Z wudaća: štwórtk, 30 apryla 2020

Ličba natyknjenych přiběrała

Budyšin/Zhorjelc. W Budyskim wo­krjesu bě wčera 351 (+3) z koronawirusom inficěrowanych. Aktualnje je hišće 91 wosobow schorjenych, z kotrychž sydom w chorowni lěkuja. Z dalšimi pjećomi su so dotal 248 wustrowili. W Zhorjelskim wokrjesu bě wčera 258 (+2) natyknjenych. Tuchwilu je 85 wosobow schorjenych, mjez nimi dwě w chorowni. 153 ludźi je so wustrowiło.

Rozrost bjezdźěłnosće zwěsćili

Budyšin. We wuchodnej Sakskej je kónc apryla 18 593 bjezdźěłnych, 1 147 wjace hač w měrcu. Přirost wučinja 6,6 procentow. Kwota bjezdźěłnosće w druhim měsacu koronapandemije ma samsnu hódnotu, kaž Budyska wotnožka agentury za dźěło dźensa zdźěli. Konkretne přičiny wuwića njejsu mjenowane.

„Holaskec“ z Chrósćic dobyli

Budyšin. Serbski poskitk tydźenja w syći (SPTWS) su sej tónraz štyrjo Donatec bratřa z Chrósćic „Holaskec“ dobyli a smědźa so nad mytom sto eurow wjeselić. Z jednorymi srědkami poskićeja woni kreatiwne a lóštne wobrazowe hódančka w socialnej syći, kaž jury SPTWS dźensa na Youtube wozjewjenym wideju hódnoći.

Tigry wo klasu postupili

Budyska hamtska lěkarka dr. Jana ­Gärtner je zjawnosći sčasom škitny srědk za ­hubu a nós poručała. Tež w boju přećiwo koronapandemiji kroči­ ­wokrjes Budyšin swój puć.

Budyšin (UM/SN). Wuprajenje hamtskeje lěkarki Budyskeho wokrjesa dr. Jany Gärtner 3. apryla njeje jej jenož chwalbu wunjesło. Hłowny tenor jeje namołwy běše: Kóždy škit, tež hdyž najwyše naroki njespjelnja, je lěpši hač žadyn. „Sadźće znamjo – wšojedne, što druzy mysla! Wužiwajće tekstilny škit za hubu a nós!“ Z tymle statementom je hamtska lěkarka swójske kompetency překročiła měni Budyska wokrjesna radźićelka Heike ­Lotze (AfD). „Přistajena zarjadnistwa nima nadawk, tajke namołwy dawać“, wuswětli Lotze předwčerawšim na posedźenju Budyskeho wokrjesneho sejmika. Lěkarka měła so na swoje fachowe zamołwitosće wobmjezować, kotrež pak ma Heike Lotze bjezdwěla za spomóžne.

Cordula Ratajczakowa

Koronakriza je po zdaću klimowu krizu z myslow ludźi wućěriła. Přiwšěm je wirus na tym wina, zo so klima, kaž hižo w financnej krizy lěta 2008, tróšku polěpša – wšako mjenje awtow po puću, lětadłow po njebju a produkowacych mašinow zdobom mjenje wuhlikoweho dioksida wot so dawa. Globalizowany swět a jeho kapitalistiski motor hospodarstwa so hižo po zwučenym wašnju njewjerćitej, a naraz je powětr zaso čisćiši. Samo w Pekingu zaso njebjo widźa. Z přiběracej diskusiju wo zběhnjenju krizowych kaž tež wo nowych hospodarstwo spěchowacych naprawach je pak dźeń a wjace hłosow słyšeć, kotrež so prašeja: Kajke ma hospodarstwo po pandemiji wupadać? „Najradšo nic tak kaž do toho“, wotmołwi Uwe Jean Heuser we wčerawšim wudaću tydźenika Die Zeit. Jeho argumentacija je hospodarska. Hdyž mały producent elektroawtow Tesla wšitkich němskich awtotwarcow na bursy přesćehnje, da wěš, zo budźe hospodarstwo přichoda digitalniše a zeleniše – móžeš dodać, zo bě přirodna kriza hižo jónu kónc dinosawrijow.

Budyšin (SN). Nowa zběrka woblubowanych delnjoserbskich spěwow za serbske zetkanja a swjedźenje je w LND wušła. Redaktor delnjoserbskeho rozhłosa RBB Gregor Kliem je dawno wupředaty spěwnik z lěta 2007 znowa zestajał a rozšěrił. Tak je wudaće „Dolna Łužyca spiwa“ wo kopicu nowych pěsnjow rozrostło. „Naša Anka źinsa doma njejo“, „We tych akacijach tam“, so wě tež „Annemarie“ a dalše pěsnje, kotrež w Delnjej Łužicy rady a často spěwaja, w zběrce namakaće. Wona wopřima nimale 200 stron.

Koronapandemije dla schadźowaše so Budyska měšćanska rada wčera w Melanchthonowym gymnaziju. Tamniša wjacezaměrowa rumnosć pak je so jako njekmana za tajke zarjadowanja wopokazała, předewšěm swojeje špatneje akustiki dla.

Budyšin (CS/SN). Pjenježne wuskutki koronakrizy na sprjewine město běchu jedna z hłownych temow na wčerawšim posedźenju Budyskeje měšćanskeje rady a wuwabichu wobšěrnu diskusiju. Financny měšćanosta dr. Robert Böhmer pokaza na přewšo chutne połoženje. Runočasnje pak wón rjekny, zo njemóže město problemy rozrisać, za kotrejž stej wokrjes a Swobodny stat Sakska zamołwitej. Hdyž dalše dawkowe dochody wotpadnu, změje město Budyšin „hoberski problem“. „Na kóždy pad płaći zasada, zo njemóžemy pjenjezy wudawać, kotrež tu njejsu“, Böhmer podšmórny.

Na premjernym swjedźenju krucha „Greta“, w kotrymž je jako jedyn z třoch elewow činohrajneho studija Budyskeho NSLDź sobu hrał, njeje so Clemens Bobka hižo wobdźělić móhł. Jewišćo wopušći­wši je direktnje do Berlina jěł. Wšako měješe na tamnišej Uniwersiće wuměłstwow nazajtra wot ranja rozsudne 3. koło pruwowanja za dźiwadźelenje. Samo jeho pruwowanski termin su serbskeje premjery dla přesunyli. Dźeń na to bě jasne, zo je wón mjez tymi dźesać wu­zwolenymi, kotrychž tam wot 1. apryla za načasne dźiwadło wukubłuja. „Bě to cyle emocionalny wokomik, jako swoje mjeno na lisćinje wuhladach“, měni 19lětny. Zdobom je to jónkrótnosć w stawi­znach činohrajneho studija, zo dźiwadłowa šula elewu wosrjedź časa wotwabi.

Nürnberg (dpa/SN). Předewzaća Němskeje su koronakrizy dla hač do 26. apryla za 10,1 milion ludźi krótkodźěło přizjewili. Tule rekordnu ličbu je Zwjazkowa agentura za dźěło w Nürnbergu dźensa wozjewiła. Tak su tež najhórše prognozy hospodarskich fachowcow přetrjechene, kotřiž běchu z najwjace sydom milionami ličili. Ličba bjezdźěłnych w Němskej je tónle měsac na 2,644 milionow rozrostła. W Sakskej je mjeztym 520 000 dźěławych w krótkodźěle, kaž dźensa zdźělichu.

Wobmjezowanja drje podlěša

Berlin (dpa/SN). Koronakrizy dla płaćiwe wobmjezowanja socialnych kontaktow drje hač do 10. meje podlěša. Wo tym je šef kanclerskeho zarjada Helge Braun (CDU) přeswědčeny. Rozsudźić chcychu wo tym dźensa w běhu dnja na widejowej konferency kanclerki Angele Merkel (CDU) z ministerskimi prezidentami zwjazkowych krajow. Dotal płaća wobmjezowanja kontaktow hač do 3. meje.

Sakska rozsudźi wo naprawach

Prěni króć w swojich stawiznach njeje so Choćebuska zhromadźizna měšćanskich zapósłancow wčera wječor w měšćanskim domje schadźowała, ale postajenjow koronapandemije dla w měšćanskej hali. Ta bě za posedźenje ekstra spřihotowana. Na połdra­metrowski wěstotny wotstawk běchu dokładnje dźiwali. Škit za hubu a nós pak wšitcy njemějachu. Foto: Michael Helbig

Z pišćelemi na nakładnym awće je znaty organist Cameron Carpenter z USA tele dny w Berlinje po puću. Ze swojim instrumentom chce 39lětny ludźi zwjeselić, kotřiž dyrbja koronawirusa dla doma wostać. Zahajił bě swoju štyri dny trajacu turneju pod hesłom „All you need is Bach“ wčera w měšćanskim dźělu Spandau. Hač do soboty chce wón před 30 hladarnjemi a starownjemi města twórby Bacha přednjesć.

Ze smjerdźacym kokošacym hnojom chce juhošwedske studentske město Lund tomu zadźěwać, zo so dźensa wječor tysacy młodych ludźi na tradicionalnu Wałporu w měšćanskim parku zhromadźa. Korony dla dyrbi swjedźeń lětsa wupadnyć. Hewak bě so tam w tej nocy stajnje hač do 30 000 ludźi zetkało. Tónraz dominuja tam pryskawy hnoja. To pozitiwne: Trawnik budźe za to ćim rjeńši.

Drježdźany/Budyšin (SN/at). 1. meja jako dźeń dźěła budźe koronapandemije dla lětsa cyle hinaša, hač smy to zwučeni. Tež w Budyšinje, Zhorjelcu abo Běłej Wodźe je DGB Sakskeje planowane zarjadowanja dawno wotprajił. Ludowy swjedźeń, na kotryž je Lěwica we Wojerecach přeprosyła, tohorunja njebudźe.

Mejske hesło rěka lětsa „Z přistojnosću wotstawk dźeržeć – Solidarisce njejsy sam!“. Druha sada je mjeztym tajku aktualitu nabyła, kajkuž njeje nichtó předwidźeć móhł, rěka ze zwjazka sakskich dźěłarnistwow, kotryž chce w syći jutře live wusyłać, a to pod hesłom: „My tu smy. Smy mnozy. A dźeržimy hromadźe.“

„Naše žadanja na politikarjow zwura­znjamy jako DGB Sakskeje lětsa w třoch internetnych widejach a na Facebooku, kotrež budu jutře přistupne“, rozłožuje Dana Dubil, regionalna jednaćelka DGB wuchodneje Sakskeje. Někotre postajenja stata w koronakrizy njejsu po jeje słowach přemyslene dosć. Rjadowanje za krótkodźěłacych kaž tež staršiski pjenjez matej so wot zakonskich 60 resp. 67 procentow na 80 resp. 87 proc. korony dla polěpšić, sej DGB žada.