Z wudaća: pjatk, 17 meje 2019

Zhorjelc (dpa/SN). Jazz na njezwučenych městnach: Pod tutym hesłom steja Zhorjelske jazzowe dny, kotrež dźensa w měsće nad Nysu zahaja. „Zarjadujemy koncerty we wjelbowanych pincach, na starej žurli uniwersity, w renesansowych a fabrikskich halach a jónu samo pod mostom“, rjekny organizator Friedemann Dreßler. Ze sobuwojowarjemi wabi wón hač do 25. meje na šěsć koncertow z dźesać mjezynarodnymi hudźbnymi skupinami na „njesłyšanych městnach“ podłu Nysy. Zhorjelske jazzowe dny su mjezu přesahowace zarjadowanje. Wjeršk budu wulke jazzowe nocy w Tivoliju. Tak móža wopytowarjo kóždy wječor tři skupiny na jewišću dožiwić.

Regina Šołćina z Konjec piše wo swojch nazhonjenjach w zwisku z pčołkami:

Zo pčołki porno wjelkam w politice ženje žanu lobby njemějachu, je znate. Njedawno dóńdźe k rozestajenju mjez delanskim pčołarjom a traktoristami, kotřiž su w připoł­dnišim času w połnym słóncu kćějaty rěpik z chemiju popry­skali a tak pčołkam smjerć přinjesli. Pčołki na kćenju su zajědojćene na zemju padnyli a zahinyli.

Zo pak su tež dobre puće za wobě stronje w rozumnej mjezsobnej komuni­kaciji móžne, njech tónle směrodajny přikład dopokazuje. Wutoru, 7. meje, zwonješe telefon a dóstachmy informaciju: Budźemy štwórtk, 9. meje, jeli so njedešćuje, wot 7.30 hač do něhdźe 11 hodź. rěpik pryskać. Prošu mějće pčołki tak dołho za­wrjene. Zamołwity zarjad za ratarstwo je to w zwisku z agrarnym­ drustwom Sorabia sobu zdźělił. Chwalobne a wšeje česće to hódne, tak zhromadnje na dobro přirody a ludźi skutkować. A to płaći na kóncu jenož jedyn telefonat!

Mjeztym 10. festiwal PolkaBeats zarjaduja tónle kónc tydźenja w Choćebuzu a dalšich městach Delnjeje Łužicy. Wopytowarjo woblubowaneho zarjadowanja dožiwja tak wjacore skupiny, kotrež tradicionalnu polku z modernymi rytmami beata zwjazuja. Wčera wječor móžachu na Choćebuskim Schillerowym naměsće hižo raz do festiwalneje atmosfery počuchać, mjez druhim ze žonjacej band Huraban z Pólskeje (hlej foto). Jutře chce so Skatapult, jedna z festiwalnych skupin, na drastowym swjedźenju w Lubinje předstajić. Za tydźeń potom wotměje so druhi dźěl festiwala z koncertami we Łukowje, Lubnjowje a Choćebuzu. Foto: Michael Helbig

19. meje 1909 narodźi so swójbje Radworskeho wučerja Michała Nawki holčka Cecilija­. Wona bě pozdźišo znata wědoma Serbowka a Sokołka. W lěće 1927 wob­dźěli so w pólskich Dalkach na kursu ludoweje uniwersity. 1929 přebywaše z delegaciju Serbskeho Sokoła na zlěće pólskeho Sokoła w Poznanju. Na foće wo swjedźenskim ćahu kroči Cecilija na čole runja Marce Šołćic a Elzy Janakowej w narodnej drasće. W samsnym lěće při poswjećenju pomnika Korle Awgusta Kocora w Zahorju stej Cecilija a Dora Frajšlagec jeničkej žonje. W katolskej drasće chodźeše čas žiwjenja. Tomu tak bě, jako słužeše fararjej Jurjej Handrikej w Markneukirchenje a w Njebjelčicach. Farar Handrik jako tehdyši městopředsyda Domowiny drje bě na tym „wina“, zo bě Cecilija Nawkec po załoženju Serbskeho zarjada 1948 zamołwita wotrjada za žony. Poslednje lěta žiwjenja bě w starowni swj. Ludmile w Swinjarni. Tam zemrě 18. meje 2002, dźeń do swojich 93. narodnin. Mikławš Krawc

Dźěći Chróšćanskeje zakładneje šule su wčera dopołdnja po předstajenju krótkeho programa meju powalili. Při tym zwěsći kóždy­ ze štyrjoch lětnikow při napřemoběhu mejskeho krala, a tón smědźeše sej swoju kralownu wuzwolić. Po slědowacej zhromadnej­ snědani ze staršimi, dźědami a wowkami kaž tež mnohimi hotowańčemi podachu so holcy a hólcy do bliskeho Domu­ swj. Ludmile. Tam zawjeselichu woni wobydlerjow z połhodźinskim programom, mjez druhim z bantowej reju a pře­podachu jim kwěćelki, štož je mjeztym wjelelětna tradicija. Foto: Feliks Haza

Budyšin (aha/SN). Njeposrědnje po politiskim přewróće je Gabriele Pattberg, redaktorka telewizije SWR-Südwestfunk do Drježdźan přišła. Tam najwjedowaše dźewjeć lět a po tym runje tak dołho w Lipsku redakciju ARD-aktualnje pola sćelaka MDR. Njeje do toho znała wuměnjenja a poměry, kaž běchu wone za čas NDR. Tež wo Serbach njeje ničo do toho wědźała, ale zajim za narodnu mjeńšinu zbudźi so w njej, jako so za kulojtym blidom wobdźěli. We 18 lětach dźěławosće pola MDR bě wjacore razy w Budyšinje a je so na serbskich wsach wot Radworja přez Pančicy-Kukow hač do Ralbic rozhladowała. Je w pěstowarnjach a šulach a druhdźe z ludźimi rěčała, zo by wo jich problemach a starosćach zhoniła. Mjeztym jako wuměnkarka zaso w swojej domiznje je tam wjele wo Serbach, jich nałožkach a kulturje powědała.

Hamorska gmejna na pokiwy komunalneho dohladowarstwa reagowała

Hamor (AK/SN). Gmejna Hamor swój dwójny etat za lěće 2019 a 2020 koriguje, z čimž reaguje na pokiwy a njedostatki komunalneho dohladowarstwa. Gmejnska rada je póndźelu nowopředźěłanu wersiju jednohłósnje wobzamknyła. Zdobom je wobzamknjenje dwójneho etata wot 14. januara zběhnyła. „Zapřijeli smy nětko 200 000 eurow swójskich srědkow gmejny za polěpšenje wohnjoškita w Hamorskej zakładnej šuli, runje tak za wobstaranje mustwoweho transportneho woza MTW za Manjowsku wohnjowu woboru. Za nju dóstanjemy spěchowanje 23 000 eurow“, wujasni komornik Ulrich Bänsch. K nowemu etatej słušeja dale ponowjenje nadróžneho wobswětlenja na techniku LED, přichodne planowanja při Bjerwałdskim jězoru a dalše dypki. Nje­změnjeny wostanje plan městnow w zarjadnistwje komuny.

Njebjelčicy (JK/SN). W Njebjelčicach kroča připóznate puće, šěrić wědu. Nimale dwě lěće wobsteji dorěčenje mjez Budyskej ludowej uniwersitu, Sakskej krajnej centralu za politiske kubłanje a Njebjelčanskej gmejnu, so zhromadnje wo politiske kubłanje na wsach starać. Nětko je ludowa uniwersita prěnju bilancu dźěła sćahnyła a Njebjelčicam dobry posudk wustajiła. Prócowanja, wjace za politiske a wšostronske kubłanje we wjesnym wobłuku činić, su so přikładnje wuwili.

Hač na polu wuwića wsy abo při zdźěłanju a zwoprawdźenju dołhodobnych projektow, aktiwity serbskeje gmejny su přez jeje mjezy znate. K tomu su přinošowali tež zarjadowanja ludoweje uniwersity, kotrež žiwjenje ludźi na wsy wobohaćeja. Tak su skićili dosć wulki spektrum zajimawych poskitkow, wědu šěrić. Organizatoram zarjadowanjow njeńdźe jeničce wo politiske kubłanje, ale wosebje wo to, ludźom na wsach spřistupnić pozadki wuwića towaršnosće, přirody a wobswěta. Mnohe zarjadowanja buchu derje přiwzate a su sprawny zajim zbudźili.

Skupina šulerjow Ralbičanskeje wyšeje šule přebywa we wobłuku spěchowanskeho programa Europskeje unije Erasmus hač do jutřišeho w čěskim Mělníku. Dźesać holcow a hólcow 6., 7. a 8. lětnika zaběraše so cyły tydźeń we wuměnje z čěskimi šulerjemi a ze šulerjemi srjedźosłowakskeho Zvolena ze wšelakimi eksperimentami wokoło­ temy woda. Powučne, zajimawe a wočerstwjace běchu ekskursije do wodoweje a jadroweje milinarnje runje tak kaž rafting při „aprylskim wjedrje“ po Wołtawje wot Noveho Broda do Českeho Krumlova. W oktobrje přewjedu druhi dźěl projekta w Zvolenje a klětu dalši w Ralbicach. Foto: Julija Serbinec

Do wobchoda so zadobyli

Židźino. W nocy na srjedu su so njeznaći do wobchoda za twaršćizny w Židźinom (Seidewinkel) zadobyli. Tam přepytachu wšitke běrowy, spakosćichu pjenježnu kasetu z něhdźe 2 200 eurami a načinichu wěcnu škodu něhdźe tysac eurow.

Wobruč prasnyła

Wóspork. Z dotal njeznateje přičiny je srjedu na awtodróze A 4 mjez Budyšinom a Wósporkom wobruč Lkw-ja prasnyła. Šofer móžeše runje tak na kromje jězdnje zastać. Zranił so nichtó njeje.