Kónctydźenski wolejbul
Prěnje wolejbulowe mustwo Viktorije Worklecy změje swoju prěnju dypkowu partiju lěta 2020 w Habrachćicach (Ebersbach), a to jutře, sobotu, wot 14 hodź. Tam hraje wone jako druhi tabulki přećiwo šestemu, mustwu TSV Kundraćicy. Prěnju partiju doma běchu Worklečenjo srjedź oktobra z 3:0 jasnje dobyli. Su tuž we wróćohrě jasny faworit. Dalše hry:
18.01. 14:00 Schönbachske VV –
HZ Pančicy-Worklecy II (žony, w Lubiju)
25.01. 14:00 Viktoria Worklecy –
MSV Budyšin 04 III (ž)
25.01. 14:00 Viktoria Worklecy –
Módro-běłe Wojerecy II
Koparske přihoty na 2. połseriju
Wodorunje: 3 jězor pola Zubornički, 5 dźěl lěta, 6 zapal, 7 prawidło, 10 jězor w Finskej, 13 město jendźelsce, 14 Berlinske knježerstwo, 15 drohotne drjewo
Padorunje: 1 kónc modlitwy, 2 rěka přez Mnichow, 3 wulkomorjo, 4 nic sotra, 8 pólske město nad Wódru, 9 stolica Běłoruskeje, 11 łaćonsce: w lěće, 12 grjekski pismik
Čorny Chołmc (SN/MiR). Wjace hač 10 500 eurow ma nětko dožiwjenski statok Krabatowy młyn w Čornym Chołmcu wjace na swojim konće. Pjenjezy su předwidźane za twar pjecy. Zaměr, nazběrać 9 800 eurow, je z wjele wjetšej sumu wjac hač docpěty. Crowdfunding-akcija bě tuž přewšo wuspěšna. „45 dnjow smy ju přewjedli, ale prěnje dny je jara mało wothłosa měła, tak zo započachmy hižo dwělować“, zwěsća jednaćel Čornochołmčanskeho Krabatoweho młyna Tobias Čižik. „Nawjazach tuž zwisk k wjace hač połsta předewzaćam z próstwu wo sponsoring, narěčach znatych a wabjach w socialnych medijach.“ Spočatk noweho lěta su podpěraćeljo potom pjenjezy přepokazali, a to sumy mjez pjeć a wjace hač tysac eurami. Zdźěla dochadźachu na dźeń wjacore sta eurow. Ideja za wosebitu pječernju je w zjawnosći wulku sympatiju wuwabiła, tež dokelž su medije informacije šěrili. Ludźo su mjeztym zajimowani a ju ze swójskimi myslemi ze žiwjenjom pjelnja. Wčera bu crowdfunding-akcija zakónčena.
Zańdźene dny su po wšej Němskej ptački ličili. Wot 10. do 12. januara běštej tež Němski přirodoškitny zwjazk (NABU) a krajny zwjazk za škit ptačkow z.t. (LBV) k tomu namołwjałoj.
Běła Woda/Budyšin (jrl/SN/MiR). Mjeztym dźesaty króć přewjedźechu po wšej Němskej „hodźinu zymskich ptačkow“. Vivien, Kira, Julian, Melanie, Nele a Tabea kaž tež Carsten Proft su lubowarjo přirody ze zwěrjencoweje šule w Běłej Wodźe. Zańdźenu póndźelu běchu wone na tamnišej staciji młodych slědźerjow přirody a techniki zymske ptački ličili. Pod fachowym nawodom Christiana Schulzy a Christiana Hoffmanna z Němskeho přirodoškitneho zwjazka su swědomiće dźěłali. Z pomocu dalokowida a z wótrym wóčkom su hólcy a holcy po šćežkach a pućikach ducy dokładnje hladali, zo bychu na terenje kubłanišća ptački zwěsćili. Woni zličichu wšitke sykorki, wrobliki a zelene wopuški (Grünfink). Nimo stajnych ptačkow, kotrež we Łužicy přez cyłe lěto přebywaja, su tež ptačkow-hosći wobkedźbowali, kotrež w zymskich měsacach ze zymnišich kónčin sewjerneje a wuchodneje do srjedźneje Europy ćahnu.
Rostlinskoškitne srědki kradnyli
Krěpjecy. Ćeže ze škódnikami na rostlinach maja po wšěm zdaću paduši wokoło Krěpjec. Kaž policija wčera zdźěli, běchu so w času wot kónca decembra hač do minjeneje srjedy na arealu tamnišeje agrarneje towaršnosće njeznaći zadobyli. Woni wobškodźichu płót a łamachu so do kontejnera kaž tež do jednoho kamora. Pokradnyli su wšelake rostlinskoškitne srědki w hódnoće pjećcyfroweje sumy pjenjez. Wěcna škoda, kotruž su při tym na ležownosći agrarneje towaršnosće zawostajili, wučinja něhdźe 500 eurow. Kriminalni technikarjo móžachu na městnje njeskutka slědy zawěsćić. Kriminalna policija pad přepytuje.
Kulow. Wyša šula „Korla Awgust Kocor“ Kulow přeproša jutře, 18. januara, na dźeń wotewrjenych duri. Hižo w 10 hodź. witaja zajimowanych staršich a jich dźěći w ćěłozwučowarni, hdźež předstaja so mjez druhim chór, skupina šule ze sportowymi aktiwitami a šulska póstniska garda. Přitomni budu tež lětuši šulski princowski por a rejwanska skupina. Potom je přiležnosć so po šuli a fachowych kabinetach rozhladować a so z wučerjemi a šulerjemi rozmołwjeć. Změja tež tykancowy bazar. Wosebje witani su zajimcy za wučbu serbšćiny.
Koncert z hudźbu Chopina
Smochćicy. Dom biskopa Bena w Smochćicach přeproša dźensa w 19.30 hodź. na koncert. We wobłuku Smochčanskeho jewišća zaklinča kompozicije za klawěr a spěwy z pjera Fryderyka Chopina (1818–1849). Solistce wječora stej Birgit Polter na klawěrje a sopranistka Katharina Scheliga. Wuměłči dopominatej z programom „Spěw Fryderyka Chopina“ na najsławnišeho pólskeho komponista. W srjedźišću koncerta steji mjez druhim jeho w Drježdźanach komponowany walčik As-Dur op. 69 čo. 1.
Unikaty sej kupić
Najstarši hišće wobstejacy serbski spěwny cyłk, Radworski chór Meja, swjeći lětsa 125. narodniny. Wučer, hudźbnik a spisowaćel-fejetonist Jurij Słodeńk załoži ćěleso 18. januara 1895 jako towarstwo a sta so z jeho prěnim dirigentom, prěni předsyda bu ratar a předsyda gmejny Jan Hantuš.
Kak jara sej dźensniši čłonojo załožićela česća, wo tym swědči po nim pomjenowany towarstwowy a zdobom probowa rumnosć w něhdyšej Radworskej filiali lutowarnje runje tak kaž zaplećenje jeho sadźbow do programow chóra. A samozrozumliwje bě Słodeńk tež na swjedźenskim koncerće spočatk toho lěta stajnje prezentny, hač na po blidach rozdźělenych portretowych fotach abo w słowach dźensnišeje předsydki spěwneho cyłka Angeliki Häneltoweje.
Slědy wosom dirigentow
Jara swjedźensce skutkuje narodna drasta za swjatkownu njedźelu Slepjanskeje wosady. Čorne płatowe suknje, wołmjane suknje a běłe rubiška su markantne za nju. Runje tajku narodnu drastu woblečene spěwachu žony towarstwa Kólesko loni swjatki njedźelu w Slepjanskej cyrkwi. Je to jedna z wjac hač dwaceći 20 wšelakich wariantow cyrkwinskeje drasty w kónčinje. „Žadyn druhi wobłuk w Slepjanskej kónčnje njeje tak mnohotny kaž cyrkwinska a žarowanska narodna drasta. Žony su je z wulkej prócu hladali a zachowali. Kemši su so stajnje wupikali“, powěda Elvira Rathner, sobuzałožerka Kóleska. „Hač do lěta 1945 běchu žony hišće prawidłownje w narodnej drasće chodźili.“