Fotowa přehladka powěda wo žonach w Kamerunje
Korzym (SN/at). Młoda pygmejska mać je zadwělowana. Wona přisłuša etniskej mjeńšinje we wuchodnym Kamerunje, kotraž sydli w dešćowym lěsu. Dokelž tam wukrajne koncerny štomy trjebja, wuhnachu Pygmejow a zasydlichu jich blisko dróhow w pomocnych kwartěrach bjez wody, swěcy abo šulow a bjez pjenjez. W tajkej bědźe žona synka ćěši. Hnujace to foto we wustajeńcy „Kamerun z wočemi tysac žonow“, kotruž su wčera we wobłuku Łužiskeho festiwala w Korzymskej galeriji Flox wotewrěli.
Přehladka je pokłonjenje před sylnosću afriskich žonow a zarjaduje so do prócowanjow Hornjeje Łužicy wo partnerstwo z Afriku, předewšěm z jeje žonami. Widźeć su horde, njelochki wšědny dźeń zmištrowace wosobiny. Kaž iniciator prof. Matthias Theodor Vogt ze Zhorjelskeho Instituta za kulturnu infrastrukturu Sakskeje na wčerawšim wotewrjenju wuzběhny, steja Kamerunjenjo nastupajo zajim za cuzu rěč němčinu a za naš kraj w Africe na třećim městnje. Tuž měli tamnišim žonam přichileni być.
Hudźbnu chłóšćenku natoča
Z mjeńšimi formatami won na wsy
Wuměłcy Serbskeho ludoweho ansambla chcedźa so wědomje ludej přibližić a so sylnišo na serbske a dwurěčne wsy podawać, zo bychu ludźi lěpje docpěli.
Budyšin (SN/JaW). 15 premjerow a z nich štyri prapremjery planuje Serbski ludowy ansambl w nowej hrajnej dobje 2021/2022. To zdźěli nowy intendant Tomaš Kreibich-Nawka wčera w Budyšinje žurnalistam na nowinarskej konferency w bašće SLA.
„Jako nowy nawoda najprjedy chcu, zo zaso měr do domu zaćehnje. Trjebamy zawodnu klimu, w kotrejž so wšitke sobudźěłaćerki a wšitcy sobudźěłaćerjo derje čuja, štož budźe wulke wužadanje“, zwurazni Kreibich-Nawka, prašany za předstawami a wizijemi do přichoda. Te wšak wón tež ma, nochcyše pak so přejara wo swojich zaměrach wuprajić. Wšako wón hakle měsac ansambl nawjeduje. „Na kóždy pad chcu, zo so SLA zaso sylnišo ludej zbliži. Docpěć chcu to z mjeńšimi wuměłstwowymi formatami, kotrež móžemy tež na wsach pokazować. Chcemy wšak zaso bóle ludźi docpěć, kotřiž so hewak njebychu do Budyšina na předstajenje SLA podali. Skrućić chcu tak tež zwisk k stajnemu publikumej.“
Wjele wuspěcha
Film předstajeny
Praha (SN/MiR). W Praskim běrowje Swobodneho stata Sakskeje su póndźelu wječor na Małej stronje čěskeje stolicy filmowy projekt „Kak klinči domizna?“ předstajili. Čłon předsydstwa Towarstwa přećelow Serbow Ondřej Šrámek je přitomnych, mjez kotrymiž bě sakska statna ministerka za kulturu Barbara Klepsch (CDU), do Serbskeho seminara witał, rozłožejo jim historiski pozadk twarjenja kaž tež zwiski Čěskeje z Łužiskimi Serbami. Zarjadowanje wotmě so w kooperaciji z akciju „So geht sächsisch“.
Pomha rozdźělne widy na powójnske stawizny rozumić
Wosebite wudaće V Łužiskeho almanacha su njedawno po tradiciji na zarjadowanju w Kamjenskim měšćanskim dźiwadle předstajili. Wot dźensnišeho je edicija nětko w mnohich łužiskich kniharnjach na předań.
Aktualne wudaće je najnapjećišim temam němskich powójnskich stawiznow wěnowane. Titl rěka „40 lět NDR a 30 lět jednota Němskeje“. Na jedne měł přichileny čitar/měła přichilena čitarka při lekturje přeco dźiwać: Wšitke lěta Němskeje demokratiskeje republiki (NDR) su tež jako doba zymneje wójny do stawiznow zašli. Němska bě najwažniša hranica konkurowaceju swětoweju systemow. Třiceći lět jednoty Němskeje su w dopominanju Łužičanow jeno zdźěla jako wuspěšne stawizny prezentne. A to najebać inwesticije we wobjimje miliardow hriwnow/eurow. To wujasnjeja teksty najwšelakorišich swědkow časa, kaž na přikład tón Norberta Schnabela.
Kapała Nordstern je minjenu sobotu w Kulowskej sportowni ...
Dešć, błóto a wulkotna nalada
Nuknica (rze/SN). Dohromady dźewjeć hudźbnych skupin kaž tež wosebitaj hosćej-hercaj su wočiwidnje wuhłódnjeny publikum minjeny kónc tydźenja na 22. Nuckstock-openairu w Nuknicy zahorili. Po kóždym wustupje žadachu sej wopytowarjo přidawk. Najlěpši wothłós žněještaj minjeny pjatk jendźelsko-francosko-italsko-němska band Etienne Pelosoff z njewšědnej kombinaciju jazza a black metala a sobotu z Porynsko-Westfalskeje pochadźaca death metal pěstowaca kapała Evoked.
Flensburgčanaj na dźěłarničce družku zhotowiłoj
Miłoćicy (UM/SN). Na 15. mjezynarodnej rězbarskej dźěłarničce w Miłočanskej skale Při Krabatowym kamjenju, kotruž su wčera zakónčili, běštaj so mjez druhim młodaj wuměłcaj ze sewjerneje Němskeje wobdźěliłoj. Jeju twórba žněješe wosebite připóznaće.
Zadźiwanje bě wulke, jako wopytowarjo wčerawšeje finisaže rězbarskeje dźěłarnički zhonichu, zo staj Rosalie Buchtal a Julian Nogli z Flensburga. Z drjewa běštaj wona družku narězbariłoj a wukonještaj z błóckom a hamorom runje hišće poslednje dźěła na swojej twórbje, kotraž je tež w detailach chětro dokładnje zdźěłana. „To drje staj so intensiwnje z motiwom rozestajałoj. Je hnydom widźeć, što waju twórba předstaja. Wuběrne to dźěło!“ Tak a podobnje zwuraznichu mnozy wopytowarjo wuměłcomaj swoje připóznaće.
