Wo knihach a kniharni (19.11.21)
Loni je do jstwy mojeho synka nowy knižny rjad zaćahnył. Nańdźech jón w interneće, jako za darami pytach. Su to knihi młodeje awtorki z jendźelskeho Dorseta Rachel Bright. Prěnja kniha, na kotruž storčich, rěka „Law w tebi“ (2016). Na wobalce wuhladaće wulku lawjacu hłowu, na kotrejž sedźi stulena myška. Knihu mój syn lubuje, wězo wulkeho lawa dla. Law pak njeje hłowna wosoba jednanja, skerje wjerći so wšo wokoło małeje myški. W rjanych lochkich rymach wopisuje awtorka jeje dóńt. Tamne zwěrjata dźungla ju přewidźa, dokelž je tak mólička. Teptaja jej samo na wopušku, zo dyrbi sej ju zawobalić. Na wulkich ilustracijach začuwaš, kak samotna, zastróžana a zadwělowana myška je.
Mainstream a subkultura
Serbske hudźbne wideja diskusiju w syći Łužycafilm zbudźili
Hudźbne wideja wukopachu so na lětušim Choćebuskim filmowym festiwalu (CFF) jako tuchwilu najwoblubowaniši žanr młodych serbskich filmowcow: Skupina Astronawt feat. Lil Handrij zdoby sej na filmowej přehladce z paskom „Brunica“ Spěchowanske myto Załožby za serbski lud, hiphopowa trójka Nowa Doba prezentowaše widejo „Schwientek G“, Kolektiw Wakuum předstaji we wobłuku sekcije „Heimat – Domownja – Domizna“ widejo „Čert“ a Kolektiw Klanki swoju druhu widejowu produkciju „Mróčele“. Tuž bě prawy wokomik, zo so tež syć Łužycafilm na swojej dźěłarničce z tymle tworjenjom zaběra. Dobry zakład za to poda rěčnica syće Sylka Polencojc-Laubensteinowa ze Załožby za Serbski lud z derje rešeršowanym přehladom dotalnych serbskich hudźbnych widejow. A čłowjek so dźiwa – tak młody, kaž zda so žanr w Serbach hladajo na nawal nowych produkcijow w běhu minjeneho lěta (tu mamy wosebje skupina Astronawt feat. Lil Handrij z wjacorymi přinoškami wuzběhnyć) być, wón docyła njeje.
Jězba po času wobswětla 225 lět dźiwadła
Wot lěta 1796 w Budyšinje dźiwadło na stajnym jewišću hraja. Jubilej bě Němsko-Serbskemu ludowemu dźiwadłu přiležnosć, róčnicu z wulkim galaprogramom woswjećić.
Budyšin (SN/bn). Pod hesłom „Holmes a dźiwadłowy duch“ podachu so protagonisća lětušeho lětnjeho dźiwadła „Sherlock Holmes a paski Beatlesow“ na jězbu po času. Na próstwu intendanta NSLDź Lutza Hillmanna, kiž je so samoho hrał, přepytuja mišterski detektiw (Frank Schilcher), dr. Watson (Měrko Brankačk) a mrs. Hudson (Gabriele Rothmann), štó so za „hrožacej repriwatizaciju“ – kaž scenarij wujewi, njeby to prěni raz było – Budyskeho dźiwadła chowa. Za to so do stawiznow hrajerskeho wuměłstwa w měsće zanurjeja, złožujo so na „bibliju“ Michała Lorenca „Bautzener Theater Geschichten“ a na serbsce sakrowaceho „dźiwadłoweho ducha“ (Marian Bulank).
Benedikt Dyrlich w Kamjencu čitał
Jan Bartko
Štyri prapremjery łužiskich komponistow
Choćebuz (UL/SN). Łužiscy komponisća, wuznamnaj zastupjerjej hudźby 20. lětstotka a wulkomištraj Wienskeje klasiki, prezentowani wot wuběrnych wuměłcow Trio Vocalis – třeći koncert 47. Choćebuskeje hudźbneje nazymy je předwčerawšim publikum w połnje wobsadźenej Módłejskej (Madlow) cyrkwi swj. Měrćina zahorił. Dagmar Klauck na fleće, klarinetist Alexander Muhr a Bastian Brewing na fagoće předstajichu nimo divertimenta Wolfganga Amadeusa Mozarta a wariacijow titulneho motiwa opery Mozarta „Don Giovanni“ z kompozitoriskeho pjera Ludwiga van Beethovena tež prapremjerje „Capriccio a 3“ Choćebužana Franka Petzolda a „Dwaj kruchaj za drjewowych dujerjow op. 79“ Bernda Weinreicha. Łužiskaj komponistaj wobohaćataj programy hudźbneje nazymy hižo wjele lět z nadawkowymi twórbami za rozdźělne wobsadki.
Njepraktiski poskitk
Sakralne pomniki w srjedźišću
Budyšin (ML/SN). Towarstwo Cyrila a Metoda chce klětu narownej pomnikaj seniora Budyskeho tachantstwa Jakuba Skale kaž tež kapłana a spisowaćela Michała Róle na Budyskim Mikławšku wobnowić dać. To zdźěli předsydka pomnikoweho wuběrka Maćicy Serbskeje Trudla Malinkowa na wuradźowanju minjenu wutoru w Serbskim domje.
Jakub Skala (1851–1925) bě tež předsyda Maćicy Serbskeje (MS) a narodny a kulturny prócowar. Michał Róla (1841–1881) bě zdobom redaktor Katolskeho Posoła, awtor mnohich ludowědnych přinoškow a pismawjedźer MS. Wobaj duchownaj staj pódla Michała Hórnika při zapadnej rozwalinje Mikławška pochowanaj. Z wysokim narownym pomnikom byštej narownej kamjenjej Skale a Róle po wobnowjenju dostojny napohlad tworiłoj. Tohodla wuprajichu so čłonojo pomnikoweho wuběrka za podpěru projekta.
