poskitki LND namakaće w lětušim wudaću Nowinkarja!

Nowinkar 2026-27

HSSL25

Chróšćan Šulerjo

Midas Logo