Z wudaća: štwórtk, 30 apryla 2020

Kamjenc. W mjenje Spěchowanskeho towarstwa za wopomnišćo wonkowneho lěhwa kaceta Groß Rosen, w Kamjencu-Knježim dole, namołwja čłon towarstwa Uwe Hauschild wobydlerjow, 8. meje při wopomnišćach za wopory Druheje swětoweje wójny w Lessingowym měsće kwětki połožić. Na te wašnje maja so narunać wopomnjenske zarjadowanja, kotrež tuchwilu móžne njejsu. Wobydlerjo pak měli hygieniske předpisy a wotstawk ­dodźeržeć.

Wotewru park błudźenkow

Wochozy. Ručež sakske statne knježerstwo dalše wolóženja zjawneho žiwjenja wobzamknje, chcedźa tež Wochožanski park błudźenkow přichodnu póndźelu, 4. meje, zaso wočinić. „Wobžarujemy, zo budźe park 1. meje hišće zawrjeny. Tak dyrbi naša tradicionalna předań rostlin wupadnyć“, praji zamołwita za marketing a zjawnostne dźěło spěchowanskeho towarstwa parka Anita Schwitalla. Za dodźerženje hygieniskich a wěstotnych předpisow su we Wochozach koncept zdźěłali. Tež za předań zakuskow maja wšitko spřihotowane.

Kóncej Druheje swětoweje wójny wěnuje so wosebita wustajeńca w Měšćanskim muzeju Pirna. Přehladka wěnuje so dožiwjenskim rozprawam ludźi za čas bombardowanja 1945 w měsće. Projektna nawodnica Katrin Purtak pokazuje tule eksponataj, slěbornu łžicu a zeškrěty jědźny grat, kotryž běchu po bombardowanju w korčmje našli. Dokelž je muzej koronawirusa dla zawrjeny, poka­zuja wurězki wustajeńcy a rozprawy swědkow na jeho internetnej stronje. Foto: Daniel Schäfer

Budyšin (SN). Kaž mjeztym hižo někotre razy móžeće tež njedźelu, 3. meje, zaso serbske katolske kemše digitalnje sćěhować. W 9 hodź. wusyłaja Božu mšu live na Youtube z tachantskim fararjom Witom Sćapanom. Link k tomu podawa Katolski Posoł pod www.posol.de. Štóž přistup k internetej nima, móže w samsnym času přez Serbski rozhłós na kemše słuchać. Tež ewangelskim wěriwym poskićeja wosady bohosłužby online, mjez druhim pod www.youtube.com/channel/UClH_TtFPbZLy1hkvuPpGEWQ? view_as=subscriber a pod www.kirch­ge­meinde-bluno.de. Katolscy wosadni fararjo wěriwych dale na to skedźbnjeja, zo měli lětsa mejske nyšpory sami doma abo w mjeńšich skupinkach swjećić, po­dobnje kaž jutrońčku nyšpory. Na internetnej stronje Radworskeje a Chróšćanskeje wosady podawaja namjety za wotběhi swójskich mejskich nyšporow. Zdobom dušepastyrjo wěriwym poručeja, hdyž njemóža do cyrkwje kemši hić a njemóža swjate woprawjenje přijeć, modlić so paćerjej z Wosadnika „Hdyž kemši hić njemóžeš“ a „Duchowne ­swjate woprawjenje“.

Budyšin (SN). Na lětušim wubědźowanju Spěchowanskeho kruha za serbsku ludowu kulturu wo najrjeńše jutrowne jejko je so lětsa 41 dźěći a młodostnych w starobje štyrjoch do 24 lět wobdźěliło. To je jenož jedna wosoba mjenje hač loni. Wobdźělili su so dźěći ­a młodostni z Hornjeje a Delnjeje Łužicy a samo z Hessenskeje. Cyłkownje je towarstwo zapodate kolekcije we wosom starobnych skupinach mytowało. Za to pak dyrbještej jurorce Sonja Hrjehorjowa a Mónika Ošikowa debjene jejka najprjedy ­posudźować. Dobyćerjo lětušeho wubědźowanja wo najrjeńše jutrowne jejko dźěći a młodźiny su: w starobnje skupinje (sk) 4–6 lět Helena Krügerec z Wu­dworja, w sk 7–8 lět Hanka Cyžec z Worklec, w sk 9–10 lět Felix Grimmig z Nowoslic, w sk 11–12 lět Elea Kasperec ze Židźinoho, w sk 13–14 Mathilda ­Fischer z Drježdźan, w sk 15–16 lět Vanessa Trenschel z Allendorfa nad rěku Lumda w Hessenskej, w sk 17–18 lět Ronja Alena Süßec z Wopakeje a w sk 19–24 lět ­Sophie ­Hejduškec z Bóšic. Młodźinske spěchowanske myto spožčichu Emiliji Kasperec ­ze Židźinoho. Najwjac wobdźělnikow bě jejka bosěrowało.

pjatk, 1. meje, hornjoserbsce

11:00 Powěsće, mjez druhim z alternatiwami w syći k mejestajenju

11:20 Jurij a Marja Cyžec a pólska tajna słužba

11:45 Nalětnja hudźba

12:00 Nětk meja nazeleni – wusyłanje do nalěća

delnjoserbsce

12:30 Postrow za dźěći, ludowědne wosebitosće 1. meje a zhladowanje na fararja a zběraćela ludowych pěsnjow Jana Boguchwała Markusa (1815–1880)

13:00 „Pój, wzmi sej kij!“ – hudźbne pućowanje po Łužicy

po tym hudźba tydźenja a zbožopřeća

njedźelu, 3. meje, hornjoserbsce

9:00 Boža mša z tachantskim fararjom Witom Sćapanom

11:00 Łužica tutón tydźeń

11:20 Meja měsac lubosće – pěseń lubosće w bibliji

11:45 Jakub a Matej so sadźitaj

12:00 Nabožne wusyłanje  (farar Christoph Rummel)

po tym zbožopřeća

delnjoserbsce

12:30 Postrow za dźěći a wo skutkowanju Heinzojc šwalčernje za čas koronakrizy

13:00 Tematiske wusyłanje: „Wo smjeću a smějkotanju“

13:40 Nabožne wusyłanje

 (Madlena Norbergowa)

po tym hudźba tydźenja a zbožopřeća

Serbski telewizijny magacin Wuhladko njemóže so runja wšěm druhim tuchwilnej koronakrizy wuwinyć. Tohodla tež tale tema aktualne wudaće magacina zajutřišim, sobotu, w 11.45 hodź. dominuje.

Telewiznicy wěnuja so w swojim mejskim wudaću mjez druhim jutram w Serbach, kiž wšak běchu ze znateje přičiny cyle hinaše hač zwučene. Redakcija pak njepředstaji jenož někotre kreatiwne wašnja, kak su mnozy křižerjo poselstwo zrowastanjenja přiwšěm wozjewjeli, ale zhladuje tohorunja do stawiznow lětstotki stareho nałožka. Dalša tema je, kak Serbja, kotřiž zwonka domizny skutkuja, aktualny čas korony dla dožiwjeja a kak su lětsa serbske jutry swjećili.

Informować pak chcedźa 2. meje tež wo tym, kak z naležnosću wokoło korony na serbskich šulach wobchadźeja, hdźež wučbu poněčim zaso zahajeja, pruwowanja přihotuja a tež přewjeduja. Nimo toho chce Wuhladko pokazać, zo je kreatiwnosć w Serbach wjetša dyžli prjedy, a rozprawja wo někotrych zajimawych projektach. Chceće-li wědźeć, kotre to su, zapińće zajutřišim w 11.45 hodź. tele­wizor na sćelaku MDR. SN

Turněr přestorčić abo wotprajić

Šansa, zo so 38. sokołski wolejbulowy turněr wo pokal Domowiny, kotryž bě za sobotu, 16. meje, w Radworskej „Slaviji“ planowany, tola hišće přewjedźe, chětro woteběra. Wčera su zamołwići Serbskeho Sokoła, zarjadowarja a wuhotowarja wubědźowanja, poručenje z Radworskeho gmejnskeho zarjadnistwa dóstali, zo by lěpje było turněr přestorčić abo wotprajić. Doskónčnje rozsudźić pak Sokołki a Sokoljo hišće nochcychu. Skupina Brodatych, mustwo z Drježdźan, pak so 16. meje definitiwnje njewobdźěli. Wone je dźensa wotprajiło, dokelž by na pla­nowanym terminje přemało hrajerkow a hrajerjow k dispoziciji měło.

Webinary žněja dobry wothłós

Bjez narunanja šmórnjene

Čorny Chołmc. Kóždolětny nalětni prěnjomejski swjedźeń w Čornochołmčanskim Krabatowym młynje dyrbja lětsa bjez narunanja šmórnyć. Tak njezměja tam koronawirusa dla prěni raz po lětach jutře žadyn pisany kultury program, žane reje a hudźbu kaž tež žane paslenje a zabawu za dźěći. Koronawirusa dla tam kóždolětne čaporowe wiki 2. a 3. meje tohorunja njebudu.

Prózdninski program wotprajeny

Budyšin. Muzej Budyšin je nimo lětušeje Dołheje nocy kultury w sprjewinym měsće tež swój prózdninski program wotprajił. Za meju planowanu wustajeńcu historiskich hrajnych kartow přestorča na oktober, a wosebitu wustajeńcu wotewru potom hakle klětu. Tuchwilu je drje měšćanski muzej koronakrizy dla hišće zawrjeny, nadźija pak je wulka, zo jón póndźelu, 4. meje, zaso wotewru.

Internetne seminary

Wodorunje: 3 jej dyrbimy sej tuchwilu časćišo myć, 5 wotdaloka wróćo, 6 Bóh lubosće, 7 dlěše powědančko, 10 hižo so njedopomnić, 13 stolica Azerbajdźana, 14 krajina na Balkanje, 15 zapadoafriski stat

Padorunje: 1 postrow Sportej a narodej ..., 2 islamski předspěwar, 3 spodobna, 4 nic strowy, 8 předchadnik Trumpa, 9 němska skrótšenka za wučomnika, 11 zelenina, 12 přiwuzna

Nalětnje swójbne pućowanje na Mnišonc

Zdźěćimi pućować, to je přeco tajka wěc! Štóž pućuje, ma wězo wjac wot žiwjenja, ale to tych pjerachow najprjedy raz mało zajimuje. Dyrbiš sej hižo do toho derje přemyslić, kajka ma tura być, tak zo najmłódšeho třilětneho njetrjebaš poł čary dołho na ramjenjomaj nosyć a zo so najstaršemu, hižo šulskemu dźěsću njewostudźi. Čara měła tuž wotměnjawa być a po etapach derje wuzwolena. Zajimawe přestawki – a to w nic přewulkich wotstawkach – dyrbja być. Tam hdźež spokoja so dorosćeny z ławku a rjanym wuhladom, chce dźěćo wjace zabawy.

Dźiwać měli na to, zo sej do blišeje wokoliny wulećimy. Tež hdyž Sakska Šwica wabi, mysliće na to, zo móže hodźinska jězba z awtom dosć napinaca być, hdyž jedne z dźěći snano wuspane njeje, abo hdyž so wone słuchohry dla zwadźa. Tajka jězba z awtom jako zazběh pućowanja móže ći wšón lóšt skazyć, tohodla poručam wšitko w radiusu třiceći awtowych minutow do fokusa brać.