Wojerowska Domowinska župa „Handrij Zejler“ zwoprawdźa projekt k nowoprodukciji płatu za serbsku drastu

„Židźinski serbski kwasny ćah“ rěka wolijowa mólba Halštrowskeho molerja Oty Gartena (1902–2000). Srjedź mólby su młode žony we Wojerowskej swjedźenskej drasće widźeć. Wosebje krasne čerwjeno-zelene šórcuchi ze židźaneho damasta do woči kałaja. „Kóžda drasta je jónkrótna, kóžda drasta je indiwidualna“, rozłožujetej čłonka Ćišćanskeho kulturneho towarstwa Aneta Zahrodnikowa a Wojerowska regionalna rěčnica Domowiny Sonja Hrjehorjowa wobraz we Wojerowskim domje Domowiny. Region Wojerowskeje drasty wopřiješe prěnjotnje 37 wsow wot Blunja hač do Noweho Města. Wěda wo jeje hotowanju a hladanju bu dźakowano fachowcam, kaž su to Kirsten a Werner Bejmic z Wjacsławkec domu za serbsku narodnu drastu we Wojerecach, Helmuta Kurja z Blunja a Güntera Hoffmana z Małeje Nydeje (dźensa bydli w Spalach) hač do dźensnišeho wobchowana. Ćim ćešo pak nětko je, awtentiski płat za drastu dóstać.

Dwurěčnu nowu infotaflu je město Choćebuz minjeny pjatk w Žylowje (Sielow) při tamnišim něhdyšim hrodźišću Łužičanow nastajić dało. Iniciatiwa bě wušła z dźěłoweje skupiny Serbske pomniki města Choćebuza. Zamołwita za serbske naležnosće města Ana Kosacojc-Kozelowa nawjeduje skupinu, kotrejež čłonojo buchu wot wyšeho měšćanosty powołani.

Němsce „Alte Schanze“ mjenowane, w 10. lětstotku twarjene starosłowjanske hrodźišćo je dźensa škitany zemski pomnik. Wonkowny přeměr je něhdźe 65 metrow a nutřkowny 45 metrow. Dźěle historisce wuznamneho škitnišća běchu 1897 při twarje błótowskeje železnicy zničili a 1931 twara domu dla na hrodźišću samym do dalokeje měry zrunali. Dalše škody poćerpještej pomnik a jeho wokolina přez twar garažoweho kompleksa w NDRskim času, přez wjacore swójbne domy a hospodarske twarjenja ratarstwa. W zymje wužiwachu dźěći nasyp hrodźišća za sankowanje.

Berlin (SN/CoR). Tři lěta su na njej dźěłali, nětko běža poslednje přihoty za wotewrjenje interaktiwneje pućowanskeje wustajeńcy „Was heißt hier Minderheit?“. 16. měrca chce prezidentka Němskeho zwjazkoweho sejma Bärbel Bas (SPD) přehladku digitalnje wotewrěć.

Pućowanska wustajeńca nasta w zhromadnosći mjeńšinoweje rady a zwjaz­koweje rady za delnjoněmčinu. Spě­chowało je ju zwjazkowe ministerstwo ­nutřkowneho a domiznu. Prěnja to zhromadna wustajeńca, kotraž wo štyrjoch awtochtonych mjeńšinach Němskeje – Danach, Frizach, Serbach a němskich Sintach a Romach – kaž tež wo delnjoněmčinu rěčacych informuje. Centralne prašenja su: Kajke su jich stawizny? Kak mjeńšina a wjetšina mjez sobu wob­chadźatej? A što přeja sej jeju přisłuš­nicy za přichod? Wustajeńca, kotruž je europski etnologa dr. Robert ­Lorenc ­kuratěrował, skići na rozdźělnych elementach a me­dijowych stacijach ­wjace hač 150 tematiskich přistupow k stawi­znam a přitomnosći mjenowanych skupin. Prěni dohlad do njeje dóstanješ na internetnej stronje .

Drježdźany. „Wo swobodu a demokratiju dyrbiš wojować“, wuzna předwčerawšim, njedźelu, dopołdnja Jarosław Molochnuk z hłowneho jewišća Statneho dźiwadła w Drježdźanach, prjedy hač přednjese nadarjeny pianist a komponist, rodźeny 2001 w Lwiwje, někotre swoje kompozicije – a to zhromadnje ze smyčkowym kwartetom, kotryž bě tohorunja z dosć młodymi hudźbnikami z Ukrainy wob­sadźeny.