Nyšpor wuhotowali
W Katolskim serbskim dźěćacym domje Alojs Andricki w Radworju su předšulske dźěći lětsa ptačokwasny nyšpor we farskej cyrkwi wuhotowali. Tak móžachu starši, dźědojo a wowki předšulskich dźěći program live dožiwić. Braška Paul je hosći w mjenje njewjesty Pije a nawoženje Adriana witał. Hižo wot ranja su hotowańče dźěći narodnu drastu woblěkali, a dopołdnja su chowancy domu program hižo pěstowarskim dźěćom předstajili.
Andrea Henichowa
W šuli kwasowali
Dźěći 1. a 2. lětnika Serbskeje zakładneje šule „Michał Hórnik“ Worklecy swjećachu lětsa ptači kwas w swojich rjadownjach. Do toho běchu wučerjo wšitke róle wulosowali, tak zo kóždy wědźeše, kak měł so zdrasćić. W prěnimaj hodźinomaj mějachu šulerki a šulerjo hišće wučbu, w slědowacymaj pak su potom swjećili. Mjez druhim spěwachu, rejowachu, molowachu, paslachu a hrajachu hry. Za wšě štyri rjadownje běše to wotměnjawe dopołdnjo.
Jurij Bjeńš
Pisany program
Tež dźěći Čornochołmčanskeje pěstowarnje „Krabat“ su lětsa na ptači kwas dopominali. Dopołdnja zhotowachu je pilne pomocnicy serbsku narodnu drastu. Tak prezentowachu dźěći mjez druhim njewjestu a nawoženju kaž tež brašku a jako zastupjerjow staršich tak mjenowaneju zamamu a zanana. Braška ptačokwasny ćah wězo nawjedowaše, a tak docpěchu dźěći dom pěstowarnje, do kotrehož bórze zaćahnu. W nowej pěstowarni pokazachu woni přitomnym program ze spěwami w hornjoserbskej rěči. Runje tak sej zarejowachu. Z reju „Hanamarja“ so program zakónči.
Škoda, zo njemóžeše pandemije dla wjace přihladowarjow pódla być. Wšitkim dźěćom, kubłarkam a přitomnym staršim pak je so ptači kwas přiwšěm jara spodobał. Mila Libšowa
W Sulšečanskej pěstowarni „Dom palčikow“ je lětsa braška Tom ptaču hosćinu nawjedował. Njewjesta Lena a jeje nawoženja Luca běštaj kwasny por.
Foto: Christiane Noack
„Uhu, što sym słyšała“ a mnohe dalše ptačatka swjećichu w „Chróšćan kołću“ lětuši ptači kwas. Hačrunjež su časy měnjawe, hawron ze sroku kwasuje.
Ale kak je k tomu dóšło? Tak hotowachu so wosebje dźěći krušwiny, ale tež wšitcy druzy spočatk januara na ptači kwas. Štó ma njewjesta być? A rjenje bě widźeć, kak so wosebje holcy wjeselachu, na pisane fale, na narodnu drastu. Přihot w kołću; spěwać wo ptačkach a nawuknyć hrónčka, kiž ptači kwas wopisuja. Kwasna rejka njesmědźeše pobrachować.
Čim bóle so dźeń ptačeho kwasa bližeše, ćim njesćerpniše běchu tež dźěći. Hołk a tołk kaž w prawym kołću, hdźež so z pilnymi pčołkami jenož tak mjerwi. Rano mějachu hotowańče tuž ruce połnej dźěła. A tak buchu z holcow njewjesta, słónce a kwasni hosćo, wězo w krasnych šórcuchach a pisanych falach. Tež hólcy běchu swjedźensku drastu zwoblěkani. Nawoženja měješe samo kwěćel za swoju njewjestu.
Skónčnje wotewza nawoženja swoju njewjestu a poda so na wulku kwasnu pěstowarsku hosćinu.